کورد لەنامەکانی (میس بێڵ)دا ..

محەمەد حەمەساڵح تۆفیق – لەئینگلیزییەوە کردویەتی بەکوردی

میس بێڵ كێیەو ڕۆڵی چی بووە لەدروستكردنی عێراقدا؟

خاتوو گێرتروود مارگرێت لوسیان  بێڵ (14ى تەمووزى 1868 ـ  12ى تەمووزى 1926)، خانمێكی ئینگلیز بووە و نووسەر، گەڕیدە، سیاسەتمەدار، ڕۆژهەڵاتناس، شوێنەوارناس و سەر بە دەزگاى هەواڵگریى بەریتانیا بووە و كاریگەرییەكی هێجگار زۆری لە داڕشتنی نەخش و سیاسەتی ئیمپراتۆرێتی بەریتانیادا بە هۆی ئەو زانیاری و شارەزاییەوە كە لە سەر ڕۆژهەڵاتی ناوەڕاست بەدەستیهێنابوو لە میانەی گەشت و گەڕانێكی چڕ و پەیوەندیی بەرفراوانی لە وڵاتانی   میسۆپۆتامیا و شام (سوریای گەورە) و ئاسیای بچووك (توركیای ئەمرۆ) و نیمچە دوورگەی عەرەبداو بە زۆری بەوە ناسراوە كە لەگەڵ تۆماس ئێدوارد لۆرەنس (ناسراو بە لۆرەنسی عەرەب)ى هاوڕەگەز و هاوپیشەیدا یارمەتیدەری دروستكردن و دامەزراندنی مەملەكەتی هاشمی بوون لەو دوو وڵاتەی ڕۆژگاری ئەمڕۆ بە عێراق و ئوردن ناسراون. ئەم خانمە بەریتانییە، كە زیاتر بە میس بێڵ و پاشان لە بەغدا بە خاتوون ناوبانگى دەركرد لە سەروەختی داگیركردنی ئەم وڵاتەی ئێستا عێراقە و پێشتر سێ ویلایەتی ئیمپراتۆرێتی عوسمانلی بوو، لە ئاخر و ئۆخری جەنگی جیهانیی یەكەمدا لەلایەن بەریتانیاوە، لە سۆنگەی ئەو رۆڵە سەرەكییەوە كە گێڕای لە دامەزراندنی دەوڵەتی نوێی عێراقدا و بە سوود وەرگرتن لەو ئەزموونە جیاكار و دەوڵەمەندەی كە لە میانەی گەڕان و پەیوەندییەكانیدا دروستیكردبوون لەگەڵ دەمڕاست و سەرۆك هۆزەكانی ناوچە جۆراوجۆرەكانی ڕۆژهەڵاتی ناوەڕاستدا و بە تایبەتیى عەرەبەكان. ئەم خانمە لە ماوەی ژیانیدا زۆر بەرز  دەنرخێنرا و متمانەی پێدەكرا لەلایەن كاربەدەستە باڵاكانی    بەریتانیاوە و دەسەڵاتێكی زۆر بەرفراوانیان پێدابوو وەك ژنێك لەو سەردەمەدا و بەوە وەسف دەكرا كە “یەكێكە لەو كەمە نوێنەرانەی حكوومەتی خاوەن شكۆی بەریتانیا كە لەلایەن عەرەبەكانەوە بە سۆز و خۆشەویستیی یادی دەكرێتەوە”.

بێڵ لە 14ی تەمووزی 1868 لە ناوچەی دورهامی هەرێمی ئینگلاند لە بەریتانیا   لەدایكبووە و لە خێزانێكی دەوڵەمەندا گەورە بووە، كەوا كاریگەریی بەرچاوی هەبووە لە كۆمەڵـگەی ئینگلیزدا و هەر ئەم خوشگوزەرانییەش دواتر دەرفەتی گەشت و گەڕانی وڵاتانی بۆ دەستەبەر كردووە. باپیری یەكێك بووە لە سەرمایەدارە گەورەكانی وڵات و خاوەن كارگەی پیشەسازیی ئاسن بووە و لە هەمان كاتیشدا ئەندامێكی لیبراڵی پەرلەمان بووە و رۆڵی لە داڕشتنی سیاسەتی بەریتانیادا كاری كردووەتە سەر گێرتروودی كوڕەزای لە تەمەنی گەنجیدا كە بایەخ بە مەسەلە نێودەوڵەتییەكان بدات و پاشانیش مەراقی تیكەڵبوون بە سیاسەتی نێودەوڵەتی بكەوێتە سەر. سێر هیو بێڵی باوكی ماوەی چەندین ساڵ سەرۆك و كاربەدەستی گەورەی شار و ناوچەكەی خۆیان بووە و رۆڵی سیاسی و ئیداریی  كاریگەر و بەرچاوی بووە. لە تەمەنی چوار ساڵیدا دایكی بە سەر لەدایكبوونی مۆریسی برایەوە دەمرێت. لە تەمەنی حەوت ساڵیدا باوكی ژنی دووەم   دەهێنێت و ئەم خانمە باوەژنەی كە ناوی فلۆرەنس بێڵ دەبێت و وەك ژنێكی نەریتی و موحافزەكاری سەردەمی ڤیكتۆریی كۆمەڵـگەی ئینگلیزی رۆڵێكی كاریگەر لە پەروەردەی ئەم دوو منداڵەدا دەبینێ و جیایان ناكاتەوە لەو سێ منداڵەی كە لە ژیانی هاوسەریدا لە باوكی گێرتروود دەیبێت. فلۆرەنس بێڵی باوەژن نووسەری شانۆیی و چیرۆكی منداڵان بووە و بێجگە لەوەش نووسەری توێژینەوەیەك بووە لە سەر كرێكارانی كارگەكەی بێڵ و رۆڵێكی گەورەی بووە لە   پێگەیاندن و داڕشتنی بنەما رۆشنبیرییەكانی گێرتروودا و ڕەنگە هەر ئەمەش كاری كردبێتە سەر هەڵوێستی دواتری میس بێڵ لە پێشخستنی باری پەروەردە و فێركردنی ژنان لە عێراقدا.

گێرتروود خوێندنی مێژووی مۆدرێنی لە زانكۆی ئۆكسفۆرد تەواو كردووە و بە ماوەی دوو   ساڵ و بە پلەی شەرەف كۆتایی پێهێناوە و بە شێوەیەك لەڕادەبەدەر زیرەك بووە. هەرگیز لە ژیانیدا هاوسەرگیریی نەكردووە و ئەزموونێكی سۆزداریی سەرنەكەوتووی هەبووە و دوای كوژرانی دەزگیرانە ئەفسەرەكەی لە شەڕی گالیپۆڵی جەنگی جیهانیی یەكەمدا ئیتر خۆی بە تەواوی تەرخان كردووە بۆ چالاكییەكانی كە دواتر باسیان دێت.

گــەڕان و نووسینەكانی

ساڵی 1892 بێڵ سەفەرێكی ئێرانی كرد بۆ لای خاڵی، كە ئەو دەمە باڵیۆزی بەریتانیا بووە لە تاران و لە سەر ئەم گەشتەی كتێبێكی نووسیوە بە ناوی “سەفەرنامە، وێنەكانی وڵاتی فارس” كە ساڵی 1894 چاپ و بڵاوی كردووەتەوە. پاشان ماوەی دە ساڵى بە گەڕان بردە سەر لە شوێنی جیاجیای دنیادا و بە تایبەتى وەك شاخەوانێكی سەركێش لە چیاكانی سویسرادا و لەم ماوەیەشدا حەز و ئارەزووی خۆی بۆ ئاركیۆلۆجی و فێربوونی زمان پەرەپێدەدا و بە ڕەوانی  عەرەبی و فارسی و فەرەنسی و ئەڵمانی فێربوو و كەمە كەمەش بە توركی و ئیتاڵی قسەی دەكرد. لە ساڵی 1899 دا جارێكی تر گەشتی ڕۆژهەڵاتی ناوەڕاستی كردەوە و سەردانی فەلەستین و سوریای كرد و ساڵی 1900 لە گەشتێكی دوور و درێژیدا لە قودسەوە بۆ دیمەشق  شارەزایی و ئاشنایی لەگەڵ دورزییەكانی “جبل الدروز” دا پەیدا كرد.

هەروەها لە ماوەی دوانزە ساڵدا شەش جار گەشتی كردووە بۆ نیمچە دوورگەی عەرەب “سعوودیەی ئەمڕۆ” ئەم خانمە گەشتەكانی وڵاتی شام یان سوریای گەورەی هەموو تۆمار دەكرد و بە وردی لە سەر شار و شارۆچكەكانی دەدوا و وێنەی فۆتۆگرافی دەگرت وەك شارەكانی دیمەشق، ئۆرشەلیم (قودس)، بەیروت، ئەنتیوخ و ئەسكەندەروونە. پاشان هەموو ئەم باس و خواسانەی لە كتێبێكدا كۆكردووەتەوە بە ناوی “سوریا: بیایان و شارستانییەت” و ساڵی 1907 بڵاوی كردووەتەوە. باسكردنی ورد و رۆشنی ژیان لە وڵاتی شام و دوورگەی عەرەبدا دەرگای بیابانی عەرەبی بۆ جیهانی ڕۆژئاوا كردووەتەوە. لە ساڵی 1907 دا بێڵ گەشتی ئیمپراتۆرێتی عوسمانیی كردووە و لەگەڵ توێژەری بواری شوێنەوارناسی سێر ویلیەم رامسى دەستى بە كار كردووە و كنە و پشكنینیان لە شوێنەوارى “بین بیر  كڵیسە”دا   كردووە و باسێكی دوور و درێژی زنجیرەبەندی مێژووییان لە سەر بڵاوكردووەتەوە و بە ناوی “هەزار و یەك كڵیسە” هەر لە هەمان ئەو ساڵەشدا كنە و پشكنینی شوێنەوارێكی تریان لە نزیكى ئەم لە باكووری سوریا لە سەر ڕووباری فورات كردووە.

ساڵی 1909، بێڵ چووە بۆ وڵاتی میسۆپۆتامیا و سەردانی شوێنەواری شاری كەركەمیشی شارستانێتی حیسییەكانی  كردووە و نەخشەی بۆ كردووە و ئەوجا سەری لە كەلاوەكانی كۆشكی ئوخەیزەر (قصر الأخیچر) لە نزیكى كەربەلا و باسێكی وردی لە سەر نووسیوە و دواتر چووە بۆ شوێنەوارەكانی بابل و نەجەف و دیسان گەڕاوەتەوە بۆ   كەركەمیش و لەگەڵ دوو زانای شوێنەوارناسی تر كەوتە ڕاوێژ كردن، كە یەكێكیان تی. ئی. لۆرەنس بوو. گەشتەكەی ساڵی 1913ی بێڵ بە گشتی گەشتێكی پڕ لە زەحمەت بوو بۆ دوورگەی عەرەب و ئەو دووەم ژن بوو لە پاش “لەیدی ئان بڵانت” كە سەردانی حایل بكات.

لە دەمی دەستپێكردنی جەنگی جیهانیی یەكەمدا داواكاریی بێڵ بۆ پێدانی پۆست لە ڕۆژهەڵاتی ناوەڕاستدا بە شێوەیەكی سەرەتایی رەتكرایەوە و لەبری ئەوە بە خۆبەخشی كەوتە كاركردن لە خاچی سووردا لە فەرەنسا. دواتر لەلایەن دەزگای هەواڵـگریی بەریتانیاوە داوای لێكرا رێنمایی سەربازانی بكات لە بیابانەكاندا و لە ماوەی ساڵانی جەنگی جیهانیی یەكەم و تا كۆتایی ژیانی تاقە ژن بوو دەسەڵات و كاریگەریی گەورەى هەبێت لە داڕشتنی سیاسەتی كۆڵۆنیاڵیانەی بەریتانیا لە ڕۆژهەڵاتی ناوەڕاستدا و بە زۆری تیمێكی لۆكاڵی قایل و پەیدا دەكرد و ئاڕاستەی دەكردن بۆ بەجێهێنانی ئەركەكانی. ئەو لە ماوەی گەشتەكانیدا پەیوەندیی نزیكی دروست دەكرد لەگەڵ سەرۆك تیرە و هۆزەكانی ڕۆژهەڵاتی ناوەڕاستدا و سەرەڕای ئەوەش وەك ژنێك بایەخی تایبەتی دەدا بە ژن و خێزانی سەرۆك خێڵەكان.

ساڵی 1915 بانگ كرا بۆ قاهیرە و لەوێ لە نووسینگەی بەریتانی بۆ كاروباری عەرەب دامەزرا و لەوێش دیسان لەگەڵ لۆرەنس یەكیانگرتەوە، كە هەردوكیان دەرچووی ئۆكسفۆرد بوون و هەردوكیشیان بە پلەی شەرەف تەواویان كردبوو لە مێژووی نوێدا. بێڵ زمانەكانی عەرەبی و فارسی و فەرەنسی و ئەڵمانی دەزانی و لە ڕۆژهەڵاتی ناوەڕاستدا شوێنەوارناس و گەڕیدە و فۆتۆگرافەر بوو لە پێش جەنگی جیهانیی یەكەمدا. ئەمان هەردوكیان بە پێی راسپاردەی زانای شوێنەوارناس و مێژوونووس دێڤید هۆگارس لە ساڵی 1915 دا لە بارەگای هەواڵـگریی سوپا لە قاهیرە بۆ خزمەتگوزاری جەنگ دامەزران، لە بەر ئەوەی هەردوكیان لە گەشت و گەڕانی چەندین ساڵی بیابانیاندا و دروستكردنی پەیوەندی و ئاشنایی لەگەڵ هۆزە و خێڵەكاندا شارەزای بیر و بۆچوونی خەڵك و ئەو وڵاتانە بوون لە پێش جەنگی جیهانیی یەكەمدا و هۆگارس لە پسپۆرییان تێگەیشتبوو لە شوباتی ساڵی 1916 تەواوی زانیارییان دەستەبەر كرد لە سەر شوێن و ڕێگە و هەڵسوكەوتی ئەو خێڵە عەرەبانەی كە دەكرێ دەمیان چەور بكرێت و هان بدرێن بچنە پاڵ بەریتانیا لە دژی ئیمپراتۆرێتی عوسمانی و لۆرەنس ئەم زانیارییانەی لەگەڵ هەواڵـگریی بەریتانیادا بەكارهێنا بۆ هاوپەیمانی كردن لەگەڵ عەرەبەكاندا.

لە 3ی مارتی 1916 دا جەنەراڵ كڵەیتن بە پەلە بێڵی نارد بۆ بەسرە، كە هێزەكانی بەریتانیا لە نۆڤەمبەری ساڵی 1914وە گرتبوویان، وەك ڕاوێژكاری پێرسی كۆكسی گەورە ئەفسەری سیاسی، چونكە ئەم شارەزایی لە هەر كەسێكی ڕۆژئاوایی زیاتر بوو بۆ ئەو ناوچەیە. كۆكس لە بەسرە و لە بارەگاكەی خۆیدا ئۆفیسێكی بۆ كردەوە و بێڵ لەوێ نەخشەی دروست دەكرد بۆ یارمەتیدانی سوپای بەریتانی تاوەكو بە سەلامەتی بگەنە بەغدا و بوو بە تاقە ئەفسەری سیاسیی مێینە لە هێزەكانی بەریتانیا و ناونیشانی “ئەفسەری پەیوەندیی پەیامنێری قاهیرە” ی وەرگرت، (واتە بۆ بیرۆی عەرەبی كە تێیدا دامەزرابوو).

پاش ئەوەی هێزەكانی بەریتانیا لە 10ی مارتی 1917 دا بەغدایان گرت بێڵ لەلایەن كۆكسەوە بانگكرایە بەغدا و ناونیشانی “سكرتێری ڕۆژهەڵاتی” پێدرا. ئەو و كۆكس و لۆرەنس لە نێو ئەو گرووپە پسپۆڕانەی ڕۆژهەڵات بوون كەوا وینستن چەرچڵ بانگهێشتی كردن بچنە كۆنگرەی قاهیرەی ساڵی 1921 بۆ بڕیاردان لە سەر سنوورەكانی ماندێتی بەریتانیا و دەوڵەتە تازە دروستبووەكانی چەشنی عێراق.

بە درێژایی ڕۆژانی كۆنگرەكە كۆكس و لۆرەنس و بێڵ لێبڕاوانە كاریان دەكرد بۆ دروستكردن و گەڵاڵە كردنی وڵاتانی شەرقی ئوردن و عێراق تا بۆ هەردوو شازادە عەبدوڵا و فەیسەڵ بڕەخسێت ببن بە مەلیكی ئەو دوو وڵاتە، لە بەر ئەوەی كوڕانی هەڵـگیرسێنەر و رابەری شۆڕشی عەرەبی دژ بە ئیمپراتۆرێتی عوسمانی، كە حوسێن بن عەلیی شەریف و ئەمیری مەككە بوو (لە 1915 ــ 1916) دا. بێڵ تا كۆتایی ژیانی لە بەغدا و لەگەڵ دەستەی ڕاوێژكاریی كومیسیۆنی باڵای بەریتانی خزمەتی كرد لە عێراقدا، هەروەها وەك پێشتر ئاماژەم بۆ كرد لە عێراقدا بە خاتوون دەناسرا و جێمتمانەی مەلیك فەیسەڵ بوو و رۆڵێكی گەورەی بینی بۆ دەسنیشان كردنی فەیسەڵ لە نێو سەركردەكانی تری عێراقدا.

لە كۆتایی جەنگدا و لە پاش رووخانی ئیمپراتۆرێتی عوسمانی، بێڵ دەسنیشان كرا بۆ ئامادەكردنی راپۆرتێكی شیكاری لە سەر بارودۆخی میسۆپۆتامیا و ئەویش لە ماوەی دە مانگی كاركردنی سەرومڕدا راپۆرتێكی دوور و درێژی ئامادە كرد بە ناونیشانی “پێداچوونەوەی بەڕێوەبردنی مەدەنی لە میسۆپۆتامیادا review of the civil administration of mesopotamia” و بەشی كۆتاییشی بە ناوی “بڕیاردان لە حوكمی خۆبەڕێوەبردن لە میسۆپۆتامیادا” بوو. دواتر ئەم راپۆرتە شیكارییە بوو بە راپۆرتی رەسمی و سەرەكیی سیستەمی سیاسیی بەریتانیا لە عێراق. ئەرنۆڵد تالبۆت ویڵسنى بریكارى حاكمى سیاسیى بەرتانیا لە عێراق بیر و بۆچوونی جیاواز بوو لەوەی كە عێراق چۆن دەبێ بەڕێوەببرێت و وای پێباشتر بوو حكوومەتێكی عەرەبی بێت لە ژێر ڕکێفی كاربەدەستانی بەریتانیادا و خۆیان كۆنترۆڵی ڕاستەقینەیان لەدەستدابێت، یان ببەسترێت بە حكوومەتە بەریتانییەكەى هندستانەوە.

لە ئۆكتۆبەری 1920 دا پێرسی كۆكس وەك كۆمیسیارى باڵا گەڕایەوە بۆ بەغدا و داوای لە میس بێڵ كرد وەك “سكرتێری ڕۆژهەڵات” بەردەوام بێت لە كارەكەیدا و وەك فەرمانبەری پەیوەندی كار بكات لەگەڵ ئەو حكوومەتە عەرەبییەی بەڕێوەیە لە عێراقدا كار بگرێتە دەست. ڕاستێكەی بێڵ رۆڵی نێوانگری بینی لە نێوان حكوومەتی عەرەبی و كاربەدەستە بەریتانیەكاندا. هەروەها دەبوو فرە جار میانگیری بكات لە نێوان گرووپە جیاجیاكانی  عێراق و لەوانە زۆرینەیەكی دانیشتووانی شیعە لە باشوور و سوننە لە ناوەڕاست و كورد لە باكووری عێراق، كە بە هیوای سەربەخۆیی بوون. هێشتنەوەی ئەم گرووپانە بە یەكگرتووی زۆر پێویست بوو بۆ راگرتنی هاوتایی و لەنگەری سیاسی لە عێراق لەلایەك و بەرژەوەندییەكانی بەریتانیا لە لایەكی ترەوە. عێراق نەك هەر سەرچاوەیەكی بایەخداری نەوت بووە بەڵكو دەكرا وەك زۆنێكی بەربەست رۆڵ ببینێت، بە هاوكاریی كوردەكان لە باكوورەوە وەك سوپایەكی خۆڕاگر لە ناوچەكەداو پاڕاستنی لە توركیا و ئێران و سوریا. كاربەدەستانی بەریتانی لە لەندەن و بە تایبەتى چەرچڵ، زۆر گرنگییان بە بڕین یان كەمكردنەوەی خەرج و تێچووی قورس لە كۆڵۆنییەكاندا بۆ سەركوت كردن و دامركاندنەوەی شەڕی دڕندانەی خێڵەكی. پڕۆژەیەكی تری بایەخدار بۆ هەردوو لای بەریتانیا و حكومڕانە تازەكانی عێراق دروستكردنی ناسنامەیەكی نوێ بوو بۆ ئەم خەڵكە و بەو پێوەرە خۆیان بە یەك گەل پێناسە بكەن.

كاربەدەستە بەریتانییەكان هەر زوو لەو ستراتیجە تێگەیشتن كە حوكم كردنی ڕاستەوخۆیان خەرج و مەسرەفێكی زۆر گرانی دەوێت و عێراق بە خەرجی كەمتر بەڕێوەدەچێت ئەگەر وەك دەوڵەتێك خۆی حوكمی خۆی بكات. كۆنگرەی ساڵی 1921ی قاهیرە بڕیاری سیاسی و جوگرافی خۆی داوە لە سەر ئەو پێكهاتەیەی كە دواتر دەبێتە عێراق و هەروەها ڕۆژهەڵاتی ناوەڕاستی نوێ داوە. لەم گفتوگۆیانەدا گێرتروود بێڵ زانیاریی گرنگ و بەرچاوی دەدا و بەو پێیە بوو بە هۆكارێكی بنەڕەتیی دروستكردنی ئەم دەوڵەتە. لەم كۆنگرەیەدا بێڵ و لۆرانس زۆر بە گەرمی پشتگیریی فەیسەڵیان كرد وەك مەلیك دابنرێت، كە پێشتر لە سوریا كرابوو بە مەلیك بەڵام فەرەنسییەكان دەریانكردبوو. هەڵبەت هۆكاری بە مەلیك دانانی فەیسەڵ، بۆچوونی بەریتانیەكان، ئەوە بوو كە بە حوكمی ئەوەی لە بنەماڵەی هاشمییە و نەوەی پێغەمبەرە و توانایەكی دیبلۆماسیی باشی هەیە و گرووپە جۆراوجۆرەكانی وڵاتەكە ڕێزی دەگرن و هێشتنەوەی ئەم پێكهاتانە لە ژێر ڕکێفی عێراقدا پێویست بوو بۆ ئیمپراتۆرێتی بەریتانیا و لە بەرژەوەندیدا بوو كەوا هاوسەنگیی سیاسی و ئابووری رابگرێت.

بە گەیشتنی فەیسەڵ لە ساڵی 1921دا، بێڵ بوو بە ئامۆژگاریكەری لە گەلێ مەسەلەی ناوخۆییدا و لەوانە جوگرافیای نیشتەجێ و قەڵەمڕەوی تیرە و هۆزەكان و كاروباری ناوخۆ. هەروەها سەرپەرشتیی دەسنیشان كردن و دانانی كەسایەتییەكانی دەكرد بۆ كابینەی  وەزارەت و پۆستە باڵاكان لە حكوومەتی نوێدا. بە درێژایی ساڵانی بیستەكان میس بێڵ بەشێكی تەواوكەری كارگێری بوو لە عێراقدا و رژێمی پاشایەتیی هاشمی ئاڵای شەریفی مەككەیان بە رەسمی ناساند و فەیسەڵ لە 23ی ئابی 1921 دا تاجی شایى لەسەرنا.

میس بێڵ شەرەڕاى رۆڵە سیاسییەكەى ڕۆڵێكی پێشەنگیشی بوو لە گەڵاڵە كردن و دامەزراندنی كتێبخانەی گشتیدا و لە ساڵانی   1921 ــ 1924 سەرپەرشتیی كۆمیتەیەكی دەكرد بۆ ئەو مەبەستە و سەرپەرشتیی كتێبخانەیەكی تایبەتیشی دەكرد لە بەغدا بە ناوى كتێبخانەی ئاشتی كە پاشان لە ساڵی 1924 دا رادەستی وەزارەتی پەروەردە (مەعاریف) كرا و بە كتێبخانەی گشتیی بەغدا دەناسرا. هەڵبەت یەكەم خۆشەویستی ئەم خانمە شوێنەوارناسی (ئاركیۆلۆجی) بوو و هەر لە سەرەتای هاتنە بەغدایەوە و لە پاڵ ئەو هەموو جەنجاڵییە سیاسییەیدا بیری لەوە كردەوە مۆزەخانەیەكی شوێنەوار دابنێت، بە مەبەستی پاڕاستنی كولتوور و شارستانێتی وڵاتی میسۆپۆتامیا و لە  زێد و وڵاتی رەسەنی خۆیدا بیانهێڵێتەوە. هەروەها سەرپەرشتیی هەڵكۆڵین و كنە و پشكنینی شوێنەوارەكانی  دەكرد و دۆزراوە شوێنەوارییەكانی هەڵدەگرت لە بینایەكدا و دواجار لە حوزێرانی ساڵی 1926 و بە ماوەیەكی كورت پێش كۆچی دوایی بێڵ مۆزەخانەكە بە رەسمی كرایەوە و پاش مردنی و لە سەر پێشنیازی مەلیك فەیسەڵ قۆڵی ڕاستی مۆزەخانەكە بۆ یادەوەری بە ناوی ئەمەوە ناونرا و دەبێ ئیشارەت بەوەش بدەین كە فەرمانگەی شوێنەواریش هەرە لەسەر دەستی ئەم دامەزرا.

ساڵی 1925 بێڵ بۆ ماوەیەكی كورت گەڕایەوە بۆ بەریتانیا و تەماشای كرد خێزانەكەی تووشی گرفتی دارایی بووەتەوە و زۆرێك لە سەروەت و سامانی لەدەستداوە لە ئەنجامی مانگرتنی كرێكارانی بەریتانیا لە پاش جەنگی جیهانیی یەكەم و داڕمانی باری ئابووری لە ئەوروپادا. پاشان گەڕایەوە بۆ بەغدا و لێرە تووشی هەوكردنی سییەكان بوو و پاش چاكبوونەوەی هەواڵی پێگەیشت كە مۆریسى برا بچووكی بە نەخۆشیی تایفۆید (گرانەتا) مردووە.

لە 12ی تەمووزی 1926 میس بێڵ لە تەمەنى پەنجا و حەوت ساڵیدا كۆچی دوایی كرد و پێدەچێت زیاد لە پێویست حەبی خەوی قووتدابێت و نەزانرا ئاخۆ بە مەبەستی خۆكوشتن ئەو كارەی كردووە یان هەر رووداوێكی ئاسایی بووە چونكە بە كارەكەرەكەی وتبوو لە خەو هەڵیسێنێ. هەر ئەو ڕۆژە بۆ ئێوارەكەی بە ڕێوڕەسمێكی گەورە بەرەو گۆڕستانی سەربازیی بەریتانییەكان لە ناوچەی بابولشەرقیی بەغدا بەڕێیان خست بە بەشداربوونی ژمارەیەكی هێجگار زۆری خەڵك، لەوانە هاوكارانی لە كاربەدەستانی بەریتانی و مەلیكی عێراق. لەم ڕێوڕەسمەدا هێنری دۆبسی كۆمیسیاری باڵای ئەو دەمەى بەریتانیا لە عێراق وتەیەكی خوێندەوە و لە كۆتاییەكەیدا وتی “ئەو ئێستا لەو شوێنەدا راكشاوە كە خۆی دەیویست و ئەویش خاكی عێراقە”.

ڕەنگە كاریگەرترین وتە لە پاش مەرگی ئەوە بێت كە تۆماس ئێدوارد لۆرەنسی هاوڕێی لە نامەیەكدا بۆ سێر هیو بێڵی باوكی نووسیوێتی و تێیدا دەڵێ “نامەكانی ئاوێنەیەكی وردی ناخێتی. ئەو زۆر بە پەرۆش بوو، بەوپەڕی دڵـگەرمییەوە گرنگیی بە دەوروبەری خۆی و رووداوی ڕۆژانەی دەدا و هەمیشە چوست و چالاك بوو بێگوێدانە شەكەتی و ماندوێتی گرنگیی بەو كەسە دەدا كە سەردانی دەكرد. پێموانیە تا ئێستا كەسێكم بینیبێت لەو شارستانیتر بووبێت لە هەموو شتێكدا، لە هەستیدا بە هەموو هاوسۆزیی هزرییەوە .. پێموایە لە كاتی مردنیدا لەوپەڕی بەختەوەریدا بووبێت، چونكە كارە سیاسییەكەی كەوا گەورەترین كار بوو ژنێك لە ئەستۆی بگرێت، زۆر ورد بوو چەشنی كارەكەی من. ئەم دەوڵەتی عێراقەی ئەو خۆی بۆ تەرخان كرد تەلارێكی قەشەنگە، تەنانەت ئەگەر چەند ساڵێكی كەمیش بەپێوە بمێنێت”. لەیدی فلۆرەنس بێڵی باوەژنی میس بێڵ، لە دوا بڕگەی پێشەكیی بەرگی دووەمی كتێبى “نامەكانی گێرتروود بێڵ”دا، كە خۆی ئامادەی كردووە، دەنووسێت “.. با بۆ ئەو ئەجەلە نەگرین كەوا بەم خێراییە و لەم ناوەختەدا دەستی پێگەیشت.. ژیان بە حەتمی و بەبێ وەستان بەرەو خوارەوەی لێژایی گلیدەكردەوە، بەڵام مەرگ هەر لە لووتكەدا هێشتیەوە”. ماوەتەوە بڵێین كە توانا لەڕادە بەدەرەكانی ئەم خانمە و فشاری گەورەی نووسینی ئەو هەموو بەرهەمەی كتێب و نامە و نامەكاری و راپۆرتی هەواڵـگری و ڕۆژانە نووسین و گەڕان بە دوای سەرچاوەدا و كۆبوونەوە و سەردان و سەرقاڵی و راپەڕاندنی ئەركە قورسەكانی كارگێڕی و مامەڵە كردن لەگەڵ كێشە كۆتایی نەهاتووەكانی عێراقدا و گەڕانەوە سەری نەخۆشیی بۆری هەوا و سییەكان و ساڵانی زۆری جگەرە كێشان لەگەڵ دەستە و یاوەرانی ئینگلیز و عەرەبدا و سەربارى گەرمای تاقەت پڕووكێنی هاوینی بەغدا هەموو بە قورسیی لە سەر تەندروستیی كەوت و دواجار لەڕ و لاوازی كرد و نەخۆشی خست. میس بێڵ لە كۆتاییەكانى ئەم تەمەنە جەنجاڵەیدا گەلێ جار لە  نامەكانى و لە نووسینەكانى تریدا ئەوەى دووپات دەكردەوە كە “بڕوا بكەن دروستكردنى مەلیكەكان هێند ماندووى كردووم كە جارێكى تر هەرگیز دووبارەى نەكەمەوە”.

كارەكانی میس بێڵ بە تایبەتى لە پەرلەمانی بەریتانیا باس كراون و ویسامی ئیمپراتۆرێتی بەریتانیای پێبەخشراوە لە پای ئەو خزمەتە گەورەیەی بە وڵاتەكەی كردووە، بە تایبەتى لە جەنگی جیهانیی یەكەمدا و رۆڵی بەرچاوی لە جێبەجێ كردنی سیاسەتی ئەو دەمەی وڵاتەكەیدا و ئەمەش گەورەترین خەڵاتە لە بەریتانیادا. هەندێك وایدادەنین كە ئەم كێشانەی ئێستای عێراق لەو هێڵانەی سنوورەوە سەرچاوەی گرتووە كەوا كاتی خۆی بێڵ هاوكار و كاریگەر بووە لە كێشانیدا. ئەگەرچی ڕەنگە واشبێت بەڵام راپۆرتەكانی ئەم ژنە ئاماژە بەوە دەكات كەوا كێشەكان پێشبینی دەكران و بە روون و ئاشكرا دەزانرا كەوا چارەسەری هەمیشەیی نیە بۆ هێور كردنەوەی ئەو هێزانەی مایەی دووبەرەكین لە مامەڵە كردنى ئەو بەشەی جیهاندا.

میس بێڵ یەكەم ژنە لە مێژوودا كەوا تۆماری سیاسیی مێژوویی خۆی نووسیبێتەوە لە نامەكانیدا و نووسینەكانى ڕۆژانەیدا كە دواتر لە چواردە بەرگی كتێبدا بڵاوكراونەتەوە، بێجگە لە حەوت هەزار وێنە لە میانەی گەشت و گەڕانەكانیدا شایانی باشە كەوا فلۆرەنس بێڵی باوەژنی، كە لە تەمەنی حەوت ساڵی گێرتروودەوە شووی كرد بە  باوكی و رۆڵی دایكی بۆ بینی، نامەكانی بە دوو بەرگی گەورە بڵاكردووەتە بە ناوی “گێرتروود بێڵ لە نامە تایبەتییەكانیەوە” كە یەكەمیان بۆ ساڵانى 1889 ـ 1914 و دووەمیان بۆ ساڵانى  1914 ـ 1926. نامەكان سەرجەمیان 1600 نامەیە بۆ باوكى و لەیدى بێڵى باوەژنى. شایانى باسە ئەم نامانە بەشێكى زۆر بچووكیان بە لاى ژیانى تایبەتى و شەخسیدا دەچن و لە هەر نامەیەكدا چەند دێڕێكى كەمن، بەڵكو بە زۆریى راپۆرت ئاسا و باسى بارودۆخى سیاسى و كارگێڕى و ئابوورى و جۆراوجۆرن كە خۆى مامەڵەیان لەگەڵ دەكات و بڕیارى كۆتاییان لە سەر دەدات و بۆ گەلێكیان داواى ڕاوێژ لە باوكى دەكات. لەو ژمارەیەى سەرەوە 633 نامەیان لەو دەمەوە نووسیوێتى كە هاتووەتە عێراق و لە ساڵى 1916وە بۆ ساڵى 1926 كە ساڵى مردنێتى لە بەغدا. زۆربەى نامەكانى كە باسى كوردیان تێدایە دەكەونە ساڵەكانى 1921 و  1922 و 1923 وە، هەرچەندە لە پێش و پاشى ئەم ساڵانەش لەو چەشنە نامانە هەن بەڵام كەمترن. نامەكان هەندێكیان سەرومڕ باسى كورد و مەسەلەى كوردن و هەندێكیشیان هەر تەنها بە چەند بڕگە و دێڕێك باسى كوردیان تێدایە و لەمانەدا من تەنها هەر ئەو بڕگە و دێڕانەم كردووەتە كوردى و باس و خواسەكانى تریم بە پێویست نەزانیوە. هەڵبەت وەك ئەمانەتێك ڕا و بۆچوونى لە سەر كورد چۆن بووە وەك خۆى بێ دەسكارى كردن گواستوومەتەوە و بە گشتیش خراپ بووە بە تایبەتى دەرهەق بە شەخسى شێخ مەحموود و بزووتنەوەكەشى و تەواوى كۆششى خۆى تەرخان كردووە بۆ درووستكردنى دەوڵەتێكى عەرەبى لە عێراقدا وەك خۆى راشكاوانە پێى لێدەنێت چ لە نامەكانیدا و چ لە بۆنەى تردا.

ئەو بەرهەم و كتێبانەی كەوا گێرتروود بێڵ خۆی نووسیوێتی:

ــ سەفەرنامە، وێنەكانی وڵاتی فارس، 1894.

ــ هۆنراوە لە دیوانی حافزەوە، لەندەن، 1892.

ــ سوریا، بیابان و شارستانیەت، 1907.

ــ چیاكان و خزمەتكارانی خودا، 1910.

ــ لە مورادەوە بۆ موراد، 1911.

ـ كۆشك و مزگەوتی ئوخێزەر، لێكۆڵینەوەیەك لە بارەى سەرەتاكانی تەلارسازیی موحەممەدییەكانەوە، 1914.

ــ شوێنەواری هەزار و یەك كڵیسە.

ئەمە و بێجگە لە دەیان كتێب و نووسین لە سەر میس بێڵ و كارەكانی، كە لێرەدا چەند نموونەیەكی كەمی دەهێنینەوە و ئەوەی مەبەستی بێت زۆرێك لەو كتێب و سەرچاوانەی دەست دەكەوێت لە ڕێگەی ئینتەرنێتەوە.

ـ هاوێڵ، جۆرجینا، گێرتروود بێڵ: شاژنی بیابان و پێكهێنەری وڵاتان، 2006.

ــ  واڵاش، جانێت: شاژنی بیابان، 1996.

ــ ئادەمز، ئەماندا: خانمان لە مەیداندا، ژنە شوێنەوارناسەكانی بەرایی و لیكۆڵینەوە و سەركێشییان، 2010.

ــ  لوگیتز، لیۆرا: گەڕانێك بە ڕۆژهەڵاتی ناوەڕاستدا، گێرتروود بێڵ و دروستكردنی عێراقی نوێ، 2006.

ــ هۆگارس، دێڤید: پرسەنامە، گێرتروود لۆسیان بێڵ (ساڵی 1926 لە جۆرناڵی جوگرافیدا بڵاوبووەتەوە)

لێرەدا بە پێویستی دەزانم بەشێك لەو پێشەكیەی جەعفەر خەیات بگوێزمەوە بۆ وەرگێڕانی كتێبەكەی گێرتروود بێڵ بە ناوی “فصول من تاریخ العراق القریب ـ كتاب یبحپ عن العراق فی عهد الإحتلال البریگانی 1914 ـ 1920” واتە چەند بەشێك لە مێژووی نزیكی عێراق، لە بارەی عێراقەوە لە سەردەمی داگیركردنی بەرتانیادا”، كە بە عەرەبیەكەی 510 لاپەڕەیە و ئەمە هەر هەمان ئەو راپۆرتەیە كە میس بێڵ ساڵی 1920 لە ماوەی دە مانگ ئامادەی كردوە، لە سەر داوای حكوومەتی ئەو دەمەی بەریتانیا و لە ڕێگەی بریكاری حاكمی مەلەكیی عێراقەوە و پێشتر باسمان كردووە.

ئەرنۆڵد ویڵسن دەریدەخات كە میس بێڵ چەند ورد بووە لە   نووسین و ئامادە كردنی ئەم كتێبە راپۆرتەدا و كاتی خۆی پەرلەمان و حكوومەتی بەریتانیا زۆر بە بایەخەوە وەریانگرتووە و ڕاو بۆچوونی ئەم خانمەشیان زۆر بە هەند وەرگرتووە و لە گەلێ رووی دروستكردنی عێراق و تەنانەت مەسەلەی كوردیشەوە لە قسەی ئەم دەرنەچوون و هەرچەندە لە بازنەی كاربەدەستانی باڵای وەزارەتی كۆڵۆنییەكانی بەریتانیادا جیاوازیی ڕاو بۆچوون زۆر بووە، بەڵام لە مەسەلەی    ماندێت و سەربەخۆیی یان حوكمی ئەهلیی عێراقدا بە مەسەلەی كوردیشەوە هەر ڕای ئەم و لۆرانس سەركەوتووە و لەم سۆنگەیەشەوە بووە كەوا چەرچڵ بانگهێشتی هەردوكیان كردووە بۆ كۆنگرەی ساڵی 1921ی قاهیرە، لە سەر عێراق و ناوچەكە و لەوێ بە تەواوی ڕاو بۆچوونی ئەمان وەرگیراوە و هی كەسانی تری ئینگلیز دراوەتە دواوە.

جەعفەر خەیات ساڵی 1971 ئەم كتێبەی لە چاپخانەی  “دار الكتب”ی بەیروت چاپ   كردووە و ئەمەی كە ئێستا لای منە هەر ئەو چاپەیە بەڵام لەم ساڵانەدا تازە  كراوەتەوە و ساڵەكەی نەنووسراوە. پێشتریش من كتێبێكی تری وەرگێڕدراوی جەعفەر خەیاتم، لە بنكەی ژین دەستكەوت بە ناوی “العراق فی رسائل المس بیل”، واتە عێراق لە نامەكانی میس بێڵدا و لەلایەن “الموسوعە العربیە للدراسات و النشر”ی لوبنانییەوە ساڵی 2003 چاپكراوەتەوە و پێموایە چاپی یەكەمی ئەمیش هەر لە ساڵانی حەفتاكاندا بووە. بە سوپاسی بنكەی ژینەوە وەك لەو زنجیرەدا كە لە ڕۆژنامەی كوردستانی نوێدا بڵاوبووەتەوە، من چەند نامەیەكم سەبارەت بە كورد لە وەرگێڕانەكەی وەرگرت و بڵاویشم كردەوە. پاشان كە تەواوی دەقی ئینگلیزیی نامەكانی میس بێڵم دەستكەوت و كاتێ بەراوردیان دەكەم، تەماشا دەكەم بە كەیفی خۆی لێی هەڵبژاردوون و لە هەر بڕگەیەكدا كە لە سەر كورد تەرجەمەی كردووە باری نەتەوە پەرستییە عەرەبیەكەی زاڵ بووە بە سەریدا و هەر قسەیەك لە بەرژەوەندیی كوردا بووبێت ئەم قرتاندوویەتی و زۆر نائەمینانە وەریگێڕاوە و ناچار بووم جارێكی تر ڕاستی بكەمەوە، ئیتر نازانم لە نامەكانی تریشدا لە بارەی عەرەبی سوننە و  شیعە و نازانم چییەوە هەر وایكردووە یان نە و پێموایە وەرگێڕان و بە تایبەتى لە مێژوودا ئەمانەتە و من بەش بە حاڵی خۆم هەرگیز ڕێگەم بە خۆم نەداوە كاری وا  بكەم و بە لۆجیكی “ولا تقربوا الصلاە” بۆ نموونە “وأنتم سكارى”كەى ئایەتی قورئان بقرتێنم و ئەوی خۆم دەمەوێ باسی بكەم. بە هەرحاڵ هەر ئەو نیە و گەلێ نووسەر و وەرگێڕی تری عەرەب ئەم كارەیان   كردووە و مێشێكیش میوانیان نەبووە. جەعفەر خەیات لە بەشێكی وەرگێڕانی “چەند بەشێك لە مێژووی نزیكی عێراق” كە شێواندنی ناونیشانە ڕاستەقینەكەی باس و توێژینەوەكەی میس بێڵە و بەم جۆرەیە “پێداچوونەوەیەك بە بەرێوەبردنی مەدەنی لە میسۆپۆتامیادا 1914 ـ 1920″، دەڵێ “كاتێ بەریتانیای مەزن لە هاوینی ساڵی 1920 باری گرانی ماندێتی خستە ئەستۆی خۆی، یان هەر خۆی داوای كردبوو، حكوومەتی بەریتانیا لە بریكاری حاكمی مەلەكیی گشتی لە عێراق (ئەی. تی. ویڵسن) داوای كرد راپۆرتێكی دوورو درێژی بداتێ لە بارەی بارودۆخی گشتیی عێراقەوە و لەم ماوە سەختە پڕ لە رووداوەدا چی بەرپابووە، ئەمیش مەسەلەكەی خستە ئەستۆی میس بێڵی سكرتێرە بەتواناكەی خۆی و زۆر بە جوانی ئەنجامیدا لە سۆنگەی زیرەكی و توانا و ئاگابوونی تەواوی لە سەر ئەم وڵاتە و حاڵ و باری دانیشتووانی و لە ماوەی دە مانگدا راپۆرتێكی گشتگیری دانا لە دە بەشدا و ناوی نا (پێداچوونەوەیەك بە بەڕێوەبردنی مەدەنیی میسۆپۆتامیادا)، پاشان راپۆرتەكە بەرز كرایەوە بۆ دەزگا تایبەت و پەیوەندیدارەكان و (وەزارەتی هندستان) لە 3ی دیسەمبەری 1920 چاپی كرد و بە فەرمانی خاوەن شكۆ مەلیكی بەریتانیا درایە هەردوو ئەنجومەنی پەرلەمان و “فەرمانگەی پەڕاوگەی خاوەن شكۆ” ژمارە (سی. ئێم. دی 1016)ی دایە. لە نامەیەكی میس بێڵ خۆیدا (17ى كانوونى دووەمى 1921) باسی ئەوە هاتووە كەوا راپۆرتەكە بە كتێبى سپی ناونراوە و ڕۆژنامەكانی لەندەن بە ستایشێكی زۆرەوە پێشوازییان لێكردووە كاتێ كە خراوەتە بەردەمی پەرلەمانی ئینگلیزی. میس بێڵ خۆی دەڵێ كەوا حكوومەتی هندستان، كە بەرپرس بووە لە ئیدارەی مەدەنی لە عێراقدا لەو دەمەدا، داوای كردووە كە ئەم (واتە میس بێڵ) خۆی بینووسێت، نەك مستەر ویڵسنی بریكاری حاكمی مەلەكیی گشتی و ئەمیش پێی لە سەر ئەوە داگرتووە كە بە شێوازی تایبەتی خۆی بینووسێت و هەرواش كەوتەوە”.

هەروەها نووسەری ناوداری عەرەب، عەبدولڕحمان مونیف، لە پێشەكییەكیدا بۆ كتێبى “جیرترود بیل من أوراقها الشخصیة 1914 ـ 1926” تألیف: ألیزابیپ بیرغوین، ترجمة و  تعلیق و تحریر: نمیر عباس مڤفر، به ناوی “المرأە التی أنشأت دولە و نصبت ملكا”، واتە ئەو ژنەی دەوڵەتێكی دروستكرد و مەلیكێكی دانا، چاپی یەكەم 2002، دەڵێ “لە سەرەتای سەدەی بیستەمدا، دەركەوت كەوا ئیمپراتۆرێتی عوسمانی ناتوانێ چیتر بمێنێتەوە و لاوازیی بنكۆڵی كردووە و گەندەڵی هەموو شوێنێكی گرتووەتەوە و كێشە و گرفت تێیدا تەقیوەتەوە و لە هەموو لایەكەوە تەماحی تێكرابوو. هەرێمە عەرەبییەكان، كە بەشێك بوون لە ئیمپراتۆرێتی عوسمانی، لە حاڵەتی ژان و كوڵاندا بوون و لە هەوڵی بچڕینی سەربەخۆیی و ئازادیانەدا بوون لەم ئیمپراتۆرێتە پیرە و دەیانویست پشتگیریی دەوڵەتە ئەوروپاییەكان بەدەستبێنن و ئەمانیش وا خۆیان پیشاندەدا كە پشتیوانن بەڵام نیازی تریان هەبوو، لە بەر ئەوەش كە ئەو دەوڵەتانە كۆڵۆنیاڵی بوون خۆیان مەڵاس دابوو بۆیان و بۆ ئەوەش زوو كەوتنە خۆیان و لە ناو یەكدا رێككەوتن میراتی ئەم ئیمپراتۆرێتە چۆن بەش بكەن. بۆ ئەم مەبەستەش ژمارەیەكی زۆر لە پیاوەكانیان و چاوەكانیان، لە ژێر ناوی جۆراوجۆردا، ناردە هەرێمەكانى ئەم ئیمپراتۆرێتە و بە تایبەتى وڵاتانی عەرەب، كە تێیاندا بگەڕێن و لە بارودۆخیان بكۆڵنەوە و زەمینە خۆش بكەن بۆ ئەوەی بە ئاسانترین ڕێگە دەستیان بە سەردا بگرن و سامانیان ببەن و گەلانیان بندەست بخەن.

لە ناو نێردراواندا بۆ ئەم مەبەستە و هەر لە زووەوە نێردە مەسیحییە مژدەدەرەكان (مسیۆنێرەكان) و ئەوانەی بە دوای شوێنەواردا دەگەڕان و توێژەرانی زمانە    ڕۆژهەڵاتییەكان و ئەوانەی بایەخیان بە خێڵ و هۆز و پەیوەندیی كۆمەڵایەتی و كەمینەكان دەدا و ژمارەیەكی بەرچاوی ئەوانە وابەستەی بازنەكانی هەواڵـگری بوون و بە فەرمان و رێنمایی ئەوان كاریان دەكرد.

هەڵبەت لۆرەنس و فیڵبى و میس بێڵ لەو جۆرە كەسانە بوون و لۆرەنس لەو دوانەی تر ناوبانگی زیاتری پەیدا كرد و بایەخی زۆرتری درایە و زۆرتر لە سەری نووسرا. فیڵبى بە پلەی دووەم دێت و ئەمیش بە تایبەتى لە وڵاتانی دوورگەی عەرەبدا كاری گەورەی ئەنجامدا. بەڵام میس بێڵ لەو دوانەی تر كەمتر ناوی دەركرد و زیاتر لە عێراقدا ناسرا”.

هەڵبەت میس بێڵ بە حوكمی توانا و بەهرەكەی و بە حوكمی ئەو پۆستەی كە پێی سپێردرابوو بە چالاكی لە عێراقدا كەوتە كار بۆ دروستكردنی مەلیك و هەڵبژاردن و دیاریكردنی وەزیر و ئەوەی ئەو رای لێبوایە بازی بەختی بە سەرەوە دەنیشت و بەم پێیە خۆنزیك كردنەوە و بەدەستهێنانی متمانەی بوو بە ئامانجی گەلێك لە سیاسییەكان و ئەوانەی بە تەمای پۆست و دەسەڵات بوون. ئەوانەش كە ركابەرییان دەكرد ڕقی    لێهەڵـگرتن و پاشان بە هەر شێوەیەك بووە دووریدەخستەوە و ئەمەش زیاتر لە سەید تالیب نەقیب روویدا و دووریخستنەوە بۆ هندستان و تا بەردرا فەیسەڵ كرابوو بە مەلیك. بێگومان بەریتانییەكان بیریان لە سەید تالیب كردبووە كە بیكەنە مەلیك چونكە گەورەترین دەسەڵاتی بوو لە ویلایەتی بەسرەدا و لەگەڵ ئەمیش بیر لە شێخ خەزعەل ئەمیری موحەممەرە و عەبدولڕەحمانى نەقیب و هادی پاشای عومەری لە مووسڵ و عەبدولعەزیز ئیبن سعوودی حوكمڕانی نەجد و والیی پشتكۆی لوڕستان كرابووەوە، بەڵام بە پشتگیری و پێداگرتنی میس بێڵ و هێزی قەناعەت پێكردنی توانی فەیسەڵ بسەپێنێ و بۆ ئەمەش گەلێ سەرچاوەی بەریتانی خۆیان ئاماژە بە جۆرە پەیوەندییەكی سۆزداریی ئەم ژنە دەكەن لەگەڵ فەیسەڵدا و تەنانەت لە دووتوێی هەندێك لە نامەكانیشیدا پەرۆشییەكی سەیری پێوە دیارە بۆ مەلیك و خێزان و بنەماڵەكەی و دوور نیە دەزگای هەواڵـگریی بەریتانیا خۆی دەستی هەبووبێت لەم مەسەلەیەدا بۆ ملكەچ پێكردنی زیاتری فەیسەڵ و دەستەمۆ كردنی، كە لەڕاستیدا زۆر دەستەمۆ بووە و هیچ كاتێ لە ئامۆژگاری و ڕا و تەگبیری میس بێڵ دەرنەچووە، هەرچەندە مەلیك لەسەرێكی ترەوە نەتەوەپەرستێكی تەواوی عەرەب بووە و من بە دووریشی نازانم هەڵوێستی سەلبیى میس بێڵ لە بزووتنەوەكەی شێخ مەحموود و كورد پەیوەندییەكی ئەم لایەنەشی تێدا بووبێت. باشە كە حەزی بە شێخ مەحموود نەبوو و لە نامەكانیدا تانە و تەشەری زۆر خراپی دەداتە پاڵ، ئەی خۆ گەلێ سەرۆك هۆزی كورد لەو كاتەدا هەبووە لە فەیسەڵ خراپتر ئەڵقەلەگوێی میس بێڵ و سیاسەتی كۆڵۆنیاڵیی بەریتانیا بوون ئەی بۆچی بە بۆنەی ئەمانەوە لایەك لە كورد و مەسەلەی سەربەخۆییەكەی نەكرایەوە، یان ئەوەتا سیاسەتی بەریتانیا وایدەخواست كە سەروەت و سامانی ئەم كوردستانە كە لە جوغزی ویلایەتی مووسڵدا بوو و نەوت لەسەروبەندی ئەوەدا بوو بایەخێكی ئابووریی جیهانی پەیدا بكات و ململانێی سەختی دەوڵەتە كۆڵۆنیاڵییەكانیش لەو دەمەدا زیاتر لە سەر بایەخی نەوت   بوو و لەم نێوەندەدا مافی كورد و ئەرمەن و زۆرێكی تریش لە میللەتانی بندەستی دەوڵەتی عوسمانیی رووخاو پێشێل كرا.

جارێكی تریش عەبدوڕەحمان مونیف لە شوێنێكی تری ئەو پێشەكییەدا باس لەوە دەكات كەوا “دەسنیشان كردنی پیاوێكی وەك فەیسەڵ بۆ عەرشی عێراق كارێكی زۆر قورس بوو، ئەگەر نەشڵێین مەحاڵ بوو، بێ هەوڵی میس بێڵ چونكە ئەم پیاوە هەرچەند مانگێك بوو لە سوریا لەلایەن فەرەنسییەكانەوە دەركرابوو و كەسێكی غەریب بوو لەم وڵاتەدا و تەنانەت لە ناو بنەماڵەكەی خۆیشیدا ڕكابەری هەبوو و بەدەر لە كەمینەیەك لە پیاوەكانی خۆی كەس نەیدەناسی. هەڵبەت فەیسەڵ هێند لاواز بوو كە بەرگەی كۆمەڵێك كێشە و گرفتی قورسی ئەم وڵاتەی نەگرت و بەنیاز بوو واز لە دەسەڵات بێنێ و ئەم ئەركە قورسە لە كۆڵ خۆی بكاتەوە، ئەگەر میس بێڵ و ژمارەیەك لە پیاوەكانی نەبوونایە كە دەستیان دایە باڵی و سەرلەنوێ هەڵیانساندەوە. بەم ڕەنگە میس بێڵ زۆربەی كاری ڕۆژانە و تەنانەت تایبەتیشى گرتە ئەستۆی خۆی و بۆ هەموو شتێك فەیسەڵ دەگەڕایەوە بۆ ڕاو بۆچوونی ئەم و كار گەیشتە گومان و تێكەڵ و پێكەڵی لە پەیوەندیدا و میس بێڵ خۆشی باسی لە چەند حاڵەتێك دەكات كەوا فەیسەڵ بانگهێشتی دەكات بۆ باخەكەی لە خانەقین بۆ ئەوەی هەندێ كاروباری لەگەڵ باس بكات، یان چی لە ئەقڵ و دڵیدایە پێى بڵێ!”

ڕاستیەك هەیە كە دەبێ بیزانین، ئەویش ئەوەیە كەوا ئەم نامانە تۆمارێكی مێژوویی نیە بۆ سەردەمی داگیركردنی بەریتانیا و دوای ئەوەش بەڵكو مێژووی میس بێڵ خۆیەتی لەو سەردەمەدا، بەڵام بە سەرلەنوێ خوێندنەوەی نامەكان و بەراورد كردنیان بە مێژووی ئەو سەروەختەوە گەلێ ڕاستیی شاراوەمان بۆ دەردەكەوێت، چونكە نامەكان لە كەسێكی ئاساییەوە نەبووە و بۆ كەسێكی ئاساییش نەنێردراوە، بەڵكو بە كەسێكی خاوەن دەسەڵاتی بەئاگا لە هەموو  كەین و بەینێك و بۆ باوكێك كە ئەویش دەسەڵاتدارێكی سیاسی و ئابووریی كۆمەڵـگەی ئینگلیزی بووە و سەردانی عێراقی كردووە و بەشی خۆیشی خاوەن ڕاو بۆچوون بووە لە مەسەلەكاندا و بەشێكی نامەكانیش بۆ باوەژنەكەی بووە كە ئەمیش نووسەرێكی بەتوانا بووە و ژنێكی ئاسایی نەبووە و بێڵ وەك دایك مامەڵەی لەگەڵ كردووە و دوای مەرگیش ئەم باوەژنە لە دوو بەرگی گەورەدا سەرجەمی نامەكانی بڵاوكردووەتەوە.

من پێموایە، ئێمەی كورد، ئەگەر ئەم نامانەی پەیوەندیی بەو سەردەمانەوە هەیە كە بەریتانیا بە پێی بەرژەوەندییەكانی خۆی و لە ڕێگەی كاربەدەستانی باڵادەستی وەك سێر پێرسی كۆكس و ویڵسن و میس بێڵ و مێجەر سۆن و لۆرەنس و ئەدمۆنز و چەندینی ترەوە بڕیاری لە سەر چارەنووسی كورد داوە و بێ خواستی خۆی لكاندوویەتی بەم كیانەوە كە ناونرا عێراق و وەك تەوقی عەزازیل چووە ملمان، من دڵنیام بە خوێندنەوەیەكی نوێ و بەراوردكارانە بە بەڵـگە و مێژووی نووسراوی تر گەلێ پەندی بۆ ئەمڕۆمان لێوەردەگرین و بە قەولی عەرەب “ما أشبه الیوم بالبارحە” لە گەلێ سەرەوە ئێستاشمان وەك نزیكەی سەد ساڵی پێش ئەمڕۆیە و هەندێك رووداوی دەقاودەق دووبارە دەبێتەوە و ئەمڕۆ لە جیاتی ئەو ناوانەی دوێنێ تەنها ناوی تر هاتوونەتە گۆڕێ، ئەوە نەبێ ئاڵۆزى و پێچاوپێچی بەرژەوەندییە نێودەوڵەتییەكان هەندێك ئاڵۆزتر و شەیتانانەتر بوون و ئێمەش هەروەك سەردەمەكەی شێخ مەحموود و سەید تەها و سمكۆ و كێ و كێ واین و بگرە كەمێك خۆشبڕواتر بووین و نەوت و “سامانە سروشتییەكان” ئێستاش هەر پاژنەكەی ئەخیڵە و ئێستاش هەر نەفرەتی فیرعەونەكانە و ئەگەر وریا نەبینەوە بە ناخی زەویماندا دەبات و جارێكی تر هەڵسانەوەمان بۆ نیە. یان ئەوەیە ئێمەش بەشى خۆمان شەیتانمان تێدا هەڵكەوتووە و لە نێو چاوانمان كل دەفڕێنن و سەد چەمۆڵەیان داوە بە ناوشانى مافیاى رووسى و ئیتاڵیدا و هەڵبەت كەڵەكە بوونى سەرمایە نیشتمانى نیە و لە هەر كوێ قازانج و بەرژەوەندیى هەبوو كوڕى ئەو شوێنەیە و بێشك نیشتمان و نەتەوە و تەواوى بەهاكانى مرۆڤیشى دەكاتە قوربان. ئەگەر ئەو دەمە تەنها سوورەی چاوشینی ئینگلیز بڕیاری لە سەر چارەنووسمان دەدا خۆ ئێستا ناحەزی ناوخۆ و دراوسێی گورگی لە كەوڵی مەڕدا بووی زۆرمان بۆ پەیدا بووە و “موقەددەراتی” میللەتیش یارییەكی زۆر شەیتانانە و دزێوی پێدەكرێت و لە ئێستادا كەوتووەتە نێو تۆڕێكى جاڵجاڵۆكەى بێئامانەوە و دەستى مافیاى ناوخۆیى و دەرەكیى خراوەتە بین و خەریكە تەواوى خەونە رەوا و رەنگینەكانى نەتەوەیى و نیشتمانیمان لەباردەچێت.

تێـبینى: بۆ ئەم نووسینە سوود لەم سەرچاوانە وەرگیراوە.

ــ  نـامـەكـانـى میس گـێـرتـروود بـێـڵ  

 -Gertrude bell letters, miss  ــ janet wallach: desert queen, the extra ordinary life

    of gertrude bell, london, 1969.

  ــ Gertrude bell from the wikipedia.

 ــ جیرترود بیل من أوراقها الشخصیە، 1914-  1926، تألیف: إلیزابیپ بیرغوین، ترجمە: نمیر عباس مظفر، المۆسسە العربیە للدراسات والنشر، بیروت، 2002.

ــ المس غیرترود بیل: فصول من تاریخ العراق القریب 1914 ــ 1920، ترجمە: جعفر الخیاگ، مطبعة دار الكتب، بیروت، 1971.

ـ جعفر الخیاط: العراق فى رسائل المس بیل، المۆسسە العربیە للدراسات والنشر، بیروت، 2003.

ــ خلق الملوك، رسائل المس بیل لأبیها، ترجمە عبدالكریم الناصرى، جمع وتحقیق، بپینە الناصرى، بغداد، 1973.

(١)

 13ی كانوونى یەكەمى 1917

باوك و دایكی ئازیزم، تا ئێستا پۆستەم دەست نەكەوتووە و تاقە سەرچاوەی هەواڵی دنیای دەرەوەم لە ئاژانسە خراپەكەی ڕۆیتەرەوەیە. مۆڵخواردنی ئەڵمان لە بەرەی ڕۆژئاوادا جێی مەترسییە و نازانین ئەنجامی چۆن دەبێت. ئەمریكییەكان هێز و چەكێكی زۆر دێنن و تۆ بڵێی لە گشت دەریاكان بپەڕنەوە؟ ئەگەر وا بێت پاڵپشتێكی باش دەبن. لێرە جەنگ لە كۆتاییدایە بەڵام بەڕێوەبەرێتی هەر لە جێی خۆیدایە و ئێمە دۆڵی فوراتمان تا باشووری ڕۆژئاوا گرتووە و چووینەتە ئەو ناوچانەوە كە نەخشەیان بۆ نەكراوە و شتێكی ئەوتۆش لە بارەى هۆزەكانی ئەو ناوە نازانین. من لە كۆتایی مانگدا بۆ ئەو ناوچانە شۆڕ دەبمەوە. حاڵی حازر من تاوتوێی جوگرافیای حەوزی فورات دەكەم و بە پێی توانا سكێچی بۆ دەكەم، ئەمەش لەو جۆرە كارانەیە كە تا ڕادەیەك مەحاڵە لە ئۆفیسدا ئەنجام بدرێت چونكە هەموو دەم كارت پێدەبڕدرێت و بە گشتی من كتێب و نەخشەكان دەبەمە ماڵەوە و دوای نانخواردنی نیوەڕۆ كاریان لە سەر دەكەم. ڕۆژ بە فڕین دەفڕێت و هەفتەش بە پەلە دەڕوات و زۆر قورسە بیر لەوە بكەیتەوە كە ئێمە ئێستا لە نزیكەی نیوەی زستانداین. تا ئێستا ئەو بارانەی حەزی لێدەكەین نەباریوە بەڵام ئەوە هەفتەیە سەرماكەی بەدڵمانە و حەوزی ئاوی باخچەكەم ئەو دوو بەیانییە دەیبەستێ و ئەمە زۆر خۆش و جێی سەرسوڕمانە. دوێنێ بەرەبەیان چووم بۆ دەرودەشت و زۆر كەیفم بە تەزینی بەر ئەو هەوا ساردە دەهات و لە پاش سەعاتێك ئەسپ سواری دەست و قاچم سڕ بووبوو. دوای نیوەڕۆیەك چووم بۆ شوێنی پێشبڕكێی ئەسپ لە دەرەوەی شار، كەوا كاپتن لۆپتن سەرپەرشتی دەكرد. بە ڕاستى شوێنێكی خۆش بوو و لەو ناوەدا ئەسپ لە تەویلەی گەورەدا یارییان دەكرد لە ژێر دارخورمادا و كێڵـگەی گەنمە شامی و جۆ و سەوزەواتیان بە تەنیشتەوە بوو. كاپتن لوپتن ماینێكی زۆر جوان و ڕەخشنی عەرەبی پێبەخشیم بە مەرجی ڕەزامەندیی جەنەراڵ هۆڵدسوێرس، بۆ ڕۆژی دوایی ئەم پیاوەم لە سەر جادە  بینی و بە پێشنیازەكە ڕازی بوو، بەڵام بەو مەرجەی بە تەواوی ئاگام لێبێت و چاودێریی بكەم. دوێنێ دوای نیوەڕۆ سواری بووم و تەماحم خستە بەر سێر پێرسی بچێتە بەشی چاودێریی ئەسپ و داوا بكات جەنەراڵ ئەسپێكی باشی بداتێ و مەیتەرە عەرەبەكەم هۆشداریی ئەوەی دامێ كەوا ئەم ماینە ڕانەهاتووە بە عەرەبانەی ترام و ئۆتۆمبیل و جادەش پڕە لەمانە.

جەنەراڵ هۆڵدسوێرس پیاوێكی خۆش مەشرەبە و سەرەوكاریی كۆمەڵێك تەویلە دەكات كە دوو هەزار ئەسپیان تێدایە. پێم بڵێ مستەفا پاشات لەبیرە؟ ئەم پیاوە كوردێكی دەسەڵاتدار و دەسڕۆی خانەقینە لە سەر سنووری ئێران (1841 ـ 1921) و لە مانگی مایسەوە هاتووەتە ئێرە پاش ئەوەی ڕووسەكان بێ ماڵ و حاڵیان كرد كاتێ لەوێ بوون. من ساڵی 1911 لای ئەو ماومەتەوە و زۆری هاوكاریی كردم. هەفتەی پێشوو ژنەكەی گەیشتە ئێرە و ڕوخسارێكی جوان و قەشەنگی هەیە و وەك زۆربەی كوردەكان سوورو سپی و ناسكە و هاوینی رابوردووی لە چیاكان و ناو هۆز و خێڵەكاندا بەسەربردووە و پاش ئەوەی ڕووس خانەقینیان بەجێهێشت گەڕایەوە ئەوێ. من بانگهێشتم كرد بۆ ئێرە چونكە كاتێ لەوێ بووم بووبووینە هاوڕێ و باسی ئەوەی بۆ كردم كەوا چۆن هەموو چاوەڕێیان كردووین تا فڕۆكەیەكی ئینگلیز دەركەوتووە و بەمە زانیویانە ئێمە   نزیكبووینەتەوە و هـاكا لە دەست تورك و ڕووس ڕزگارمان كردن. بە هەر حاڵ ئێمە ئەوێش دەگرین، بەڵام ئەگەر ڕووس بە تەواوی لەو سنوورە نەمان، وەك چاوەڕوان دەكرێت. ئەو دەمە ڕەنگە تووشی كێشە و گرفت ببین لەگەڵ ئێراندا چونكە ئەڵمان تۆڕێك سیخوڕ و كڕێگرتەیان دروست كردووە.

سوریا شوێنێكی باش و پرشنگدارە بەڵام دەترسم تا سەر وا نەبێت. رژێمە تازەكە بە باشی بەڕێوەدەچێت و من سبەینێ لەگەڵ (س) نانی نیوەڕۆ دەخۆم و پیاوێكی خۆش مەشرەبە. لە ناو تازە دامەزراوەكاندا كوڕێكی سێر وینگەیتی تێدایە و دوێنێ نانی لەگەڵم خوارد و چیرۆكی دڵتەزێنی لە بارەى ڕووسیاوە باس دەكرد و كچێكی پرۆفیسۆر ڤینۆگرادۆڤی خواستووە و وای بۆ دەچێت تەواوی خەڵكانی چینی باڵادەست لەناوبرابێتن و كەمیان بە زیندوویی ڕزگاری بووبێت و من لام سەیرە ئەگەر ئەوە ڕاست بێت. ئاخۆ هیچ هەواڵێكی متمانە پێكراو هەیە لە بارەى ئەوەوە كەچی ڕوویداوە؟ پێدەچێت سرووشتی ئەو هەواڵانەی وەریاندەگرین بە تەواوی پشت بە بیروڕای ئەو لایەنە ببەستێت كە سەرەوكاریی وێستگەكانی بێتەل دەكات.

كچی دڵسۆزتان 

    گێرتروود 

(٢)

29ى كانوونى یەكەمى 1917

… ڕۆژى جەژنى لەدایكبوون لەگەڵ سێر پێرسى چووین بۆ ئاهەنگێكى چای خواردنەوە كە لە نەخۆشخانەى سەربازى سازدرابوو. بۆ ڕۆژى دواتر چووم بۆ نەخۆشخانەى مەدەنى كە تازە چاكمان كردبووەوە و سەردانى هەموو نەخۆشەكانم كرد بە عەرەب و جوولەكە و ئەرمەنەوە و گفتوگۆم لەگەڵ كردن، هەروەها لەگەڵ دەستە خوشكى دێرینم مەدام مستەفا پاشاى كورد، )كە دایكى سەرهەنگى خانەنشین عەزیز یامڵكییە(. ئەم خانمە پێش ماوەیەك نەشتەرگەرییەكى بۆ كرابوو، بەڵام بینیم لە سەر جێگەكەى دانیشتبوو و مێزەرێكى كوردیى بەستبوو بە سەریەوە و لە كاتى قسە كردنماندا خەریكى جگەرە كێشان بوو.

(٣)

28ى حوزێرانی 1918

…

پلانى گەشتەكەم بۆ ئێران بە تەواوى دانراوە و فەرماندەى گشتى كە بە مۆڵەت دەچووە هندستان لەو كاتەدا پێشنیازى بۆ كردم ئۆتۆمبیێلەكەى ئەو بەكاربێنم. (ئەو دەمە جەنەراڵ ولیەم مارشاڵ  فەرماندەى گشتى بوو، كە لە شوێنى جەنەرال ستانلى مۆد دانرابوو لە دواى مردنى و ئەم فەرماندەیە ساڵى 1939 كۆچى دوایى كردووە ـ و). هەروەها جەنەراڵ گیلمان هەموو ئامادەكارییەك دەكات لە پێویستییەكانى گەشتەكە وەك ئەسپ و هێستر و شتى لەم چەشنە. لە ئێستادا سەرۆكى ئاینیى یەزیدییەكان سەردانمان دەكات كە پیاوێكى خۆش مەشرەبە و هەستێكى باشمان هەیە بەرانبەرە. ئەمانە لە باكوورى مووسڵدا دەژین و زۆر پەرۆشن بچینە ناوچەكانیان و یارمەتییان بدەین لە دژى توركەكان و ئەمەش لە ئێستادا كارێكى وا ئاسان نیە. من بە هیوام بتوانین یارمەتییان بدەین و دۆستایەتیى كۆنم لەگەڵ هەندێكیان هەیە و خەڵكێكى باشن. (ئەو دەمە هێشتا مووسڵ داگیر نەكرابوو ــ و(

(٤)

30 ى ئابى 1918

ئەگەر سێر پێرسی  زستانی ئەم دواییە لێرە بوایە ئەوە دەیانتوانی كارەكان بێ من رایی بكەن، بەڵام من لەو ساتەوەی كە گەڕامەوە، كاپتن ویڵسن هەواڵێكی زۆر ناخۆشى پێڕاگەیاندم ئەویش دامەزراندنی سێر پێرسی بوو لە تاران. بەڵام لێرە نەبوونی وایلێكردم كەوا من لە سەر هەق نەبم كە لە میانەی زستانی رابوردوودا لەوێ نەبم. ئەوەش شتێكی ئازاربەخش بوو، وا نیە؟ چونكە من پاش ئەم هەموو ماوەیە بە شێوەیەك چاوەڕێم دەكرد وەك لە سەر ئاگر بم.

من كوردستانم خۆشویست بە وڵات و خەڵكەكەیەوە و زمانە فارسییەكەم بەس بوو كەوا گفتوگۆی خۆشیان لەگەڵ بكەم، چونكە فارسی وەك دەزانن تا بڵێی ئاسانە (لێرەدا مەبەستى ناوچەكانى كوردستانى ئێرانە ــ و). من لەو سێ هەفتەیەدا كە بە سواری ئەسپ بە سەرمبرد لە گەشتەكەمدا لەوە زیاتر فێر بووم ئەگەر لە ماوەی چەند مانگێكدا بە ئۆتۆمبێل بسووڕامایەتەوە لەو وڵاتەدا. بەڵام ئەمە كارێكی پڕ زەحمەت و ماندوێتی بوو، چونكە ڕێگە و بانەكان بێئەندازە خراپ بوون و كەش و هەوا هێجگار گەرم دەبوو لە نێوەڕواندا و ساتەوەختی تاقەت پڕووكێنم تووشهات لە ماندوێتی و بێزاری كەوا لە ڕۆژانە نووسینمدا باسم نەكردووە، بەڵام هەرگیز لە خەیاڵ و یادەوەریم دەرناچێ. لەگەڵ ئەوەشدا پاش گەڕانەوەم تەواوی چالاكی و ئامادەیى كاركردنم بۆ گەڕایەوە.

ئەو دوو مانگەی لە ئێران بە سەرمبرد وزەی زۆری پێبەخشیم و ئەمەش كارێكی باشە، چونكە بە شێوەیەكى گشتی ئاگاداریی كاروبار بووم و وایلێكردم شتەكان باش هەڵبسەنگێنم، بۆیە دەڵێم گەشتەكە ئەو زەحمەت و ماندووبوونەوەی دەهێنا، بێجگە لە خۆشی و كەیف و سەفاكەی.

(٥)

31 ی ئابی 1918

… وەك دەزانن سێر پێرسی ڕۆیشت بۆ تاران و منیش هزرو ئەندێشەم دابەشبووە بە سەر لەدەستدانی بـۆ جاری دووەم و خۆشحاڵیم بەوەی كەوا دواجار هەل و دەرفەت رەخسا كەوا كەسێك دەتوانێت بارودۆخی قورسی ئەوێ چارەسەر بكات، لە كاتێكدا كە سێر مارلینگ نەیتوانی ئەو كارە بكات، لە بەر هۆكاری زۆر كەوا هەمووی لە ئەنجامی هەڵەی ئەوەوە نەبوو.

رووس بە شێوەیەك كوردستانی وێران كردووە كە ناچێتە ئەقڵەوە و زستانی رابوردوو هێند كاریگەریی داگیركردنی رووسی بە سەرەوەیە كە بە ئەندازەى هەر وڵاتێكە تووشی وێرانكاریی جەنگ بووبێت. لە هەندێ شوێن پێنجیەكی دانیشتووانی لە برسا مردوون، چونكە سەرجەمی بەروبوومیان دەستی بە سەردا گیراوە و زۆربەی گوندەكانیان وێران كراوە. ئەو ناوچانەش كە ئێمە توانیومانە دەستی بە سەردا بگرین ئەوە خواردنمان داوە بە خەڵكەكەیان و ئاسایشمان بۆ گێڕاوەتەوە. لێرە هەمووان پێ لەو چاكەیە دەنێن با زمان درێژان لە تاران بۆ خۆیان بڵێن. لە كوردستان هەژار و دەوڵەمەند هەموویان بەپەرۆشن بۆ ئێمە و ئاواتەخوازن وڵاتەكەیان بەڕێوەببەین.

6

9 ی مایسی 1920  (شەخسى و نهێنى)

… ڕۆژى هەینى مستەفا پاشاى باجەڵان سەردانى كردم و زۆر لام دانیشت. ئەى. تى. ویڵسن نامەیەكى توندى بۆ ناردبوو و ئاگادارى كردبوو كە هەقى بە سەر هیچەوە نەبێت و بچێت بە لاى كارى خۆیەوە، لە بەر ئەوەى مستەفا تكاى بۆ ئەم و ئەو كردبوو، بەڵام وەڵامەكە بە تەواوى رووشكێنییەكى ناپێویست بوو. داماوە مستەفا پاشا بۆ پۆزش هێنانەوە لە ڕێگەى منەوە و دەیوت پێى بڵێ كەوا “إنكسر خاگره”، واتە خاترى نەگرتووم و شەرمەزارى لاى خەڵكى كردووم. دوێنێ ژنەكەشى هاتە لام چایەكم لەگەڵ بخواتەوە و تا دواى رەمەزان ناڕواتەوە بۆ خانەقین و هەر لە بەغدا لە ماڵى باوكى دەمێنێتەوە ئەگەر پاشا مۆڵەتى بدات. ژنێكى ژیر و ئاقڵە و دەزانێت چۆن دڵى مێردەكەى رازى بكات.

… یاداشتێكی نایابمان لە وەزارەتی جەنگەوە پێگەیشت و بۆ ئاگالێبوون نێردراوە بۆ ئێمە و وەزارەتی جەنگ و لەم یاداشتەدا سەرنجمان بۆ لای ئەو گەوجێتییە بێسنوورە رادەكێشێت كە لە مەرجەكانی ئاشتیدایە لەگەڵ توركیا. هەروەها یاداشتەكە دەسنیشانی ئەوە دەكات كەوا كێ نیشتەجێ كردنی ئەرمەن لەئەستۆ دەگرێت كە لە زەوییەكانی توركیا بۆیان تەرخان كراوە. ئێستا ئەستەمبووڵ بە تەواوی دەستەوسانە لە جێبەجێ كردنی هەر حوكمێك كە دەریدەكات، تەنانەت ئەگەر مەرجەكانیش قبووڵ بكات. ئەوجا بە چ هۆكارێك پێشنیازی پێكهێنانی حكوومەتێكی كوردیی خاوەن ئۆتۆنۆمی دەكات و وەزارەتی جەنگ رادەسپێرێت كەوا پێویست دەكات هیچ شتێك لە مەرجەكانی ئاشتیدا دانەنێت كە ئەگەری قبووڵ كردنی نەبێت، چونكە هیچكام لە ئێمە ئامادە نیە پارە و سوپای پێویست دابین بكات بۆ مەبەستێك كە ناكرێت قبووڵ بكرێت بە زەبری هێز نەبێت. لە بەر ئەوە چاوەڕوان دەكەم بانگەوازێكی نوێی ناردبێت بۆ ئەمەریكا و داوای لە ویلایەتە یەكگرتووەكان كردبێت كەوا بەرپرسیارێتیی كێشەی ئەرمینیا لە ئەستۆی خۆی بگرێت. بە هەر حاڵ ئەوان ئەمە رەتدەكەنەوە و ئەگەریش پرس بە منیش بكرێت هەر رەتیدەكەمەوە. لە هەمان كاتدا نەستوورییەكان (ئاسوورییەكان) بەنیازن بگەڕێنەوە بۆ وڵاتی خۆیان كەوا لە ژێر دەستى كوردەكاندایە و هەفتەى پێشوو شەش هەزار كەسیان لەوێ هەڵاتبوون و ئێمە لەمەشدا ناتوانین یارمەتییان بدەین. من زۆر بە ترسەوە دەڕوانمە ئەم كێشەیە و بڕوام وایە دەبوو یەكەمجار كەسانێك بنێردرایەن بۆ ڕێگە خۆشكردن و ترسی ئەوەم هەیە دەردەسەرییەكی خراپ رووبدات و ئەگەر روویشیدا ئەوا ئێمە ناتوانین ویژانی خۆمانی پێ ئاسوودە بكەین. من پێموایە ئەم بزووتنەوەیە خراپ دەورووژێت بە هۆی ئەوەی كە مەرجەكانی ئاشتی هەستی موسڵمانانی ئەنەدۆڵ دەورووژێنێت و دەبێتە هۆی كوشتوبڕێكی گشتی بۆ مەسیحییەكان. پێویستە وەك كۆمێنتێك ئەوە بڵێم كە ئێمە دەتوانین لە ئەستەمبووڵدا هەر شتێك بمانەوێ بیكەین بەڵام ناتوانین لە ناوەڕاستی ئاسیای بچووكدا هیچ شتێك بكەین.

7

2 ی ئابى 1920

… دوێنێ دواینیوەڕۆ دوو كاتژمێرم بە مشتومڕ و گفتوگۆ بردەسەر لەگەڵ حەمدی بەگی باباندا  سەبارەت بە دامەزراندن و چێكردنی دام و دەزگا ئۆتۆمییەكان لە باشووری كوردستاندا و هیوای خواست بە ئاكام بگات و بابەتەكەم خستە ناو یاداشتێكی دوورو درێژەوە بۆ ئەی. تی. ویڵسن ئەم بەیانییە. من ئومێدی هەموو چاكە و سەركەوتنێك دەخوازم بۆ حەمدی بەگ بەڵام گومانم هەیە ئەم لەو پیاوانە بێت كە بتوانێت دەرەقەتی ئەم ئەركە  بێت و ئەگەر بتوانێت ئەوە بۆ ئێمە لەبار و گونجاو دەبێت و ئەی. تی. ویڵسنیش هەر ڕای وابوو.

8

5ی ئەیلوولی 1920

دایكی ئازیزم، بە ڕاستى گەرما تەواو شەكەت و ماندووی كردووم و وا هەست دەكەم ئەم مانگی ئەیلوولەم لێناڕوات. چەند ڕۆژێكی ئەم هەفتەیە گڕەیەكی پیس هەڵیكردبوو بەڵام ئێستا كەمێك باشترە و تا دەی سەرلەبەیانی پێویستمان بە پانكە نیە، بەڵام لە دوای نیوەڕۆدا پانكە ببێت و نەبێت پلەی گەرما لە سەدی فەهرنهایت نزیك دەبێتەوە. ئەم نامەیەی من وەڵامی نامەكەی 28ی تەمووزی تۆیە (بە هەمان شێوە ئەوەی باوكیشم)، چونكە تۆ لە سەر تێبینییەكانی من قسەت كردووە لە بارەى سڵێمان فەیزییەوە. ئەو لەو جۆرە پیاوانەیە كە شت قورس دەگرێت و زەحمەتە لێی تێبگەیت و ئەو یەكێكە لە جێگرانی جارانی كۆمیتەكەی سەید تالیب. تۆ وا دەزانی لە هەوڵی چارەسەرێكی بەجێدایە، نەخێر وانیە و لە پاش ئەو مشتومڕە بە ماوەیەكی كەم بە دزە خۆی گەیاندەوە بەسرە و لەگەڵ پیاوماقووڵانی ئەوێدا هەوڵ و تەقەلایەكی زۆری دا بۆ بەرپا كردنی ڕاپەڕینێكی چالاك و پێیوتوون كەوا شوورەییە بۆیان كە نادەنە پاڵ بەغدا. پێموایە دەیەوێ لەگەڵ ئەحمەد پاشاى سەنادا حیزبێك دروست بكات ئەگەر ئەمیان بە قسەی بكات. بەشێكی مشتومڕەكەی لە سەر ئەوە بوو كەوا من و سێر ئێدگار بە توندی بەرهەڵستیی كۆمیتەكەیانین. كاتێ كلكی خستە ناوگەڵی و بە دەستی بەتاڵ گەڕایەوە بۆ بەغدا ناردمە شوێنی و پێموت هەموو شتێكم بیستووە و لەمەدا سوپاسی ئەحمەد پاشا دەكەم.

هەروەها بیروڕای خۆمم لە بارەیانەوە بۆ ڕوونكردنەوە، كەچی  سووك و ئاسان كەوتە درۆ كردن و نكووڵیی لە هەموو شتێك دەكرد و بەردەوامیشە لە سەر ئەوپەڕی هەوڵدانی بۆ ناكۆكی نانەوە. باشە دەبێ چۆن لەگەڵ ئەو جۆرە پیاوانەدا هەڵسوكەوت بكەیت؟ ئایا دەكرێ ڕێزیان لێبگیرێت؟ من ئەو ڕۆژە گفتوگۆیەكی خۆشم لەگەڵ نەقیبدا هەبوو، وابزانم پێشموتی. نەقیب وتی: “تا چەند باشە بۆ تۆ ئەگەر من لە ڕەمەزاندا چوومە سەر مینبەر و بە خەڵكم وت كەوا مەولوود و زكریان بۆ مەبەستی سیاسیی پێچەوانەی ئیسلامە؟ من كاریگەریم تا سنووری هندستانیش بڕ دەكات و مەسەلەكە وا دەكەوێتە كە من كافرم و ئینگلیز كڕیومی. باشە ئەمە یارمەتی من یان تۆ دەدات؟ تۆ دەزانی من بە تەواوی مەیلم بە لای ئێوەوەیە، بەڵام ئەگەر بە كافر لە قەڵەم درام پێتوایە چیتر كەڵكم بۆتان دەبێت لە ناو ئیسلامدا؟”. هەڵبەت ئەم پرسیارە وەڵامی نیە تا ئەو كاتەی ئەقڵییەتی موسڵمانەكان دەگۆڕێت و ئەمەش كاتی دەوێ.

جەنگ لێكەوتە و دەرەنجامى خۆی هەیە و كۆسپ و ئاستەنگیش بەردەوامن. من بەهیوام ئەم هەفتەیە ئیمتیازى هێڵی ئاسنی ئێران بەدەستبێنین. وا ئەفسەرێكی ترمان لەدەستچوو، كە جێگری حاكمی سیاسیی كفری بوو، من ئەم ئەفسەرەم نەدەناسی و لەلایەن خێڵەكانەوە دەستبەسەر كرابوو و بە دیلیی كوشتبوویان، وەك بزانم . ئەمە چیرۆكێكی ڕاچڵەكێنە بەڵام كە خەڵكی كێوى شەڕ دەكەن كاری دڕندانە ئەنجامدەدەن و كەس ناتوانێ لەم چەرخ و زەمانەدا بەر لە دڕندەیی ئەمانە بگرێت. ئێمە دەنگوباسی ئەم جۆرە كوشتنانە هەر دەبیستین ئەگەر بێت و هەندێك دەستكراوەیی بۆ سەربازە ئاساییەكانمان نەڕەخسێنین و وابزانم ئەمە ڕای ئەی. تی. ویڵسنیشە . بە گشتی من لە ڕووى بەراوردەوە ئەم دۆخە بە ئێرلاند دەشوبهێنم و كێشەكە لە پاشەڕۆژدایە چونكە خێڵەكان نایانەوێ ببنە بەشێك لە دەوڵەتێكی یەكگرتوو، شارەكانیش بێ ئەمە بەڕێوە ناچن. كەواتە چۆن پشتگیریی توخمەكانی جێگیربوون بكەین و بیانپارێزین و لە هەمان كاتیشدا بیگونجێنین لەگەڵ باری ئابووریی وڵاتەكەدا چونكە حكوومەتێكی سێنتراڵت نابێ ئەگەر كەس باج نەدات و زۆرینەی دانیشتووان نەیانەوێت باج بدەن و ناتوانن كاروباری بازرگانی ڕایی بكەن؟ كارەكە بەو جۆرەش ناڕوات كەوا  لۆرەنس لە سەر كاغەز نووسیوێتی. قسە كردن لە سەر پێكهێنانی دوو فیرقە لە سوپایەكی عەرەبی بە تەواوی بێمانایە، چونكە بێجگە ئەفسەران چ كەرەستەیەكی ترمان نیە و سوپایەك تەنها لە ئەفسەر پێكهاتبێت هیچ سوودێكی نیە. ئێمە بە شێوەیەكی بچڕبچڕ لەشكرێكمان لە كرێكاران دروستكرد و ژمارەی گەیشتە نزیكەی بیست هەزار و وا ئێستا من بە سەر بیر و بۆچوونەكانمدا دەچمەوە. لەشكری كرێكاران شەست هەزار كەسێك دەبن و من باسی ئەوەم كرد كەوا لە ماوەی نزیكەی دوو ساڵدا بیست هەزار پیاومان دەستكەوتووە بێ سەربازگرتنی زۆرەملێ بەڵام ناتوانی بیانكەیتە سوپایەك تۆكمە لە ماوەی كەمتر لە پێنج ساڵدا. هەموو كەس دەزانێ كە لێرە بارگرانیی لە سەر كۆمەڵـگەی كشتوكاڵی لەڕادە   بەدەرە و لە هەندێ وەزری ساڵدا پێداویستیی كشتوكاڵ زیاد دەكات وەك پەین كردنی دارخورما و دروێنەی مەرەزە و جۆ و شتی لەم جۆرە كە پیاوی زۆری دەوێ و كەواتە ئەم دوو فیرقەیەت لە كوێ پەیدا كرد؟ ڕەنگە بتوانی دوو لیوا پێكەوە بنێی و تەنانەت ئێستا سێ هەزار لێڤی  یان زیاترمان پێكەوەناوە و لە حیللە كاری باش دەكەن. بەڵام من تا ڕادەیەك دڵنیام لەوەی كە وەختێكی زۆری دەوێ پیاوی تەواو لەم وڵاتەدا پەیدا بكرێت بۆ دەستەبەر كردنی یاسا و نیزام. توركیا توركی بەدەستەوەیە و ناتوانن یاسا و نیزام بچەسپێنن و لەگەڵ ئەوەشدا سەربازگیریی زۆرەملێیان هەیە و من بەگومانم لەوەی حكوومەتێكی عەرەبی بتوانێ سەربازگیریی زۆرەملێ بسەپێنێ. من ناتوانم بیر لەوە بكەمەوە كەوا بۆچی ئۆفیسەكانی هندستان ڕێگە بەم خراپی و گەندەڵییە دەدەن و سوورییەكان لەمەدا خراپیان كرد. با جارێكى تر بێینەوە لای تی. ئی. لۆرەنس كاتێ كە دەڵێ ئێمە بە زۆر زمانی ئینگلیزیمان بە سەر خەڵكی وڵاتەكەدا سەپاندووە تەنها هەر درۆ ناكات بەڵكو زۆر باش دەزانێ ئەوە درۆیە و لێرە ورد و درشتی كاروباری ڕەسمی هەر بە زمانى عەرەبییە و لە قوتابخانە، دادگا، نەخۆشخانە زمانی تر بەكار ناهێنرێت و ئەمە یەكەمجارە شتى وا ڕووبدات لە سەردەمی ڕووخانی عەباسییەكانەوە.

دوێنێ ئێوارە لەگەڵ سەید تالیب ئێوارەخوانێك كۆیكردینەوە بە ئامادەبوونی جەنەراڵ هەمبرۆ، ئەیڵمەر، كاپتن كڵەیتن، ئەی. تی. (ویڵسن)، سێر ئێدگار و مستەر بۆڵارد و ئاهەنگێكی خۆش نەبوو بەڵام وابزانم سەید تالیب پێیخۆش بوو. ئەی. تی. خراپ نەخۆش كەوتبوو و من تەواو دڵم پێ دەسووتا و ئاگام لێبوو، من هەمیشە سەرنەكەوتووم لە پەیوەندیدا و لێی تێناگەم و سەرسام بووم بەوەی دڵی هەر لای میسۆپۆتامیا بوو. ڕاستە ئێمە بە تەواوی دەناڵێنین بە دەست بارودۆخێكەوە كەوا كۆنترۆڵی ناكەین بەڵام دۆخی هەڵوەشاوی ناسیۆنالیزمى عەرەبى لە سوریادا و هەمان دۆخی ئیسلام لە توركیادا بە تەواوی بۆ ئێمەی سەلماندووە كە پێویستە دووربین بین و نامانبەخشێ لەوەی كە كوێر بین لە ئاستیدا.

9

5ی كانوونى یەكەمی 1920

… دوێنێ دواینێوەڕۆ بە سواری چووم بۆ كازمێن (كازمییە) بۆ بینینی خانمە شازادەیەكی تەمەنداری ئێران، كە نازناوی بانوو عوزمایە و كچی ناسرەدین شایە. حەمید خان (ئامۆزایەكی ئاغا خانە و یاریدەدەرێكی سیاسیی كەمبایەخی ئەم خانمەیە). لە نەجەف لە دەروازەی شارەكە بینیمی و بردمی بۆ ماڵی ئەم خانمە. حەمید خان ئینگلیزییەكی باش دەزانێت و ناوبەناو ئەگەر هەڵەیەكی بكردایە بە قۆشمەیی دایدەپۆشێ. بانوو عوزما خانوویەكی لە نەجەف كڕیبوو بەو ئومێدەی پاش مردنی لێرە بنێژرێت. ئەو بە سەردان هاتبوو بۆ كازمێن و لێرە خانوویەكی بچووكی بە كرێ گرتبوو. لەوێ بینیم لە هۆدەیەكی بچووكدا بوو كە بە سەر حەوشەكەدا دەكرایەوە و لە ناوەوە فەرشی تێدا راخرابوو و پەردەش بە پەنجەرەكانەوە بۆ گلدانەوەی سەرما و لەولاشەوە مەقەڵییەكی خەڵووز و تووتییەك لە قەفەزێكدا ناو ماڵەكەی تەواو كردبوو. خانم لە سەر دۆشەكێك كە بە سەر فەرشی ناو هۆدەكەدا راخرابوو پاڵكەوتبوو و بە لێفەیەكی خوری داپۆشرابوو. سەرتاپا جل و بەرگی لە چەناگەیەوە بۆ پەنجەی پێی قەڵاخیی رەش بوو. ئەوەی كە بە دەرەوە بوو دەست و دەم و چاوی و جووتێ چاوی زل لە پشت چاویلكەكەیەوە و ئەوە دەگەیەنێت كەوا لە ڕۆژگاری خۆیدا زۆر جوان بووبێت و ژنە قاجار بەناوبانگ بوون بە بەژن و روخساری جوانیان. خانمی شازادە بە فارسییەكی ناسك و خۆش و لەسەرخۆ قسەی دەكرد، شیرین و نەرم چەشنی سێبەری دەنگێكی سەرسوڕهێن و پێی وتم كەوا میسۆپۆتامیا چەند نەفرەتی و دۆزەخ ئاسایە پاش ئەوەی باخ و باخاتە خۆشەكەی ئەسفەهانی بەجێهێشتبوو چۆن خەریكە لە گەرما دەپڕووكێ. پاشان لە بارەى ئەو پلانەیەوە قسەمان كرد سەبارەت بە دروستكردن و بەخشینی نەخۆشخانەیەك لە نەجەف و هەروەها لە بارەی كوڕە خراپەكانیەوە كە دەیانەوێت مڵك و ماڵی داگیر بكەن. ئەم خانمە ژنێكی ئازا و دلێرە و دژ بە پیاوانی خزمی خۆی وەستاوەتەوە و بە رووپۆشی و بە دەگمەن دەچێتە ناو نەجەفەوە و پێیوتم كە زۆر هەست بە تەنیایی دەكات و داوای لێكردم سەردانی بكەمەوە و بەدڵنیاییەوە منیش جێبەجێی دەكەم. ئەو لە ئێستادا بە دەست رۆماتیزمەوە گرفتارە و دەیەوێت بچێتە نەخۆشخانە مەدەنییەكەمان و بەهیوام ئەم كارەی بۆ ئاسان بكەم چونكە ئەم خانمە شازادە بە تەمەنانەی قاجار كەوا ناوە ناوە و بە زۆریش بۆ زیارەت دەردەكەون بە شێوەیەكی نائاسایی خۆش مەشرەبن و ئەمانە خانمگەلێكی زۆر   گەورە و میهرەبانن، بەڵام من لە ڕادەبەدەر بانوو عوزمام خۆشدەوێت و پێموایە هەرگیز كەسێكی خۆوڵاتیی جیاكاری گەورەی وەك ئەم خانمە بەساڵاچووە ئێرانییەم نەبینیوە كە لە سەر ئەرز راكشابێت.

كاپتن كڵەیتن و مێجەر موڕەی و من لەگەڵ ماڵی مستەر تۆددا ئێوارە خوانێكمان رێكخست بۆ بینینی ساسۆن ئەفەندی و جەعفەر پاشا و لە ڕاستیدا ئێوارەیەكی زۆر خۆش بوو. لەوێ كەوتینە قسە كردن لە بارەى توركیاوە و من سەبارەت بە ئەنوەر لە ساسۆنم پرسی و ئەویش بە سەركردەیەكی سەبازیی بلیمەت وەسفی كرد كە زۆر ئازا و چاونەترسە بەڵام لە ڕووی رۆشنبیرییەوە كزە و بایەخێكی ئەوتۆی نیە؟ هەروەها وتیشی ئەو بڕوای وابوو كە ئەڵمانیا لە جەنگدا دەیباتەوە و هەر لەو سۆنگەیەشەوە بوو كە توركیای لە جەنگەوە گلاند و تا سێپتەمبەری 1918ش كە بە ئاشكرا روونبووەوە ئێمە براوەین ئەو هەر قەناعەتی وابوو ئەڵمانیا سەركەوتوو دەبێت.

من باس و خواسێكی دوور و درێژم لەگەڵ جەعفەر كرد لە بارەى سوپای نیشتمانییەوە و ئەو ڕای وابوو كە هیچ شتێك ناكرێت بێ پلان و بەرنامەیەكی بە سەربازگرتنی زۆرەملێ لە پیاوانی شارەكان و لای ئەم پیاوانی خێڵ و هۆزەكان هیچ بایەخێكی نابێت بۆ هێزە نیزامییەكان.

10

12ی كانوونى یەكەمى 1920

… مستەر گاربێتی داماو بە فڕۆكە ویستی بچێت بۆ كەركووك بۆ بەشداربوون لە كۆنفرانسێكدا بەڵام فڕۆكەكەیان لای تاوق (داقوق) تێكشكا و ئەم بە برینداری گەیەنراوەتە نەخۆشخانە لە كەركووك و قۆڵێك و دوو پەراسووی شكاوە و بیستوومانە كەو نیشانەی نەخۆشیی سنگ و سییەكانی لێدەركەوتووە و دەترسم پەراسووە شكاوەكانی چەقیبێتە سییەكانی. لە رووداوەكەدا فڕۆكەوانەكە مردووە و بە ڕاستى ئەمە كێشەیەكی ناخۆشە و ئەوان ویستوویانە بە ناچاری بنیشنەوە و خۆیان كێشاوە بە تەپۆڵكەیەكدا. ئەمە یەكەم فڕینی مستەر گاربێت  بووە و پێموایە بەسەرهاتە بێماناكەی ئەی. تی. ویڵسنم بۆ نەگێڕاونەتەوە كاتێ كە بە فڕۆكە چووە بۆ هەولێر و مووسڵ لە مانگی سێپتەمبەردا و هەر كە ئەوێی بەجێهێشتووە كەوتووەتە ناوجەرگەی ئەو خێڵ و هۆزانەی لە یاخیبووندان و فڕۆكەكەی تێكچووە و ئەگەر   بهاتایە و بە ناچاری بنیشتایەتەوە ئەوە بە مسۆگەری خێڵەكان دەیانكوشت. ئەو رێك لەو كاتەدا كە (كەركووك یان هەولێری بەجێهێشتووە) لە بنكەی فەرماندەییەوە برووسكەیەكی پێگەیشتووە بە دەقی ئەم وشانە “ئەگەر كۆمیسیاری مەدەنی بەردەوام بێت لە ڕۆیشتن بۆ مووسڵ كارێكی باش دەكات ئەگەر بۆمبێك بە سەر باتاسدا بەربداتەوە”،  بێگومان باتاس لەو كاتەدا بە تەواوی لە حاڵەتی یاخیبووندا بوو و هەڵبەت ئەوەش جۆرێك بوو لە خۆشبەختی كەوا ویڵسن بەرهەڵستیی جێبەجێكردنی نەكرد بەڵام داڕشتنی وشەكانی برووسكەكە وەك بێمێشكییەكی ناوازە ئازاریدام.

11

22 ى كانوونى دووەمى 1921

… لەم ڕۆژانە بانگهێشتێكی نانخواردنی ئێوارەم ساز كرد كەوا بەشداربووان تێیدا كاپتن كوك لە وەزارەتی ئەوقاف و شاكر بەگ كە دەسنیشان كراوە بـــۆ پۆستی قــــایمقامی دەڵتاوە (خاڵس  ـ و) و یوسف بەگی ژنبرای كە لە وەزارەتی پەروەردەەیە. شاكر بەگ كۆڵۆنێڵێكی پێشووی توركیایە و هەرچەندە عەرەبێكی بەغدادییە بەڵام لە تایپی ڕاستەقینەی توركە و چووەتەوە سەر هوون (واتە خێڵە تۆرانییەكانی ناوەڕاستی ئاسیا ــ  و). ئەو دەڵێ كەوا هۆزەكانی دیالە تەنها پێویستیان بە ئیدارەدانێكی توندوتۆڵە و لەمەدا ڕاست دەكات و پاش مانگێك دوان لە دەستبەكاربوونی خۆی دەزانێت چۆن هێوریان دەكاتەوە و لە شوێنی خۆیان دادەنیشن. ئەم پیاوە هەمیشە مەیلی بە لای ماندێتی بەریتانیاوەیە و بەشدار نەبوو لە ئاژاوەگێڕییەكەی هاویندا كەچى لەگەڵ ئەوەشدا دەسەڵاتدارانی ئینگلیز بە گومانێكی زۆرەوە چاودێرییان دەكرد و پێموایە ئەوەش هەڵە بوو. ئەو دەزانێ كەوا زۆر كەس پلە و پایەى باشیان بووە لە سەردەمی توركدا و رایشی وایە كەوا هیچ حكوومەتێكی عەرەبی ناتوانێت لە سەر پێی خۆی بوەستێت ئەگەر هێزی بەریتانیا پشتیوانیی نەكات. ڕەنگە یوسف بەگ نەتەوە خوازێكی بەپەرۆش و دڵسۆز بێت و لێی پرسیم ئاخۆ دڵنیام لەوەی كەوا تورك نەیانویستووە سەربەخۆیی بدەنە عەرەب، منیش پێموت زۆر دڵنیام كە نەیانویستووە و ئەگەر گەرەكیشیان بووایە نەیاندەتوانی لە بەر ئەوەى  پارە و هێزی پێویستیان نەبوو بۆ ئەو مەسەلەیە. ئەم مشتومڕە ئەوەی دەگەیاند كەوا ئەو پێ لەوە دەنێت كە توركەكان لە ماوەی سێ ساڵدا زۆر نەگۆڕاون و هەروەك خۆیان دەمێننەوە. من زۆر ژنەكەی شاكر بەگم خۆشدەوێ كە خوشكی یوسف بەگە و هەر كاتێ چوون بۆ دەڵتاوە سەردانیان دەكەم.

ئێوارەی دواتر بانگهێشتی چەند كەسێكی ترم كرد بۆ نانی شێوان، لەوانە مستەر موور، كە پەیامنێری ڕۆژنامەی تایمزە لە تاران و هاتووەتە ئێرە بۆ نووسینی چەند بابەتێك لە سەر میسۆپۆتامیا و پیاوێكی چاك و زیرەكە، هەروەها مێجەر لۆنگریك لە كەركووك و مستەر هێكس گاوەر كە یەكێك لە ستافەكانی كۆڵۆنێڵ ناڵدەرە لە مووسڵ. مێجەر لۆنگریك كە من پێموایە یەكێكە لە بەتواناترین پیاوە گەنجەكانمان و كوردەكانی زۆر بەدڵ بوو. ئەو پێیوابوو كەوا كوردەكانی سنوورى میسۆپۆتامیامان بە تەواوی خواستی خۆیانەوە دێنە ژێر ڕکێفی حكوومەتی عەرەبی ئەگەر بە شێوەیەكی گونجاو مامەڵەیان لەگەڵ بكرێت و من دەزانم كۆڵۆنێڵ ناڵدەریش هەر وا بیر دەكاتەوە. سلێمانی كێشە و گرفتێكی قورسە بۆمان و پێموایە بە تایبەتى لە بەر ئەوەی مێجەر سۆنی  حاكمی سیاسی هەموو بیر و بۆچوونێكی دامەزراوە لۆكاڵییەكانی ڕەتكردووەتەوە و لەوە تێناگات كەوا ئیدارەی بەریتانی دەبێ هەر كۆتایی پێبێت.

 ئێمە دەبێ شێوەیەك لە شێوەكانی حكوومەتی كوردی لۆكاڵیمان هەبێت كەوا باشترە پەیوەندیی بە میسۆپۆتامیاوە ببێت بۆ بەرژەوەندیی هەموو لایەكی پەیوەندیدار و تاقە ئەڵتەرناتیڤیش بۆ ئەم دۆخە ئەوەیە كە بچینە دەرەوە و مەسەلەكە هەر بە پشێوی و ئاڵۆزی بهێڵینەوە. بەڵام بیر و باوەڕەكانی ئەی. تی. ویڵسن دەكرێ كاڵ بێتەوە و بگۆڕێت كەچی مێجەر سۆن هەرگیز كۆڵ لە ئایدیا و باوەڕی خۆی   نادات و خۆشبەختانە وا بۆ مانگێك دوان مۆڵەت وەردرەگرێت و مێجەر لۆنگریك بە تەواوی بەرپرسیارێتی لە ئەستۆ دەگرێت و هاوكار دەبێت لەگەڵمان.

12

13 ى شوباتى 1921

باوكی ئازیزم، وا خەریكم وەڵامی نامەكەت دەدەمەوە كە لە 12ی كانوونی دووەم بۆت   ناردم و خۆزگەم دەخواست كە لە موحازەرەكەتدا بەشدار بوومایە، دەستخۆش و خوا سەلامەتت بكات. من دڵنیام كە زۆر خۆش بووە و بە كارتەكەدا دیارە كە بە شێوەیەكی سەرسامكەر هەمەلایەنە بووە. من كە ئەم نامە  دوور و درێژانەت بۆ دەنووسم چونكە تاقە شێوەی ڕۆژانە نووسینەكانمە كە بیپارێزم و نامەوێ كۆپیی لێبپارێزیت تەنها یەك دوو ڕۆژ نەبێت كە ڕەنگە بمەوێت و كێ دەزانێت؟

ئەم هەفتەیە بە شێوەیەكی بەرچاو سەرنجڕاكێش بوو كە تێیدا بیست كەس لە دوورخراوەكان گەڕانەوە كەوا ئەی. تی. ویڵسن ناردبوونی بۆ هەنجام و یەك لەوانە سەید ئەحمەد داودی سەرۆكی ئاژاوەگێڕانی بەغدا بوو كەوا وڵاتی بە سەر یەكدا تێكدابوو. هەڵبەت سڵێمانی كوڕیشی لەگەڵ تاقمێك ئاژاوەگێڕی تردا گیران و ئەمانە نووسەر و هەواخوای ڕۆژنامەی ئیستیقلال بوون كەوا هەفتەی رابردوو كورتەیەكیم لەبارەوە بۆ ناردیت. قەدەغە كردنی ڕۆژنامەكە بۆ ماوەیەك بوو بە مایەی مشتومڕ بەڵام مەسەلەكەی سپاردە وەزارەتی ناوخۆ و دواجار سەید تالیب  بوێریی خۆی كۆكردەوە و كارەكەی جێبەجێ   كرد و ئەمەش كارێكی شكۆمەندانە بوو لەلایەن ئەوەوە و پێدەچێت بە تەواوی تێیدا سەركەوتوو بێت. من هیچێكی وام نەبیستووە هەندێ دەربڕین و گوزارشتی فریاكەوتن نەبێت لەملاولاوە، بە تایبەتى قەناعەت هێنانی دوو عالمی بەتەمەنی نەجەف و هەندێ شێخ و سەیدی دیوانییە لە بارەی یاخیبوونی ئێستای دژ بە ئێمە و لێرەش تكاكارن لە سێر پێرسى بۆ بەردەوامی پێدانی بەڕێوەبەرێتیی بەریتانیا! ئەوەی ئەوان دەیڵێن گوایە بەغدا پێشتر فێڵی لێكردوون و بۆیە ئەوان سزایان وەرگرتووە و ئێستا دەڵێن خوا شایەتە كە بەغدا دەیەوێت دیسان هەمان گەمە بكاتەوە. هەڵبەت ئەمەش دانپیانانێكی ناوخۆیی سەیرە كەوا بەم ئاسانییە و بۆ دووەمجار فێڵیان لێكراوە. حكوومەتەكەی ئێستا هێشتا دەستی بە سەر لیواكاندا ناڕوات بەڵام پێموایە لێرە (واتە بەغدا ـ و) جێگەی خۆی  كردووەتەوە و ئەم دۆخەش تا ڕادەیەك وایلێكردووین كە سوپاسی سەید تالیب بكەین و چاوەڕوانی و بۆچوونەكانی باشترن و دیارە زۆر باش گەمەكە دەكات، بەڵام هێشتا هەر قەناعەتم پێ نیە.

… بەڵام من گومانم لەوە هەیە كەوا ئێمە كاتمان هەبێت بۆ پەیڕەویكردنی ئامۆژگارییەكانی عیززەت پاشا و لێگەڕێین شتەكان رێچكەی خۆیان بگرن بۆ چەند مانگێك و كۆنگرەی پاریس ڕەنگە دەرفەتێك بداتە ئیمارەتی میسۆپۆتامیا بۆ توركیا یان بە نەخێر بشكێتەوە. لە كۆبوونەوەی نێوان سێر پێرسى، وینستن (چەرچڵ) و ئەللێنبى و سەمۆییڵ لە سەرەتای مارتدا، ئەوە بەدڵنیاییەوە سێر پێرسى دەیەوێت من لەگەڵ خۆی ببات و منیش ئامادەییم دەربڕی بەڵام دەبێ ئەوەش بڵێم كە زۆر هەست بە دڵەڕاوكێ دەكەم لە بەجێهێشتنى وڵات بۆ چارەنووسی خۆی لە غیابی سێر پێرسیدا و قەناعەتم وایە كە باشترە من لێرە بمێنمەوە تا ئەو ئاستەی كە هەر كەسێك هەر شتێك بكات بۆ لە چوارچێوە گرتنی رای گشتی ئەوە من باوەڕم وایە كە من یەك لەو كەسانە بم ئەو كارە دەكەن و ڕەنگە ئەگەری ئەوەش هەبێت كە من هەڵە بم. هەروەها دەیویست ساسۆنیش لەگەڵ خۆی ببات و وایبۆدەچم ئەمە زیرەكییەكی تەواوە و ئەمەش یارمەتیی سێر پێرسى دەدات كە هەستی حكوومەتێكی عەرەبیی ڕاستەقینە بداتە كۆنگرەكە و حكوومەتەكەش وا هەست بكات كە لە سەر زەمینەیەكی پتەو وەستاوە. من زۆر جار لە پێشبینییەكانم بە هەڵەدا دەچم بەڵام لەمەدا باوەڕم وایە كە ئەگەر ماندێت رەتبكەینەوە ئەوە  هاتوهاوار و غەڵبەغەڵب لە وڵاتدا بەرز دەبێتەوە و تكامان لێدەكەن كە قبووڵی بكەین. من گومانم هەیە كە فەرەنسییەكان هەر خەریكی فــڕوفێڵە ئاساییە قێزەونەكانیانن و عیززەت پاشا ئاگاداری كردوومەتەوە كە بە دڵنیاییەو فەرەنسییەكان خەریكی دنەدان و هاندانی كوردەكانن كەوا لەگەڵ عێراقدا نەڕۆن بەڵكو داوای ماندێتی فەرنسییەكان بكەن! لە ئێستادا كــــوردێكی پیرە ساڵ لە پاریسە و ناوی شەریف پاشایە  و لە ڕێگەی ئەمەوە فەرەنسییەكان هەوڵی خۆیان دەدەن وەك عیززەت باسی دەكات. مەسەلەیەكی گەرمی تر لە ئارادایە كە ئەویش لێبووردنی گشتییە و من دڵنیام كەوا كاتی هاتووە، یان زۆر نزیكبووەتەوە و پێویستە دەستپێشخەریی تێدا بكەین. ئەمە لە لایەن دەسەڵاتدارە سەربازییەكانەوە بە توندی بەرهەڵستیی دەكرێت و حاڵی حازر سێر ئەیڵمەر  ناڕەزایی دەردەبڕێت لە سەر گێڕانەوەی دوورخراوەكانی لە پێشەوە باسم كردن. من پێموانیە سێر ئەیڵمەر رای تایبەتی خۆی هەبێت چونكە هیچ كاتێك نیەتی بەڵام هەندێ لە ستافەكەی دەیخەنە سەر ئەو ڕا و بۆچوونە. ئەوان لەوە تێناگەن كە حكوومەتێكی عەرەبی هیچ كات رازیی نیە بە سەپاندنی سزا لە سەر یاخیبووانی دژ بە كارگێڕیی سەربازیی بەریتانی. ئێستا من دەمەوێ سەربڵندیی ئەوەمان پێببڕێت كەوا خۆمان ئەو هەنگاوە بنێین و ڕێگە نەدەین عەرەبەكان فشارمان بخەنە سەر بۆ ئەو كارە و ئێمە هەرگیز شتەكان لە كات و ساتی خۆیاندا ناكەین و سێر پێرسى زۆر بە رەقی بڕیاریداوە كە بیروبۆچوونە ڕاستەكان ئەنجام بدات. بەم ڕەنگە ئەگەر من كارەكە چێبكەم پێموایە ئەو رازی بێت لە سەری. ئەم ئێوارەیە جەعفەر پاشا و كاپتن كڵەیتن لای من نانى شێوان دەخۆن و ئەم مەسەلەیان لەگەڵ باس دەكەم.

13

29ى مایسى 1921

… هەوڵەكانی ئەم هەفتەیەكمان بە شێوەیەكی سەرەكی    ئێرانە و كەوتنی سەید زیائەدین ئێران دەخاتە نێو مەنجەڵێكی كوڵاوەوە و دەترسم زۆر بە توندی بتەقێتەوە. قەوزاقەكانی رەزا خان لێی هەڵـگەڕاونەتەوە و رەزا خان خۆیشی سەربازێكی نەزان و نەخوێندەوارە و زۆر نەگونجاوە بۆ بەڕێوەبردن و پەرۆشی دامەزراندنی دكتاتۆرێتێكە. هەر كە هێزەكانمان لەوێ كشانەوە هێزی كاریگەری وڵات كەوتە دەستی و شای ئاگادار كردووەتەوە كەوا سەید زیا دەستی لەگەڵ بەلشەفیكەكاندا تێكەڵ كردووە بۆ رووخاندنی ئەم و پشتگیریی لە پاشماوەكانیان دەكات. بەڵام ڕاستێكەی ئەو ئێرانی وا لێدەكرد كە خاكێكی بەپیت نەبێت بۆ بەلشەفیزم بە بنكۆڵ كردن و لابردنی ئەو زەمینەیەی بەلشەفیزمی لە سەر وەستابوو. بە پێچەوانەوە وەزیرە تازەكە پشتی رەزا خانی دەگرت چونكە وای بڵاو دەكردەوە كە سەید زیا لە نزیكەوە بووبووە داردەستی ڕاوێژكارە سەربازی و داراییە بەریتانییەكان. هەرچەندە هێشتا زووە بۆ پێشبینی كردن بەڵام پێدەچێت ئەم كوودەتایە وا بكات لە باكووری ئێران كە جارێكی تر بكەوێتەوە ژێر دەسەڵاتی رووسیا  ـ  واتە رووسیای نوێ كە سیاسەتی دەرەوەی زۆر نەگۆڕاوە لەگەڵ رژێمی پێشوو. ئەوان ڕەنگە وڵاتەكە بكەنە بەلشەفیك، لە حاڵەتی تێكچوونی شیرازەی حوكم و ئاژاوە و پشێویدا و هـــۆزە گەورە و دەسەڵاتدارەكان هەرچییان دەست بكەوێت لە شارەكاندا بیفڕێنن و بیخەنە ژێر رەحمەتی خۆیانەوە، یان بە شێوازی كۆن ئێران لاواز بكەن، بەڵام سەید زیا هەوڵی دەدا لەو دۆخە بیپارێزێت.

سبەینێ لێبووردنی گشتییەكە دەردەكەوێت، سوپاس بۆ خوا و ئەمە دەستی ناسیۆنالیستەكانمان دەكاتەوە بۆ كاركردن. بە ڕاستی گوتارەكەی مستەر چەرچڵ بۆ پەرلەمان روونكردنەوەیەكی ئیزافی بوو، چونكە دەبێ شتێك بڵێ لە بارەى ئەوەوە كە فەیسەڵ كاندیدێكی پەسەندە لای خاوەن شكۆ (مەلیكى بەریتانیا ـ و) كە بە فراوانی رەچاوی ئەوە دەكرێت وەك زۆرترین پەسەندكراو. ئەم هەفتەیە گرژییەكی سووك روویدا لە سەر پێكهێنانی سوپای عەرەبی و كۆڵۆنێڵ جۆیس پڕۆژەیەكی خستە بەردەمی ئەنجومەنی وەزیران بۆ ناردنی لایەنەكانی ئەفسەرە دامەزراوەكانی عەرەب و لەگەڵ نەیاریی سەلبى بەرامبەر دەوەستنەوە.

ئەنجومەنیش، كە ڕەنگە جەعفەر تێیدا تاكە ناسیۆنالیستى دەركەوتوو بێت، زۆر ئەنجومەنیش كە ڕەنگە جەعفەر تێیدا تاكە كەسى ناسیۆنالیستی دەركەوتوو بێت، زۆر بە دڵنیاییەوە هەست بەوە دەكەن كەوا سوپا دەبێتە لانكەی ناسیۆنالیزم و ئەفسەرە دامەزراوەكانیش پرۆپاگەندەی نەتەوەیی لە وڵاتدا بڵاو دەكەنەوە. بەم پێیە ئەنجومەن بەرهەڵستیی خۆی راگەیاند و مەسەلەكەی دواخست و پاساوی ئەوە بوو كە لە ئێستادا هێزی لێڤی بەسە و بە رەخنە گرتنى توند لە ئەفسەرە عێراقییەكان كۆتاییان پێهێنا كەوا خزمەتی سوریایان كردووە. بۆ بەیانیی ڕۆژی دواتر عەبدولمەجید شاوی هاتە لام و لە بارەی مەسەلەكەوە چۆن كەوتەوە لەگەڵم دوا و داوای ڕاوێژی لێكردم كە چۆن دەنگ بدات كاتێ كە گفتوگۆ دوادەخەنەوە. بۆ ئێوارە كۆڵۆنێل جۆیسم بینی و سبەی بەیانیش بە ڕێكەوت نەقیبم بینی و مەسەلەی سوپای خستە بەر باس و وتی كەوا لەوە دەترسێ ئەوەی لە سوریا روویدا لێرەش دووبارە بێتەوە، كەوا توندوتیژیی سەربازی حكوومەتێكی نیشتمانیی رووخاند و ڕەنگە هەمان ئەو كەسانە لێرەش ئەكتیڤ بن. منیش وتم هاوتەریبییەك لە مەسەلەكەدا نیە، چونكە لە سوریا ئەوان شەڕیان لەگەڵ دەسەڵاتی ماندێتدا دەكرد و لای ئێمە كارەكە بەو جۆرە نیە.

… من نیازم وایە لە كۆتایی هەفتەدا بۆ ماوەی چەند ڕۆژێك بچم بۆ سلێمانی و دوو شەویش لە كەركووك بمێنمەوە و بە ئۆتۆمبێل بڕۆم. سلێمانی لە ڕاپرسیدا ئەوەی رەتكردەوە كە بێنە ژێر دەسەڵاتی حكوومەتی عەرەبی و حاڵی حازر بەرەو ئەوە دەڕوات كە ببێتە ناوچەیەكی بچووكی كوردی و ڕاستەوخۆ لەلایەن سێر پێرسییەوە بەرێوە ببرێت. ئێمە بەهیواین لە دواجاردا بێتەوە ناو عێراق بەڵام كارێكی باش نیە ئەگەر مەسەلەكە زەبری هێزی تێبكەوێت. دانیشتووانی ئێرە سەرلەبەر كوردن و دەڵێن كەوا نایانەوێت ببنە بەشێك لە دەوڵەتێكی عەرەبیدا. من هەرگیز نەچووم بۆ ئەوێ و بەتەماین هەواڵی مامەڵەی چاك ببیستین لە فەرمانگەی كۆمیسیۆنی باڵاوە.

14

5 ى حوزێرانى 1921

… ئێمە لە كاتێكی زۆر دژوارداین. ئێران گومانێكی زۆری بۆ دروست كردووین بەڵام جارێ هەر بە خامۆشی ماوەتەوە. ئەو پیاوەی خراوەتە جێگەی سەید زیائەدین، واتە قەوامولسەڵتەنە ــ كەسێكی بەتوانایە وەك سێر پێرسى دەڵێ و نوێنەرایەتی ئەرستۆكراتە لیبراڵەكان دەكات، بەڵام ئاخۆ هیچ ئەرستۆكراتێك هێند لیبراڵە كەوا دژ بە بەلشەفیزم بوەستێتەوە، ئەوە من گومانم هەیە. ئارمیتاج سمیس ماوەیەكە كاری خۆی راگرتووە بەڵام من لاموایە ئەمە شووم و چارە ڕەشییە و كۆڵۆنێڵ هادڵستۆنی ڕاوێژكاری سەربازیی بلیمەت باس لە ڕێگا چارەیەك دەكات. ئەگەر سمیس بڕیاریدا بڕوات من هیواخوازم كاروباری لێڤی بەڕێوەببات لە شوێنی ئایرنساید.

سەید زیا ئێستا لێرەیە و (واتە بەغدا ـ و) بە ڕێگەوەیە بەرەو هندستان و پاشان بەریتانیا. پێدەچێت بەریتانیا ببێتە داڵدەدەری نەتەوەخوازە لە كارخراوەكانـ یەكەمجار فەیسەڵ و دواتر سەید زیا! هەڵبەت ئەمەش شتێكی سەیر و سەمەرەیە، كاتێ كە بیری لێدەكەیتەوە كەوا زوڵم و ستەمی ئیمپریالی وەك بەلشەفیكەكان لە سەرانسەری ئاسیادا ناویان زڕاندووە، دەبێ لە ژێر باڵی خۆیدا نیشتمانپەروەرە لەكارخراوەكان كۆبكاتەوە. سەید زیا پیاوێكی زۆر خۆش مەشرەبە و جارێكیان لە نێوەڕۆخوانێكدا لە تاران لەگەڵ خانەوادەی كۆكسدا    كۆبووەوە و بۆ سەبەینێش لەگەڵ مندا بۆ بینینی جەعفەر و ئاشنایی پەیداكردن لەگەڵی و من و ئەو پێكەوە بە فارسی و فەرەنسی قسەمان دەكرد. ئەو هۆكاری رووخاندنی خۆی كە تەواوی دەگێڕێتەوە بۆ پیلانگێڕیی شا چونكە لە پڕۆژەكانی چاكسازیی كۆمەڵایەتیی ئەم دەترسا و بڕیاری دابوو بیگۆڕێت. من ناخوازم ئێران بكەوێتە ناو ئاژاوە و پشێوییەكی بەلشەفیكانەوە، بەڵام ئەوە مایەی پێكەنینمە كە ببینم شا ئاوها نوقمی بووە.

… پێموایە ئاگادارم كردوویتەوە كە لە ئەنقەرەدا پەڕگرەكان دەستێكی باڵایان پەیدا كردووە كە لە دیدو بۆچوونی ئێمەوە ئەوە دەگەیەنێت كە ئاژاوەگێڕیی توركیا بەردەوام بێت لە ناوچە سنوورییەكانی باكوورماندا. دوا رووداو ئەوەیە كەوا ئەفسەرێكی تورك لەگەڵ 13 كەسدا لە رەواندزدا بینراون، كە شارۆچكەیەكی كوردنشینە لە چیاكانی ڕۆژئاوای مووسڵدا و بەشێكی زۆری دانیشتووانی ئەم شارۆچكەیە بەم دواییە عەرزەوحاڵێكیان بۆ ناردووین و داوا دەكەن بخرێنە سەر عێراق و لە ژێر ماندێتی ئێمەدا بن. بەڵام دەركەوتن و پەیدابوونی ئەم دەستە و تاقمە ترس و لەرزی خستووەتە هەموو ناوچە سنوورییەكانی كوردنشینەوە كە چاوەڕوانن ئاخۆ ژمارەی زیادی تری تورك دێنە ئەم ناوە و دەبێ ئینگلیزەكان چیبكەن. وەك خۆشت دەزانیت ئێمە هێزێكی سەربازیی وامان نیە بۆ بەرگری كردن لەم سنوورانە دژ بە دەسدرێژیی تورك و گریمانەش لە قاهیرە ئەوەیە كە ئێمە لەگەڵ توركیادا لە حاڵەتی ئاشتیداین.

15

14 ى ئابى 1921

باوكی ئازیزم، ریفراندۆمەكە تەواو بووە و ئێمە تەنها چاوەڕێی دوا ئیمزای ئەنجامەكان دەكەین بۆ ئەوەی لە لیواكانەوە بگات و پاشان فەیسەڵ وەك مەلیك رادەگەیەنرێت بێ دواكەوتن. هەڵبژاردنەكە بە كۆی دەنگ ئەویان دیاری كردووە بەڵام لە ژمارەیەكی هێجگار زۆری دەنگەكاندا كە دەتوانم بڵێم زیاد لە نیوەی وڵاتە ـ خەڵكەكە لای خۆیانەوە مەرجێكیان داناوە و دەڵێن هەتا ئەو كاتەی ئەم مەلیكە پەیوەندیی دۆستانەی لەگەڵ حكوومەتی بەریتانیادا دەپارێزێ ئێمە قبووڵمانە یان تا ئەو كاتەی كە لە ژێر پارێزگاریی بەریتانیادا دەنێن. داڕشتنی ئەم ئیزافەیە لای هەر یەكە و بە جۆرێكە بەڵام هەموویان لە سەر هەمان شت كۆكن و تاقە بواردنێكیش لەم مەسەلەیەدا كەركووكە. وەك خۆت دەزانی لەوێ خەڵكی عەرەبیان ناوێ و لە ناو توركەكاندا پرۆپاگەندەیەكی زۆری داتاشین بە لای توركیادا هەیە. دوو گەڕەكی شاری كەركووك داوای فەرماندارێكی توركیان كردووە و كوردەكان دژی ئینگلیز نین بەڵام حكوومەتێكی كوردیی سەربەخۆیان دەوێ لە ژێر سایە و پارێزگاریی ئێمەدا و ئەمەی ئەوان گەرەكیانە نە خۆیان و نە كەسی تریش سەری لێدەرناكات، چونكە ئەوان بەردەوام جەخت لەوە دەكەنەوە كە بە هیچ شێوەیەك نایانەوێ ببەسترێنەوە بە لیوا كوردییەكەی سلێمانییەوە، كەوا پێش هاتنی فەیسەڵ دەنگی بەوە داوە كە لە دەرەوەی دەوڵەتی عێراق بێت. بە هەر حاڵ، ناسیۆنالیزمی كوردی لەم چەند مانگەی دواییدا زۆری ڕست و زۆری وڕێنە كرد، كە ڕەنگە بیستبێتت، تا لە ڕاستیدا سێر پێرسى توانی قەناعەت بە كەركووك بكات بێنە سەر ڕێ و گوێ لە ئەقڵ و مەنتیق بگرن. ئەربیل و تەواوی ناوچە كوردییەكانی دەوروپشتی مووسڵ هاتوونەتە ژێر بار، چونكە دەزانن كە بەرژەوەندیی  سیاسی و ئابوورییان بەستراوە بە مووسڵەوە. ئەوان سەودا و مامەڵەیان لە سەر ئەمە كردووە و هەمان ئیمتیازیان دەست دەكەوێ چەشنی كاربەدەستانی كورد. هەندێك لەوان داواكارن كەوا خوێندن لە قوتابخانەكاندا دەبێ بە كوردی بێت و ئەمەش داواكارییەكی   ڕەوا و بەجێ نیە ئەگەر ئەو ڕاستییە رەچاو نەكرێت كەوا كوردی بە دەگمەن زمانی   نووسینە و هیچ مامۆستایەكی كوردیش نیە و ئەوان دەتوانرێ تەنها بە عەرەبی راهێنانیان پێبكرێت، لە بەر ئەوەی بە هیچ كلۆجێك كتێبى كوردی نیە.

ئای دنیا چەند سەیر و سەمەرەیە!

… ڕەنگە بەشێكی بە هۆی كەشوهەواوە بێت و بەشێكیشی بە هۆی خراپی و بێماناییەوە بێت كە وایلێكردم شێت و هار بم بە دەست ڕۆژنامە لۆكاڵییەكانەوە. ڕۆژنامەی “دیجلە” لەلایەن كابرایەكی گەنجی گەوج و بێئەقڵەوە دەردەكرێت كە هێرش دەكاتە سەر هەموو كەس و گوێ نادات بەوەی كێیە و كێ نیە. ئەم بڵاوكەرەوە بێئەقڵە بازاڕییە كە خۆی بە ئۆپۆزسیۆنێكی گەردوونیی دەزانێت ڕۆژنامە شەق و شڕەكەی بە پەرۆشەوە ئەوە دەخاتە ڕوو كەوا بنوێنێ نەیاری ئێمەیە و خۆی وا لە قەڵەم دەدا كە نیشتمانپەروەرێكی ئاست بەرزی عەرەبە بە هۆی بڵاوكردنەوەی هەواڵی ئەو سەركەوتنانەی توركیا لەم شەش هەفتەیەی رابوردوودا بێ ئەوەی بیر لە ڕۆژ و بەروار بكاتەوە. دواجاریش ڕاستیی دەردەكەوێت لە نێو تەمومژدا و هەمان ئەو ڕۆژەى ئەو جاڕیدا كە گریكەكان (یۆنانییەكان) بە كەشتی لە ئیزمیر هەڵاتوون كەچی هەر لەو ڕۆژەدا ڕۆیتەر لە ڕۆژنامەیەكی تری پەیوەندیدار بە عەرەبەوە رایگەیاند كەوا توركەكان ئەنقەرەیان چۆڵكردووە و ئەمەش لەوە قورستر بوو كە من پێم قووت بدرێ. تۆ دەزانی كە لێرە لە ئاستی میللیدا خەڵك رقیە لە سەركەوتنەكانی گریك و ئافەرینی هەر كەسێ دەكەن كە لە بارەى سەركەوتنەكانی توركیاوە دەدوێ سەرباری ئەوەش ڕۆژنامەكەی  دەكڕن و لە بنەڕەتدا منیش هەمان هەستم هەیە. من هەر هیچ نەبێ نامەوێ گریك لە ئاسیای بچووكدا ببینم و لەوێ جێگیر بن، بەڵام ئەركی من لە ئێستادا دروستكردن و دامەزراندنی دەوڵەتێكی عەرەبییە لە میسۆپۆتامیادا، لە بەر ئەوە تاقە دوژمنێك كە لە ئێستادا دەیبینم كەمالییەكان و هاوپەیمانییانە لەگەڵ بەلشەفیكەكاندا. ئەوان لەم ساتەدا بە هێزێكی شەست كەسییەوە پارچەیەك لە وڵاتە شاخاوییەكەی ئێمەیان داگیر كردووە كە دەكەوێتە باكووری ئەربیل (هەولێر)ەوە و حكوومەتێكی توركییان تێدا دامەزراندووە و مەسەلە تەنها هێزە و هیچی تر، بەڵام ئێمە هێزی تەواومان نیە بینێرینە سەرەوە بۆ ئەو شاخانە و تەنها دەتوانین بە هێزی ئاسمانی مامەڵەی لەگەڵ بكەین كە ئەویش بەس نیە. بەم پێیە جارێ لێگەڕاوین و ئەنجامەكەشی ئەوەیە كەوا هەر سەلكە زۆڵێك بە درێژایی ئەو سنوورانە خۆی پێدا بكات. لە كاتێكدا كەوا ڕۆژنامەی “دیجلە” برووسكەى سەركەوتنەكانی توركیا بڵاودەكاتەوە، جەعفەر ناردبووی بە شوێن ناونووسین و دامەزراندن لە سوپای عەرەبیدا بەڵام كەسی دەست نەكەوتبوو، چونكە خەڵك هزر و ئەقڵی شێواوەوە كەوتوونەتە قسە و باسی لە ئەگەری گەڕانەوەی توركەكان! ئەمەش لە ڕۆژهەڵات خەڵك حەزی پێدەكات.

16

28ى ئابى 1921

باوكی خۆشەویستم، پاش ئەوەی دوو هەفتە بوو نامەم بە دەست نەگەیشتبوو، ئەم هەفتەیە دوو نامەم بە دەست گەیشت كە لە 19ی تەمووز و 27یدا نووسرابوون بە باسكردنێكی  قووڵ و خۆشی ناوجەرگەی یۆرکشایەر من وا نامە بۆ دایكم دەنووسم و نامەكانم هەمان شێوازی پەرۆشیی جارانیان پێوەیە. هەرچۆنێك بێت هەفتەیەكی ترسناكمان بردە سەر و مەلیكەكەمان تاجی  لەسەرنا و سێر پێرسى و منیش لە سەر ئەو ڕایە كۆكین كەوا نیوەی دەریامان بڕیوە و نیوەكەی تریش كە ماوە مەسەلەی پەرلەمان و دەستوورە. بەینی خۆمان بێت خۆ ئەوەم بۆ نووسیت كەوا حكوومەتی خاوەن شكۆ چ كێشە و گرفتێكی بۆ دروستكردین لە دوا ساتدا و وەڵامی فەیسەڵ و سێر پێرسى.

حكوومەتی خاوەن شكۆ وەك من ناوم لێناوە تازە بە تازە خەریكی دارەدارەیە لەم ڕووەوە و ئەمە هەمووی هەڵە بوو و دوور لە نیازی ئەوان بۆ دەستێوەردان و خوا كەریمە و ئێمەش بە خۆشحاڵییەوە بەرەو پێشەوە دەچین. شەوی دووشەممە ئاهەنگێكی نانخواردنی خێزانیمان ساز كرد لەگەڵ جەعفەر و نوری و ژنەكانیان، هەروەها برایەكی گەنجی جەعفەریش كە ناوی تەحسین بوو بەشداری كردین، ئەم برایەی پشكنەری پۆلیسە لە سامەڕا و گەنجێكی زۆر باش و بەتوانایەو بە ڕاستی شەوێكی خۆش بوو. جەعفەر و نوری یەكبینە لەخۆشییاندا خەریكی نوكتە گێڕانەوە بوون و منیش بۆم دەسەندنەوە. ڕێوڕەسمی تاج لەسەرنان ڕۆژی سێشەممە كاتژمێر شەش دەستی  پێكرد و زۆر جوان بەڕێوەچوو، سەكۆیەكی 2 × 6 پێ بەرز لە ناوەڕاستی حەوشەی سەرای گەورەدا دانرابوو، لە پشتیەوە جێگەی فەیسەڵ تەرخان كرابوو لەگەڵ شوێنی گەورەی پێشوازیی حكوومەت و لە پێشەوە جێگەی ئێمەش ڕیز ڕیز دیاریكرابوو: ئینگلیزەكان، كاربەدەستانی عەرەب، پیاوماقووڵانی شار، وەزیرەكان، نوێنەرە ناوخۆییەكان و تێكڕا ژمارەی ئامادەبووان دەگەیشتە هەزار و پێنجسەد كەس. ئێمە لە دەروازەی سەراوە بە پسووڵە دەهاتینە ژوورەوە و كاتێ مەراسیمەكە دەستی پێكرد پۆلیسی عەرەب نەیهێشت كەس بێتە ژوورەوە و زۆرێك لەو كەسایەتییە پایەبەرزانەی درەنگ هاتن نەیانتوانی بێنە ژوورەوە. ئەمە هەموو ڕێكخستنی عەرەب بوو و بە تەواوی ڕاست و دروست بوو. من پێش ئەوەی ماڵەكەم بەجێبێڵم حاجی ناجی بەرەو ئاهەنگەكە بەڕێكەوت و بە ئۆتۆمبیلەكەی خۆم سەرمخست و پێكەوە ڕۆیشتین.  من و لەیدی كۆكس و گاربێت و خاتوو سڵەیتەر و یەك دوو پیاو لە بارەگای حكوومەت لە ڕیزی پێشەوەی ئینگلیزەكان بووین. ڕێك كاتژمێر شەش فەیسەڵمان بینی بە بەرگی ڕەسمییەوە، لەگەڵ سێر پێرسیدا بە دەستەجلێكی سپیی یونیفۆرمەوە بە تەواوی شریت و ئەستێرەكانیەوە، سێر ئەیڵمەر، مستەر كۆرنواڵیس و تاقمێك بەدوایانەوە بە سەر فەرشی درێژدا هەنگاویان دەنا و گاردی شەرەفیان دەپشكنی و بەرەو سەكۆكە دەچوون. لە ناو ئەوانەدا سەید مەحموودی كوڕە گەورەی نەقیب و سەید حوسێن ئەفنانی سكرتێری ئەنجومەنی وەزیران ئامادە بوون. ئێمە هەموو هەڵساینە سەرپێ كاتێ ئەوان هاتنە ژوورەوە و ئەوجا دانیشتین كاتێ كە جێگای خۆیان لە سەر سەكۆكە وەرگرت. فەیسەڵ زۆر بە شكۆوە دەركەوتبوو بەڵام بە تەواوی شڵەژابوو و ساتەوەختێكی پڕ كەف و كوڵ بوو. ئەو چاوی بەڕیزی پێشەوەدا دەگێڕا و چاوی خستە سەر من و سڵاوێكم لێكرد، پاشان سەید حوسێن ئەفنان هەڵسا و بەیاننامەی سێر پێرسیی خوێندەوە و ڕایگەیاند كەوا فەیسەڵ بە دەنگی 96% ی خەڵكی میسۆپۆتامیا بە مەلیك هەڵبژێردرا. بژی مەلیك! لێرەدا ئێمە هەڵساینە سەرپێ و سڵاومان بۆ كرد و ئاڵای نیشتمانی لە تەنیشتیەوە بەرز كرایەوە و تیپى مۆسیقایش سروودی “خوایە مەلیك بپارێزی”ی خوێند، چونكە تا ئێستا سروودی نیشتمانییان نیە (هەڵبەت ئەمە سروودى نیشتمانیى بەریتانیا بوو ـ وەرگێڕ) و لە پاش سڵاوی نیشتمانی بیست و یەك گوللە تۆپ تەقێنرا و لەو كاتەدا سەید مەحموود زۆر بە شێوەیەكی نەشیاو دۆعای سوپاسگوزاریی خودای خوێند و لەجیاتی ئەنجومەنی وەزیران بەیعەتی مەلیكی كرد. مێجەر دیچبێرن لە ناوچەی ناسرییەی دوورەدەست پێیوتم كاتێ تۆپەكان تەقین یەكێك لە سەرۆك هۆزەكانی سەعدوون كە لە هەڵۆ دەچوو و بە تەنیشتیەوە دانیشتبوو وتوویەتی “هادە الحچی، واتە ئەمەیە قسە!” (مەبەستى ئەوە بووە كە ئیش هەر لە خۆیان دێت ــ و) و وا دیارە بووە بە قسەو باسی هەموو شوێنێك. دواجار مەلیك فەیسەڵ وتارێكی بۆ خەڵكەكە داو ئێمە تێكستی وتارەكەمان بە برووسكە بۆ ناردوون و دەتوانن بیخوێننەوە، پاشان كە مەلیك هاتە سەر بڕگەی بەریتانیای مەزن ئاوڕی بۆ لای سێر پێرسى دایەوە. بە هەر حاڵ وتارەكە زۆر جوان و سادە و دڵـگیر بوو. لە پاش ئەمە دەرچوونە دەرەوە بەو شێوەیەی كە هاتنە ژوورەوە و ئێمەش تاوێك دانیشتین تا سێر پێرسى و جەنەراڵ بە ئۆتۆمبێلەكانیان ڕۆیشتن و پاشان ئێمەش بە ڕێككەوتن بە دەم قسە كردن و گۆڕینەوەی سڵاو و پیرۆزباییەوە. شتێكی سەرسامكەر بوو كە هەموو عێراق لە باكوورەوە بۆ باشوور ببینی لەوێدا پێكەوە كۆبوونەتەوە و لە مێژوودا یەكەمجارە ئەمە ڕووبدات. پاشان من چووم بۆ ئۆفیس و لەگەڵ خانەوادەی كۆكسدا قاوەڵتیمان كرد و دواتر پێشوازیم لە كۆمەڵێك خەڵك كرد كە هەر یەكەیان بەیت و باوێكی ئەو بەیانییەى لەلابوو كە یەك لەوانە عەلی سڵێمانی دلێم بوو كە دەیوت “بەو خوایە سێر پێرسى كۆكس وەك مانگ لە ناویاندا دەدرەوشایەوە (مانگ لای عەرەب بۆ نێرینەیە) و ڕوخساری لە هی فریشتە دەچوو”. من لە خەڵكی ترم بیست كەوا گەورەترین ئاسوودەیى و كەیفخۆشیی شێخەكانی ناوچە دوورەكان ئەوە بووە كە چاویان بە سێر پێرسى بكەوێت چونكە پێشتر نەیانبینیبوو. ئەمە شتێكی چاكە كەوا كەسایەتییەكی لەم چەشنەیە، بە باڵای بەرز و باریكی و لووتی پڵنگ ئاسای. بۆ ئێوارە ئاهەنگێكی نانخواردنم بۆ هەشت كەس ساز كرد كە مێجەر دیچبێرن و موتەسەڕیفی لیواكەی كە ئیبراهیم بەگی سەعدوونە و پۆستەكەی وەك موتەسەڕیف كەمێك زەحمەت بوو چونكە خوێندەواریی نەبوو، هەروەها عەبدوڵا بەگی سەعدوون كە هەفتەی پێشوو بۆم باسكردی، عەبدولمەجید شاوی، مستەفا چەلەبیی سابوونچی كە یەكێكە لە پیاوماقووڵانی مووسڵ. بەهیوام دوو كەسایەتییەكەی ترم بیر بێتەوە كە ناوەكانیانم لەبیرچووەتەوە. هەردوو سەعدوون جلی بەدەوییان پۆشیبوو، چەلەبی كەواو مێزەر، عەبدولمەجید بە جلی  ئەوروپی و فێسێكی لە سەر نابوو. كارەكە بە باشی بەڕێوەچوو. ئەحمەد پاشاى سەنا لە بەسرە، كە نەهات بۆ بانگهێشتنەكە، چایەكی لەگەڵ خواردمەوە و بە دوور و درێژیی لە بارەی دۆخی بەسرەوە دوا و باسی ئەوەی دەكرد كە بەسرە دەیەوێت ببێتە بەشێك لە عێراق و دەخوازێ پەیوەندیی نزیك و بەهێزمان هەبێت زیاتر لە هەر بەشێكی تری عێراق. منیش وتم ئەمە هەمووی ڕاستە كاتێ كە ئەوان بەشێكی تەواوكەر و دانەبڕاو بن لە عێراق و ئەندامانیان بنێرنە ئەنجومەنی هەڵبژێردراو.

بۆ بەیانیی ڕۆژی ئایندە سێر پێرسى و ستافەكەی یەكەم كەس بوون بچنە خزمەتی فەیسەڵ. ئەمە كاتژمێر حەوت و نیوی بەیانی دەستی پێكرد و یەكەمجار سێر پێرسى ڕۆیشت ئەوجا مستەر گاربێت و دوای ئەوانیش من. فەیسەڵ لە پێش تاجەكەیدا وەستابوو، سێر پێرسى لە لای ڕاستیەوە، مستەر گاربێت لە لای چەپیەوە و منیش پاش ئەوەی بۆی نووشتامەوە چوومە لای چەپی سێر پێرسى، لە كاتێكدا هەموو ستافە بەریتانیەكان بەوێدا تێپەڕین. (من ئەستێرەكەم و هەر سێ ویشاحی جەنگم بەستبوو، بۆ یەكەمجار لە كاتی تاج لەسەرناندا). ئێمە هەرسێكمان لەگەڵ فەیسەڵ و دواتریش مستەر كۆرنواڵیس لە سووچێكی ژوورەكەدا دانیشتین و كەوتینە قاوە خواردنەوە تا ئەو كاتەی هاتن و وتیان ئاهەنگەكە سازە و ئەوجا ئەوێمان جێهێشت درەنگانێكی پاش نیوەڕۆ خانەوادەی كۆكس ئاهەنگێكی بچووكیان ساز كرد لە باخچەكەیاندا و فەیسەڵ هەواڵی لێگێڕاینەوە كە حەز دەكات بێت بۆ ئەوەى سوپاسی سێر پێرسى بكات. مستەر كۆرنواڵیس، كۆڵۆنێڵ جۆیس و تاقمی سێر پێرسى و ماڵی گاربێت و من لەوێ بووین. ئاهەنگەكە ئەوپەڕی خۆش و قەشەنگ بوو لە سەر سەوزەگیای ژێر دارخورماكاندا. فەیسەڵ پێنج شەش كەسی دەستە و تاقمەكەی خۆی هێنابوو، هەموو دانیشتن بۆ ماوەی سەعاتێك و شیرینى و ساردەمەنیمان خوارد. پاشان من بانگهێشتێكی ترم هەبوو بۆ نانخواردنی ئێوارە بۆ هەشت كەس كە عەبدوللەتیف پاشای مەندیل و حاجی مەحموود وەزیری ئەوقاف و قایمقام و نەقیب و قازی بوون و دانیشتنێكی زۆر خۆش بوو. قازیی مووسڵ ڕەنگە خۆشەویستترین پیرەمێرد بێت لە هەموو عێراقدا، كە پیاوێكى سپی پێست لە جبە و مێزەرێكی سپیدا و زۆر قەشەنگ و ژیر دەینواند، وەزیری ئەوقاف كەسێكی ڕووخۆش و ئاقڵ، نەقیب پیاوێكە تەمەنی كەمێك سەروو هەفتا ساڵە و مێزەرێكی سەوزی تێری بە سەرەوەیە و زۆر بایەخێكی ئەوتۆی نیە بەڵام هەر ئەوەیە كە ڕاستەوخۆ نەوەی پێغەمبەرە و بنەماڵەكەی فەرمانی نەقیبییان هەیە لە زەمانی تەیموورلەنگەوە. ئەمەش بە شێوە توركییەك نووسرابوو كە نەیاندەتوانی بیخوێننەوە و بەڵـگەنامەیەكی ڕێزلێنان بوو. سەیدەكانی مووسڵ بەشێكی زۆر بایەخدار بوون لە   شاردا و ئەمانە هەر هەموو نەوەى یەك باپیرە گەورەن و نزیكەی هەشت سەد لەمەوپێش هاتوونەتە مووسڵ. لە نێو ئەم تاقمە دێوانە و دەروێشەدا عەبدوللەتیف مەندیل كەسێكی جیاواز بوو و ڕوخسارێكی نەجدی و شێوازی عەرەبێكی قووڵایی وڵاتی عەرەبستانی هەبوو. باوكی لە بەسرە نیشتەجێ بووە و ئێستا كە تالیب دەسەڵاتی نەما پێموایە بەهێزترین كەسایەتییە لە وڵاتدا و هەر ئەویش داواكاریی خەڵكی بەسرەی ڕێكخست بۆ ئەوەی لەگەڵ ئێمە بمێنێتەوە. باشە بۆچی؟ ئاخر ئەو بازرگانێكی گەورەیە و دەیەوێ لە ئاوی مەنگ و هێمندا ڕاوە ماسی بكات و گوزارشی تەواو بەهێزی دەكرد لە دید و بۆچوونی خۆى لەم ئێوارە خوانەدا. پاشان هاتینە سەر گفتوگۆ كردن لە سەر كەركووك و وەزیری ئەوقاف كەوتە دۆعا و پاڕانەوە لە خوا كەركووك لە عێراق جیابێتەوە چونكە وەقفەكانیان هیچ نانێرن و لە ناو خۆیاندا هەر خەریكی شەڕ و ئاژاوەن و لێرەدا مەجلیسەكە هەموو دایانە قاقای پێكەنین، بەڵام قازی سەری هەڵبڕی و بە هەندێك دوور و درێژی و زۆر ئاقڵانە لە سەر مەسەلەی كورد دوا. لێرەدا دوو میوانەكەی ترم بیركەوتەوە كە لە ئاهەنگەكەی یەكەمجاردا هاتبوون، ئەوانیش موتەسەڕیفی عەمارە ساڵح باش ئەعیان بوو كە لە زیرەكیدا مەیموونیش گرەوی لێنەدەبردەوە و من زۆرم خۆش دەوێ، لەگەڵ عەبدولقادر باش ئەعیانی خوشكەزایدا كە ئاهەنگێكی گەورەی لە قاهیرە بۆ جەعفەر سازكردبوو.

سێر پێرسى زۆر نەخۆش بوو، بەڵام لە ڕۆژی تاج لەسەرناندا تەندروستیى باشتر بووبوو و ئێستا بە تەواوی چاكبووەتەوە، لە بەر ئەوە من كە بۆ ماوەی هەفتەیەك نەمدەهێشت خەڵك بچێتە لای و بۆنەیەكم ڕێكخست بۆ پیاوماقووڵان كەوا سەردانی بكەن و سڵاوی لێبكەن و دوو ڕۆژمان بۆ ئەوە دانا، كە هەینی و بەیانیی شەممە بوو. زەحمەتە پێت بڵێم لە یەك كاتدا چەند كەس لە ئۆفیسدا بوون و زۆرم لا خۆش بوو ئەوانە ببینم كە هی وایان تێدابوو لەوەوپێش هەرگیز نەمدیبوو، هەروەها زۆرێك لەوانە پێشتر بەغدایان نەدیبوو. بەسرە و عەمارە ڕۆژی هەینی هاتن، حیللە و مووسڵ ڕۆژی شەممە و هەر هەموو گەورە پیاوانی ئەو شوێنانە بوون. لە ناو ئەمانەدا مووسڵ لە هەمووی خۆشتر و سەرسامكەرتر بوو و من كردمن بە سێ تاقمەوە: یەكەم بۆ گەورە پیاوانی شاری مووسڵ كە میوانەكانی من و هاوەڵەكانیان بوون، ئەوجا قەشە و مەترانەكانی مەسیحی كە زۆرن لە مووسڵدا لەگەڵ گەورە ڕابی و حاخامی جوولەكە. یەك لە مەسیحییەكان مار شەمعوونی بچكۆلە بوو كە مەتران و فەرمانڕەوای نەستوورییەكان بوو و ئەم پۆستە لە بنەماڵەكەیاندا بە میراتی لە باوباپیرانەوە بۆیان ماوەتەوە و ئەمیش پار ئەم جێگەیەی وەرگرتووە. ئەم كوڕە بچكۆلە ڕۆحسووكە تەمەنی دە ساڵ بوو و بە تەواوی بە پێی داب و دەستووری كەنیسە هاتبوو، خاچێكی زێڕی گەورە و زنجیرێكی لەملدا بوو و چارەنووس بۆی دانابوو كە ببێتە مەتران. گرووپی سێهەم لەوانیتر خۆشتر و سەرنجڕاكێشتر بوو ئەویش سەرۆكە كوردەكانی ئەو سنوورانە بوون كە هەڵبژێرابوون بێنە ناو دەوڵەتی عێراقەوە تا ئەو دەمەی كوردستانێكی سەربەخۆ گەڵاڵە دەبێت و خواستیان دێتەدی. من پێشتر تەنها یەك كەسم لەوانە دەناسی ئەویش سەعید بەگی سەرۆكی ئاینیی ئێزیدییەكان و ئەو دەمەی لە ساڵی 1909 دا من لەگەڵ باوكیدا بووم ئەو منداڵێكی حەوت هەشت ساڵان بوو. دەستمان كردە ملی یەكتر و بە تەواوی ئەوەی لەبیر بوو كە هەموو جار دەهات لە خێوەتەكەمدا لەگەڵم دادەنیشت. هەندێكی تریان خەڵكی زۆر كەتە و زل بوون و لەوانە شێخ نوری بریفكانی كە سەری پاك سپی و مێزەر و جبەشی هەر سپی بوو و دەسەڵاتی ئاینی و دنیایی بە سەر بەشێكی زۆری خەڵكی سنووردا دەڕۆیشت. قادر ئاغای شووش لە ناوچەكەدا زۆر دەستباڵا بوو و لە زمانی كوردی بەولاوە هیچی تری نەدەزانی و پیاوێكی كەتە و لەڕادە بەدەر قەڵەو بوو، دەستەجل و شەرواڵێكی پانوپۆڕ و خەتخەتی لە بەردا بوو لەگەڵ پشتێنێكی گوڵـگوڵی و گەورەترین مێزەری كوردیی بە سەریەوە و شاڵێكی گەورەشی بە دەورەوە پێچابوو، بە ڕاستى بینینی ئەم پیاوە شتێكی خۆش بوو. پاش ئەوەی چارەكە سەعاتێكیان لەگەڵ سێر پێرسى بردە سەر، هەر هەموو بە نۆرە هاتنەوە لای  من و لەوێدا كوردەكان هاتن و زۆر لام دانیشتن. قایمقامی زاخۆ قسەی دەستپێكرد و وتی دەرفەتی ئەوەیان نەبووە باسی پاشەڕۆژی كوردستان بكەن لەگەڵ سێر پێرسیداو لە بیروڕای منیان پرسی لەو بارەیەوە، منیش پێموتن كەوا ڕام وایە ئەو ناوچانەی ئەوان لێیەوە هاتوون لە ڕووی ئابوورییەوە پشتیان بە مووسڵ بەستووە و بەم پێیە بێت دەبێ چەند كوردستانێك دروست بێت. ئەوان قەناعەتیان بەم قسەیە كرد، بەڵام شێخ نوری وتی دەبێ كاربەدەستی كوردمان هەبێت و منیش وتم ئەمە كارێكی زەحمەت نیە. هەروەها داواكارییان ئەوە بوو كە منداڵان بە كوردی بخوێنن لە قوتابخانەكاندا، بەڵام من ڕام وابوو ئەو كارە زەحمەتە تا ڕادەیەك چونكە یەك دانە كتێبى قوتابخانە و بگرە هی تریش نیە كە بە كوردی نووسرابێت. لێرەدا هەڵوەستەیەكیان بۆ كرد و پاش تێڕامانێك وتیان قەیدی نیە با خوێندن بە عەرەبی بێت، بەڵام ئەی بەڕێوەبردن و ئۆتۆنۆمیی ناوچەیی چۆن دەبێت؟ منیش وتم: “باشە لەو بارەیەوە قسەتان لەگەڵ فەیسەڵی گەورەماندا كردووە؟ وتیان: “نەخێر” منیش پێشنیازم كرد “چاكە وا باشترە دەسبەجێ بچن بۆ لای و ئەوەی لەگەڵ باس بكەن، ئەگەر دەتانەوێ دیدارێكتان لەگەڵیدا بۆ ساز بكەم؟” وتیان: “بەڵێ”. بەمجۆرە تەلەفۆنم كرد بۆ ڕۆستەم حەیدەر و دواینیوەڕۆی دوێنێم ڕێكخست بۆ ئەو چاوپێكەوتنە، چونكە خۆیشم بەپەرۆش بووم بزانم فەیسەڵ لەم بارەیەوە چی دەڵێ. سەیرە، وا نیە.

ڕۆژی پێشتر دوو سەعاتم لەگەڵ فەیسەڵدا بەسەربرد و داوای چای بۆ كردم و وێنەكانی سەیرانەكەمانم بۆ برد (ئەوەی كە بۆم باسكردیت) لەگەڵ نەخشەیەكی سوریادا، لە تایمسەوە وەرگیرابوو، بەو شێوەیەی كە فەرەنسییەكان سوریایان لەتوپەت كردبوو بە سەر ویلایەتی جیاجیادا. فەیسەڵ زۆری حەز لە وێنە بوو و سوێندی لە سەر نەخشەكە خوارد “بەخوا، ئەمە حەرامە” و ئێمە پێشتر لەو بارەیەوە ئەمەی سوریامان بە كوفر و ناڕەوا داناوە. هەر لەو كاتەدا نوری و ڕۆستەم بە دوای جەعفەردا خۆیان كرد بە ژووردا (رۆستەم خەڵكی سوریا بوو). من پێموتن كەوا بێجگە لە ڕۆستەم وا بزانم لە هەر یەكێك لە ئێوە باشتر سوریا دەناسم و زیاترم خۆش دەوێت، گوند بە گوند و شاخ بە شاخ و ڕووبار بە   ڕووبار و باوەڕم وابوو تاقە یەك هیوا هەیە بۆ سوریا، كە دەبێ لێرە بە تەواوی دانیشتن و ورتەمان لە دەم نەیەتە دەرەوە و خەریكی كاری خۆمان بین. كاتێ كە ئێمە میسۆپۆتامیامان كردە دەوڵەتێكی نموونەیی عەرەب هیچ عەرەبێكی سوریا و فەلەستین نەبوو حەز نەكات ببێتە بەشێك لەو دەوڵەتە و من بەهیوام پێش ئەوەی بمرم فەیسەڵ لە سنووری ئێرانەوە تا دەریای ناوەڕاست حوكم بكات. بەڵام ئەگەر لێرەوە ئاژاوەمان بەرپا كرد و پەنجەمان بەرز كردەوە و دەنگمان هەڵبڕی ئەوە سوریا و عێراق وەك یەك خاپوور دەبن. ئەمە تا ڕادەیەك بە هۆى مەولوود پاشاوە بوو كەوا دەردی جەعفەر پێی دەڵێ “كەری نمرە یەك” و لە بارەی مووسڵەوە دەیوت هەر كاتێ فەیسەڵ فەرمان بدات سوریا دەگرمەوە، هەروەها ئەو بوو كە ساڵی پار سەركردایەتیی هێرشێكی كرد دژی ئێمە لە سەر فورات و فەرمانەكانی فەیسەڵی فەرامۆش كرد. مەسەلەیەكی سەیر و سەمەرە ئەگەر لە پاش داگیركردنی دێرەزور (دیر الزور) لە باكوورەوە و دەرپەڕاندنی ئیدارەی بەریتانی لە ساڵی 1920 دا، بێت دێرەزور لە باشوورەوە بگرێت و ئیدارەی فەرەنسی لە ساڵی 1921 دا دەردەپەڕێنێت! بەڵام بێگومان ئێمە ڕێگەی پێنادەین. پاشان سەعاتێكی خۆشمان بەسەربرد و گفتوگۆمان لە سەر ئەم شتانە كرد: (ئە) سنووری بیابانمان لە باشوور و ڕۆژئاواوە، (بێ) ئاڵای نیشتمانی و ئاڵای شەخسیی فەیسەڵ و بۆ ئەمەی دواییان بە شێوەیەكی كاتی ئەم سێكچەمان ڕێكخست و ئاڵای حیجاز لەگەڵ تاجێكی ئاڵتوونیدا لە سەر سێگۆشەیەكی سوور و با ئەوەشت پێبڵێم كەوا سوور ڕەنگی خانووەكەیەتی بۆیە دەیەوێ ناو و مۆركی خۆیی بخاتەسەر. باوكە لە ڕێی خوادا پێم بڵێ ئایا ئاڵای حیجاز لە ڕووی ڕەسەنایەتییەوە ڕاستە؟ بە برووسكە بۆم بنێرە و پێموایە ئاڵایەكی زۆر باشە و دەتوانین لەمەی عێراقدا گۆڕانكاریی تێدا بكەین و ئەستێرەیەكی ئاڵتوونی بخەینە سەر شریتێك قوماشی ڕەش یان سێگۆشەیەكی سوور. ئەنجومەن ڕاستەوخۆ ڕەزامەندیی لە سەر دەردەبڕێت كاتێ كۆبووەوە و تكایە لە كاتی گونجاوی خۆیدا ئاگادارم بكەرەوە و ئەگەر هەر پێشنیازێكیشت هەیە بۆ ستانداردەكەی فەیسەڵ بۆم بنێرە.

بە هەر حاڵ لە پاش خۆرئاوا لێبووینەوە و فەیسەڵ خێرا ڕاپەڕی و كڵاوەكەی لەسەرنا و وتی: “دەبێ ئێستا بچم بۆ نوێژ كردن” و هەر كە ئەو چووە دەرەوە من و جەعفەر ویستمان لە ژووری تاجەوە بڕۆین بەڵام جەعفەر وتی “خاتوون كەمێك چاوەڕێ بكە” و بردمیە ئەو باڵكۆنەی كە بە سەر دیجلەدا دەیڕوانی. ئەوەی كە ویستی پرسیارم لێبكات لە بارەی كابینە نوێكەوە بوو. شتێكی سەرسورهێنەر بوو، ڕووناكییەكی سوور بە سەر دیجلەوە، شەوێكی   گەرم و قسە پڕ دڵەڕاوكێكەی جەعفەر و بە شێوەیەكی سروشتی هیچ شتێكی تر باس نەكرا. یەك لە ڕۆژنامەكانی ناوخۆ خەڵاتێكی دانابوو بۆ هەر كەسێك بە ڕاستى مەزەندەی ژمارەی كاندیدی حكوومەت بكات. ئەم دواینیوەڕۆیە ناجی سوەیدى هاتە لام و وتی وەزارەتی ناوخۆم ناوێت (كەوا بایەخدارترین وەزارەتە)، چونكە وەك دەیوت خەڵكی لێیدەئاڵین و كاریان لێدەوێ. من پێموت بیستوومە كەوا وەزارەتی داد بۆ تۆ   دانراوە و وتی پێی ڕازیم. ئەمە سەلماندنێكی گرنگ بوو چونكە نە سێر  پێرسى و نە نەقیب، كە داوای لێكرابوو پۆستی سەرۆك وەزیران وەربگرێت، ناجییان خۆش نەدەویست. ئەوان وایاندەبینی كەوا كەسێكی زۆر بەتوانایە بەڵام تەواو جێگیر نیە بۆ ئەم كاتە ناسكە. من لای خۆمەوە وای بیر لێدەكەمەوە كە ئەگەری ئەوە هەیە هەموو شتێك بە ڕێكی ئەنجام بدات و بە تایبەتیش فەیسەڵ پێی باشە و بەڵام دەزانێ كە سێر پێرسى حەزی لێناكات و زیاتر بە دوای كەسێكی دڵسۆزدا دەگەڕا و جەعفەری زیاتر پێ پەسەند بوو.

جەعفەر تا سەر ئێسقان دڵسۆزە بەڵام ناتوانێ ناوخۆ بەڕێوە ببات و لەوەش ئەولاتر نابێ وەزارەتی بەرگری وەربگرێت لە سەروبەندی دروستكردنی سوپایەكی عەرەبیدا. جەعفەر بەوە دەستی پێكرد و پاشان پێشنیازی ناجی كرد و منیش ڕێك ئەوەم پێوت كە ناجی   پێیوتم و ئەمەش كارتێكی زۆر سوودبەخش بوو. پاشان جەعفەر ناوی حەمدی پاچەچی هێنا كە هەرگیز نەیدەكرد، چونكە كابرایەكى بێكەڵكی لووتبەرز بوو. وابزانم لەو ڕووەوە جەعفەرم قەناعەت پێكرد و ئەویش وتی “ئەی نوری چۆنە؟” لە وەڵامدا وتم من نوریم خۆش دەوێ بەڵام ئەو هێشتا زۆر گەنجە و ئەزموونی بەڕێوەبردنی نیە. جەعفەر زۆر بە شڵەژانەوە تەماشای دەكرد و پێموت: “ئێستا دەبێ پێت بڵێم ئەو پیاوەی سێر پێرسى بۆ ئەم سەردەمە كاتییە گەرەكێتی و لەم كاتەدا كە بانگهێشت و ڕێنمایی نوێنەران دەكەین بۆ داڕشتنی یاسای بنەڕەتی، ئەحمەد پاشای سەنائە. جەعفەر و نوریش هەر بیریان لەم   كردووەتەوە و ئێمە بە تایبەتى ئەحمەد پاشا دەناسین. بۆیە وامبیستووە كەوا ئەگەری دامەزراندنی ئەویان باس كردووە”. جەعفەر وتی “بەڵێ بەڵام ترسم لەوەیە پەڕگر و توندڕەوان ناڕەزایی توند دەرببڕن”. من داكۆكیم لەوە كرد كەوا هەموو خەڵكانی كاریگەر وەك گەرەنتییەك تەماشای ئەم پیاوە دەكەن بۆ جێگری و بێجگە لەوەش ئەگەر تۆ پیاوێكی خەڵكی بەسرەت لە وەزارەتێكی گرنگدا دانا ئەو كاتە زۆر زەحمەتە بەسرە سوور بێت لە سەر جیابوونەوەی ئیداری لە عێراق. لەم كاتەدا فەیسەڵ، كە لە نوێژ كردن بووەوە، گەڕایەوە و مستەر كۆرنواڵیسیش گەیشت بۆ ئەوەی سەبارەت بە ئیش و كار قسەی لەگەڵ بكات. بەم ڕەنگە منیش ئەوێم بەجێهێشت و كاتێ كە لەگەڵ جەعفەردا بە قاڵدرمەكاندا دەچووە خوارەوە جەختم لە سەر دوا مشتومڕیان كرد و بە تەواوی سەری سوڕمابوو. بەهیوام بەهەڵەدا نەچووبێتم بەڵام ئەمە خواستی سێر پێرسى یە و بە زۆری ئەو هەڵە ناكات. بۆ سبەی بەیانی تەواوی مشتومڕەكەم بۆ فەیسەڵ باس كرد و ئەویش سەری ڕەزامەندیی بۆ لەقاند.

                                                                                               كچى دڵسۆزتان                                              گـێـرتـروود 

17

17 ى ئەیلوولى 1921

باوك و دایكی ئازیزم، ئەمڕۆ نامەكانی 16 و 17 ی ئابی ئێوەم پێگەیشت و تیایاندا باستان لە بابەتێكی نابەجێ كردووە كەوا لە سەر من لە ڕۆژنامەی نیۆیۆرك هێراڵدا بڵاوكراوەتەوە و باستان نەكردووە كەچی تێدا وتراوە و وای بیر لێدەكرێتەوە كە لەوەی كە هەیە خراپترە. من هەرگیز ناوی جۆن ماكهاف ستیوارتم نەبیستووە و پێستی سەری بە نەعلەت بێت. بە پێچەوانەی ئەوەوە هەموو هەواڵەكانی ترتان دڵخۆشكەرن و من خۆشحاڵم بەوەی چێژ لە نامەكانم دەبینن و سوپاستان دەكەم. ئەوە هەمووی ڕاست نیە كە من بڕیار لە سەر تەواوی چارەنووسی عێراق دەدەم، بەڵام ئەوەیان ڕاستە كە من تا سەر ئێسقان لەگەڵ دروستكردنی حكوومەتێكی عەرەبیدام و مەسەلەیەكی زۆر ناسك و هەستیارە هێند جێی متمانەیان بم و زۆر بەئاگام لەوەی كە لووت نەژەندمە هەموو كاروبارێكیانەوە و هەر كاتێ ئەوان سەرقاڵی شتی تر بوون ئەوە من دەچمە لای كاری خۆمەوە. پاشان هەر هەموو بە هەناسە سواری هانام بۆ دەهێننەوە! چونكە كاریان مەیسەر نابێت و بە هەڵەداوان دەخوازن كاری ئاڵۆزیان بۆ ساز و چارەسەر بكەم و ڕەنگە بەمە كەمێك هۆشیان بێتەوە سەر و شتێك فێر بن لەوەی كە من گاڵتەیان پێدەكەم، بەڵام ڕاستیەكەی لەوەدایە كە نیشتمانپەروەریی ڕاستەقینە لەم وڵاتەدا زۆر كەمە (هەرچەندە ئاسان نیە كە بیزانن) و هەر واشدەبێت تا خەڵكی ئەوە نەبینن كە حكوومەتە عەرەبییەكە و ئێمەش لە پشتیەوە، بەرەو  شكست و هەڵدێر دەچێت. حاڵی حازر ڕێژەیەكی بەرچاوی گەوج هەن كە قەناعەتیان وایە یان دەبێ كاروباری شانۆكە ئەوان ڕایی بكەن یان هەڵیدەگێڕنەوە و هەڵبەت هێچكامێكیشیان پێناكرێت. مەسەلەیەك نیە بەلای منەوە ئەوانە تێدەگەن یان نە، چونكە ئەوانە هیچ بایەخێكیان نیە و تەنها پەرۆشم كە ئەوانیتر بزانن كەوا ئەوانە بێبایەخن.

سێشەممەی رابوردوو پانزەی موحەڕەم بوو كە عاشوورایە و لووتكەى شین و شەپۆڕە بۆ یادی كوشتنی حوسەین، من چوومە دەرەوە بۆ ئەوەی ڕێوڕەسمەكە لە كازمیەدا بینم، بەڵام لە ڕاستیدا نایانبینی چونكە دەچنە ناو مزگەوتەوە، بەڵام قایمقامی كازمییە هۆدەیەكی لە خانوویەكی چۆڵدا بۆ ئامادە كردبووین كەوا ڕوویكردبووە مزگەوتەكە و لەوێ دانیشتین چاودێریی خرمەی پێی ئەسپەكانمان دەكرد. گرووپی ئێمە مستەر گاربێت و من و خەڵكی جۆراوجۆری تری ئۆفیسەكان بووین. من و مستەر گاربێت كاتژمێر پێنج و نیو بە ئۆتۆمبیل ڕۆیشتین و ئەوانی ترمان لەوێ بینی. خانووەكە خانوویەكی زۆر كۆنی مۆدێل ئێرانی بوو بە پەنجەرەی تەلبەندەوە، كە هی كەسێكی خەڵكی نەجەف بوو. هەر كە ئێمە گەیشتین فەیسەڵیش هات و چووە ناو مزگەوتەكەوە بۆ شوێنێكی تایبەتی چون سندووق كە بە تایبەتى بۆ ئەویان تەرخان كردبوو لە حەوشەكەدا بۆ تەماشا كردنی ڕێوڕەسمی موحەڕەم، كە بێگومان ئێمە نەماندەبینی. ئەوان تەواوی دیمەنی مەرگی حوسەینیان دەنواند، هێرشی لەشكری معاویە و كوشتنی تاقمی ژمارە كەمی حوسەین یەك لە دوای یەك، سووتاندنی خێوەتەكانیان و بڕینی سەری كوژراوەكان و ناردنیان بۆ معاویە (ڕاستێكەى بۆ یەزیدى كوڕى معاویە بووە ــ و). بەڵام پێش نمایشكردنی ڕێوڕەسمەكە مەوكیب لە دوای مەوكیب تێدەپەڕین بە بەر پەنجەرەكەی ئێمەدا و لە ناو ئەوانەدا تاقمی فیداییەكانی حوسەین بوون كە دوو جۆر بوون: تاقمێكیان بە هێمنی سینگیان دەكوتا و تاقمێكی تری پیاوان خۆیان بە شمشێر لەتوپەت كردبوو. لە زەمانی توركدا هەندێك لەم تاقمەی دواییان خۆیان دەكوشت هێند شمشێریان لەخۆ دەدا، بەڵام ئێستا پۆلیس ڕێكیاندەخات و بەو ڕادەیە مەترسیدار نیە. پرۆسەكە بەم جۆرەی خوارەوەیە: زۆر بە چاكی سەرت تاشیبێت و ڕووتت كردبێت و وەك بەشدارێكی توندڕەو و پشكنەرێكی پۆلیس بە شمشێر گەلێ برینی قووڵ دەكاتە تەوقە   سەرت و برینەكان خوێنیان لێدەچۆڕێت و خوێن سەر و دەم و چاوت سوور دەكات و كاتێ دەست دەكێشی بە سەرتدا و پاشان دەیدەی بە كەوا سپییەكەتدا یەكپارچە پەڵەی  خوێن و دیمەنێكی سەرسامكەر دروست دەكات. هەندێك لەوانە كەواكەیان لە دواوە بە تەواوی شەڵاڵی خوێن دەبوو، من فرە جار وام بەبیردا دەهات كە ئەوە خوێنی شتێكی تر بێت و ڕەنگە خوێنی مەڕ بێت. لە هەمان كاتدا زۆرێك لەوانە بە تەواوی تێكچووبوون و لەتریان دەدا و هاوەڵەكانیان گرتبوونیان و یەكێكیان هەر بوو بە لاشە و بە چواردەستە بردیان. پاشان هەر هەموو بە پڕتاو لە مزگەوت وەدەركەوتن و شمشێر و تیغەكانیان ڕادەوەشاند و زیرەكانە بەكاریاندەهێنا و پشكنەری پۆلیس لە ساتەوەختی دڵـگەرمییاندا نەیدەهێشت چیتر خۆ بكوتن و ببڕن. ئەمە هەموو كاری دڕندەیی نائاسایی بوو و سونییەكان ڕقیان لێدەبۆوە و وای بۆ دەچوون كەوا كارێكی شوورەییە لە ئیسلامدا و ئەوجا هەر وایشە.

بارودۆخەكە لە كوردستان بە شێوەیەكی سەیر پەرەیسەندووە و لەو كاتەوە كە فەیسەڵ گەیشتووە بەردەوام لە گەورە پیاوانی كوردەوە لە ناوچەكانی باكوورەوە نامە و پەیامی پێدەگات و دەڵێن دەیانەوێ لە دەستی تورك ڕزگاریان بێت و كوردستانێكی ئۆتۆنۆمیی دروست ببێت و فەیسەڵ مەلیك بێت و لە ژێر سایە و پارێزگاریی بەریتانیادا بن (بە جۆرێك لە جۆرەكان وەك دەوڵەتی نەمسا  ـ مەجەر). وا ئێستا داوای لێدەكەن لە بەغدا كۆنفرانسێك بۆ سەرۆكە كوردەكان ببەسترێت، كە هەندێكیان لە پاریسن و هەندێكیش لە ئەستەمبووڵ. فەیسەڵ ئێمە لە هەموو شتێك ئاگادار دەكاتەوە و ئەگەر ئەوەشی نەكردایە ئەوە بەردەوام خەڵكی خەفیە دەهاتن و چی لە نامەكاندا نووسرابوو پێیاندەوتم و تەنانەت پێش ئەوەی بگەیشتنایەتە دەستی ئەو من دەمزانی چییان تێدایە. فەیسەڵ بە عادەت دەیویست سیاسەتی حكوومەتی خاوەن شكۆ بزانێ و مەسەلەكە بە هۆی ئەم فاكتەرانەوە ئاڵۆز بوو:

1 ــ هەرگیز دوو كورد لە سەر شتیك ڕێكنەدەكەوتن لە پراكتیكدا.

2 ـ ئەو بەشەی هەرێمەكە كە پێشنیازیان دەكرد دەوڵەتێكی كوردیی لێپێكبێنن لە ژێر     سایە و پارێزگاریی بەریتانیادا دەكەوتە بازنەی دەسەڵاتی فەرەنساوە.

هـەرچۆنێك بێت و كوردەكان هەرچییەك بكەن لەگەڵ فەرنسییەكاندا من باوەڕ ناكەم بتوانن زۆر لە كوردەكان بكەن دەسبەرداری دەوڵەتی كوردی بن، با لە بازنەی دەسەڵاتی ئەوانیشدا بن. ئێمە توانیمان عەرەبەكان بكەینە دوو كەرتەوە و دوو وڵاتی جودایان بۆ پێكبێنین بەڵام هەردوو وڵاتەكە لە ژێر كۆنترۆڵی هێزەكانی فەرەنسا و بەریتانیادایە، بەڵام حاڵەتەكە لەگەڵ كوردستاندا وا نیە و فەرنسییەكان لە ڕووی سەربازییەوە هیچ بەشێكی وڵاتی ئەوانی داگیر نەكردووە. كەواتە لەم حاڵەتەدا كێ دانیشتووان ناچار دەكات ئەگەر دانانی ئەو هێڵی سنوورە دەستكردانە ڕەتبكەنەوە كە لەندەن و پاریس لە سەری ڕێككەوتوون؟

دوێنێ ئێوارە نانی شێوانم لەگەڵ هەندێ كەسی هاكەزاییدا خوارد كە بریتی بوون لە یوسف غەنیمەی مەسیحیی بچكۆلە و قەشەنگ كە ئەمینداری كتێبخانەی گشتیی سەلامە و من سەرۆكیم، سەرنووسەری یەك لە ڕۆژنامە ناوخۆییەكان، عەبدوللەتیف فەلاحیی كە كابرایەكی بۆش و بەتاڵە، دوكتۆر مەعلووف كە دوكتۆرێكی سەربازیی زۆر ڕێكوپێكە (لە سوپای عەرەبیدا) و سوورییەكی سادە و بەڕێزە و حەسەن ویفقی، بە ڕاستى ئێوارەخوانێكی پڕ لە خۆشی و پێكەنین بوو.

18

25 ى ئەیلوولى 1921

… بارودۆخێكی زۆر دڵخۆشكەر شكستی هێرشەكەی توركە لە باكووردا. لەم ماوەیەدا ئەفسەرێك و نزیكەی شەست سەربازی تورك رەواندزیان داگیر كرد (كە ئێمەشى تێدا نەبووین) و كەوتنە هاندانی هەندێ خەڵكی یاخی لە ناو خێڵە كوردەكاندا و پێشڕەوییان كرد بۆ تاڵان كردن و وێرانكردنی باتاس و رانیە. ئێمەش بە زەبرى بۆردمانى فڕۆكە و هێزی   لێڤی و عەشیرەتەكانەوە هەردوو شوێنەكەمان لێسەندنەوە و ڕاستێكەی باشیی كارەكە و دەستوبرد و كارامەیی هێزە ناوخۆییە نیمچە مەشقپێكراو یان هەر مەشق پێنەكراوەكان بوو بە هەماهەنگی لەگەڵ هێزى ئاسمانیدا كە بە خەستیى بۆمبارانی دەكرد و ڕێگەی دەكردەوە بۆ پیادەڕۆیی هێزە ناوخۆییەكان كە وەك ئامێر ملیان دەنا و هێرشیان دەكرد. ئەوە مژدەیەكی زۆر باشە بۆ سوپای عەرەبی  كە بە هاوكارییەكی كەمی ئێمە لە ڕێگەی فڕۆكەوە ئەو نەبەردییە ئەنجام دەدات.

… وەك دەزانیت كەوا ئارمیتاج سمیس بەم دواییە ڕۆیشتەوە بۆ ئێران و جێگرەكەی مستەر بەلفۆر هاتووە بۆ ئێرە لە ڕێگەیدا بۆ سەفەری وڵات. ئارمیتاج چووەتەوە بۆ ناو   بەختیاری و ناوچەى  بوشەهر و زۆر حەز بە ئیش دەكات لە ئێراندا و وەك مستەر بەلفۆر دەڵێ دۆخی ئێستای ئێران خراپتر بووە. پێدەچێت دوو ئەڵتەرناتیڤ لە ئارادا بێت و ڕەنگە وڵاتەكە ببێتە دوو بەشەوە و ئەم پرۆسەیە لە ئێستادا دەستیپێكردووە و هەردوو ئوستانی ئازەربایجان و گەیلان جاڕی سەربەخۆییان داوە و لە حكوومەتی ناوەند جیابوونەتەوە. یان بەلشەفیكەكان بێنە ناوەوە، چونكە نزیكەی سەد هەزار سەرباز لە هێزەكانی بەلشەفیك رۆڵی كەرت كردن ببینێت لەگەڵ حكوومەتی  ئێراندا و لە یەكەمجاردا ئێران دەبێتە وڵاتێكی پڕ ئاژاوەی  بێنرخ و پاشاگەردانی دەبێت و دووەمجاریش بەلشەفیزم بە لووشدانی وڵاتێكی تری موسڵمان بە تەواوی سووك و لەكەدار دەبێت لە جیهانی ئیسلامیدا. بەم پێیە من وایبۆدەچم كە هیچ ئەڵتەرناتیڤێكیان لێرە زیان بە ئێمە ناگەیەنێت و ئەوەش ئێستا لە ئێراندا روودەدات زۆر بەلامەوە گرنگ نیە، چونكە ناتوانین هیچ شتێك بكەین.

19

17 ی تشرینى یەكەمی 1921

باوكی ئازیزم، دوێنێ یەكشەممە ڕۆژێكی خۆشم بردەسەر. كوڕێكی گەنج هەیە ناوی كاپتن ڕیدە و ئێستا ڕاوێژكارە لە باقووبە و كوڕێكی زۆر باشە و من ماوەیەكی دوور و درێژە دەیناسم، بەڵام تووشی خوویەكی دوورەپەرێزیی خراپ بووە و هەرگیز نایە هیچ كەسێك لە ئێمە ببینێ و لە ڕاپۆرتەكانیدا هەستی ئەوەم لا دروست بووە كە بە تەواویی حاڵی خراپە و لەدەست دەرچووە، بۆیە برووسكەم بۆ كرد و پێمڕاگەیاند كە دەچم نانی نیوەڕۆی لەگەڵ دەخۆم و بۆ ئەو مەبەستە ئۆتۆمبیلێكم بە كرێ گرت و گەشتێكی سەرلەبەیانیی پڕ خۆرەتاوم دەستپێكرد و كاتژمێر یانزە و نیو گەیشتمە باقووبە و لەو كاتەدا ئیتر خۆرەكە گەرمی كرد. ئەم ناوچەیە جوان بوو لەگەڵ دۆڵ و شیوی پڕ لە باخاتی پرتەقاڵدا و چەم و ئاوێكی بچووك كە كلكەی چەمی خۆراسان بوو و بە ناوەڕاستیدا دەڕۆیشت. من یەكسەر چووم بۆ سەرای و لەوێ كاپتن ڕید و ئەحمەد حاڵەت بەگی موتەسەڕیفی  پیر و ڕۆحسووكم بینی كە جارێكیان لایدابووە لام بەڵام من لە دەرەوە بووم و بە دیداری شاد نەبووم و ئەمە پیاوێكی بەشكۆ و ڕێزە و لە چاكترین جۆری كاربەدەستانی توركی كۆنە. من زۆرم لا خۆش بوو ئەو دۆستایەتییە بەتینەی نێوان ئەم پیاوە و كاپتن ڕیدم بینی و ئەگەر پرسیارت لە هەر كامێكیان بكردایە ئاوڕیان بۆ لای یەكتر دەدایەوە و بۆ دڵنیا بوون لە دروستیى وەڵامەكانیان. هەرسێكمان لە ئۆفیسی موتەسەڕیف  دانیشتین و ماوەی نیو سەعاتێك لە بارەی كاروباری دیالەوە دواین و پاشان من بۆی نووشتامەوە و پێموت تۆ سەرقاڵیت با لە كاتت نەگرم و لە ئۆفیسەكەی كاپتن ڕید چاوەڕێت دەكەم تا كاتی نانخواردنی نیوەڕۆ، بەڵام سوودی نەبوو موتەسەڕیف بە غاردان شوێنمان كەوت و لەوێ دانیشت دەستی كردە قسە و دەمەتەقێ لە كاتێكدا كەوا كاپتن ڕید خەریكی ئیمزا كردنی نامە و نووسراوەكانی بەردەمی بوو، پاشان پێی لە سەر ئەوە داگرت كە هەموو سەراییم پێشان بدات، ئەو شوێنەی كە لە هەرا و ئاژاوەكەی پاردا سووتا و هەردوكیان لەوێ كەوتنە باسی نیازی چاككردنەوەی. دواتر لەگەڵ كاپتن ڕیددا چووم بۆ نانخواردنی نیوەڕۆ لە خانووە بچكۆلە شەق و شڕەكەیدا بێئەوەی بوارم هەبێت تۆسقاڵێك پشوو بدەم. چەرچەفی سەر خوانەكە بە دڵنیاییەوە مانگێك بوو نەشۆردرابوو و نانی نیوەڕۆمان گۆشتى پۆڕ بوو، پاشان كاڵەكی نایابی قزل ڕەباتمان خوارد، كە بەناوبانگە بە كاڵەكی بەتامى و بە درێژایی ماوەی نانخواردن كاپتن ڕید بەردەوام قسەی لە سەر موتەسەڕیف و دەستە و دایەرەكەی دەكرد. من زۆر بەپەرۆش بووم بۆ قسەكانی، بەڵام ئەگەر واشنەبوومایە ئەو هەرچییەكی لەدڵدابوو هەر هەڵیدەڕشت سەبارەت بەو شتانەی زۆر نزیكن لێیەوە: خێڵ و عەشیرەتەكانی، شێخەكانی، موتەسەڕیفەكەی و چۆن كاری خۆی بە جوانی ڕادەپەڕێنێ و چۆن بە سەر سەربازەكاندا دەگەڕێ و تەنانەت شەو لە خێوەتی عەرەبێكدا دەباتە سەر و ئەمە شتێكە باوەڕ ناكەم هیچ موتەسەڕیفێك لە سەردەمی توركدا وایكردبێت و چۆن لەگەڵ خەڵكدا باشبووە و لە یەكتر تێگەیشتوون و تێكەڵ بوون. پاش نانی نیوەڕۆ بە ئۆتۆمبیل چووین بۆ دەڵتاوە، كە نزیكەی دە میل لە باكووری باقووبەوە بوو، بە سەر ناوچەیەكدا دەیڕوانى كە بە دار و دەوەن داپۆشرابوو چون مێرگێكی ئینگلیزی ئەوە نەبێ كە ئەمەی ئێرە  قاوەیی و زەرد بوو لەبری سەوز و پەمەیی. چەمى خوراسان ئاوی ئەم ناوە   دەدا و لە هەموو شوێنێك باخی دارخورما دەبینی. دەڵتاوە خۆی، كە من پێشتر هەرگیز نەمدیبوو، وەك هەر گوندێكی نموونەیی عێراقی كەوتبووە ناو باخی خورما و پرتەقاڵەوە. لەوێ چووین بۆ ماڵی قایمقام كە دۆستێكی نزیكمە و هەڵبەت لەو دواینیوەڕۆ زووەدا بێئاگاداری سەردانمان كرد و لە توێی بیجامەدا بوو، بەڵام كاتێ كە من چوومە سەرەوە بۆ بینینی ژنەكەی (كە كچێكی بەغدایی بوو و چاكم دەناسی)، قایمقام بە پەلەپڕووزێ قاتی  چاكەت و پانتۆڵی لە بەر كرد و كاتێ دابەزیم و چوومە دیوەخانی پیاوان ئەم بە تەواوی لە شكۆ و ڕێزی خۆیدا بوو. بە درێژایی ڕێگای ڕۆیشتن و گەڕانەوە بۆ دەڵتاوە كاپتن ڕید لە قسە كردن نەكەوت.

ئەمانە بە ڕاستی سەیرن، ئەم كوڕە گەنجە ئینگلیزانە، كە فڕێدراونەتە لیواكان بە كەیفی خۆیان هەڵسوكەوت دەكەن. ئەوان لە ناو ئەو دەوروبەرەیاندا وا خۆیان لە قەڵەم دەدەن كە هیچ شتێكی تر ئەو بایەخەی نیە لایان، بەڵام ئەگەر وایان بە خەیاڵدا هات كە تۆ كەیفت پێیان دێت ئەوە وەك گوڵ دەگەشێنەوە بۆ سەرسامی و ئارامیت كە چۆن ئەم ساڵانەیان گوزەراندووە.

پاشان دۆعاخوازیم لە كاپتن ڕید كرد و بەڵێنی ئەوەم لێوەرگرت ئەمجارە كە هات بۆ بەغدا موتەسەڕیفیش لەگەڵ خۆی بێنێ بۆ ئەوەی پێكەوە نانی نیوەڕۆ بخۆین. منیش بەڵێنی ئەوەم پێدا بەم زوانە   بێمەوە و شەو لە شارەبان بەسەرببەین، كە قایمقامە تازە دامەزراوەكەی خەڵكی بەغدایە و زۆرم خۆش دەوێ.

ئەمڕۆ سەید فەیسەڵ لە مووسڵ گەڕایەوە و كاتژمێر نۆی سەرلەبەیانی گەیشتەوە و ئێمە هەموو بۆ پێشوازیی چووین بۆ وێستگەی شەمەندەفەر. سێر پێرسى، سێر ئەیڵمەر، گشت وەزیرەكان و خەڵكێكی زۆر لەوێ بوون و ئاهەنگێكی خنجیلەی سەركەوتوو سازكرا و لە دەرەوەی وێستگەكە خێوەتێكی بچووكى پڕ لە رایەخ و فەرش هەڵدرابوو كە مەلیك تێیدا بە راوەستانەوە تەوقەی لەگەڵ خەڵكەكە دەكرد كە هاتبوونە پێشوازى، پاشان من و مستەر كۆرنواڵیس و یەك دوو كەسی تری بانگ كرد و قاوەیەكمان خواردەوە و تاوێك پێكەوە قسەمان كرد. پێدەچوو فەیسەڵ دڵى خۆش بێت بە سەركەوتنی سەردانەكەی مووسڵی و سوپاس بۆ خوا كە بە سەلامەتی گەڕایەوە!

مێجەر یۆنگ بە فڕۆكە لە ئۆرشەلیمەوە گەیشت و من ئەم بەیانییە بۆ تاوێك لە وێستگە بینیم و وەك هەمیشە بە كەیف و خۆشحاڵی هاتە بەرچاوم و بۆ سبەینێ بانگهێشتم كرد بۆ ئێوارە خوانێك لە ئەنجومەنی وەزیران.

دایكە، بۆ ئاگاداریت رۆبە شینەكەم و عەباكە لە خانم بێڵەوە   گەیشتن و بە ڕاستى بەڕێز و میهرەبانن، من زۆر سوپاسگوزاری ئەوانم كە زۆر زەحمەتیان پێوەكێشام.

20

24ی تشرینى یەكەمی 1921

… هەفتەیەكی جەنجاڵم بەسەربرد و شتێكی زۆر تایبەت نیە بیخەمە ڕوو، جارێ با پێتان بڵێم كە مێجەر یۆنگ زۆر لەوە میهرەبانتر بوو كە چاوەڕێى بووم، ڕۆژی 18ی مانگ نانی نیوەڕۆم لە ماڵی گاربێت خوارد و لەوێ چاوم پێكەوت و زۆرمان گفتوگۆ كرد، بۆ سبەی ئێوارەش لەگەڵ من شیوی  كرد و لەم بانگهێشتنەدا مستەر كۆرنواڵیس بەشدار بوو لەگەڵ ناجی سوەیدى، ساسۆن ئەفەندی، سەید داود (كە ئامۆزای خانەوادەى نەقیبە) و عەبدوللەتیف مەندیلى بەسرە كە وەزیری بازرگانییە. لەم ڕۆژانەدا و لە ئێوارە خوانێكی زۆر خۆشى مەلیكدا زمانە عەرەبییەكەی مێجەر یۆنگ زۆر سەیر و سەرنجڕاكێش بوو كە تێیدا ماڵی سڵەیتەر، كۆڵۆنێڵ جۆیس (كە تازە ژنی هێنابوو بەڵام ئەو ئێوارەیە ژنەكەی لەوێ نەبوو)، كاپتن كڵەیتن و چەند وەزیرێكیش بەشدار بوون. خانمی سڵەیتەر و من بەرانبەر بە فەیسەڵ دانیشتین و لە بەر ئەوەى ئەم خانمە هیچ قسەیەكی نەكرد ئەوە دەمەتەقێكە بە زۆری ڕووی دەكردەوە كۆتایی مێزەكە كە ناجی سوەیدى و منی لێبووین و جەعفەریش بەرانبەرمان دانیشتبوو و لەگەڵ مەلیكدا كەوتبوونە گفتوگۆیەكی خۆشەوە.

ئەو دواینیوەڕۆیە هەموو لە ڕەیسس بووین و زۆر خۆش نەبوو چونكە دنیا زۆر گەرم و وەڕسهێن بوو، بەڵام لە بەر ئەوەی یەكەم هاتنی فەیسەڵ بوو من بە فەخری جەمیلم وت    بێت و منیش بگەیەنێت. من دەبوو چاودێریى بكەم بزانم پیاوماقووڵانی تر لەوێن (كە زۆر كەم بوون) و بانگهێشت كرابوون بۆ شوێنی تایبەتی مەلیك. ڕێكخەرانی بۆنەكە باش نەبوون لە كارەكەیاندا و كەمتەرخەمیی پێوە دیار بوو، بەڵام زۆر دەرفەت و كاتی باش رەخسا بۆ گفتوگۆ كردن لە سەر پاشەڕۆژی كوردەكان و دوو پیاوماقووڵی پیر و شكۆدار لێرەن، وەك نوێنەری كۆمەڵـگەی نەتەوەیی لە ئەستەمبووڵ، كە هاتوون بزانن هیچ شتێك دەكرێ لە مەسەلەى سەرپێخستنی كوردستانێكی سەربەخۆدا. ئەوان كاتێكی زۆریان لەگەڵ من بردەسەر و بە تەواوی نائومێد بوون لە قبووڵ كردنی هەر شێوەیەكی حكوومەت، نیشتمان یان هەر شتێكی تر بۆ ئاغا كوردە كێوییەكان لە وڵاتێكی شاخاوی و كێویتردا. من هەست و سۆزێكی گەرمم بۆ ئەم دوو پیرە بەڕێزە دەربڕی و ئێوارەی 21ی مانگ لەگەڵم شێویان كرد و كاپتن كڵەیتنم بانگ كرد بیانبینێ و تا كاتژمێر 11ی شەو لە سەر مەسەلەی نەتەوەیی كورد گفتوگۆمان كرد. بۆ سبەی بەیانیی كاتژمێر هەشت یەكێكیان هاتە ئۆفیسەكەم و ئاڵایەكی نەتەوەیی كوردیی تازە داهێنراوی پێشاندام و هاوزەمان بە نهێنی پێیوتم كە زۆر لە    هاوەڵە پیرەكەی تری دەترسێت هەموو كەشتییەكانی لە ئەستەمبووڵ سووتاندبێت بە هاتنی بۆ ئێرە و ڕەنگە ناچار بێت، ئەگەر ئێمە پشتگیریی نەكەین، خۆی بكاتە سەرۆكی تاقمە جەردەیەكی كورد و بە تەنها پەلاماری توركەكان بدات و ئەوجا بە هەناسە هەڵكێشانێكەوە وتی:

“وەك دەبینی، هیچ ئەڵتەرناتیڤێكی تری نیە”. من قەناعەتم وایە كەوا ئەڵتەرناتیڤی گونجاو بۆ رەفعەت بەگ ڕەنگە خانوویەكی بچكۆلەی قەشەنگ بێت لە قەراخ شاردا، بەڵام ئەوەیان گونجاو نیە بوترێ و بەو پێیە منیش ئەوە بە باشتر دەزانم بۆ هاوەڵەكەی. من پێشنیازم كرد بۆ سێر پێرسى كەوا گۆڕانكارییەكی خۆشە بۆ من ئەگەر بە شاژنی تاج لە سەر نەنراوی كوردستان دابنرێم و نامەوێ كۆسپ بخەمە ڕێگەی ئەگەر حەزی بەم كارە بێت و ڕەنگە ئێمە خەت و شێری بۆ بكەین.

ئەم دواینیوەڕۆیە چووم چایەكم لای فەیسەڵ خواردەوە و سەبارەت بە دانانی یاسا و ڕێسایەك بۆ میسۆپۆتامیا قسەمان كرد (چونكە دەبێ چوارچێوە و دیكۆرێكی خۆمان هەبێت). لەو دانیشتنەدا قسە و باسێكی زۆرمان لە سەر كوردستان كرد كە بە ڕای من مەلیكی خاون شكۆ   ژیرى و داناییەكی گەورەی تێدا خستەڕوو، كە بە ڕای ئەو بە هیچ شێوەیەك گونجاو نیە بۆ ئێمە و بۆ ئەویش دەستمان بە سەركێشییەكی كوردی بسووتێنین و یەكەم شت ئەوەیە كەوا دەبێ داوا لە كوردەكان بكرێت كەسێك لای خۆیانەوە دەسنیشان بكەن بۆ پۆستی مەلیك یان سەرۆك و كاكڵەی بزووتنەوەیەك دروست بكەن  ـ واتە لە ڕاستیدا فەیسەڵێكی كورد گەلاڵە بكەن. من بڕوا ناكەم هیچ كەسێكیان هەبێت و قەناعەتم وایە كە لەگەڵ كوردستان و ئەرمینیادا جاڕدانی ئاگربەسمان زیاتر دەبێت لە توانای جێبەجێ كردنمان و دەبێ لە ئێستادا زۆر بە وردی ئاگاداری ئەوە بین كە بە راشكاوانە ئەوە بسەلمێنین كەوا پوولێكمان نیە لە مەسەلەی سەربەخۆیی كورددا سەرفی بكەین، چونكە ئەگەر ئێمە خەڵكی وەك دوو برادەرە ئەستەمبووڵییەكەی من هان بدەین دەبێ تەنها بۆ ئەو ساتەوەختە دایاننێین كە پێویستمان پێیانبێت و ئەمەش ڕەنگە خراپترین ئەگەر بێت. ئەمە بەسە بۆ كورد، بەڵام ئەوان كاتی زۆریان دەوێ و من سەرلەبەیانییەكی تەواوم تەرخان كرد بۆ نووسینی دوو یاداشت لە بارەی ئەوانەوە بۆ سێر پێرسى و كۆڵن گاربێت.

دوێنێ، یەكشەممە، ئازادیم بە خۆم دا و لەگەڵ فەخری ئەفەندی بە ئۆتۆمبیل چووم بۆ باخەكانی سەرووی باقووبە و كاتژمێر 8ی بەیانی كەوتینەڕێ و دیمەنێكی هێند جوان بوو باوەڕ ناكەم هەرگیز بینیبێتم. ئەمساڵ خورما درەنگ پێگەیشت و هێشتا هەر بە دارخورماكانەوەیە بە هێشووی ئاڵتوونیی گەورە گەورە و لە ژێریشیاندا هەنار بە دارەوە شۆڕ بووەتەوە و دار پرتەقاڵەكانیش بەریان خەریكە پێدەگات و پرتەقاڵی سەوز ماتەی زەردیی داوە و ئەم باخە بەهەشتێكی خوا بوو بۆ خۆی. من لە ناو باخەكەدا بە سەرسوڕمانەوە پیاسەم دەكرد و مێو بە سەر  دار و كەپردا پەلى كوتابوو و لە ئاخر و ئۆخری بەریدا بوو، هێشووی زل زلى ترێی سپیش سێبەر و ساباتی بۆ كرابوو تا خۆر لێیان نەدات. دواجار نانی نیوەڕۆمان لەو دەشت و دەرە بۆ لێنرا كە بریتیبوو لە برنجی نایاب و مریشك و گۆشتی كوڵاو لە سەر ئاگری كز، لەگەڵ شەربەتی هەناردا بۆ خواردنەوە، كە لە ژێر سابات و كەپری داردا دانیشتینە سەرى. پاشان جووتیار و باخەوانەكانی فەخری هاتن بۆ لامان و بە چواردەوردا دانیشتن و لەگەڵمان كەوتنە دەمەتەقێ و ئێمەش خەریكی ناندان بووین بۆ ئەو پیرەمێردە هەشتا ساڵەی باپیری كە هەموو ئەوانیتری دەناسی، وەك لە دێبەرێكی گەورەی بەریتانیادا، تەنها ئەوەبوو كە ئەوان شەرمیان كەمتر بوو لە جووتیار و باخەوانەكانی ئێمە، كە سادەتر بوون. پاش نانخواردنی نیوەڕۆ چووین بۆ بینینی كوڕانی نەقیب: سەید سەفائەدین و سەید محێدین لەو ماڵەدا كەوا كاتی خۆی من و تۆ نانی نیوەڕۆمان تێدا   خوارد و باخەكەیان لەو كاتەدا جوانتر دێتە بەرچاو كە تۆ لێرەبوویت و پڕە لە داری میوەجات.

سەید محێدین پیاوێكى قورسە و زۆر سادە نیە و سیناتۆرێكی توركییە و وابزانم دەیەوێت وەك تورك بمێنێتەوە و لە پێش هاتنی فەیسەڵدا خانەنشین بووە و لە باخەكەی خۆیدا لە دیالە ژیان  دەباتەسەر و لەو كاتەوە هەرگیز نەگەڕاوەتەوە بۆ بەغدا. من خۆم شەخسی زۆرم خۆشدەوێ و باشترین كوڕانی نەقیبە، بەڵام دەبێ خۆی ساغ بكاتەوە ئایا خۆی بە ڕەعییەتێكی عێراقی دەزانێ یان توركی، خۆ ئەگەر ئەمەی دواییان هەڵبژێرێ وا چاكترە بچێتەوە بۆ ئەستەمبووڵ. من هەستێكی تەواوم هەیە كە ئێمە لە پێشكەوتنداین چونكە سەردانەكەی فەیسەڵ بۆ مووسڵ سەركەوتنێكی گەورە بوو و كاریگەرییەكی زۆر باشی لە بەغدا دروستكرد و مووسڵییەكان بایەخێكی گەورەیان پێدا و ئەو زۆر بە خۆشحاڵی لای  ئەوان و مستەر ناڵدەر گەڕایەوە و لە هەردوولا هەستێكی پڕ متمانە هاتە كایەوە. ئێستا ئەو كەوتووەتە هەستكردن بە بایەخی ئەو كەسانەی ئێمە بڕوامان پێیان هەبوو و مایەى رەزامەندى بوون لامان، نەك لە بەر ئەوەی ئێمە پەسەندمان دەكردن بەڵكو ئەو خۆی تاقیكردنەوە و بۆی دەركەوت چەند لە ناخەوە پاك و باشن. مستەر ناڵدەر لە لایەك و لەولاشەوە شێخ عەلی سڵێمانی دلێم كە هاتە بەغدا و بە دڵـگەرمی لەگەڵ خاوەن شكۆ دوا كە هەڵوێستی ئەمی لەبیرە و خەڵكێكی زۆر هەن بەوە دەزانن كە نەیداوەتە پاڵ ڕاپەرینی پار ساڵ و هاوكار بووە لە پاڕاستنی ئاشتی و ئاسایشدا و ئەو ئەمەی لە پێناوی حكوومەتی عەرەبی و حكوومەتی بەریتانیادا كردووە. فەیسەڵ زۆر خۆشحاڵ بوو بە دیداری و عەلی سڵێمانیش، كەوا كەسایەتییەكی گەورەی عێراقە، بە كەیفخۆشییەوە ڕۆیشت. ئەمە ڕێك ئەوەیە كە دەیخوازیت بیبینی و ئەویش دروستكردنی متمانەی دووسەرەیە لە نێوان پاشا و ڕەعییەتدا. ڕەفتار و هەڵسوكەوتی ئەم پیاوە زۆر یارمەتیدەری بوو و خێرا پێزانین و ناسینی دەوروبەری ڕۆڵی گەورەیان بینی لەمەدا.

سبەینێ مەلیك دەچێ بۆ گەشتێكی یەك هەفتەیی لە ناوچەی حیللە و هیوادارم بە قەد سەردانەكەی مووسڵ پڕ بەرهەم بێت. لەم ماوەیەدا پەیماننامەی نێوان بەریتانیا و حكوومەتی عێراق تەواو دەبێت و ئەم بەیانییە فەیسەڵ و سێر پێرسى و مێجەر یۆنگ یەكەم كۆنفرانسیان بەست و سێر پێرسى پێیوتم كەوا چاوەڕێی هیچ كۆسپ و تەگەرەیەك ناكات و كاتێ كە ڕایی كرا و خرایە نێو چوارچێوەی خۆیەوە ئەوە گەورەترین كۆسپ لە ڕێگەی ئێمەدا تەخت دەبێت. فەیسەڵ زۆر هەست بە مەترسی دەكات لەمە و ترسی ئەوەی هەیە لەوانەیە حكوومەتی بەریتانیا داوای لێبكات ڕازی بێت لە سەر هەل و مەرجێك كە ناسیۆنالیستەكان پێی ڕازی نەبن، وەك ئەوەی كە حكوومەتی فەرەنسی كردی لە سوریادا. لە بەر ئەوە تا ئەو مۆتەكەیە نەڕەوێتەوە ئەو هەست بە ئەمان ناكات، بەڵام من پێموایە هیچ هۆكارێك نیە بۆ ئەم دڵەڕاوكێیەی ئەو. سێر پێرسى زۆر باش دەزانێ كەوا چەند شتی جۆراوجۆر دەبێ  تاوتوێ و چارەسەر بكرێت، سەرباری ئەوەش ئێمە پێشتر بینیومانە، هەر كاتێ سێر پێرسى بڕیارێك بدات دەبێ مستەر چەرچڵ بە تەواوی پابەندی بێت. (ئەم بڕگەیە با هەر بۆ خۆمان بێت)! ئێمە ناتوانین بە ڕق و كینەوە متمانە بدەین بە شتێك و فەیسەڵ هەموو جار ئەوە دووپات دەكاتەوە كەوا ئەو هیچ توانا و دەسەڵاتێكی نیە بێ یارمەتیدانی ئێمە و هەڵبەت هیچ هۆیەك نیە كەوا گومان لە دڵسۆزیی ئەم پیاوە بكەین (من هیچ گومانێكم نیە). هەروەها دەبێ دید و بۆچوونی ئەو ڕەچاو بكەین كاتێ دەڵێ ئەگەر بڕوا بە بەرپرسیارێتیی من دەكرێ كە بووم بە مەلیكی عێراق ئەوە دەبێ بوارم بدرێتێ كە مەلیكێكی ڕاستەقینە بم، نەك دروستكراوی هێزێكی بێگانە، بە پێچەوانەوە كۆت و پێوەندێكی قورس دەخرێتە دەستی لە جێبەجێ كردنی ئەركێكدا كە لە باشترین حاڵەتیدا ئاسان نیە.

21

27ی تشرینى یەكەمی 1921

سەرلەبەیانیی 25ی مانگ لەجیاتی سێر پێرسى چووم بۆ بینینی فەیسەڵ و لەوێ من و مستەر كۆرنواڵیس و هەموو وەزیرەكان و زۆرێك لە پیاوماقووڵان لە مەجلیسەكەیدا بووین و پاش ئەوە لەگەڵ مستەر كۆرنواڵیس قاوەڵتیی بەیانیمان كرد. لای منەوە كاتم زۆر كەمە و بەردەوام مێشكم ماندووە و كارەكانم بە تەواوی ڕاناپەڕێنم و وای بیر لێدەكەمەوە هەفتەی داهاتوو بۆ ماوەی چەند ڕۆژێك بچمە سلێمانی. دوێنێ سێر پێرسى ئاهەنگێكی لە باخچەكەی خۆیدا سازكرد بۆ چاوپێكەوتنی مێجەر یۆنگ و یەكەمجار بوو مەجلیسێكی لەو جۆرە تێكەڵ ببەستین كە وەزیرە عەرەبەكان و هەندێك لە پیاوماقووڵان تێیدا بەشداربن و پێموابێت سەركەوتنێك بوو. ئەمڕۆ هەوڵ و تەقەلای ئاسایی خۆمان دا بۆ تەواو كردنی ئەو شتانەی كە سبەینێ بە پۆستی ئاسمانی دەڕوات و من نابینم ڕۆڵێكی بایەخدارم تێدا گێڕابێت. ئەمەریكییەك لە تارانەوە گەڕاوەتەوە بۆ ئێرە و ناوێكی بێفەڕی هەیە جۆن دۆس پاسۆس و پەیامنێری ڕۆژنامەی نیویۆرك تریبیۆن هات بۆ لام چایەكی لەگەڵ خواردمەوە و پیاوێكی خۆش مەشرەب و ڕۆحسووكە و گەشتێكی لە ئەستەمبووڵەوە كردووە بە سەر قەوقازدا و فرە چیرۆك و بەسەرهاتی پێیە بیگێڕێتەوە.

دوو نامەی شیرینی تۆ و دایكمم پێگەیشتووە كە هی 20 و 28ی سێپتەمبەرن و زۆر سوپاسی دایكم دەكەم بۆ گرفت و سەرئێشەكەی بە بۆنەی وتارەكەمەوە و بڵاوكراوە نیومانگییەكە جوانە، بەڵام دەترسم نەتوانم چیتر بۆیان بنووسم چونكە من هەموو دەم لە بەغدام و هیچ شتێك گونجاو نیە لە سەری بنووسی. من زۆر هەست بە لاوازی و بێتاقەتی دەكەم و هەر شتێكیش بوو لە بارەیەوە بنووسم هیچم پێناكرێت و هەر لەو سۆنگەیەشەوەیە ئەم نامەیە هێند بڵحە.

كچی دڵسۆزتان

  گێرتروود

22

9 ی تشرینى دووەمی 1921

باوكی خۆشەیستم، شتێكی باش نیە پێت بڵێم لە كوێم، چونكە بە پێی ئەوەی لە نەخشەی جەنگیدا دیاریكراوە دەبێ پابەند بم پێیەوە. من شەوی 2ی نۆڤەمبەر بەغدام بە شەمەندەفەر جێهێشت. هەڵبەت تووشی سەرسوڕمان نابیت ئەگەر ئاگادارى بارودۆخی هێڵی ئاسنی میسۆپۆتامیا بیت و ئەوە ببیستی كە پێش ئەوەی دەست بە جووڵە بكات مەكینەكەی  شكا و دوو سەعات دواتر و لە نیوەشەوداو دواجار كاتێ كە لە خەو هەڵسام لە قزل ڕەبات بووین، ڕێك لەو شوێنەدا كە هەردوكمان پێكەوە بەرەو سنووری ئێران دەڕۆیشتین. گرد و بەرزاییەكانی ئێران لە حوكمی چاودا بوون و شنەبایەكی خۆش و فێنكی ئەو بەرزاییانە پێشوازیت لێدەكات وەك خێر و بەرەكەت. ئێمە كاتژمێرێك یان زیاتر لە قزل ڕەبات ماینەوە و لێرە بە تۆبزی بڕی پێنج ڕوپێ  سزا بۆ هەر پاسپۆرتێكی حاجییە ئێرانییەكان وەردەگیرێت (مەبەستى زیارەتكەرانى شارە پیرۆزەكانى كەربەلا و نەجەفە ـ و) كە خۆیان دزیوەتەوە لە داواكاریی پۆلیس كە ئەو بڕە پارەیە لە بەغدا بدەن و سەرپێچییان كردووە. پاشان خۆم گۆڕی و بە هێلكەی كوڵاو قاوەڵتیم كرد لەگەڵ چایەكی گەرمی چاكدا و بەرەو كنگربان    كەوتینەڕێ و موعجیزەیەك بوو بۆ خۆی كە فارگۆنەكەی من لەوانیتر نەترازا، چونكە هێڵە ئاسنەكانی میزۆپۆتۆمیا هەژدە مانگ لەو دەمە كۆنترن كە تۆ بینیتن و ئێمەش پارەمان نیە بۆ كڕینی پێچكەی نوێ و كەرەستەی یەدەك و چاككردنەوە و جا وەرە بیر لە ئەنجامەكەی بكەرەوە. دەسكی دەرگاكان لە كردنەوەدا بەدەستتەوە دێن، ئەگەر نەزانی و ئاگات لە خۆت نەبوو پەنجەرەیەكت كردەوە ئەوە جارێكی تر داناخرێتەوە، بەلووعە لە حەمام و دەستشۆرەكاندا لە كاركەوتوون و ئەگەر بمەوێ ئاوی گەرمم لە مەكینەكەوە دەست بكەوێت دەبێ كونی حەوزەكە بە كاغەز بگرم. لە كنگربان ئۆتۆمبیل چاوەڕێی دەكردم و كاتژمێر شەشی ئێوارە گەیشتمە كەركووك و لەوێ لەگەڵ ڕاوێژكاری لیواكە، مێجەر مارشاڵ مامەوە. هەمان هۆدە لە حەوشە بچوكەكەدا و جۆگە ئاوێكی پێدا تێدەپەڕی. بیرت دێتەوە كە تۆ لە هۆدەكەی ئەوبەر بوویت؟ من گفتوگۆیەكی دوور و درێژم كرد لەگەڵ مێجەر مارشاڵ سەبارەت بە مەسەلە سیاسییەكانی ناوچەكە و خۆت دەزانی كەركووك زۆر بە توندی سوێندی بەیعەتی بۆ فەیسەڵ ڕەتكردەوەو ئێرە نیوەی توركە و نیوەی كوردە و خەڵكە توركەكەی راشكاوانە دەخوازن بگەڕێنەوە سەر توركیا و لە بەر ئەوەی كەركووك دەكەوێتە ناوەڕاستی عێراقەوە ئەو مەسەلەیە سەرناگرێ و بەشە كوردەكەشی ئەگەری ئەوە هەیە بدەنە پاڵ دەوڵەتێكی كوردی ئەگەر هاتە ئاراوە. ئێستا تەواوی لیواكە لە ژێر ڕكێفی موتەسەڕیفێكی عەرەبدایە كە زات ناكات ئاڵای عەرەبى هەڵبكات و ناشتوانێ ئاڵای بەریتانیا هەڵبكات و بەو ڕەنگە هیچ ئاڵایەكی هەڵنەكردووە. فەتاح پاشای موتەسەڕیف هات بۆ ئێوارە خوانێك كە بۆ من ساز كرابوو، فەتاح پاشا كەم تا زۆر كاربەدەستێكی شكۆداری سەر بە قوتابخانەی كۆنە و خۆی لە دۆخێكی زۆر ناسكدا دەبینێ و تەنها قەرەبووی ئەو دۆخەی دۆستایەتییە بەتینەكەیەتی لەگەڵ ڕاوێژكاردا.

بۆ بەیانیی ڕۆژی دواتر گەورە پیاوی شار سەردانێكی كردم، كە تورك بوو و كەسی سەرەكی بوو لە بزووتنەوەی سەر بە توركدا، بەڵام لەبەر ئەوەی تا ئێستا دۆخی كەركووك دیاری نەكرابوو هیچمان باس نەكرد لە باسی كەشوهەوا و بەروبووم بەولاوە. هەر ئەمڕۆش كاتژمێر 11 بە ئۆتۆمبێل بەرەو ڕۆژهەڵات بەڕێكەوتم بۆ سلێمانی ڕێگەكە یەكەمجار بە دێهاتی ناڕێكوپێكدا دەڕۆیشت بە ناو گرد و تەپۆڵكەی بچووكدا و وردە وردە هەردە و هەڵەت خۆیان كۆدەكردەوە و بەرزاییەكیان پێكهێنا و شۆڕ بووەوە بۆ دەشتایی و نزماییەكی پڕ گژوگیا كە بەهارێكی بچووك سەریهەڵدابوو و گوڵی پەمەیی پەیدا بووبوو. كاتێ گەیشتینە ترۆپكی بەرزاییەكە لە خوارەوە دۆڵی چەمچەماڵمان بینی كە ڕیزە شاخێكی ڕاستەقینە لەوسەریەوە بوو، ڕووتەن و بەردین. لە پشتی ئەویشەوە زنجیرە لە دوای زنجیرە چیا بەرزاییەكانی هەرێمی كوردیان پێكدەهێنا و تا بەرەو سنووری ئێران بڕۆیشتیتایەی بەرزتر دەبووەوە. دوور بەرەو باكووری ڕۆژهەڵات بڕۆیت هاوینە هەواری قەندیل داغە كە لووتكە بە بەفر داپۆشراوەكانی چووە بە ئاسماندا. گرد و دۆڵەكان تا ڕادەیەك وەك یەك بوون نە خەڵكیان تێدابوو و نە كشتوكاڵ و تا چاو بڕ بكات فەرشی گژوگیا ئەو ناوەی گرتبوو و ترۆپكە شاخی بەردین لووتی ژەندبووە ئاسمان و هیچ شتێكی تر نەبوو. لەو ناوەدا تەنها لە بەر پێماندا گوندی چەمچەماڵ دیاربوو، خانووی قوڕی ساپیتە فلات لە بن گردێكی كۆنی میدییەكاندا بە تەنیشتی یەكترەوە دروستكرابوو (چەمچەماڵ لەو دەمەشدا شارۆچكەیەك بووە نەك گوند ـ و). ئەمە وڵاتی عەشیرەتی هەمەوەندی بەهێز بوو كە بەردەوام مایەی ترس و تۆقاندن بوون بۆ حكوومەت و لەو گوندە پەرت و بڵاوانەی نێوان گرد و تەپۆڵكە و دۆڵەكاندا دەژیان و تا ئەو دەمەی ئێمە هاتین و تەماشامان كرد. هەمەوەند كۆمەڵێكن لە نزیكەی دوو سەد ئاغایەكی چاوچنۆك زیاتر نین و لەلایەن جێگرێكی ئەفسەری سیاسیی بەریتانییەوە  كۆنترۆڵ و جڵەو كراون و ئێمە تەنها خانوویەكی گەورەمان بۆ دروستكردبوو كە ئاڵای بەریتانیاى بە سەرەوە دەشەكایەوە، بەڵام هێشتا نەچووەتە ناوی و من لە ماڵە كوردێكی بچووكدا بینیم لە سەر سندووقێكی هەڵەوگێڕاو نانی نیوەڕۆی دەخوارد و ئاغایەكی هەمەوەندیش بە تەنیشتیەوە چوارمشقی دانیشتبوو، بۆ خۆیان دەمەتەقێیان دەكرد. من دە دەقیقەیەك لە لای دانیشتم و لەو كاتەدا تایەیەكی ئۆتۆمبیلەكەیان گۆڕی و پاشان بە سەر ناوچەیەكی هەردەو هەڵەتدا ڕێمان گرتەبەر و وردە وردە بەرەو دەروازەی زنجیرە شاخێك هەڵكشاین كە دەربەندی بازیان بوو، ئێمە لێرە لە هاوینی 1919دا هێزەكانی شێخ مەحموودمان شكاند و تەفروتوونامان كردن . ئەوەش چیرۆكێكی دوور و درێژ و پڕ لە پێچ و پەنایە و تەماشای هەر كتێبێكی سپی بكەیت تێدەگەی مەسەلە چی بووە (ئەو كتێبە یان ڕاپۆرتە بەرگ سپییەیە كە دەوڵەت دەریدەكرد لە سەر مەسەلە یان كێشەیەك ــ و). لە دەربەندەكەدا ژنە كوردێكی بەژن و باڵا گۆشتنى ڕووگەشمان بینی كۆرپەیەكی بە كۆڵیەوە دابەستبوو و مانگایەكیش بە بارەوە هێدی هێدی لە پێشیەوە دەڕۆیشت و ئاژەڵێكی بارهەڵـگری سەیر بوو. هەر كە ئێمەی بینی سڵەمییەوە و دای بە تاوێر و بەردی قەراخ ڕێگەكەدا و بە بارەوە گلاو كەوت. منداڵەكە دەستی كردە گریان و ژنە كەوتە لێدانی  مانگاكە و ئەمیش كەوتە لنگە فرتێ و وامزانی هەر ئێستا قاچی دەشكێ. ئێمە بە ئۆتۆمبیلەكەمان لە كوردستان ئەم هەراو بەزمەمان نایەوە! لە بەر ئەوە بە هەڵەداوان ڕامانكرد و بارەكەمان لە مانگاكە داگرت و هەڵمانسانە سەر پێ و منداڵەكەمان گرت تا دایكەكە سەرلەنوێ بارەكەی توند كردەوە و ئەوجا بە خۆشییەوە هەر یەكە بە ڕێی خۆماندا ڕۆیشتین. ڕێگەی ئێمە خۆش و پان و پۆڕ بوو و بە دۆڵی بازیاندا خلۆر بووینەوە كە بە پڵ و پووشی زەردی ئاڵتوونی داپۆشرابوو، لەوبەری دۆڵەكەوە زنجیرە شاخێكی نزمترمان چاو كرد كە تاسڵووجە داغی ناو بوو. لێرە بە لێژاییەكی پڕ لە پووشی نەرمدا وەستاین بۆ نانخواردنی نیوەڕۆ و لەولامانەوە خێزانێكی كورد لۆكەیان دەچنی لە مەزرایەكی بچووكدا و نەمزانی ئەمانە لە كوێوە هاتوون چونكە هیچ گوندێكم لەو ناوەدا بەرچاو نەكەوت و پاشان دەربەندی تاسڵووجەمان بڕی و چووین بە دیوی دۆڵی سلێمانیدا كە زۆر بەرفراوانتر بوو لە بازیان و چەمچەماڵ. دوور لە خواری دۆڵەكە دار و خانووەكانی شاری سلێمانیمان بەدیكرد، كە لە نزیكەی كاتژمێر پێنجدا پێیگەیشتین و لەو ناوەدا لەملاو لەولاوە چەند گوندێكمان بینی و خەڵك بە ڕێگاوە بوون بۆ ماڵی خۆیان و ئافرەتان گورزە پووش و چیلكەیان بە كۆڵ هەڵـگرتبوو كە 8 تا 10 پێ درێژ و 4 پێ پان بوو. ئەوان وەك هەندێ جۆری قالۆنچەی سەیر دەهاتنە بەرچاو كە كۆمەڵە پووشەكە بە سەر پشتی چەماوەیانەوە بوو و هیچی تر نەدەبینرا لە دوو قولەپێی بەهێز بەولاوە و لەرەلەری گورزەیەك. خۆر لە ئاوابووندا بوو كە ئێمە گەیشتینە سلێمانی و یەكڕاست چووین بۆ ماڵی مێجەر گۆڵدسمیس، كە خانوویەكی قەشەنگ بوو لە سەر شێوەی ئێرانی و باخێكی تێدابوو پڕ لە دار هەناری گەڵا زەرد هەڵـگەڕاو لەگەڵ چەند ڕیزە كۆسمۆسێكی درەنگ گوڵكردوو. بە هۆڵێكی بچووكدا دەچیتە ژوورەوە بۆ دیوەخانێكی گەورە و فراوان و چەند كۆڵەكەیەكی دارینی تێدایە و دەڕوانێتە سەر باخچەیەكدا و لەوێ دانیشتین و چایان بۆ هێناین. هۆدەی خەوتنەكەی من، وەك هەر هۆدەیەكی خەوتنی ئێرانی پەنجەرەی تەلبەندی هەبوو و بە سەر باخچەكەدا دەیڕوانی لە بەرانبەر هۆدەی دیوەخانەوە و لە پشتیشیەوە هۆدەیەكی گەورەی پێشوازی خرابووە سەر خانووەكە. شوێنەكە خۆش و دیوارەكان سپی و تاقمی جوان لە دیوارەكاندا هەبوون و بنمیچی دارین و ئاگردانی گەورە گەورە زۆری دڵخۆش كردین كە لە ئێوارەدا ئاگری دارمان دەبینی دەسووتا. سلێمانی دەكەوێتە سەر بەرزیی 2 ــ 3 هەزار پێ (لە ڕووی دەریاوە) و وەرزی ئەم درەنگانی پایزە زۆر خۆشە. لێرە كاپتن بێلی، كە دەمێكە دەیناسم و خۆشمدەوێ، یاریدەدەری مێجەر گۆڵدسمیسە، سكرتێرەكەشی كاپتن هۆڵتە (كە ڕۆژی دوای ئەوەی من گەیشتم تووشی ئاوڵە بوو و لە جێگادا كەوتووە، داماو خۆی)، هەروەها ئەفسەرەكانی لێڤی كاپتن ماكانت و كاپتن بۆرن بوون، یەكەمیان كەسێكی چاك بوو كە بە عادەت زۆربەی كاتی لەگەڵ من بە سەردەبرد كاتێ كە دەهات بۆ بەغدا. ئێمە سلێمانی وەك لیوایەك بەڕێوە دەبەین كە هەموو دانیشتووانی كوردن، ڕاستەوخۆ لە ژێر دەسەڵاتی كۆمیسیاری باڵادا و جیا لە عێراق و هیچی تری لەگەڵ ناكرێت. لێڤییەكانی كوردن و هێزی بەریتانیمان لەوێ نیە و هەموو كاربەدەستان كوردن و هەموو كار و ڕایی كردنی مامەڵەیەك هەر بە زمانى كوردی دەكرێت. ئێمە ئێستا وا خەریكی دامەزراندنی ئەنجومەنێكی هەڵبژێردراوین كە پێكهاتووە لە چوار ئەندامی حكوومەت (مێجەر گۆڵدسمیس خۆی و سێ كاربەدەستی كورد)، چوار نوێنەری شاری سلێمانی و یەك نوێنەریش لە هەر قەزایەك لە چوار قەزاكە. ئەم چوارەیان ئێستا لە پرۆسەی هەڵبژارندان و كارێكە پێی ئاشنا نین چونكە پێشتر هیچ كەس هەڵنەبژێردراوە و كاندیدەكان زۆر شەرم دەكەن بێنە پێشەوە، بە ڕادەیەك كە دەبێ ئەفسەرە سیاسییەكان ڕازییان بكەن و هەوڵیان لەگەڵ بدەن. بە هەر حاڵ ئێمە كەم تا زۆر هەر نوێنەرایەتییەكی وڵاتمان دەستدەكەوێت وردە وردە بەرپرسیارێتیی دەخەینە ئەستۆ. لە ئێستادا مێجەر گوڵدسمیس دەبێتە سەرۆكی ئەو ئەنجومەنە چونكە كەسێك نیە لەو شیاوتر بێت بۆ ئەو پۆستە، بەڵام دواتر بەهیواین بتوانن كەسێك هەڵبژێرن بۆ ئەو شوێنە و ڕەنگە پیاوێكی خوێندەواری خۆوڵاتی بێت، كە زۆرێكیان لە ئەستەمبووڵ فێر بوون، چونكە توركەكان كاتی خۆی زۆر لە بنەماڵە گەورەكانیان بردووە بۆ پایتەخت. هەر كاتێكدا كە ئەوە ئەنجامدرا ئەوە پێكهاتەكە تەواو دەبێت، كە قەوارەیەكی ناوخۆیی حوكمی حكوومەتی كوردی دەكات لە ژێر دەسەڵاتی كۆمیسیۆنی باڵادا و هەڵبەت ئەمە شتێكی سەرسامكەرە كە لەم ماوەیەدا كار لەم بوارەدا كراوە. لە كاتی دەسەڵاتی توركدا تەواوی هەرێمەكە لە پشێوی و نائارامیدا بووە و هیچ ڕێگاوبانێك سەلامەتی و ئەمانی تێدا نەبووە و هیچ كارێكی حكوومەت جێبەجێ نەدەكرا، بەڵام ئێستا بە ئاشتی و ئارامى كار بەڕێوەدەچێت و چاوچنۆكی و تەماحكاریی سەرۆك و ئاغای تیرە و هۆزەكان بەری لێگیراوە و جووتیار ڕەز و باخی خۆی دەكێڵێ و تووتنی خۆی دەكات و بەروبوومی خۆی بە سەلامەتی دێنێتە بازاڕی سلێمانییەوە و ئێستا بە سەرپەرشتییەكى كەم خەڵكەكە خۆیان كاروبارى خۆیان بەڕێوەدەبەن. داهاتی كورد بە ڕەسمی دەخەمڵێنرێت و هەروەها ئەرك و كارەكانی لێڤیش، بەڵام دەفتەر و تۆمارەكانی دەبێ بخرێنە بەر پشكنینی كاربەدەستی بەریتانی لە هەموو شوێنێك بۆ پشكنین و ڕێكخستن و ڕاست ڕاگرتنی ژمێریاری بە شێوەیەكی دروست و هەڵبەت كاربەدەستی بەریتانی هەموو ئەوانە بە كوردی دەكات. من ڕۆژانی پێنج و شەشی ئەم مانگەم لە سلێمانی بەسەربرد و یەكەم ڕۆژم تەرخان كرد بۆ بینینی ئەم شارە جوان و بچووكە و گەڕان بە ناو بازاڕە قەشەنگەكانیدا. كوردەكان خەڵكێكی ڕووخۆش و بە وێڵ و ماریفەتن. مێزەری زلى تێكەڵاویان (مەبەستى تێكەڵكردنی مشكی و جامانەیە كە ئەو دەمە باو بووە ـ وەرگێڕ) شەرواڵی فشەڵ و پانوپۆڕیان كە لە ناوقەدیانەوە بە چەندین یارد پشتێنی قوماشی لۆكە بە شێوەی قوڵف و گرێ گرێ دەیبەستن و چاكەتێكی كورتی بە سەردا لە بەر دەكەن و سەیر دەنوێنێ لە تەماشا كردندا. پیاوانی شار كەوای رنگاوڕەنگ یان بە ئاوڕێشم چنراو لە بەر دەكەن لە ژێر چاكەتێكی زۆر كورتدا (مەبەستی سەڵتەیە ـ و) و خەنجەرێكی مشتوو زیو دەكەن بە بەر پشتێنەكەیاندا، بەڵام كەس ئێستا پێویستی بەوە نیە چەك هەڵبگرێت و بچێ بۆ سەر ئیشی   ڕۆژانەی و بەم پێیە ئەگەر ڕەزنێ دوان فیشەك لەخۆ بدەیت و بە چواردەوری شاردا بسووڕێیتەوە و خۆت با بدەیت قەیناكە بەڵام نەك لە ناو شاردا. لای ئێوارە هەر سێ كاربەدەستەكەی حكوومەت هاتن بۆ لام، كە قازی و ماڵ مودیری (بەڕێوەبەرى داهات) و دادەوەر بوون. ئەمان هەموویان بە عەرەبی قسەیان دەكرد و خێرا خێرا جەختیان لە سەر ئەوە دەكردەوە بۆم كە هیچیان لەگەڵ عێراق و فەیسەڵدا نیە.

سلێمانیی سەربەخۆ ــ من تەنانەت ناڵێم كوردستان ــ شتێكە كە ئەوان فەرامۆشیان كردووە و لەگەڵ ئێمەدا هاوكار بن و ئامۆژگاریی كاربەدەستانی كورد بكەن و ئەگەر توانیمان پارە پەیدا بكەین هێڵێكی ئاسن لە كەركووكەوە ڕاكێشین بۆ ئێرە ئەوە منەتبار دەبن، بەڵام من پێمڕاگەیاندن كە ئەم خاڵەیان پێدەچێت جێبەجێ نەبێت. ڕۆژی شەشی مانگ باران بوو بەڵام من سەرلەبەیانییەكەی بەخۆشییەوە لە بناری شاخدا ئەسپ سوارییەكی چاكم  كرد و جەندرمەیەكی عەرەبیزان وەك ڕێپیشاندەر یاوەریی دەكردم. پاش نیوەڕۆ لەگەڵ كاپتن ماكانت سەردانی سەربازگەى لێڤیم كرد لەگەڵ نەخۆشخانەی سەربازی و چەند شوێنێكی تر و یەك لە سەربازگەكانیان خانووە گەورەكەی شێخ مەحموود بوو. دواتر هەر چوار ئەندامە هەڵبژێردراوەكەی ئەنجومەن هاتنە لام و پێكەوە چایەكمان خواردەوە و سیانیان بە عەرەبی قسەیان دەكرد و هیوام بۆ خواستن بە گشتی سەركەوتوو بن لە كاروباری ئەنجومەن و حكوومەتەكەیاندا و وتیشم ئێمە دەمانەوێ لە هەلومەرج و دۆخێكی باشدا بن لەگەڵ عێراق و چ حكوومەتێك هەڵدەبژێرن لای خۆتانە. هەروەها ڕەزا بەگی قایمقامیش هات و ئاماژەی بەوە كرد كەوا ڕەنگە كەركووكیش بیەوێت بێتە سەر سلێمانی بەڵام من ئەو مەسەلەیەم پێ قبووڵ نەبوو و بەدڵنیاییەوە ئەو هەستەم لا دروست بووبوو كەوا كەركووك ناداتە پاڵ كەس   (لەبەر هۆۆیەکی بەجێ) pour le bon motif. بە هەر حاڵ ئەوان دەبێ نەخشەی كاری خۆیان دابڕێژن بۆ ڕزگار بوون بەڵام ئومێدم وایە ڕێگای گەوجانە نەگرنە بەر. سەرلەئێوارە بوو بە باران و هەورە  گرمە و لە بەر ئەوە زۆرم هیوا نەما بەو گەشتەی بەنیازی بووم لە ناوچە شاخاوییەكاندا بەڵام بۆ بەیانیی حەوتی مانگ هەور بە ئاسمانەوە نەما و دنیا لە دوای ئەو بارانە ساف و ڕوون بوو. بەم پێیە بەیانیی كاتژمێر نۆ من و كاپتن بێلی كەوتینەڕێ بە یاوەریی دووسێ جەندرمە كە بەرگی ڕەسمیی سەرنجڕاكێشیان پۆشیبوو بە جۆرێك كەوا لەگەڵ پێگە و پایەبەرزیی ئێمەدا بگونجێ (یەكێكیان كە ناوی ساڵح بەگ بوو و عەرەبی زانێكی باش بوو بە دەستەجلێكی قاوەیی و نەخشی چنراوی ئاڵتوونییەوە، كەوتە تەك من) و زەیا بە جووتێ هێسترەوە كە جانتا و تفاقمانیان هەڵـگرتبوو بە دوامانەوە بوو. من هیچێكی ئەوتۆم لەگەڵ خۆم نەبردبوو بێجگە لە كورسی و  دەستشۆر و دەستێك جل و كیسە خەوێك و ئەمە هەموو ئەو شتانەیە كە لە كوردستاندا پێویستت پێیانە و تۆش لەوە تێدەگەیت كەوا جارێكی تر دڵم كەوتە ترپە ترپ بە زرنگەی زەنگی كاروان لە ئاوزەنگییەكانی لای پاژنەمەوە. ئێمە بە سواریی ئەسپ یەكڕاست بە شاخەكەی پشتی شاری سلێمانیدا سەركەوتین و لەوێوە و لە سەر لووتكەی شاخەوە بە سەر تەواوی وڵاتەكەدا دەمانڕوانی و دنیایەك زنجیرە شاخی پڕ دارستانمان بینی و لووتكە شاخێكی ڕووتەنیش كە سنووری ئێرانی دیاری دەكرد. كاتێ چووینە ئەودیودا وردە وردە دەوەن و داربەڕووەكان گەورەو گەورەتر دەبوون، لێرە و لەوێ هەندێك گۆڕستانمان بینی كە دار تیایدا پیرۆزە و تەنانەت نابێ لقە دارێكیشی لێببڕیت بۆ سووتاندن و داری زل زل سێبەریان كردبوو بۆ كێلە بەردی سەر گۆڕەكان. من وایبۆدەچم كە ئیسلام بە سووكی تەماشای خەڵكی چیانشین دەكات، چونكە لە هەموو لا گۆڕی پیرۆزت بەرچاو دەكەوێت پیاوچاكێكی لەبیركراو یان تەواو خەیاڵی لە ناویاندا نێژراوە و كۆمەڵە بەردێكی لە سەر كەڵەكە كراوە بۆ دیاری كردنی مەزارەكەی و داربەڕووی لارولوێریان لە سەر دەڕوێ و ڕێبواران پارچە قوماشی شەكاوە بە لقەكانیدا هەڵدەواسن لە هەر لایە ترۆپكی گرد و   تەپۆڵكەیە و مەزاری ئەم حاجی و ئەو شێخن وەك خواپەرستێكی كۆن لە موسڵمانانی ئەمڕۆ دەخوازن پارچە پەڕۆ یان نازانم چییەك بكەنە نەزر بۆ ئەو شوێنەی باوباپیرانیان كڕنووشیان بۆ چیاكان و نووری بەهەشت بردووە. بەم جۆرە بە دۆڵێكی قووڵدا شۆڕ بووینەوە كە لاپاڵەكانی بە داربەڕوو داپۆشراوە و هەموو شتێك جوانیی ئەو پایزە درەنگوەختەی دەنواند. داربەڕووەكان بڕبڕ لە بەرگی   قاوەیی و سەوزدا دەدڕەوشانەوە، داربی،  دارچنار و سپیندار لە بنی دۆڵەكەدا دیمەنێكی دڵڕفێنی زەرد و ئاڵتوونییان دەنواند. لێرە و لەوێش ڕەزە ترێ هێشتا هەندێ لە دوا گەڵامێوی درەوشاوەیان پێوە مابوو، یان چڵە مێوێك لە سەرەوە تا خوار خۆی لە داربەڕوویەك ئاڵاندووە. لەو كاتەدا هێزێكی سوارە هاتە سەر ڕێگەمان و ئەمانە قایمقامی ئەو ناوچەیە و دەستوپێوەندی بوون و هاتبوونە پێشوازیی كاپتن بێلییەوە و كەوتنە تەكمان بۆ بارەگای قەزا، كە گوندێكی بچووك بوو پێیان دەوت كانی سارد و لەوێ لە بیناكانی حكوومەتدا دایانبەزاندین. ڕەنگە وابزانن خانووی گەورە و پۆشتە و پەرداخ بووبێتن؟ با بۆت باس بكەم چۆن خانوویەك بوو، سێ ژووری لە  قوڕ و بەرد دروستكراو بە سەر هەیوانێكی قوڕدا  كراوەتەوە و بنمیچەكەی قامیش و چەند لقە دارێك بوو، هەر سێ دەرگاكە قاپیی پێوە نەبوو، ئەم هۆدانە هیچ پەنجەرەیان تێدا نەبوو لە كونێك زیاتر لە بنمیچی هۆدەكاندا بۆ ئەوەی دووكەڵی ئاگردانی ناوەڕاستی هۆدەكانی لێوە دەرچێت كاتێ ئاگریان تێدا دەكرێتەوە. من زانیم دووكەڵ دەرناچێت چونكە بە شەو جەندرمەكانمان لە هۆدەكەی بەرانبەری ئەوەی من ئاگریان كردەوە و دووكەڵەكەی هەموو هاتە ژوورەكانی ترەوە تا بە شتێك گرتیان. لە هەیوانەكەدا سفرە ڕاخرا و نانێكی بەتامیان بۆ كردبووین كە بریتی بوو لە برنج و گۆشتی كوڵاو و ماستاوی سوێر و ترێی ڕەشی بچووك كە دوا بەری ترێ بوو لەم شاخانەدا. كاپتن بێلی دواینیوەڕۆكەی زۆر سەرقاڵ بوو و یەكەمجار پێنج شەش بازرگانی كۆكردەوە كە لە سلێمانییەوە هاتبوون بۆ كڕینی تووتنی ئەو وەرزە لە دێهاتی ئەو دەوروبەرە و لەگەڵیاندا ئەو نرخەی بڕییەوە كە ئامادە بوون بیدەن بۆ كڕینی تووتن و بەو پێیە دەكرا دە یەكی حكوومەت بە ڕاستی بخەمڵێنرێت. دوای ئەوە چووە سەر حیسابی عەبدوڵا ئەفەندیی كاربەدەستی ناوخۆیی داهات و چاوی بە كارەكانیدا خشاندەوە لە دەفتەر و تۆمارەكانیدا و پەڕە پەڕە هەڵیدایەوە كە هەمووی بە زمانی كوردی نووسیبووەوە و عەبدوڵا ئەفەندی بە شێوەیەكی سەرنجڕاكێش دەفتەر و تۆمارەكانی خۆی بە رێكوپێكی ڕاگرتبوو. بەڵام من بەجێمهێشتن و بۆ خۆم كەوتمە گەڕان لە دۆڵەكەدا لە خوار ئاواییەوە بە ڕاڕەوە پر گژوگیاكاندا و بە ناو پەڵە تووتنە چێنراوەكاندا و پەڵە جۆی سەوزی زستانەدا، تا گەیشتمە بن دارتوویەكی ئاڵتوونی و لەوێ بۆ خۆم پاڵمدایەوە و تەماشای زنجیرە شاخی شین و دارچنارم دەكرد كە لە ناو چەمەكەوە هەڵكشابوون و دەدرەوشانەوە. دەمەو خۆراوا   گەڕامەوە و ڕوانیم كاپتن بێلی ژمێریاریی خۆی تەواو كردووە و لە پێش نانی ئێوارەدا چەندین پیاڵە چای شیرینیان بۆ هێناین و هەر كە پیاڵەیەكت دەخواردەوە خێرا یەكێكی تریان بۆ دەهێنایت و هیچ سوودی نەبوو بتوتایە بەسە ئیتر ناخۆمەوە. لەوێ باسی گالیپۆڵی مان كرد كەوا كاپتن بێلی شەش مانگى تێدا بەسەربردبوو وەك ئەفسەری تۆپخانە تا تووشی نەخۆشیی تایفۆیید (گرانەتا) بووبوو و لە پێش هێرشەكەدا ناردبوویانەوە بۆ ماڵەوە. لەم شەڕەدا چل ئەفسەر بێسەروشوێن بوون لە فەوجەكەدا و بگرە فەوجەكە خۆیشی نەما و تەفروتوونا بوو. وادیارە باوەڕ ناكرێ لە ناو ئەم چیا هێمن و بێدەنگانەی كورددا شێت و شبرێكی لەم چەشنە لە ماوەیەكی كەمدا دنیا بگەڕێ.

بۆ نانى شێوان لە نانخواردنی نیوەڕۆ زیاترمان خوارد و دواتر هەر لە هەیوانەكەدا لێی خەوتم، چونكە شەو لە كانی سارددا بە واتا خەوتن. بۆ سبەى بەیانیى 8ی نۆڤەمبەر، كەشێكی خۆش و بێ هەوری هەبوو، تەنها ئەوەندە سارد بوو ناچا بیت بە دوای گەرمیی خۆردا بگەڕێیت كە سێ سەعات زیاتر بوو هەڵاتبوو بەڵام ئەوەندە تینی نەبوو وا هەست بكەم جلە تەنكەكانی ئەسپ سواریم لێ ببێتە بار. كاپتن بێلی بە ئەرك گەڕایەوە بۆ سلێمانی و زۆرم خەفەت خوارد بۆ ئەو جیابوونەوەیە و بەیانیی كاتژمێر هەشت لەگەڵ ساڵح بەگ و زەیا و دوو هێستر و سێ جەندرمەی تر بەڕێكەوتم، نەك لە بەر سەلامەتی بەڵكو بۆ ڕاگرتنی   شان و شكۆی كاروانەكەم. گەشتەكەم حەوت كاتژمێری سواریی برد بۆ شیوەكەڵ كە نیو سەعات لە سنووری ئێرانەوە دوور بوو. من هەرگیز وڵاتی وا جوان و دڵڕفێنم بە چاو نەدیوە و سێ جار ڕاڕەوی هەورازمان هەڵكشا بۆ دوو یان سێ هەزار  پێ و پاشان دوو یان سێ هەزار پێ شۆڕ دەبووینەوە بۆ شیوێكی تر و بە ناو پەڵە داربەڕووی قاوەیی سوورباودا بەو لاپاڵ و نشێویانەدا و زینی ئەسپەكانمان لەم هەوراز و لێژییەی دۆڵ و شیوەكاندا دەخزا و لارەسەنگ دەبوو. چەم و شیوەكان پڕبوون لە دار قەزوان و چنار و سپیندار و بی و تووتڕك بە گوێی جۆگە ئاوەكاندا و ئێمە لە سێ چەم و ئاومان دا و پەڕینەوە چونكە وەرزەكەی پایز بوو و لە بەهاراندا هەرگیز بواری پەڕینەوە نادەن لە بەر ئاو زۆرییان. هەموو قەدپاڵی گرد و چیاكان یەكپارچە ڕەزو دار و دەوەن بوون و سەوزەگیایەكی نەرمیش سەری دەرهێنابوو، بەڵام ئەم ناوە هەمووی چۆڵ بوو و بە درێژایی ڕۆژەڕێیەكمان چل كەس كەمترمان بینی بە كاروانی بچووك بچووك كە بارە تووتن یان گوێزیان پێبوو بۆ بازاڕی سلێمانی لەگەڵ ژمارەیەكی كەمی ئاوارەی ئێران كە لە بەر ئاژاوە و پشێویی ئەو سنوورانە هەڵاتبوون و هەندێ شڕكە و پڕكەی ناوماڵیان لەگەڵ خۆ هێنابوو. كوردستانی بەری لای ئێمە بووبووە جۆرێك لە پەناگە و داڵدە بە هۆی ئاشتی و ئارامی و بەڕێوەبردنی دادپەروەرانەوە و چاودێریی ژمارەیەكی كەم گەنجی ئینگلیزەوە. لە هەر شوێنێكی ڕێگا تووشی هەر پیاوێك ببوایەم دەوەستا و سڵاوی بۆ دەكردم، نەك لە بەر شەخسی خۆم بەڵكو لە بەر گەورەیی و خێرخوازیی حكوومەتەكەم بێجگە لەوەش كە غەریب بووم و بۆ ماوەیەكی كاتی لە ناو خەڵكێكی میوان پەروەردا بووم.

پاش ئەوەی چەمی سێهەممان بڕی، كە لە هەمووی جوانتر و دڵڕفێنتر بوو، ڕێك بەرەو شاخەكەی سنوور هەڵدەزناین بەڵام بە ڕێگایەكی پێچاوپێچى بێكۆتاییدا. شتێكی زۆر گرنگە كە هاتنت بۆ كوردستان تەنها لە پایزدا بێت بۆ بینینی گوڵى سۆرنجانی زەرد. هەموو قەدپاڵێكی بەردین تۆپی ئاڵتوونیی گوڵی ئەو ڕووەكەی لە سەر پەرت و بڵاو بووەتەوە و خۆی لە بەر خۆر هەڵخستووە و چەشنی ئەستێرە ئەو خاكە سوورباوەی گرتووەتەوە و جریوەی دێت لە سەری.

ئێمە هەر هەڵكشاین و هەڵكشاین و لە بەر ئەوەی هیچ گوندێكمان نەهاتەڕێ تەواوی ڕۆژەكە هیچمان نەخوارد و لە بەر ئەوەی ڕێگەی نێو چیاكان بە لێژایی تووش و سەختدا شۆڕ دەبووەوە من بە زۆری بە پێیان دەڕۆیشتم بۆ ئەوەی ماینەكەم بپارێزم لە گلان و پێش ئەوەی تەلانەكانی شیوەكەڵ بەدی بكەین من هەستم بە برسێتیی زۆر دەكرد. ئێمە لە ناو پەڵە تووتنەكاندا ڕێگەمان ونكرد و كە هاتینەوە سەر ڕێ تووشی مودیر بووین كە لەگەڵ سوارەكانیدا هاتبوونە پێشوازیمانەوە، چونكە كەمێ پێش ئەوە پیاوێكمان ناردبووە لایان كە هەواڵیان بداتێ وا گەیشتین. شیوەكەڵیش وەك هەموو گوندە كوردەكانی تر بە لاپاڵێكی تووش و لە گوێ چەمێكدا دروستكرابوو، لە پێشەوە خانووەكان لە دوو نهۆم دروستكرابوون، خوارەوەیان بۆ ئاژەڵ و پاتاڵ و سەرەوەش بۆ نیشتەجێی خۆیان، لە پشتیشەوە بنمیچەكە لەگەڵ ڕاڕەوەكەدا یەكسانە و خانووەكە لەوەی سەرەوەی خۆی جیادەكاتەوە. نهۆمی سەرەوە لە دواوە بە سەر ساپیتەی گەوڕەكەوەیە و بە پەیژەیەكی داریندا سەردەكەویت و دەچیتە دیوەخانێكی گەورەوە كە بنمیچەكەی بە كۆڵەكە دار ڕاگیر كراوە و لێرە لە سەر قاڵی و دۆشەك دادەنیشیت و چەند كەسێكیش خەریكی چاى لێنانن. ئاگر لە ناوەڕاستی دیوەخاندا دەكرایەوە كە یەكپارچە دەیكردە چەڕە دووكەڵ، یان لە ئاگردانێكی ناو دیوارەكەدا لە هۆدەكەوە ئاگر دەكرایەوە و دووكەڵی كەمتر بوو، لەم وڵاتەدا وا دیارە دووكەڵیش بەكار نەدەهات. هۆدەیەكیش لە پشتی دیوەخانەوە هەبوو زۆر تاریك بوو و تەنها لە دەرگا و هەندێ كونی دیوارەكەیەوە كەمێك ڕووناكیی پێدەگەیشت و لێرەدا ئەندامانی خێزان لە شوێنێكی هێند پیسدا دەژیان كە هەر باس ناكرێت. لە لایەكیشەوە هۆدەیەكی درێژ و تەسك هەبوو، بە درێژایی دیوەخان و هەیوانەكە، كەوا بزانم لە زستاندا وەك دیوەخان بەكاردێت كاتێ كە دنیا زۆر  ساردە و ناكرێ لە داڵاندا دانیشن، بەڵام بە زۆری ئێستا بەتاڵە و ئەمە ئەو هۆدەیە بوو كە بۆ من تەرخان كرا وەك شوێنی حەوانەوە و خەوتن. لێرەدا نەخشەی خانوویەكی كوردی دەخەینەڕوو كە لە زۆر شوێن بەمجۆرەیە بە هەندێ جیاوازیی كەمەوە لێرە و لەوێ (بە داخەوە لە دەقە ئینگلیزییەكەدا وێنەكە هاوپێچ نەكرابوو ـ و). سەرنج بدە كە هۆدەكەی من لەو ڕووەوە باش بوو كە دوو پەنجەرەی تێدابوو بە سەر ساپیتەی گەوڕەكەدا دەكرانەوە و بە ئەڵقەڕێزێكی دارین دادەخران و تەلبەندێكی دارینیشیان پێدا گیرابوو كە دەكرانەوە. پەنجەرەكان شووشەیان پێوە نەبوو و زەویی هۆدەكان هەر بە قوڕ سواغ درابوو، دیوارەكانیش هەر قوڕ بوون و لە كون و درزی ژوورەكەوە گیانلەبەری خشۆك و جۆراوجۆر دەردەچوون كە نەمدەخواست بیانبینم، بەڵام سوپاس بۆ خوا وەرزی كێچ خەریكبوو بە سەردەچوو.

با ئێستا بێینەوە لای شیوەكەڵ.

ئێمە چووینە ماڵێكەوە كە مودیری تێدا بوو، چونكە ماڵی خۆی لەم گوندەدا نەبوو و لە دیوەخاندا دانیشتین. دەربەندێكی تەنگەبەری بچووك لە خوارمانەوە پڕ بوو لە دار قەزوانی  جوان و خوڕەی ئاوەكەی بووبووە مۆسیقا لە گوێی مندا، بەڵام هێندەم برسیبوو زۆرم چێژ لە بیستنی ئەو هاژەی ئاوە وەرنەدەگرت و خۆشترین ساتەوەخت ئەوە بوو كە مودیر چای ئامادە دەكرد و تەبەقێك نانی تەنكی كوردی و ماستاوی سوێر و چەند شیشێك كەبابی گەرمی هێنا. پاشان بە زمانێكی فارسیی سەر و گوێلاك شكاو كەوتمە دەمەتەقێ لەگەڵ مودیر و زۆربەیان كەمێك قسەیان پێدەكرد، چونكە ئێرە سنووری ئێران  ـ كوردستان بوو. پاش تاوێك من چوومە ژوورەكەی خۆم بۆ تەواوكردنی ئەم نامەیە بۆ تۆ (واتە بۆ باوكى ــ و) كە هەمووی هەر لە ساتەوەختی ناڕێك و ڕەوتەنیدا نووسراوە. دواتر كاتژمێر شەش گەڕامەوە بۆ ئەوەی نانی شێوان لەگەڵ مودیردا بخۆم. كاتژمێر هەشت زەیای دڵسۆز ئاوی بۆ گەرم كردم و خۆم شۆرد و ڕێك 10 كاتژمێری تەواو لێی خەوتم بێ ئەوەی بیر لە هیچ بكەمەوە و ئێستا دوای ئەوەی هەفتەیەكە بەغدام جێهێشتووە وا هەست دەكەم كەسێكی ترم.

لێرە نەك هەر تەنها خەڵك كەمە بەڵكو سەیر ئەوەیە باڵندە و ئاژەڵیش كەمن. لە ڕێگەماندا بەرەو شیوەكەڵ هەندێك بزنە كێوی و مەڕە كێویمان بینی كە پێشتر نەمدیبوون، هەروەها كەوی قاچ سووری سەر بەرد و هەندێك قەلە بازەڵە و هەڵۆ، ئەمە هەموو ئەو باڵندە و ئاژەڵانە بوون كە بینیمن. لە بەهاراندا تەواوی وڵاتەكە دەبێ بە بەهەشتی گوڵ و گوڵزار و زەنبەقی ڕەش ڕێك لە زەوی ڕاستبووەتەوە، زافەرانی شین و زەردی پایزە، دیانساسی پەمەیی و نەعنای سوورباو هەموو ئێستا گوڵیان كردووە و هەموو جۆرەكانی ڕوەكی پیازی و   سەلك و ڕەگ و جۆرەكانی تر هەموو ئێستا نەماون. یاوەرەكانم هیچ لە پایز ڕانەدەمان و كاتێ من بە سەرسامی لە بەردەمی شكۆی دار قەزوانەكان و ڕەزی سوور هەڵـگەڕاودا ڕادەوەستام و ئەوان تەنها ئەوەیان دەوت كە ئێرە لە بەهاراندا زۆر جوانە. گوندی شوێن بەرزی وەك شیوەكەڵ، كە نزیكەی هەشت هەزار پێ لە ڕووی دەریاوە بەرزە، ساڵانە ماوەی   3 – 4 مانگ لە ژێر بەفردا دەمێنێتەوە. من سەرم لەوە سوڕدەمێنێ چۆن خەڵكی بە زیندوویی هەڵدەكەن كاتێ كە شەكر و چایان لێدەبڕێت و بەفریش ڕێگای سلێمانییان لێدەگرێت. ئەوان دارێكی زۆریان هەیە بۆ سووتاندن و داربەڕووەكانیشیان ئالیكی ئاژەڵیان بۆ دابین دەكات و لە ناو لقەكانی هەر دەوەنێكی بەڕوودا لە نزیك گوندەوە باوەشێك گەڵا دەبینی. ئێمە لە نۆڤەمبەردا دیسان  كەوتینەڕێ و مودیر و ئەو كەسانەمان كەوتنە تەك كە لە شیوەكەڵدا بوون وەك كارمەندی داهات بۆ ئەوەی ماوەی چەند میلێكی كەم كەشوفش بە كاروانەكە   بدەن و ڕێگامان بۆ یەكەم قۆناخی ڕۆژ بە قەدپاڵەكانی سنووری ئێراندا هەر هەوراز و نشێومان دەكرد و بە ناو دارستانی بەڕوودا ئەمسەر و ئەوسەرمان دەكرد. دوو جار بە ناو گوندێكی بچووكدا تێپەڕین كە لە گوێ چەمێكدا دروستكرابوو و پڕ بوو لە دار قەزوان و بی و دەوەنی تووتڕك، هەروەها پەڵە تووتن و جۆی زستانە هەموو لاپاڵەكانی گرتبووەوە. بەڵام هەرگیز بیر لەوە مەكەرەوە كە لەم گوندە برسییانەدا جووتیار خاوەنی زەوی بێت چونكە تەواوی زەوی و زار یان لانی كەم بەشی زۆری مڵكی مودیرن، لە بەر ئەوەی باوكی لە سەردەمی توركدا قایمقام بووە و بەو پێیە هەموو شتێكی بۆ خۆی قۆرخ كردووە. ئەو خانووەی من لە شیوەكەڵدا تیایدا خەوتم هی بازرگانێكە و لەو گوندەشدا كە پیایدا تێپەڕیم سەرنجی خانوویەكی نائاسایی باشم دا و دواتر زانیم ئەویش هی هەمان بازرگانە و لە هەر یەكێكیاندا ژنێك و خێزانێكی هەیە و لە شوێنی تریش هەمان شتی    هەیە و بەو ڕەنگە بۆ هەر شوێنێك بچێت بۆ كار و بازرگانی ماڵێكی خۆی هەیە. وەك باویاپیرانی ئیسپانیی تۆ، گوندی سێهەم كە زۆر لەوانیتر گەورەتر بوو، ئەوەبوو كە مودیری لێدەژیا. ئێمە كاتژمێر 11 گەیشتینە ئەوێ و بۆ نانی نیوەڕۆ لاماندا. من لەو ناوەدا گەڕام و وێنەم گرت و لە دیوەخانەكەی مودیردا لە بەر خۆر دانیشتم و كەوتمە چاى خواردنەوە لە چاوەڕوانیی نانی نیوەڕۆدا، كە نانێكی زۆر تایبەت و چاك بوو لەگەڵ گۆشتی كوڵاوی نایابدا لە سەر برنج، بێجگە لە نانی گەرم و ماستاو و قووڵینەیەك ترێ. ماڵی مودیر گەورە و فراوان بوو، دوو هێندەی ئەوەی من نەخشەم بۆ كێشابوو، واتە دوو بەرە خانوو بوو كە دووەمیان بۆ ژنەكان بوو، هەروەها دەتتوانی بە قاڵدرمەیەك سەركەوی بۆ دیوەخانەكەی.

پاش نانخواردنی نیوەڕۆ سەرلەنوێ كەوتینەوە ڕێ و مودیر ماوەی نزیكەی نیو سەعاتێك بە سواری كەوتە تەكمان. ڕێرەومان بە شانێكدا دەڕۆیشت و پاشان شۆڕ بووینەوە بۆ گوندێكی بچكۆلانەی جوان كە ناوی سوورەبان بوو. شتێكی سەیر بوو كە ئەم گوندە و هەروەها نۆڕكی گوندەكەی مودیریش لە نەخشەی جەنگیدا دەسنیشان كرابوون، بەڵام ناوەكانیان هێند بە نامۆ و زەحمەت حینجە دەكرا كەوا كەس نەیدەناسینەوە. من لام سەیر نەبوو، چونكە ئەگەر ئاشنا نەبوویتایە بە زمانی كوردی نەتدەتوانی بیانناسیتەوە و بە پێی ڕەگی وشەكە دەگۆڕان. بۆ نموونە چووڵەغان ڕەگێكی هەبوو و نۆڕكیش لە ڕەگێكی ترەوە دەهات. لە پاش سوورەبان و كێڵـگە بچووكە بەیەكەوە بووەكانی، هاتینە ناو چەم و دۆڵێكی بەرفراوانتر كە ناوی ئاوی سیوەیل بوو. چەمێكی پڕ لە گاشە بەردی دڵڕفێن و ئەملاو ئەولای لێژگەیەكی تووش و سەخت و بە درێژایی ماوەی ڕێكردنمان بە سواری هەمووی ڕووەكی سۆرنجان بوو. پاشان هێدی هێدی لە چەمەكە پەڕینە ئەوبەرەوە كە كێڵـگەی درێژ و بەرفراوان و پڕ لە دار و دەوەن و جۆگە ئاو و دۆڵ و كەندڕ بوو، ئەمە هەمووی دەستكردی سروشت بوو و كەسی تێدا نەدەژیا و كەسیش نەیكێڵابوو، بەڵام گاگەل و مانگای گوندێكی ئەو نزیكانەی تێدا دەلەوەڕا كە ئێواران دەیانبردەوە بۆ گوند. لێرەدا مودیر سەرنجی ڕاكێشام بۆ لای ئارامیی ناوچەكە و پاش ئەوەی دابەزین وەختەكەمان هەموو بە دەمەتەقێیەكی مودیر و ساڵح بەگ بە سەربرد. ساڵح بەگ پیاوێكی زۆر دڵپاك و كراوە و رێكپۆش بوو بەڵام كەمێك بێئەقڵ بوو، كە ئەمەی خوارەوە شێوازێكی قسەكانمان بوو:

ــ ساڵح بەگ: خاتوون، ئەو كچە دەبینی؟ دایكی تەمەنی هەشتا ساڵ بوو كە ئەو لەدایكبوو.

ــ گێرتروود بێڵ: هەشتا ساڵ! دەی وەڵڵاهی ئەوە تەمەنێكی زۆرە.

ــ ساڵح بەگ: بەڵێ هەشتا یان شەست، دەى با شەست بێت.

من مەزەندەی ئەوەم كرد ڕەنگە تەمەنی دایكەكە 35 بووبێت.

ئەو هیچ كاتێ بۆ وەڵام دانەدەما و من لێمدەپرسی ئەم ڕێگا یان ئەویتر بۆ كوێ دەچێت و هەرچەندە ئەو بچووكترین شارەزایی نەبوو بەڵام یەكسەر دەیوت: “خاتوون ئەم ڕێگەیە دەچێ بۆ فڵانە ناوچە لە فڵانە شوێن” و بێ ئەوەی هیچ گومانێك پیشان بدات دەستی بۆ ئەو لایە ڕادەكێشا. كاتژمێر سێی پاشنیوەڕۆ بەرەو سپیارە هەڵكشاین، كە دەبوو لەوێ چاومان بە مودیری پێنجوێن بكەوێت. من نەمدەزانی ئەم چاوپێكەوتنە لەوێ لە سەر چ بنەمایەكە و ئەگەر من مودیر بوومایە كەس قەناعەتی پێنەدەكردم كە تاقە شەوێكیش لە سپیارەدا ببەمە سەر. خوایە گیان ئەمە چیەو بە هەر حاڵ دێهاتییەكان هەمیشە بە   وێڵ و كەماڵن و هەموو لە ژێر دار قەزوانێكی گەورەدا كۆبووبوونەوە بۆ پێشوازی و بەخێرهاتنمان كاتێ كە دەگەین و ئەوان ئەمە پیشەیانە هەر كاتێ سەردانى گوندەكەیان بكەیت. ئێمە پێنج دەقیقەیەك پێش گەیشتنمان پیاوێكمان نارد هەواڵیان بداتێ بۆ ئەوەى كۆببنەوە. ئەگەر تۆ چارەكە سەعاتێك تەرخان بكەیت بۆیان ئەوە چاوت بە پێنج كەسی داماوی جل شڕ دەكەوێت بە ترسێكەوە سڵاوت لێدەكەن و ئەوجا بە ڕێزەوە پاشەوپاش دەكشێنەوە. خەڵكی سپیارە وەك خەڵكی شوێنەكانی تر بەڕێز و نەزاكەت بوون بەڵام ئەم گوندە هەژارترین و پیسترین ئەو گوندانە بوو كە من ڕێم تێكەوتن. پاشان بردمیان بۆ دیوەخانی ماڵێك و خێزانی ماڵەكە بە ترس و شپرزەییەكی زۆرەوە چوونە هۆدەیەكی ڕەشی تاریكەوە، بەڵام ئەوان كێچەكانیان لەگەڵ خۆیان نەبرد و منیش بۆم دەركەوت كە لەو گریمانەمدا ڕاست نەبووم كەوا وەرزی كێچ بەسەرچووە و بە قەد بەرزیی شوێنی سپیارە كێچ كەڵەكە بووبوون و باوەڕ ناكەم كەس لە دنیادا بە ئەندازەى ئەم كوردانە پیس بێت هەرچەندە خەڵكێكی زۆر باش و دڵپاكن. ئەوان ناتوانن بە درێژایی 4 – 5 مانگی زستان خۆیان بشۆن لە بەر ئەوەی زۆر ساردە و پێدەچێت لەو باوەڕەدا بن كە خۆشۆردن لەو مانگانەدا بێسوودە و چاكترە خۆیان لە مانگەكانی تردا بشۆن و هەرگیز جلە زۆرەكانی بەریان داناكەنن زستان بێت یان هاوین، بە تایبەتیش مێزەرە زلەكانی پیاوان و ژنان كە قەت لە سەرى داناگرن. ژنیان قژ بە  لاجانگیاندا و بە سەر گوێچكەدا بەردەدەنەوە و بە زۆریش پەلكی ڕەشیان دەبەنە دواوە و لە ژێر سەرپۆشدا دەیشارنەوە. هەركە بەهار هات كێچ هێند زۆر دەبێت لە ماڵەكاندا تاڕادەیەك كە كوردە سەرەتاییەكانیش بەرگەی ناگرن و تەواوی گوند چۆڵی دەكات بۆ خانووی هاوینە كە وا لە گەڵا و لقی داربەڕوو دروست دەكرێ بە لاپاڵەكانەوەو منیش بەم حاڵ و بارەوە ویستم لە سپیارەدا بخەوم! پاش ئەوەی گەیشتم فرەی پێنەچوو جێگرێكی مودیر بە سواری هات كە گەنجێكی كەتە بوو و زۆر جار بینیبووم چونكە هۆدەكەی من ژووری تۆمار كردنی ئەو بوو كاتێ كە خەریكی كاروباری گومرگ دەبوو. ئێمە هێشتا هەر نزیكەی سەعاتێك لە سنووری ئێرانەوە دوور بووین. پاش ئەوەی شەو داهات هیچ ڕووناكییەك نەبوو ڕووناكیی ئاگری داڵانی دیوەخانەكەی لێدەرچێت و نانی شێوانمان چەند مریشكێك بوو لە سەر برنج بە نان و ماستاوی سوێرەوە. من پڕكێشیم كرد كە پارەی خواردن و خەوتن بدەم وەلێ ئەوان بە سووكایەتی پێكردنیان لە قەڵەم دا، بەڵام ژن و منداڵ هەلیان دەقۆستەوە و سواڵیان لێدەكردم و بە جۆرێكی تر ئەو قەرزەم بە سەر خۆمەوە نەهێشت. بۆ سبەی بەیانی چوار كەسی جل شڕی هەژار هاتنە لامان لەو كاتەدا كە ئەسپەكانیان بۆ زین دەكردین، دوانیان بە تەواوی نابینا و دوانیشیان یەكچاو بوون و من هەستم كرد ئەمە ڕێكەوت نیە و ئەوەی پێویست بوو بەجێمهێنا و لەو بڕوایەدام ئاوات بەوە دەخوازن كە هەموو جارێك ساحێبێكی ئینگلیز شەو لە سپیارەدا بكاتەوە.

23

 10 ی تشرینى دووەمی 1921

من خۆشحاڵ بووم بەوەی چوومە شوێنێك هەوای پاك و سارد بوو، شوێنێكی بێ كێچ با بڵێم و ئێمە لە لاشانی شاخێكی پڕ لە دارستان بەرەو لووتكە هەڵكشاین و لەوێوە و لە پشتی دۆڵ و شیوەكانەوە بەرزاییەكانی سنووری ئێران دیار بوون و كەوانێكی گەورەی بەرەو ڕۆژهەڵات دروستكردبوو. لێرە و لە گوندێكی تابڵێی پیسدا  ـ كە بیرم كەوتەوە ناوی بەهێ بوو و وابزانم بە واتای هەنار دێت (لێرەدا لێی تێكچووە ــ و) و نەگونجاو بوو لەگەڵ ئەم ناوەدا، لەگەڵ جێگری مودیر بەڕێكەوتین و بە سواری بە دۆڵەكەدا بەرەو خوار بووینەوە كە هەر چوار لای شاخی بەرز بوو، هەروەها پێشیشی زنجیرە شاخێكی بڵند  گرتبووی و دەبوو سبەینێ ئێمە لەوێوە بپەڕینەوە و كە چووینە ناو دەربەندێكەوە لەسەرخۆ دەڕۆیشتین و بە ڕاستى ڕەوتكردنی وڵاخەكانمان بە سەر نەرمە گیای دۆڵی پێنجوێندا زۆر خۆش بوو. كاروانی گەورەی هێستر بە دەنگی زەنگ و قۆڕەوە بە دوامانەوە بوون، ڕێك وەك ئەوەی لەشكری سوارە بن و ئێمەش لە سوپایەكى سوارە دەچووین لە كاتی هێرشدا و جەندرمە پۆشاك سەیرەكانم خۆیان بە تفەنگەكانیانەوە بادەدا و زەیا لە پانتۆڵی كورتی خاكیی قەشەنگدا دەتوت لە ئاهەنگدایە، بەڵام باوەڕ ناكەم چەكمە قاوەییە درێژەكانی من و شەبقە سەوزباوەكەم دیمەنێكی جوانیان نواندبێت، تەنانەت بە پانتۆڵی سواریی ئینگلیزیشەوە و وەی كە كۆرسێكی قۆشمەمان پێكهێنابوو. لە ڕێگا چاومان بە پیاوێك كەوت بە زەحمەت ڕێی دەكرد و بارێكی بە سەر شانەوە بوو و تفەنگێكی ڕووسیی بە دەستەوە، جەندرمەكانی من كە لە قەزای شارباژێرەوە هاتبوون (هەڵبەت ئێمە ئێستا لە قەزای پێنجوێنین) ڕایانگرت و ڕوخسەتیان لە من خواست چیبكەن، چونكە جەختیان لە سەر ئەوە كردەوە كە تفەنگ هەڵـگرتن بێ پاس قەدەغەیە و كابرا پێی لەوەنا كە هی خۆی نیە و بیانووی ئەوە بوو كە: (ئە) تفەنگەكە هی شێخ حەسەن بەگە كە ئێمەی لێ ئاگادار نەكردووەتەوەو (بێ) بۆیە پێویستی پێیەتی نەوەك ئەو شتومەكانەی لە توورەكەكەدا هەڵـگیرتوون لە ڕێگا دز لێی بسەنێت. كابرا لەم قسانەدا بوو و توورەكەكەی كردەوە و من وای بۆچووم كە بۆمان بسەلمێنێت چۆن تفەنگەكە پاڕاستوویەتی. دادگای لێكۆڵینەوە پێی وا نیە ئەم باس و خواسە بەس بێت، لە بەر ئەوە عەلی بەگ، كە یەكێك بوو لە جەندرمەكانی من، تفەنگ و ڕەزنەكەی لێسەند و لەگەڵ ئەوەی خۆیدا كردیە شانی و بە كابرای خاوەنی وت شوێنمان بكەوێت بۆ لای مودیری پێنجوێن، كە ئێمە خۆمان بۆ لای ئەو دەڕۆیشتین. كۆتایی چیرۆكەكە ئەوە بوو وەختێ ئێمە گەیشتینە پێنجوێن و زانیمان ئەم فەرمانە جارێ جێبەجێ نەكراوە، بۆیە تفەنگ و ڕەزنەكەمان دایەوە بە كابرا و سەرباری ئەوەش من هەندێك بەخشیشی دۆستانەم دایە و (بە ڕاستی لە دڵەوە پێم خۆش بوو دەست بە سەر تفەنگەكەیدا نەگیرا) و دەتوانم بڵێم كەوا ئەم ڕووداوە بە خۆشی و ڕەزامەندی كۆتایی هات.

پێنجوێن لە دوورەوە شوێنێكی خۆش دیارە و هەر لەو دۆڵە بەرفراوانەدا كە تێیدا هەڵكەوتووە جوانییەكی بێوێنەی داربی دەبینی بە گوێ چەم و جۆگە و ئاوەكاندا و چنار كە سەریان بەرز كردووەتەوە بەرەو دامێنی گردەكان. بەڵام كاتێ دێیتە ناو شارەوە یەكپارچە كارەساتە! لە هەموو لایەكەوە و وێرانەی لە ڕووس بەجێماوە (كە لە ساڵی 1916 یان 1917 پێموایە هاتوونەتە ئێرە). لێرە تەنها نیوەی خانووەكان بە پێوە ماون، بازاڕ پەیكەرە ئێسكێكی بێ ساپیتەیە، قەیسەرییە جوانەكە، خانی ناو بازاڕ هەمووی كەلاوەیە. حەمامەكان و مزگەوتەكان كە مۆركی جوانیی شار بوون نیوەیان ڕووخاون. ڕووس هەرچی ئاژەڵ و ماڵاتیان هەبووە كوشتوویەتی یان بە تاڵانی بردووە و خەڵكەكە شتێكی وای بە دەستەوە نەماوە، سەد حەیف و مخابن!

مودیر، كە بە سواریی هاتبووە دەرەوەی شار بۆ پێشوازیی من، ناوی عەونی ئەفەندی بوو و پیاوێكی قەشەنگ و بەشكۆ بوو و عەرەبییەكی باشی دەزانی و ڕۆشنبیر و ڕووخۆش بوو. كاتێ چووینە ماڵیان دەسبەجێ ژنە شۆخەكەی و منداڵەكانی پێناساندم. ئافرەتی كورد سەرپۆشیان بە سەرەوە نیە و تێكەڵی پیاوان دەبن و خانمی گەورەی ماڵن چەشنی ئەم خانمە و بۆ كوێیان دەوێ دەڕۆن. ژنەكەی عەونی ئەفەندی ئەوەی پێخۆش بوو بە دانیشتنەوە وێنەی بگیرێت و بە تایبەتى هەموو خشڵ و زێڕێكی كردبوو بە خۆدا بۆ پێشوازیى من و كەمێك عەرەبیشی دەزانی چونكە باوكی كاپتن بووە لە سوپای    توركدا و بەو هۆیەوە چەند ساڵێك لە بەغدا و مووسڵ ژیاوە. پێش ئەوەی نانی نیوەڕۆ پێبگات من تاوێك بە ناو شاردا گەڕام و سەردانێكی قازیم كرد كە لە بەرهەیوانی مزگەوتدا دانیشتبوو، هەروەها وێنەی ژنانم لە سەر كانی گرت. پێنجوێن لە دۆڵێكی زۆر جوان و دڵڕفێندایە و خانووە باشەكانی لە خشتی سوور دروستكراوە و ئەگەر ئەم شوێنە ئەوەندەی كەلاوە تێدا نەبوایە ئەوە شارێكی تەواو ڕێكوپێك دەبوو، بەڵام لەگەڵ كەلاوەكانیشیدا دار و درەخت و قەدپاڵی چیاكانی جوانییەكی سەیریان پێبەخشیبوو. مودیر نانێكی نیوەڕۆی زۆر نایابی بۆ ئامادە كردبووم و ماڵەكەشی تەواو خۆش و جێی حەوانەوە بوو. خۆی و ژنەكەی هۆدەكەی خۆیان بۆ تەرخان كردم كە دەكەوتە پشتی دیوەخان و هۆدەیەكی پڕ فەرش و خاوێن و ژوورێكی بچووكی تری لە سەر بوو كەوا كەلوپەلی خۆشۆردنم لێدانا. نانی نیوەڕۆ و ئێوارە وەختێكی زۆریان بەین نەبوو، چونكە یەكەمیان درەنگ خواردمان و دووەمیش زوو. لە كاتی نانخواردنی شێواندا لە دیوەخان خانم لەگەڵم دانیشت و نایابترین هەنگوین و ماستاوی سوێریان بۆ دانام. پاشان لە دەستە خانوویەكی تری ماڵدا چووم لەگەڵ مودیر دانیشتم، ئێمە   لەمبەر و لەوبەری ژوورەكەوە لە سەر دۆشەك دانیشتبووین و ئاگرێكی گەشیش لە ئاگردانی ناو هۆدەكەدا دەگڕا و بە دوور و درێژی باسی بارودۆخی سیاسیمان كرد. مودیر پیاوێكی لەسەرخۆ و ژیر بوو و زۆر بەداخەوە بوو كە كوردستان نایەوێت بچێتە چوارچێوەی عێراقەوە بەڵام هەردوكمان هاوڕا بووین كە كاری زۆرەملێ ئەنجامی باش نیە. ئەو وایبۆدەچوو كە دواجار خۆی لەخۆیدا یەكگرتنێك دروست دەبێت و دەیوت بێگومان یەك دوانێك لە خەڵكی شار بایەخ بەوە دەدەن كە حكوومەتی وڵات لە ژێر دەستی كێدایە، بە مەرجێك حكوومەتێكی شایستە بێتە كایەوە كە ڕێگە بە جووتیاران بدات بەشێكی ئەو بەرووبوومەیان بەركەوێت كەوا دەیچێنن. هەمیشە ئەمە كێشەیە، بەڵام ئێمە دەزانین كەوا ژمارەیەكی كەم لە سیاسییەكانی ناوخۆ خەڵك بۆ لای خۆیان ڕادەكێشن بە هەندێ هات و هاواری وەك كوردستان بۆ كوردە و یەكێتی ئیسلامی و بۆ نموونە یەكێتی لەگەڵ توركیادا، تەنانەت ئەگەر خەڵك بەو جۆرەش بیر نەكاتەوە كە ئەوە نابێ و ناكرێ). بە هەر حاڵ مودیر وایبۆدەچوو كەوا ئەنجومەنی نوێنەرایەتیی سلێمانی قەناعەتی بەو خولیا و مەرامە سیاسییانە هەیە و پێیان خۆشە.

پێنجوێن بە ژمارەی دانیشتووانی كە هەزار و پێنجسەد كەس یان زیاترە، دە هاوڵاتی دەنگدەری هەیە و مودیر دەنگی وەرگرتوون بۆ سێ پاڵێوراو لە ئەنجومەنی هەڵەبجەدا. ئەم كاندیدانە لەلایەن مێجەر گوڵدسمیس و كاپتن دۆگڵاسەوە هەڵبژێردراون بە ڕاوێژ لەگەڵ كاربەدەستانی حكوومەتدا، كە ئەندامی مەجلیسی ناوخۆی قەزان و بۆ دڵنیایی دەرفەتی تر نەبوو. ئەم قەزایە قەڵەمڕەوی سەرۆكەكانی جافە و بەگزادەی جاف خاوەنی زۆربەی گوندەكانن و نیوەی ڕاستی خودی پێنجوێن خۆیشى و بەم پێیە ئەگەری كاندیدی تر نەبوو بێجگە لە بەگزادە (چونكە بێجگە لەوان خەڵكی دەمڕاست و پیاوماقووڵانی تر نین) و ئەوانە هەرسێكیان مێجەر گۆڵدسمیس پێشنیازی كردوون بۆ هەڵبژاردن. هۆزی جاف كۆچەرن و بەگزادەكان كە سەرۆك و دەمڕاستیانن، بوون بە نیشتەجێ و خاوەن مڵك و دێهات و كشتوكاڵ دەكەن. هەموو بەهارێك تەواوی عەشرەتی جاف، كە نزیكەی دە هەزار خێوەت دەبن، بە قەزای هەڵەبجەدا دەڕۆن بەرەو لەوەڕگا و پاوانی هاوینەیان لە هەردە و چیاكانی ئێراندا و هەموو پایزێكیش بەرەو هەوارگەی زستانەیان دادەگەڕێنەوە لە نێوان كفری و خانەقیندا. هەموو جارێكیش تێپەڕبوونیان بە ناوچەكانی قەزای هەڵەبجەدا نزیكەی مانگێك دەخایەنێ و لە ڕءژگاری توركدا مانگێكی پڕ لە ترس و تۆقین بووە بۆ خەڵكە نیشتەجێكە. جاف بە هەر شوێنێكدا گوزەریان بكردایە خەڵكیان سەغڵەت دەكرد و دەڕووتاندەوە و كاتێ جاف دەهاتنە ئەو دۆڵە گەورەیەی كە من پیێدا بەرەو پێنجوێن گوزەرم كرد و هەر خێڵ و تاقمەیان شەوێ دوانیان لەوێ بە سەردەبرد مودیر دەیناردە شوێن بەگزادەیەكی هەڵەبجەدا و لەگەڵ یەكتر رێكدەكەوتن كە خێڵەكە بە ئارامی بهێڵنەوە. بەگ بە پێی نەریتی خێڵەكی فەرمانڕەوایی دەكرد و مودیریش، پێدەچێت بە شێوەیەكی كاراتر، لەگەڵ دە پۆلیسی خەڵكی شار و پێنج جەندرمەی سوارەدا كارڕانییان دەكرد. مودیر دەیوت “كاتێ جاف لێرەوە گوزەر دەكەن هەمیشە بەندیخانە پڕە، ئەمەش تەنها لە بەر هەندێك دزی و دەخەڵیی بچووكە وەك دزینی مریشكێ دوان لێرە و فڕاندنی ماینێك   لەوێ و دزینی میوە و دانەوێڵە”. ئەمانە نزیكەی مانگێكیان پێدەچوو لەم ناوەدا و ئەمە پیشەی هەموو ساڵێكیان بووە، نەك نموونەی تاوانێكی بەرچاو. شتێكی چاكە وا نیە!

24

 11 ی تشرینى دووەمی 1921

دنیا بە شەو زۆر سارد بوو، چونكە پێنجوێن زیاد لە پێنج هەزار پێ بەرز بوو، بەیانیش زۆر جوان و ڕووناك بوو. ئەم بەیانییە مودیر قاوەڵتییەكی ئاسایی، وەك ڕۆژانی تری دامێ كە بریتی بوو لە هێلكەی كوڵاو، ماست، نانی تیری و چاى و قاوەڵتیی لەمە باشتر نەبوو. پاشان كەوتمە ڕێ و مودیریش بۆ ماوەی نیو سەعاتێك بە سواریی كەوتە تەكم. تەنانەت لە كاتژمێر هەشت و نیودا كە كەوتینەڕێ توێژاڵێك شەختە و زوقم لە ژێر دارەكاندا بوو، بەڵام هەر كە دامانە لاپاڵی گرد و چیاكاندا خۆر تەواو گەرمی كرد. لە ڕێگا راوێكی سەرنەكەوتووی بزنە كێویمان كرد و هەر یەكە لای خۆیەوە كەوتە پارێز لە بزنە كێوییەكان كە جڵەوی بارودۆخەكە لای ئەوان بوو. ئێمە بە سواری بە شاخەكانی پشتی پێنجوێندا ڕۆیشتین بە ناو جوانترین دارستانی داربەڕوودا كە تا ئێستا بینیبێتم. دارەكان نزیكەی شەست پێ یان زیاتر بەرز بوون و بەڕووی زل زلیان پێوە بوو، كە سێ جار لە بەڕووەكانی لای خۆمان گەورەتر بوو و هەندێكت بۆ دەنێرم و بەرە گۆیژی گەورە و نایاب لە هەموو لایەك بەرچاو دەكەوت و حەزت دەكرد بیخۆیت. لە سەرەوەی تەنگی ڕێرەوەكەمان زەوییەكی سەیر هاتە پێش چاومان كە شاخە بەرزەكان یەكپارچە دارستانی بەڕوو بوون و لەوەخواریش زنجیرە چیای     ڕووتەن و پاشان دەشتی پان و بەرینی هەڵەبجە و لەوێش بەولاوە زنجیرەی شاخە نووك تیژەكانی هەورامان بوو كە بەشێكیان لە ناو خاكی ئێراندا بوو. من بە ناو داربەڕووەكاندا چوومە خوارەوە و جار جار دەوەستام و بەرە تووتڕكم دەخوارد كە لە قەراخ و بیجاخی هەموو جۆگە ئاوەكان سەوز بووبوون. بەرەبەرە دارەكان هاتنە تەنكی و پاشان دیار نەمان و ئێمەش كەوتینە ناو پێدەشتێكەوە پاش ئەوەی دەربەندێكی ڕووتەنمان بڕی. وا ئیتر دارستانی بەڕوو نەما، خوایە خۆ من پێنج ڕۆژی خۆشم لە ناویاندا بردە سەر. دواجار گەیشتینە یەك لەم دەربەندە ڕووتانەی دەیڕوانییە سەر دەشتێكی فراواندا و هاتینە بچووكترین و پیسترین زنجی كوردەوە كە تووتاغاج بوو، واتە دارتوو و ئەم ناوەشیان بۆ گاڵتە بە سەردا بڕیوە و تەنها سێ داربەڕووی گەڕی تێدا بوو كە ژاكابوون و خەریكبوو وشك دەبوون. تووتاغاج مڵكی یەكێك لە بەگزادەكانە كە ناوی عەبدوڵا بەگە و من بۆرە ناسیاوییەكم لەگەڵدا هەبوو. ئەو لە زستاندا لێرە دەژیا و بە هاوینانیش دەچووە چیاكانی ئەو ناوە. عەبدوڵا بەگ زۆر میوانپەروەر بوو و بە گەرمی پێشوازیی لێكردم و خێرا فەرمانی دا یەكێك لە دوو هۆدەی زنجەكەیم بۆ پاك بكەنەوە و بیخەنە خزمەتمەوە، بەڵام چونكە ئەو ئەزموونە تاڵەی سپیارەم هەبوو، چەند ڕۆژێك لەمەوبەر زۆر بێتاقەت بوم و لە ترسی كێچ لەرزم لێهات. لێرەدا ئەو پێشنیازی كرد كە خێوەتێكم لە دەرەوەی ئاوایی بۆ هەڵبدات لە هەر شوێنێكدا كە خۆم پێمخۆش بێت. بە ڕاستى منیش زۆر كەیفم پێهات و خێوەتمان لە سەر زەوییەكی پاك هەڵدا لە شوێن خەرمانێكدا، كە چەند سەد یاردێك لە دێوە دوور بوو. خێوەتی كوردی زۆر داخراو نیە و بریتییە لە ساپیتەیەك لە بەنی مووی بزن و چواردەوری بە جۆرە حەسیرێك گیراوە كە لە قامیش دروست كراوە و شاشە و دەر و ناوی دەبینرێت و بەرزییەكەشی ناگاتە ئاستی  ساپیتەكە و بەتاڵییەكی زۆر هەیە لە نێوانیاندا (مەبەستى چیخە ــ و). ئێمە بەشێكیمان جیاكردەوە بۆ زەیا و ساڵح بەگ و من خاولیی حەمامەكەم بە نێواندا هەڵواسی وەك پەردەیەك و بەمجۆرە شوێنێكی ترمان دابینكرد و دنیا لێرە گەرم بوو چونكە نزیكەی  2  ــ 3 هەزار پێ دابەزیبووین و دەشتی هەڵەبجەش زستانە هەوارە، واتە گەرمیانە و بەم ڕەنگە خەوتن لە دەرەوە خۆش بوو و دانیشتنیش لە دەرەوەی خێوەتەكە و نامە نووسین بۆ تۆ تام و بۆیەكی خۆشی هەبوو. دانیشتووانی گوند هەڵسوكەوتێكی جوانیان نواند و پاش بەخێرهاتن بە جێیانهێشتم بۆ حەوانەوە، بە پێچەوانەی مەڕ و ماڵاتەكەیانەوە كە بەردەوام قۆچیان لە خێوەتەكە دەدا و بۆنیان بە كەلوپەلەكانەوە دەكرد. دەمەو خۆراوا گاگەل بەرەو ناو ئاوایی گەڕایەوە و سێبەرێكی شینباو قەدپاڵ و چیاكانی داگیر كرد و لووتكە بەرزەكان وەك ئاڵتوون بریسكەیان دەهات، خوایە وا من بووم بە شاژنە ڤیكتۆریا! ئەو بڕگەیەی ستراچیت لە بیرە كە دەڵێت: “ئەلبێرتی ئازیز دەڵێ هۆكاری جوانیی دیمەنی شاخەكان لە گۆڕانی بەردەوامیاندایە”. چاكە، ئێمە كاتژمێر شەشی ئێوارە لە سەربانی ماڵی عەبدوڵا بەگ نانی شێوانمان خوارد. بەیانی چوار هێلكە و نانێكی بچووكم خواردبوو، ئیتر دوای ئەوە تا ئێوارە هیچم نەخوارد و وا ئێستا نانی ئێوارە لە بەر تریفەی مانگەشەو دەخۆم كە بریتی بوو لە گۆشتی كوڵاو و سوورەوەكراو لەگەڵ برنجدا كە تام و لەزەتی هەر تەواو نەدەبوو. چێشتی كوردی بە تایبەتى نایابە و تەنانەت لەم شوێن و ڕێ ناڕێك و هەژارەیاندا خواردنی خۆش و بەتام دروست دەكەن و تۆ لێرە نابێ پارە بدەیت چونكە پێیان عەیبە و بە سووكایەتیی دادەنێن. من هەست بە نیگەرانی دەكەم كەوا خۆم و جەندرمە و هێسترەكانم بوون بە بارێكی قورس بە سەر شوێنێكی وەك تووتاغاجەوە.

25

12 ی تشرینى دووەمی 1921

ڕاستێكەی من تەواو خۆشنوود بووم و نوقمی خەیاڵ بووبووم و تەماشا دەكەم قاوەڵتییەكە هیچ نیە بێجگە لە هەندێك نان و پیاڵەیەك یان دوان چاى. من هەندێك گوێزم پێبوو بەڵام گوێز زۆر بەرگە ناگرێت و ئێمە نزیكەی پێنج كاتژمێر بە سواری ڕێمان كرد تا گەیشتینە هەڵەبجە. ئەو دەشتەی پێیدا گوزەرمان كرد زەوی و زارێكی زۆر بەپیتی وڵاتەكە بوو و هەروا چەم و لقی ڕووباری سیروان بوو لەتی كردبوو و پێیدا دەڕۆیشت و بە چواردەوری ئەو گرد و ڕووتەنانەدا لە سێ لاوە چەم و ئاو بوو. گەلێ گوند كەوتبوونە بن گردی دەستكردەوە ـ جا ئەمانە ئاسەواری میدییەكان بوون یان چی، نازانم؟

هەڵەبجە كەوتبووە كۆتایی پێدەشتەكە و نزیك بە شاخەكان و ماوەی نیو سەعاتێكمان مابوو بگەینە مەنزڵ ئەحمەد بەگی قایمقاممان پێگەیشت كە لەگەڵ بیست كەسی پۆشاك قەشەنگی دەستە و تاقمیدا ڕاوی دەكرد و كاپتن دۆگڵاسیشی لەگەڵ بوو كە جێگری ئەفسەری سیاسیی هەڵەبجە بوو، بەمجۆرە پێكەوە دامانە غاردان و كۆڕ و كۆمەڵێكی قەبە و سەیر دەهاتینە بەرچاو. كاپتن دۆگڵاس لە خانوویەكی كۆنی شێواز ئێرانیدا دەژیا، كە زۆر قەشەنگ و جوان بوو و لە شووشەی ڕەنگاوڕەنگی سەیر و تەختەی نایاب و جوان پێكهاتبوو، بەڵام بیناكە كۆن بووبوو و دەرگا و پەنجەرەكانی خەریكبوون دەڕزین و من لەم شوێنەدا لەگەڵ كاپتن دۆگڵاس مامەوە.

كەسایەتیی دیاری هەڵەبجە عەدلە خانمە  كە خانمی گەورەی بەگزادەیە لێرە و دایكی ئەحمەد بەگە و خێزانی وەسمان پاشا بووە، كە ساڵانێك لەمەوبەر كۆچی دوایی كردووە و ئەم خانمە بەردەوام بوو لە فەرمانڕەوایی كردنی جاف بەوپەڕی توانایەوە و كاریگەریی لەوە بەهێزترە كەوا بیری لێبكەیتەوە كەسێك بیكات و بەگشتی وەك خانمە گەورەكانی كورد هەڵسوكەوت دەكات. ئەو گەلێ جار نامەی بۆ نووسیوم و بێگومان من هەستم بەوە كرد كە دەبێ دڵی ڕابگرین و خێرا دوای نانی نیوەڕۆ چووم بۆ دیدەنی. ئەم ئافرەتە كەسێتییەكی سەرسامكەر و سەرنجڕاكێشە بە جلوبەرگی كوردیی قەشەنگیەوە و بە زڵفی ڕەشی قەترانییەوە (پێموابێت بۆیاخی كردبوو) كە لە ژێر مێزەرە گەورەكەیەوە بەریدابووەوە بە سەر گۆنای ئارایشتكراویدا. ئێمە بە فارسی گفتوگۆمان دەكرد و لە زۆر شت دواین بە تایبەتى ئەو بوارەم بۆ باس كردن كە چۆن عێراق باش بەڕێوە دەچێت لە ژێر سەركردایەتیی فەیسەڵدا و بۆ دڵنیایی پێیان بڵێن كە ئەوپەڕی ئاواتی ئێمە دوو منداڵەكەمان بووە، عێراق و كوردستان كە چۆن دەبێ بە ئاشتی و دۆستایەتی پێكەوە بژین.

26

13 ی تشرینى دووەمی 1921

من دەبێ بگەڕێمەوە سلێمانی و لە 15ی مانگدا بە سواریی شەمەندەفەر بچمەوە بۆ بەغدا، بەڵام تا ئێستا ئەوەم نەكردووە. كاپتن دۆگڵاس پێشنیازی ئەوە دەكات كە شەوێكیش لە چیاكانی هەورامان لە سەرووی هەڵەبجەوە بە سەربەرم و لە بەردەم ئەم خولیایەدا خۆم ڕانەگرت. هەورامان لای ئێمە كەمتر ناسرابوو و سەردانی كرابوو، كەواتە دەبوو ئەم هەلە لە دەست نەدەم و بگرە كورتترین سەردان باشتر بوو لەوەی لە دەستی بدەم. چیاكانی زۆر سەخت بوون و شیوی قووڵ قووڵ كەرت و پەرتی كردبوون كە پڕبوون لە دار و درەخت و باخی بچووك بچووكی نێو تەڵان. لێرە ژیانی نەریتیی دێهاتە و دانیشتووانی زۆر  كۆنن و بە دیالێكتێكی تایبەتی كوردی قسە دەكەن و وەك باس دەكرێت زۆر نزیكە لە شێوە بەراییەكانی زمانی فارسییەوە. بەگەكانی هەورامان خەڵكی توندوتیژ و ئاژاوەگێڕن و لەوانیش كەمتر لە   كاریگەری و توندوتیژیدا بنەماڵەیەكی گەورەی ئاینیی شێخەكانن كە لە سەر تەریقەتی نەقشبەندین و مەزهەبێكی زۆر  بەربڵاوە و لە دیمەشق و ئەستەمبووڵ و شوێنانی تر مزگەوت و تەكیە یان با بڵێین خەڵوەتخانەیان هەیە (مەبەستى خانەقایە كە زیاتر بۆ رابەرانى تەریقەتى نەقشبەندییە لە كوردستاندا ـ وەرگێڕ). لە ڕاستیدا نەقشبەندییەكان زیاتر لە ڕێبازێكی ئاینی دەچن وەك هەر شتێكی تر و هاوشێوەیەكی ئیسلامیی باوكانی دۆمینیكانە و هەورامان شوێنی پیرۆزیانە.

ئێمە تاقمێكی گەورە بووین و ئەحمەد بەگ (لێرەدا مەبەست شاعیر ئەحمەد موختار جافە ــ و) بە خۆی و بیست سوارەوە هاتبوو، ئەحمەد بەگ ماینێكی عەرەبیی جوانی دامێ بۆ سواری. لە پاش دەرچوونمان بە نیو سەعات سێ شێخی نەقشبەندی هاتنە پیریمانەوە، یەكێكیان شێخ سەعدیی برای شێخ حیسامەدین بوو كە لەگەڵی چووین بۆ سەر خوانی  نیوەڕۆ و نیو سەعاتی تری ڕێگە بە بنی یاڵ و شاخی ڕووتەندا ڕۆیشتین و گەیشتینە قادر بەگی كوڕی جافر سوڵتانی سەرۆك، كە سوارێ یان دوانی لەگەڵ بوو. بەم پێیە هەمووان دەیانگوت كەوا تاقمەكەی ئێمە 40 تا 50 سواری پۆشاك ڕەنگاوڕەنگ بووین بە سەر پشتی ئەسپی خۆشبەزی عەرەبییەوە و بە وێنەی كتێبێكی پڕ لە زانستی فارسی دەچووین. بەم ڕەنگە بە ناو چیاكاندا ڕۆیشتین تاوەكو چووینە پێچی شاخەوە و جۆگەی ئاودێریی بچووك تێیدا سەرەوخوار دەهات و ریزێك دارتوو لە سەریان سەوز بووبوون. لە دووریشەوە گوندێكی خنجیلە لە بەرزاییەوە دەركەوتبوو، كە ناوی باخە كۆن بوو و ئێمە بەرەو ئەوێ دەچووین بۆ نانخواردنی نیوەڕۆ. ئێرەش وەك هەموو گوندەكانی تری هەورامان بە ڕێكی لە بەرد دروستكراوە و نوقمی داری بەرییە كە لە تەڵانەكاندا ڕواون بە درێژایی جۆگە ئاودێرییەكان بە لاپاڵی چیاكانەوە. لە بەرزترین شوێنی گونددا چووینە ماڵی شێخ   حیسامەدین و بە درێژایی دیوەخانە لە بەرد دروستكراوەكەی و لە بەردەمی ئێمەدا بۆ خوارەوە و بە قەدپاڵی چیاكەوە باخچەیەكی خنجیلانەی بچووك دروستكرابوو لە سەر دەستووری ئێران كە بریتیبوو لە دوو تەڵان و حەوزێكی ئاو لە ناوەڕاستدا و شۆڕەبییەك لە تەنیشتیەوە و گوڵ و گوڵزار بە چواردەوریدا، كۆڵەكە دار بووە بە پەرژینی باخەكە و ئاو بە نێو بەردی خزدا پلووسكی بەستبوو بەرەو خوار بۆ تەڵانە پڕ گوڵ و گوڵزارەكەی ئەوبەر. ئێمە گشت چووین بۆ دیوەخان و لە سەر قاڵی و لباد دانیشتین. خودی حیسامەدین خۆیشی لەوێ بوو، كە ڕووخۆشترین و كەیفخۆشترین پیرەمێردی بەشكۆ و پیرۆز بوو بینیبێتم، جووتێ چاوی گەش و  گەورە و لووتێكی زلی قوڵنگی پێوەبوو، مێزەرێكی سپیی زلی بە سەرەوە و هەمیشە دەم بە خەندە بوو، هەروەها عەرەبییەكی زۆر چاكیشی دەزانی. هەر هەموو ئەو بەگ و شێخانەی لەوێ دانیشتبوون لە جلوبەرگی ئاڵ و واڵای سوور و شین و قاوەیی و سپی و ڕەشدا بوون. تیشكی ڕۆژ لە پەنجەرە كراوەكانەوە دەهاتە ژوور، كە لێیانەوە حەوزە شینەكە و لق و پۆپی شۆڕەبییەكە و لووتكەی كەژەكانت دەبینی كە دیمەنێكی جوان و دڵڕفێنی دەبەخشی. لە نێو ئەم   كۆڕ و كۆمەڵەدا پیاوێك هەبوو زۆر جیاواز بوو لەم كوردە كەتە و زلانە كە عەرەبێكی لەڕ و لاوازی خەڵكی حیجاز بوو و ماوەی پانزە ساڵ بوو لەگەڵ شێخ حیسامەدین دەژیا و لێرە ژنی هێنابوو و جێگیر بووبوو بەڵام یەك وشە لە زمانی كوردی فێر نەبووبوو. ئەم پیاوە مەیلی بە لای قسە كردنەوە نەبوو بە هیچ زمانێك و تەقەی سەری دەهات كە باسی فەیسەڵم دەكرد كەچی شێخ زۆر بەپەرۆش بوو بۆ بیستنی.

لە پاش نانخواردنێكی نایاب و بەتامى نیوەڕۆ دۆعاخوازیمان كرد و دەبێ ئەوەش بڵێم كە من بە نابەدڵی ئەو شوێنەم جێهێشت. ئەم باخە كۆنە وەختی خۆی لانكەی دز و جەردە بووە تا ئەو دەمەی كە باوكی حیسامەدین فەرمانی پێكردووە گوندێك لەم شوێنەدا ئاوەدان بكاتەوە و دەست بداتە ئیرشادی تەریقەت. بەمجۆرە بوو بە خانەقای نەقشبەندی و خەڵك دەهاتنە سەردانی و دەستی شێخى ڕووگەشیان ماچ دەكرد و سەرەتاكانی بەها و ڕەوشتی لێوە فێر دەبوون بە پێی تێگەیشتنی ئەو شوێنە.

كاتێ كە بەڕێكەوتین بەرەو دەربەندێك داگەڕاین و بە قەد چیایەكدا پێچمان كردەوە و ڕۆیشتینە دەربەندێكی دیكەی قووڵتر و سامناكترەوە كە یەكپارچە دارستانێكی چڕ بوو و لەناكاو لە قوژبنێكدا خۆمان لە ناو دۆڵێكی پڕ لە دارگوێزی قەبە و زەبەلاحدا بینییەوە و چووینە گوندی بیارە كە مەرقەدی شێخ عومەری تێدابوو، كەوا ڕابەری بەناوبانگی تەریقەتى نەقشبەندیی بووە پشتێ دوان لەمەوپێش. ئێرە ئامۆزایەكی شێخ حیسامەدینی لێبوو كە ناوی شێخ عەلادین  بوو و لە دیوەخانەكەی خۆیدا لە ژێر كۆمەڵە دارگوێزێكی گەورەدا چووینە  لای و ئەم دیوەخانە دەكەوتە لایەكی خانەقاوە و بە تەنیشت حەوزێكەوە كە خەڵك دەسنوێژیان لێدەگرت پێش ئەوەی بچن بۆ نوێژ كردن و شوێنەكە تا بڵێی ئارام و دڵڕفێن بوو. ئەم شێخ عەلادینە هەر كە دەمی كردەوە كەوتە سكاڵا و بۆڵەبۆڵ و هەر لەو ساتەوە ڕقم لێهەڵـگرت چونكە پیرەمێردێكی ڕووتاڵی بەدفەساڵ بوو كە بەردەوام كۆڵی لەو باس و خواسە نەدەدا كەوا حكوومەتی بەریتانیا زۆر لەوە كەمتری بۆ كردووە كە هەقبوو بیكردایە و ئەم چاوەڕێی شتی باشتر بوو و داواكاریی زۆرتر بوو. من پێموایە ئەم زۆر پیرۆزتر بوو لە ئامۆزاكەی كە پێیوابوو بایەخی زیاتری پێدراوە بۆیە وا بێ وێڵ و ماریفەت بوو لەگەڵمان و هەرچۆنێك بێت وایدەبینم كەوا كاریگەرییەكی تایبەتی هەیە. ئەو ئیرشادی “جیهان”   دەكات و نووشتە و دۆعا و چارەسەری بەموعجیزە دەكات و تێكەڵی فڕوفێڵی سیاسیی دەكات كە چۆن بگونجێ لەگەڵ نەگێڕانەوەی قەرزی كشتوكاڵی و هەڵوەشانەوەی باج سەندن. مانەوەی شەومان ماوەی نیو سەعاتێك دەكەوتە ئەوسەری دەربەندەكەوە، چونكە دەبوو لەگەڵ ئەفراسیاو بەگ بمێنینەوە كە یەكێك بوو لە بەگزادەكانی هەورامان و هەروەها كوڕەكەیشی كە تەمەنی 10 ــ 11 ساڵ دەبوو و هاتبوونە بیارە بۆ دیدەنیی ئێمە. ئەم نیو سەعاتە ڕێیە بە سواری زۆر سەرسورهێنەر بوو بە ناو دۆڵ و شیوی پڕ لە دارگوێز و داری میوەی جۆراوجۆر. كاتێ كە خۆر ئاوا بوو لە پشتی چیاكانەوە ئێمە گەیشتینە مەنزڵ، كە ماڵێكی هاوینەی ئەفراسیاو بەگ بوو بۆ میوان و خانوویەكی گەورەی لە بەرد دروستكراو بوو كە بریتیبوو لە سێ نهۆم، خوارەوە بۆ ئاژەڵ و نهۆمی یەكەم بۆ خزمەتكار و نهۆمی سەرەوەشی بۆ ئاغا و پیاوماقووڵان. نیوەی دیوەخانە گەورەكە بە سەر دۆڵ و ترۆپكی دارەكاندا كراوەتەوە و كۆڵەكەی داریش خراوەتە بەر ساپیتە دارینە قورسەكەی و نیوەكەی تریش بە دیواری ئەستووری پێنج پێیى دەوردرابوو و تاقی گەورەی تێدا دروستكرابوو. هۆدەكەی من كە لایەكی خانووەكەی گرتبوو لە دوو لاوە ئەو تاقە گەورانەی تێدابوو، كە هەوا بە باشی دەیگرتەوە بەڵام خۆشبەختانە دنیا سارد نەبوو، هەروەها ئەم تاقانەش زۆر بەرز بوون و لە كەسەوە دیار نەبووی سەیرت بكەن، مەگەر بچوایەتە سەر شاخەكەی بەرانبەری.

پێش ئەوەی شەو دابێت بەرەو گوندەكە ڕۆیشتم كە دەكەوتە سەری ئەوسەری دەربەندەكەوە و لەوپەڕی دارەكانەوە. شاخە ڕووتەنەكە نزیكەی هەزار پێ لە سەر گوندەكەوە بوو بەڵام سنووری ڕاستەقینە كەوتبووە لای خوارەوە و گوندەكەی ئەفراسیاو بەگ ڕێك لە ناو ئێراندا بوو و ناوی هانە گەرمەڵە بوو واتە كانیی گەرم بە دیالێكتی هەورامی. هەفتەیەك دوانی تر گوندەكە دەبێ بە ژێر بەفرەوە، بەڵام خەڵكەكەى گوێ بە سەرما نادەن چونكە خانووەكانیان لە بەردی زل و قەبە دروستكردووە و دارێكی زۆریان لە هەیوانی ماڵدا كەڵەكە كردووە بۆ سووتاندن. ئەفراسیاو بەگ خانووی زستانەی لێرەیە، كە بریتییە لە كۆشكێكی هەورامی كەوا ڕووبەرێكی شكۆداری گەورەی هەیە و كۆڵەكەی ئەستوور ڕایگرتووە.

كاتێ گەڕامەوە بۆ ماڵ تەماشام كرد لە سووچی دیوەخانەوە ئاگریان دەمداوە و ئەفراسیاو بەگ و هەر سێ كوڕە بچووكەكەی، كە پۆشاكی قەشەنگیان لەبەردابوو، لەگەڵ قادر بەگی كوڕی جافر سوڵتان لە سەر دۆشەك دانیشتبوون و لەوبەریشیانەوە چایچییەكە سەماوەری لێدەمدابوو، خزمەتكارەكانیش لە پشتەوە بوون. ماوەیەكی زۆر نەبوو كەوا ئەفراسیاو بەگ یەكێك لە براكانی قادر بەگی كوشتبوو و جافر سوڵتانیش ڕق و كینەی گرتبووە دڵ و هەڕەشەی دەكرد، بەڵام واپێدەچوو قادر بەگ زۆر بایەخ بەم دوژمنایەتییەى ناو خێزانەكە نەدا و بێگومان بووم كە لەمەدا زۆر ژیرانە بیر دەكاتەوە، چونكە ژمارەیەك برای هەیەو یەكێكیان لێ كەم بێتەوە یان زیاد بێت مەسەلەیەكی ئەوتۆ نیە، بۆیە پێكەوە خۆی و ئەفراسیاو لە ئەنجومەنی قەزا دانیشتبوون و سوڵحیان كردبوو. ئێمە لە دیوەخان نانی شێوانمان خوارد، من و كاپتن دۆگڵاس لە سەر تەبەقێكی گەورەی برنج و نان و گۆشتی    كوڵاو و سوورەوەكراو و ماستاو بووین، قادر و ئەفراسیاو و منداڵەكانیش لە سەر تەبەقێكی تر، هەروەها دووسێ تاقمی تریش بەشداری ئەم خوانە بوون. كاتێ كە ئێمە لێبووینەوە و ئەو بەردەستە زۆرەی لێمان مابووەوە دەستوپێ و خزمەتكار بردیانە دەرەوە و خواردیان. شەو زۆرم لاخۆش بوو كەوا لە سەر جێگەكەمەوە و لە كونی تاقەكانەوە تەماشای ترۆپكی دارەكانم دەكرد كە لە نێو تریفەی مانگەشەودا مەلەیان دەكرد.

بۆ سبەی بەیانیی 14ی نۆڤەمبەر بە سواریی گەڕاینەوە بۆ   هەڵەبجە و لە بیارە ئەحمەد بەگ و دەستەو تاقمەكەیمان لەگەڵ خۆمان بردەوە، چونكە ئەوان شەو لە بیارە مابوونەوە. شێخ زۆری هەوڵدا لەگەڵمان كە بۆ نانخواردنی نیوەڕۆ لای ئەو بمێنینەوە و ڕاستیەكەی نانیشی ئامادە كردبوو، بەڵام ئێمە لەبەر ئەوەی هەر سەعاتێك دەبوو نانی بەیانیمان خواردبوو، كە بریتی بوو لە هێلكە و ماست، من پۆزشم بۆ هێنایەوە و نەمانتوانی بچینە سەر بانگهێشتەكەی و پێموایە لێشمان دڵـگران بوو. بۆ لای نیوەڕۆ گەیشتینەوە هەڵەبجە و پاش نانی نیوەڕۆ دۆعاخوازیم لە عەدلە خانم كرد و بە ئۆتۆمبیل گەڕامەوە بۆ سلێمانی، كە نزیكەی سێ كاتژمێر بە ئـۆتۆمبێل دوور بوو و ئێمەش ڕێگەیەكی باشی ئۆتۆمبێلمان بۆ دروستكردبوو. لەوێ مێجەر مارشاڵ لەگەڵ مێجەر گوڵدسمیس مابووەوە و ڕۆژێكی خۆشی بە گەڕان و گرتنی چەند فۆتۆگرافێك لە سلێمانی بردبووە سەر. دواینیوەڕۆی ڕۆژی 15ی نۆڤەمبەر عەدلە خانم هات بۆ سلێمانی و پێی وتم لە بەر خۆشەویستیی من هاتووە بۆ ئەوەی جارێكی تر بمبینێ، بەڵام مەبەستی ڕاستەقینەی ئەوە بوو كە لە لای مێجەر گۆڵدسمیس بۆی تێبكەوم سەبارەت بە هەندێ كاروباری تایبەتی خۆی و لەم كارەیدا سەرنەكەوت و منیش نەمدەخواست دەست وەردەمە كاروباری سیاسیی ناوخۆ، سەرەڕای ئەوەش مێجەر گوڵدسمیس هەموو شتێكی لە بارەی ئەم مەسەلە تایبەتانەوە بۆ باسكردبووم بۆیە بە تەواوی ئاگاداری گەمەكەی خانم بووم.

ڕۆژی 16ی نۆڤەمبەر بە ئۆتۆمبیل گەڕامەوە بۆ كەركووك و جێگری ڕاوێژكار (كاپتن میڵەر) ئەركی میوانداریی بەجێهێنا و ئەلهەقی پیاوێكی بەڕێز بوو (بابە تۆ لە كەركووك بینیوتە بەڵام ڕەنگە نەیەتەوە یادت) و من دەبێ بیر لە پیاوێكی بەتواناتر بكەمەوە لەم سەرۆكە زۆر خۆشنوودەی. لە كەركووك تەماشام كرد بارودۆخەكە بە تەواوی گۆڕاوە و زۆر باشتر بووە. كاپتن میڵەر بەرەوخوار بووەتەوە بۆ بەغدا، چونكە ئەو كاتە لێرەبوو كە من بە كەركووكدا گوزەرم كرد. لەوێ چاوپێكەوتنێكی دوور و درێژی لەگەڵ فەیسەڵ ئەنجامدابوو و بە تەواوی سەرسام بووبوو بە زیرەكی و هونەری كار بەڕێوەبردنی ئەم  پیاوە و بە بڕیارێكەوە گەڕابۆوە بۆ ئەوەى بە كەركووكییەكانی بسەلمێنێ كە بە تەواوی هەڵەن لە  ملنەدانیاندا و تۆزقاڵێكیش لەوە نەگەیشتوون كە فەیسەڵ دەیەوێت و وا چاكترە نوێنەرێكیان بنێرن بیبینێت، كە تا ئێستا ڕازی نەبوون ئەم كارە بكەن. كارێكی سەركەوتوو دەبێت ئەگەر وەفدێكی نوێنەرانیان بە سەرۆكایەتی گەورە پیاوی شار لە ماوەی دە ڕۆژدا خۆ ئامادە بكەن بۆ ڕۆیشتن، چونكە حاڵی حازر فەیسەڵ بە گەشتێك چووەتە شوێنێك. گەورەی شار وەك كاپتن میڵەر دەڵێ لە سەر ئەوە ساغبووەتەوە كەوا تورك نەك هەر ناگەڕێنەوە بەڵكو خودی خۆی دەكەوێتە بارێكی خراپەوە ئەگەر ئەوەیان كرد. لە بەر ئەوە خۆی خستووەتە خزمەتی ئێمەوە و پاڵپشتێكی دڵسۆزی حكوومەتی بەریتانیایە لە كاتی داگیر كردنەوە. خەڵكی كوردی كەركووك حەز ناكەن لەگەڵ سلێمانیدا یەكبگرن و گەوهەری مەسەلەكەش ئەوەیە كە ئەوان بە تورك و كوردەوە لەم ناوچەیەدا لە خۆئامادەكردندان بۆ ئەوەی سوێندی ملكەچی و دڵسۆزی بۆ مەلیكی عێراق بخۆن و ئەمە تاقە خاڵی بەجێیە بۆ ئەوان كە هەوڵ بدەن بیگەیەننە ئەنجام.

هەموو ئەم باس و خواسە كاپتن میڵەر بۆی گێڕامەوە كاتێ بە ئۆتۆمیبل بردمیە دەرەوە پێش چاى خواردنەوە و بۆ بینینى ئەو چاڵە نەوتە ڕەشەی نزیكەی شەش میل دەكەوتە باكووری كەركووكەوە و من پێشتر نەمبینیبوو. ئەمە نەوتێكی پاك نیە بەڵام پاش ئەوەی بە شێوەیەكی سەرەتایی دەیپاڵێون دەتوانرێ بۆ كاروباری ناوماڵ بەكاربهێنرێت و دەكرێ ئەگەر پاڵاوگەیەكی باشی بۆ دابمەزرێنن ئەوە دەتوانن پیترۆڵی سووتەمەنی ئۆتۆمبیلی لێدەربهێنن. ئەم چاڵە نەوتانە مڵكی خێزانێكی كەركووكین كە پێیان دەڵێن نەفتچی زادە. لە دووریی نزیكەی چارەكە میلێك لەم چاڵە نەوتانەوە چاڵێكی بچووك بە سەر تەپۆڵكەیەكەوە تاق بووەتەوە كەوا لە ژێر زەوییەوە گازی لێدێتە دەرەوە و بەردەوام دەسووتێ. ئێمە چووینە سەرەوە بۆ تەماشا كردنی و نێڵەنێڵی لە ئاگری دۆزەخى دەكرد و پڕیشكی ئاگر لە هەموو كون و درزێكەوە هەڵدەبەزییەوە و بۆنی گۆگردی لێدەهات. خۆزگە باوكە جارێكیان لەگەڵ تۆ دەچوومە سەری و بۆت باس دەكردم كە ئەمە چیە و چی نیە. كاتێ گەڕاینە دواوە كاپتن میڵەر بردمی بۆ سەردانی قایمقام كە ئاغایەكی سەرۆكی كوردی لەلابوو بە ناوی حەبیب بەگی تاڵەبانی (ڕاستتر شێخ حەبیب ـ و)  و نوێنەریشە و گفتوگۆیەكی دۆستانەمان پێكەوە كرد و كە هاتن بۆ بەغدا بانگهێشتی ئێوارە خوانێكیان دەكەم. ئێوارە درەنگانێك قایمقام لە بەرانبەر سەردانەكەی مندا سەردانی كردمەوە و عەبدوڵا ئەفەندیی برایشی لەگەڵ خۆ هێنابوو بۆ سەردانی من. ئەم برایەی پێشتر ئەندامی ئەنجومەنی مەبعووسانی تورك بووە و هەروەها حوسێن بەگی نەفتچی زادەشیان لەگەڵ هاتبوو، ئەو بنەماڵەیەی بۆ نوێنەر دەسنیشان كرابوو. عەبدوڵا بەگ و حوسێن بەگ زۆر كەم عەرەبییان دەزانی و تەنها بە توركی قسەیان دەكرد و هەڵبەت ئەم كەركووكیانە تورك بوون نەك عوسمانلی و لە سەردەمی داگیركردنی زووی سەلجوقییەكانەوە هاتبوون. لێرە ئێوارە خوانێكی خۆشمان ساز كرد لەگەڵ دوكتۆر و ئەفسەرێكی لێڤیدا كە لە سلێمانییەوە هاتبوون و دوو پیاوی تر كە لە بەغداوە هاتبوون. لە 17ی نۆڤەمبەردا چووم بۆ كنگربان  و وا ئێستاش هێدی هێدی بەرەوخوار دەبمەوە بۆ بەغدا. ئای ئازیزم خۆزگە لێرە دەبووی!

27

24ى تشرینى دووەمى 1921

بە گەڕانەوەم ئەو نامانەم پێگەیشتن كە تۆ ناردبووتن لە 26ی ئۆكتۆبەر و 2ی نۆڤەمبەر و ئەوانی دایكیشم لە 12 و 18ی ئۆكتۆبەردا، بە ڕاستى ئێوە نامەنێری سەرسامكەرن. من زۆر كەیفم بە هەموو ئەو قسە و باسانە دێت كە لە بارەی لۆرد گرەیەوە نووسیوتن و هاوڕام لەگەڵ تۆ سەبارەت بە لاوازیی هێزی دەستپێشخەری و خەسڵەتی پیاوی دەوڵەتی تێدا نیە.

ئەمڕۆ ڕۆژی زەماوەندی هۆگۆیە و ناردنی برووسكە هیچ كەڵكێكی نیە چونكە كەس نازانێ بە سێ چوار ڕۆژ دەگات یان نە. من زۆر نیە لە سلێمانی گەڕاومەتەوە. یەكشەممە 20ی مانگ تا ئێوارە باران بوو و ئێستاش هەمدیس دەستی پێكردەوە. بەڵام هەرچەندە دەبێ تا ئەژنۆ بچەقمە قوڕ كە دەچم بۆ ئۆفیس من هەر بارانم پێ خۆشترە و مانای وایە بەروبووم زوو پێدەگات و سەوزایی و گژوگیا لە لەوەڕگا و پاوانەكاندا گەشە دەكات و بیر لەوە دەكەمەوە چۆن فەیسەڵ و حكوومەتی عێراق بتوانن قەرزەكانیان بدەنەوە. سبەینێ مەلیك لە ناسریە دەگەڕێتەوە بەڵام پێدەچێت باران خزمەتگوزاریی هێڵی ئاسن ببڕێت و بیستوومە زۆر نیگەرانە بە رێككەوتننامەی فرانكۆ ـ كەمال ئەتاتۆرك و مەسەلەكەش لەوەوە سەرچاوە دەگرێت كەوا دەزانین واڵاكردنی سنووری باكوورمانە بۆ مەترسیدارترین دوژمنمان. من سەرم لەوە سوڕماوە كە دەبێ تا چەند قورسایی هاوپەیمانیی فەرەنسییەكان هەڵبگرین! نامەیەك دەنووسم بۆ لۆرد هاردینگ بزانم بیروڕای لەو بارەیەوە چیە و وا ئێستا زۆر دڕەنگە دەبێ بخەوم و ئەم نامەیە زۆر درێژ بووەوە.

كچی دڵ لەلاتان

  گێرتروود

28

4ی كانوونى یەكەمی 1921

باوكی ئازیزم، ئێمە ئێستا بەریدی ئاسمانی بە بوارێكی كەم دەزانین بۆ گەیاندنی نامە و لە كەشوهەوای تەڕوتووشیدا كار ناكات و بەو پێیە ئێمە پۆستی هەفتەی پێشوومان لە دەرفەتێكدا دەستكەوت كە فڕۆكەخانە وشك بوو بەڵام دواتر كار واكەوتەوە كە ماوەی 3 هەفتە پۆستمان پێنەگەیشت لە بەر بەردەوامیی باران و نوقم بوونی دنیا لە قوڕدا. بە هەر حاڵ هەرچۆنێك بێت هەر نامە دەنووسم و دوانامەم، كە نامەیەكی دوور و درێژ بوو لە سەر كوردستان وابزانم 25ی نۆڤەمبەر بوو، یەكشەممەی رابوردوو هیچ شتێك نەبوو خۆمی پێوە خەریك بكەم لە بەر قوڕ و قوڕاو، بەڵام مستەر تۆمسن هاتە لام بۆ نانی نیوەڕۆ و پاش ئەوە كەوتینە پیاسەیەكی دوورو درێژ بە گوێی ڕووبارەكەدا و خۆر لێواری ڕووباری وشك كردبووەوە. ڕۆژی دووشەممە 28ی مانگ دیسان دایكردەوە باران و بۆ سێشەممە بە ناو قوڕو قوڕاودا چووم بۆ پێشوازیی مەلیك كە لە ناسرییە گەڕایەوە. سەرەڕای قوڕ و باران خەڵكێكی زۆر لە وێستگە چاوەڕێ بوون بەڵام شەمەندەفەرەكە سێ چارەك دواكەوت و لەگەڵ ئەوەشدا دەرفەتێكی باش بوو بۆ بینینی خەڵك و قسە كردن لەگەڵیاندا. نەقیب وەك هەموو جارێك سەید مەحموودی كوڕە گەورەی ناردبوو بەم بۆنەیەوە، ئەوجا وەزیرەكان و یەك دوو   ڕاوێژكار و ئەو دەست و پێوەندە مفتخۆرەی لە سوریاوە شوێن فەیسەڵ كەوتبوون لەگەڵ كۆمەڵێك خەڵكی ناسیۆنالیستی پەڕگری هیچ و پووچ. وابزانم ئەو مفتخۆرە سوریانە خەریكە كاریگەرییان زیاد دەكات و یەكێكیان تازە پێگەیشتووە، كە ناوی دوكتور قادری یە و برای یەكێك لە دەستوپێوەندەكانە و بە پزیشكی تایبەتی مەلیك دامەزراوە و لە دیمەشق هەمان پۆستی بووە. براكەی كەسێكی بێوەی و رووخۆشە بەڵام من ئەم دوكتۆرەم خۆشناوێ چونكە كەسێكی مێباز و فێڵبازە.

قسە و باسێكی زۆر هەبوو لە سەر ئەو خۆپیشاندانەی نیاز وابوو لە وێستگەدا بكرێت كە تیایدا وتار بدرێت و داوا بكرێت دەسبەجێ ئەنجومەنی دامەزراندن و وەزیرە عەرەبەكان و كاربەدەستانی بەرێوەبردن لە ژێر كۆنترۆڵی ڕاوێژكارە بەریتانیەكان دەربچن، بەڵام هیچ شتێك ڕووینەدا و پێدەچێت هەر واتەوات بووبێت. خودی فەیسەڵ خۆی نەیدەویست ئەنجومەن كۆ ببێتەوە (كە ئەركی داڕشتنی قانوونی بنەڕەتییە) تاوەكو هەلومەرجی ڕێكەوتننامەكە بە باشی جێگیر   دەبێت و بەرپرسیارێتی هەردوو حكوومەتی بەریتانی و عەرەبی دیاری دەكرێت. ئەمە مەسەلەی بەرپرسیارێتییە كە هەموو كەسێكی نیگەران كردووە سەبارەت بە پێگەی ڕاوێژكاران و گەلێ شتی تریش. بەگشتی پەیكەری كێشەكە ئەوەیە ئایا ئێمە بەرپرسیارێتی بەرگریكردنمان لە سەرە ئەگەر هێرش كرایە سەر وڵاتەكە ـ بۆ نموونە لەلایەن كەمالیستەكانەوە. ئەگەر نەتوانین ئەوە فەیسەڵ دەیەوێت دەستی كراوە ببێت كە بەرگری لە وڵاتەكەی بكات بەو شێوەیەی كە خۆی دەیەوێت، وەك هاندانی گیانی نەتەوە پەروەری لە چواردەوری مەلیكێكی موسڵمانی سەربەخۆدا، بەڵام دواجار ئەو دەبێ بتوانێ سەربەخۆیی ڕاستەقینەی خۆی بنوێنێت بە جۆرێك كە ئێمە بە ڕاستى ببینە   ڕاوێژكار و بڕیاری كۆتایی لە دەستی حكوومەتی عەرەبی و ئەودا بێت. وەك دەزانی، بە بۆچوونی من ئێمە ناتوانین دەنگدانێكی زۆرەملێ پیادە بكەین چونكە هەموو ئەوانەی دەوترێن جێبەجێ بكرێن ئەو هیچ هۆكارێكی هێز و فشارمان بەدەستەوە نامێنێت. بەو پێیە دەبێ هەمیشە پەنا ببەینە بەر قەناعەت پێكردن و ئەگەر هەموو ئەوانە كەڵكیان نەبوو بڕێكی تری لێدەكەینەوە. بەڵام دەبێ توانای ئەوەمان هەبێت كەوا كۆمەڵەی گەلان رازی بكەین كەوا دەتوانین ئیلتیزاماتی نێودەوڵەتی جێبەجێ بكەین كەوا ماندێت (ئینتیداب) بە ئێمە بسپێردرێت. تەنانەت ئەگەر لە ماندێتەكەش بكشێینەوە و پەیماننامەیەك ببەستین، ئەوە دەبێ ئەو بەیاننامەیە بەشێوەیەك بێت كە عەرەبەكان قبووڵی بكەن. من وایدەبینم كە دەبێ زیاتر بە ئاڕاستەی تەنازولدا بڕۆین وەك لەوەی حكوومەتی خاوەن شكۆ لە حاڵی حازردا بیر لە گەڵاڵە كردنی دەكاتەوە. من بە گومانم لەوەی كە عەرەبەكان كۆنترۆڵی تەواوی پەیوەندییەكانی دەرەوە قبووڵ بكەن و هانی ئەوەش دەدرێن كە كارێكی وا بكەن چونكە ئەمەریكییەكان، كە هەرگیز دانیان بە ماندێتدا نەناوە، ئەوپەڕی حەز دەكەن لەلایەن خۆیانەوە پەیماننامەیەك لەگەڵ دەوڵەتی عێراقدا ببەستن كە سوودێكی زیاتریان بداتێ و نەوت خۆی كێشەیە و كەرەستەیەكی قێزەونە!

وشەی ماندێت (ئینتیداب) لێرە هەمان ئەو كاریگەرییەی وشەی ویسایەی هەیە لە میسر و ڕاگەیاندنی فیشەر لە كۆمەڵەی گەلاندا كەوا ماندێت پەیوەندییەكانی ئێمە بە كۆمەڵەوە دەخاتە ڕوو لە كاتێكدا پەیماننامەكە پەیوەندیمان بە دەوڵەتی عەرەبییەوە دەخاتە ڕوو هەڵاو بگرێكی كەمی ورووژاندووە. تەنانەت فەیسەڵ پێشتر وا لە ماندێت تێگەیشتبوو كە دەبێ نەمێنێ و كەچی لێرەدا بە فۆرمێكی تر هاتووەتە ئاراوە. من وا چاوەڕوانم چۆن ویسایە كەوت ئەمیش وایلێبێت و هەرگیز بەرگی پرسەی بۆ ناپۆشم. ئەوەی كە دەبێ لەبیرمان بێت كەوا ڕاستێكەی زۆرێك لە عەرەبی نەدار و بێتوانا دەبێ بێ رابەری و كۆنترۆڵی ئێمە كاری خۆیان بكەن. ئەوان كەرامەتیان لە ئێستای داگیركاریی جیهاندا سووكایەتی پێكراوە بە مانا سیاسییەكەی، یان بە هۆی وشەی ڕابەرایەتی كردنەوە ئەگەر بە هەر مانایەك بێت لە ڕاوێژ بترازێ و بە سەربەستی قبووڵ نەكرێت. دەكرێ ئەوەش بڵێم كەوا ئەم كاردانەوانە هەمووی تایبەتن و حەز دەكەم ئەم نامەیە پیشانی دۆمنوڵ بدەیت.

وەفدی نوێنەرایەتی كەركووك گەیشت و ڕاستەوخۆ چوون بۆ لای سێر پێرسى بۆ تەگبیر و ڕاوێژ، بەڵام هیچ ڕایەكی نەدا و پێیوتن كەوا ئازادن بچنە پاڵ ئەم دەوڵەتە عەرەبییە یان ماوەی ساڵێك مەسەلەكە هەڵپەسێرن و بزانن ئایا دەوڵەتێكی كوردی پێكدێت بە پێی پەیماننامەی سیڤەر (كە ئیقرار نەكراوە و قابیلی ئیقراریش نیە) و ڕایسپاردن بچن قسە لەگەڵ فەیسەڵ بكەن. ئەوانیش ڕۆیشتن بۆ لای و چەند جارێك چاوی پێیان كەوت. دواتر فەیسەڵ ئاگاداری كردمەوە كە ئەوەی ئەوان پێیانوتووە ئەوەیە كەوا ئەگەر دەوڵەتێكی تۆكمەی نیشتمانی و سەربەخۆ دابمەزرێت لێرە و توانای بەڕێوەبردنی وڵاتی هەبێت، ئەوە وایدەبینن كە لە بەرژەوەندییانە بچنە پاڵی، بەڵام ئەگەر هەر قەوارەیەك بێت لە ژێر دەسەڵاتی ڕەهای بەریتانیادا ئەوە وای باشتر دەزانن هەر ڕاستەوخۆ لە ژێر ڕكێفی ئەو دەسەڵاتەدا بن و لە ڕێگەی كاربەدەستانی ئەڵقەلەگوێی عەرەبەوە حوكم نەكرێن. فەیسەڵ وایبۆدەچوو ئەمە هەڵوێستێكی بەجێ بێت بەڵام باوەڕیشی وابوو كە دەتوانێ هانیان بدات دەستی لەگەڵ بێننە پێشەوە لە ڕێكخستنی دەوڵەتێكی خۆماڵیدا و بە تایبەتى من حەز دەكەم ئەو كارەی پێبكرێت. فەیسەڵ داوای لێكردم ڕۆژی پێنجشەممە بچم چایەكی لەگەڵ    بخۆمەوە و هەمان داواشی لە یەك دوو كەسی تر كردبوو بەڵام هەندێ هەڵە كەوتبووە دانانی كاتەكەوە. بەم ڕەنگە سەعاتێك پێكەوە دواین و باسی زۆر شتمان كرد بەڵام وا مەزانە من هیچ چارەسەرێكم پێیە بۆ ئەم كێشانەو شتێكیان لەبارەوە دەزانم چونكە سێر پێرسى كورتەیەكیانم بۆ باس دەكات و من تەنها تەماشاكەرم و فەیسەڵیش هەرچەندە دڵنەرم و هاوڕامە بەڵام لەم شتانەدا ڕاوێژم پێناكات. من ئەوە نزیكەی پێنج هەفتەیە نەمدیوە بە هۆی جارێك سەفەری من و جارێكیش سەفەری خۆیەوە و من زۆر بە وریاییەوە خۆم دوورەپەرێز دەگرم لە هەر ڕاوێژێك بۆ ئەو مەسەلانەی ورد و هەستەوەرن و بە زۆری بەرەوڕووی سێر پێرسى دەبنەوە. هەموو ئەوەی كە من دەتوانم بیكەم یان هەوڵى بۆ بدەم بە وردی ڕاو بۆچوونی خۆمە بە پێی توانای خۆم لە بارەی ئەوەوە كە خەڵك چیدەڵێن و چۆن بیر دەكەنەوە. ڕۆژی چوارشەممە تەلەفونێكی دوور و درێژم بۆ نەقیب كرد، چونكە ئەم پیاوەم  خۆشدەوێ و زۆر زۆر پێی سەرسامم. دڵسۆزیی چەسپاوی ئەو بۆ سێر پێرسى شتێكی زۆر   جوان و كاریگەرە. ئەو بڕوای تەواوی بەوەیە كە لە داهاتوودا ڕزگاریی وڵاتەكەی بەندە بە حكوومەتی بەریتانیاوە و بە موو لانادات لەم بڕوایەی خۆی و ئەو سیاسەتەی بە تەواوی قبووڵە كە داڕێژراوە. هەروەها ڕۆڵێكی زۆر جوان و لەخۆبوردووانە دەگێڕێت لە پەیوەندیدا بە فەیسەڵەوە و ئەوەندە پەككەوتە و لاوازە كەوا ناتوانێ سەر لە مەلیك بدات وەك سەرۆك وەزیران و ئەنجام وا كەوتووەتەوە لە بازنەی ڕا و تەگبیر بەدەر منیش وایبۆدەچم كە ئامۆژگاریی ئەو زۆر پێویست و بەنرخە. فەیسەڵیش كە لە دەوربەرێكی پڕ مەراییدایە، قەناعەتی بەوە هێناوە كەوا وەك مەلیكێك ناشێ سەردانی سەرۆك وەزیرانی خۆی بكات. من بە ڕەزامەندیی سێر پێرسى هەوڵی زۆرم دا بۆ پووچكردنەوەی ئەو بیرو بۆچوونە و هیوادارم هەوڵەكانم بەری زیاتر بگرن.

ئەمڕۆ كە یەكشەممەیە و من بە هۆی قوڕەوە بەند بووم و مێجەر موڕەی كە ڕاوێژكاری موتەسەڕیفی بەغدایە لەگەڵ مێجەر ویڵكینسن (بێتەل) بۆ نانخواردنی نیوەڕۆ هاتنە لام. پاشان تۆفیق خالیدیی كە پیاوێكی رۆشنیری هەست بەرزە بەڵام نەتەوە پەرستێكی دڵـگەرم نیە بۆ چاى خواردنەوە هات و هەر لەو كاتەدا دوكتۆر مەعلووفیش هات كە پیاوێكی    میسرییە و بەشی پزیشكیی سوپای عەرەبی بەڕێوە دەبات. ئەم پیاوە كەسێكی ڕۆحسووك و مونەوەرە و چەشنی كەسێكی ئینگلیز دەتوانێ لە بارەی سیاسەتەوە قسەی لەگەڵ بكەیت و زمانە ئینگلیزییەكەی زۆر پاراوە.

29

5ی كانوونى یەكەمی 1921

لەم دە ڕۆژەی دواییدا زیاد لە پێنج ئینج باران باریوە و هەرگیز لە ئەزموونی بەغدامدا   قوڕ و قوڕاوێكی وەك ئەمجارەم نەبینیوە. ئەمڕۆ بەیانییەكی خۆشم لە ئۆفیس بردەسەر بە وێنەكردن و چەسپاندنی سنووری بیابانی باشووری عێراق بە هاوكاریی پیاوێكی بەڕێزی خەڵكی حایل كە فەهد بەگی ئازیزی شێخی عەنزە و ئەم پیاوە باوەڕی تەواوی بەوە هەبوو كە من شارەزاییەكی باشم هەیە لە بیاباندا و ئــــــەم باوەڕەشی لە شەرمدا سوور هەڵیدەگەڕاندم.

كاتێ مستەر كۆرنواڵیس پرسیاری ئەوەی لێكرد كە سنووری هۆزەكەی خۆی دیاری بكات وتی: “لە خاتوون بپرسە، ئەو دەزانێت” منیش بۆ پاڕاستنی ئەو ناوبانگەی كە هەموو شت دەزانم زۆر بەئاگاییەوە هەوڵمدا شوێنی هەموو ئەو بیرە ئاوانە بزانم كە عەنزە ئیدیعاى خاوەندارێتییان دەكرد لە ڕێگەی فەهدەوە و ئەو بیرانەش كە شەممەر بە هی خۆیانیان دەزانی لە ڕێگەی پیاوەكەی حایلەوە و بە شێوازی جۆراوجۆر توانیم سنووورێكی بەجێ بكێشم. گرنگیی مەسەلەكە لەوەدایە كەوا ئیبن سعوود حایلی گرتووە  و لە زووترین دەرفەتی گونجاودا سێر پێرسى دەیەوێت كۆنفرانسێك ببەستێ لە نێوان  ئەو و فەیسەڵدا بۆ چارەسەر كردنی تەواوی ئەوەی كەوا كام هۆز و زەوی هی عێراقە و كامەی هی ئیبن سعوودە. ئەگەری ئەوە هەیە كە ئەم كۆنفرانسە لە كوەیت ببەسترێ و من بەهیوام كە سێر پێرسى لەگەڵ خۆی بمبات، بەڵام هۆكاری ئەوە نازانم كە بۆچی من یان خۆی نابێ پێشنیازی بكەین. لە پاش ئۆفیس بە ناو قوڕدا چووم بۆ سەردانی وەفدی كەركووك و زۆربەیانم لە ماڵی عیززەت پاشا بینی، كە وەزیری ئەشغاڵی گشتی و كەركووكلیش بوو. لەوێ گفتوگۆیەكی دۆستانەمان دامەزراند لە سەر هەموو ئەو مەسەلانەی باسیان لێوەكرد و بە تایبەتى لەو ڕووەوە كە سەرنجم دا كەوا سیدی فەیسەڵ زۆر سەرسام بوو بە هەڵوێستی بەجێ و ژیرانەیان. ئەوانیش لە وەڵامدا وتیان كەوا مەلیك لەڕادە بەدەر بەخشندە و میهرەبان بووە لە گەڵیان و پاشان بەردەوام بووین لە گفتوگۆ كردن لە سەر ئەگەر و سوودەكانی ئاشتییەك لەگەڵ توركیادا. دواجار كە ئەوێم بەجێهێشت عیززەت پاشا شوێنم كەوت بۆ دەرەوە و لە ڕاڕەوە قوڕاوییەكەدا بە ئەسپایی وتی: “هەموو شت بە پێی ویستی تۆ  ڕۆیشت” و لەم گوزارشە تەمومژاوییە بەهیوا بووم ئەوە بگەیەنێ كەوا كەركووك بڕیاری داوە بێتە پاڵ عێراق.

ئەمڕۆ نامەیەكم لە دایكمەوە پێگەیشت كە لە 2ی نۆڤەمبەردا نووسرابوو، ئەمە ئەوە دەگەیەنێ كەوا بە پۆستەی ئاسمانی نەیناردووە چونكە وەك پێشتر سەرنجم داوە پۆستی ئاسمانی بە هۆی قوڕو بارانەوە ناگات. نامەیەكی ئێلزاشم لە هەمان ڕۆژدا بۆ هاتووە و هەردوكیان باسێكی تەڵخیان نووسیوە كەوا هەموو بەنكەكان بەرەو داڕووخان دەچن و نوقمی مایەپووچی دەبن. ئەمە زۆر ناخۆشە، بەڵام لە هەمان كاتدا كە من ناتوانم هیچ شتێك بكەم بۆ بەرگرتن لەم حاڵەتە و وەك مستەر بەلفوَر لە بارەی سیاسەتی ڕۆژهەڵاتەوە دەڵێت (شتێكی تاڵ و شوومە!) ڕووم لەم ئەگەرە تاڵانە وەردەگێڕم! سێر پێرسى دەڵێ كەوا حاڵی حازر بارى دارایی بانك داڕووخاوە، واتە وا دێتە بەرچاو كە ئاسانە پارە بە دەست   بهێنرێت و من لە دڵەوە باوەڕم وایە كە ڕەنگە وابێت. بەڵام باوكی ئازیزم ئەوەی بە شێوەیەكی سەرەكی وەڕسم دەكات، بیری ئەوەیە كە تۆ لەم كاتەدا نیگەران بووبیت و هیوادارم مەزاجت بەزوویی بێتەوە سەرخۆی. من دەمەوێ ئەوە بڵێم كە بنەماكانی زانیاریم لە بواری داراییدا لە سەر ئەو بەدیهەتەیە كەوا هەر شتێك تۆ دەیكەیت باشترین شتە كرابێت و زۆر لەو هەستەی فەهد دەچێت سەبارەت بە زانیاریی من لە سەر سنووری هۆزەكان.

30

17 ی كانوونى یەكەمى 1921

… ئازیزم فرانك (بەلفۆر)، من قەرزاری تۆم بۆ وەڵامدانەوەی دوو نامەی زۆر خۆش و ڕۆحسووك كە لە 8ی سێپتەمبەر و 23ی ئۆكتوبەردا نێردرابوون. مستەر داڤیدسۆن هەندێ شتی تۆی بۆ باسكردم سەبارەت بە كاروباری فیكی، بەڵام نەك ئەگەری پەیوەست بوون بە سنووسییەوە كە زۆر جێگەى دڵخۆشییە. سەید ئەحمەد كارتێكی سەركەوتوو نیە لە دەستی توركدا و دوا هەواڵ كە لە بارەیەوە بیستوومانە ئەوەیە كەوا لەگەڵ كەمالیستەكان ڕۆیشتووە و بیر لەوە دەكاتەوە كە بگەڕێتەوە ماڵی خۆی.

پێموانیە مەسەلەیەكی ئەوتۆ بێت بمێنێتەوە یان بڕوات و ئەوە ناگەیەنێ كە بڵێین چالاكیەكانی تورك بەرچاو نین، بەڵكو هەن. ئەم ئێوارەیە گفتوگۆیەكی دوورو درێژم هەبوو لەگەڵ كاپتن لیتڵدێڵ كە لە ئەربیل (هەولێر)ەوە هاتووە و كەسێكی زۆر بەتوانا و لێهاتووە و كاری سەرسامكەری لەوێ ئەنجامداوە لە بەشی پۆلیسداو ئەو شتەكان هەر بە ڕەشی دەبینێ. هێرشێكی تورك بە هەر هێزێك بێت 200 یان 300 كەس، ڕەنگە كشانەوەیەكی خێرا بگەیەنێ لە هەولێر لەلایەن ئێمەوە و ئەوان ئێستا هێزێكی سەد و بیست كەسییان لە ڕەواندز پێكەوە ناوە. بە پێی ئەنجامگیریی ئەم ئاشتیە لەگەڵ توركیادا تاقە چارەسەرە (ئەمە وەك گۆرانی وتنی كۆرسی لێهاتووە). كاتێ فەیسەڵ دەڵێ ئەو لە سیاسەتی ئێمە تێناگات، من تەنها لەگەڵ ئەودام. لە كاتێكدا دوژمنكاریی تورك ڕۆژهەڵاتی نزیكی بە پیسترین پرۆپاگەندە پڕكردووە لە دژی ئێمە و فەرەنساییەكانیش ناوچەیەكی سنوورییان لێدزین، كێ سەرزەنشتیان دەكات؟ كەچی ئێستا بە هۆی رێككەوتنیانەوە سوودمەندن، بڕوانە ڕاپۆرتی ژمارە بیست و حەوتم. من ناتوانم بیر لەوە بكەمەوە كەوا ئێمە ئێستا دەتوانین ئەمە لەگەڵ شەرەف و كەرامەتدا تێكەڵ بكەین، بەڵام من ئەو شكۆیە دەدەمە دەم باوە. لای خوارەوە كاری ئیبن سعوود خۆشبەختانە لە دەستی سێر پێرسیدایە نەك حكوومەتی خاوەن شكۆ. ئێمە تا چەند زوو چارەسەرێك لەوێ بەدەستبێنین باشترە. من هیچ گومانێكم نیە لەوەی كەوا گرتنی حایل سەرەنجامی دوورتری لێدەكەوێتەوە. ئەو ڕاستەوخۆ دوای ئەوە هەنگاوی بۆ شانۆی سوریا و فەلەستین ناوە، بێجگە لە شەرقی   ئوردون و تەواوی حیجازیش. شەرقی ئوردون بە زمنیی مستەر فیڵبى  دەگرێتەوە كە ئێستا لەوێ لە دەسەڵاتدایە، وەك هەر كەسێكی دەسەڵاتدار. ئەگەرى ئەوە هەیە كەوا ڕەنگە ئەو هۆكاری ئەم دەسەڵاتە شاهانەیەی تێكەڵ بكات و من لە تی. ئی. لۆرەنسم  بیستووە كە بە دڵسۆزی ماوەتەوە بۆ ئیبن سعوود. ئەو دەڵێ فەیسەڵ سەرنجێكی تەڵخی وەرگرتووە بەڵام بەگشتی من وایبۆدەچم كە تەنها كاریگەریی ئێمە دەتوانێ بەربەست بۆ ئیبن سعوود دابنێ كە حیجاز و بگرە شەرقی ئوردونیش نەخوات و بە گشتی بەرژەوەندی وا دەخوازێ كە نوێنەری بەریتانیا لەوێ پەیوەندییەكی باشی لەگەڵ هەبێت. ئیبن سعوود تا ئێستا بە باشی پابەندە بە ڕێككەوتنەكانیەوە لەگەڵمان سەرەڕای ناكۆكیی تاڵی لەگەڵ بنەماڵەی شەریفدا كە لە باسكردن نایەت.

بەڵێ ئێمە بە پەیماننامەكەوە سەرقاڵین و لۆرد بۆی نووسیوین كەوا حكوومەتی خاوەن شكۆ بوار دەدا كە بە تەواوی دەستكراوە بین. وشەی ماندێت لێرە مایەى بێزلێكردنەوەیە و تەنانەت نەقیبیش زۆر پەرۆشە بۆ بەكارهێنانی بڕگەیەك كە وشەی ماندێت یان پارێزگاری بخاتە لاوە. ئەو ئەمڕۆ ناردی بە شوێنمدا بۆ ئەوەی دیدو بۆچوونی خۆیم بۆ ڕوون بكاتەوە و هەرچۆنێك بێت بەپێی توانا بیخەمە بەردەمی سێر پێرسى. من قەناعەتم وایە كە دەبێ وریابین لە داڕشتنی ڕستە و بڕگەی باشتردا بۆ دابینكردنی ڕێكەوتننامەی ڕاستەقینە، بەڵام زۆر دڵنیا نیم لەوەی حكوومەتی خاوەن شكۆ بواری بدات.

حەدداد لێرەیە و پیاوێكی پیری خۆهەڵكێش و فرەڕێسی خۆشە و دۆستمانە و زۆر دڵسۆزی فەیسەڵە بەڵام ئەم زۆری لەو تێپەڕاندووە لە ژیری و هونەری بەڕێوەبردنی دەوڵەتدا. لێرە ئەوەندە حەز لە حەدداد ناكەن و بە تایبەتى سورییەكان ئێرەیی پێدەبەن، بە زۆری لە بەر ئەوەی دڵسۆزانە ڕەخنە گرتنی لە سیاسەتی زایۆنیستیی قێزەونی ڕەتدەكردەوەو بە ڕاستى ئێمە مەسەلەكان بۆ دۆستەكانمان قورس دەكەین.

ماوەیەكی كورت لە پێش تێكچوونی كەشوهەوادا ڕۆیشتم بۆ  سلێمانی و لەوێ هەشت ڕۆژی خۆشم بەسەربرد بە سواریی ئەسپ بە درێژایی سنووری ئێران و بە سەر شاخ و یاڵی بە داربەڕوو داپۆشراودا. وڵاتێكی كێوی و جوانی دڵڕفێنى وام هەرگیز نەبینیوە و مێجەر گوڵدسمیس زۆر بە چاكی و سەرسورهێنەر بەڕێوەی دەبات. ئەم وڵاتە بە ڕەهایی هەر بەستنەوەیەكی لەگەڵ عێراقدا ڕەتكردووەتەوە و ئەمیش ژیرانە كاروباری بە خەڵك سپاردووە بەو هیوایەی ئەگەر دواجار ئێمە سەركەوتین لە پێكهێنانی حكوومەتێكی بەجێ و جێگیردا لێرە، ئەوە كورد ڕەنگە پێیان خۆشبێت بە هەلومەرجی ڕازی بن و هاوكاری بكەن.

لێرە هەندێك ناڕەزایی و نیگەرانی هەیە لە سەر هەڵبژاردنی شارەوانی. عەبدولمەجید خۆی بەم ئۆفیسەوە هەڵواسیوە بەڵام وەك دەزانی كەسێكی بێتوانایە و پێموایە كاتی ئەم بە سەرچووە و ئێمە پیاوێكی گەنجتر و بەتواناترمان دەوێ. دڵسۆزیی ئەم پیاوە بۆ ئێمە شتێكە ناتوانم لەبیری بكەم بەڵام لەگەڵ ڕێزمدا من دەبێ پێ لەوە بنێم كەوا ئەم ئەو كەسە گونجاوە نیە. پێموایە هەلی باشی بۆ ڕەخساوە بە ئاسوودەیی خانەنشین بێت ئەگەر نەڵێین بە دەوڵەمەندیش و ئەمەش باشترین هەلە بۆ ئەو.

لەم سێ هەفتەی ئەم دواییەدا بارانی زۆر و بەخوڕ بە جارێ ژیانی تێكدابووین تاوەكو پارەیەكی زۆر باش لە شەقامەكانی بەغدادا خەرج نەكەن چاكبوونی بەرچاو مەحاڵ دەبێت. لەم ماوەیەدا هێڵی كەمترین بەرگری قسە وتنە بە ئەمینداری شار، كە ئەم بەیانییە هاتە لام و وتی: “یا حچرە الخاتون، خوایە ئیتر بەسە باران!” بەڵام پێموانیە خوا بارانەكە بگرێتەوە، چونكە بای وەشت هەر بەردەوامە. ئای فرانكی ئازیزم، چەندم حەز دەكرد تۆ و فیلیس لێرە بوونایە! من زۆر بەپەرۆشم بۆ هاوەڵێك دوان. مستەر كۆرنواڵیس پاڵپشتێكی گەورەیە، بەڵام هێند جەنجاڵە كەوا كەمجار دەیبینم. ئۆریلیا تۆد لە ئیتالیایە و دنیاش سارد و سڕە. ئێستا كاپتن كڵەیتن، مێجەر موڕەی، مستەر تۆمسن پشتیوانی سەرەكیمن و جۆیس ژنێكی خۆشەویستمە و مستەر داڤیدسۆنم زۆر خۆشدەوێ و تازە ژنەكەی گەیشتووە و سبەینێ بانگهێشتی نانخواردنی نیوەڕۆم كردوون و مستەر داڤیدسۆنم زۆر لا بەنرخە و لە بنەڕەتدا لیبراڵە لە دید و بۆچوونیدا و ئاگاداری ناوەرۆكی پەیوەندیمانە لەگەڵ عەرەبەكاندا وەك هەر كەسێكی تر لێرە. پیاوە ئینگلیزەكانمان بە شێوەیەكی سەرسورهێنەر باشن و من زۆر سەرسامم بە سۆز و ئارامیی تێگەیشتنیان، بەڵام ژنەكانیان، هەندێكیان لێ بەدەر، تا بڵێی هیچ و پووچن و لە جۆری بێكەڵكە ئینگلۆ ــ هندییەكانن.

دەزانی لە كۆیلەیەتی دەرچوونی ڕەگەزی مێ باش دەچێتە پێشەوە و ئەو ژنانەی كە لە دیمەشق و ئەستەمبووڵ دەژین وەك ئەوەی لە لەندەن و پاریس بن دژ بە ستانداردی بەغدای مێینە هەستاون. هەفتەی ڕابوردوو لەگەڵ سێر ئەیڵمەر نانی شێوانم خوارد و جەعفەر    پاشا و نوری پاشام بینی لەگەڵ ژنەكانیان و هەردوكیان كە دوو دەستەخوشكمن بە تەواوی بێئاگابوون لە هەموو شتێك. تۆ تەماشا ئەمە لە بەغدا! من چاوەڕێی گەشەكردنم. تۆ جارێكیان ئامۆژگاریت كردم ئەوەندە خۆم سەغڵەت نەكەم بە كاروبارەوە، هەڵبەت من لەمە زیاتر شتێكی ترم پێناكرێت، چونكە هەر لە فەیسەڵەوە بۆ خواری خوارەوە زۆر بایەخیان پێداوم، بە سۆز و متمانەوە و زۆر قەرزاریانم. ئەوان زۆر بە گەورەیی و لە ڕادەبەدەر مەزەندەی خزمەتكردنیان بە خۆیان لەقەڵەمداوە. لە بەر ئەوە دڵ و گیانم دەخەمە خزمەتەوە و ئەوپەڕی خەڵاتی پێزانینم لەبری ئەوە وەرگرتووە و هەرگیز مافی گلەیی و سكاڵام نیە، لەگەڵ ڕێز و خۆشەویستیم. 

    گێرتروود

31

20ى كانوونى یەكەمى 1921

باوكی ئازیزم، سبەینێ پۆستەى ئاسمانی دەوەستێت، دوو ڕۆژ پێشتر لە ڕۆژانى ئاسایی، بە هۆی جەژنی لەدایكبوونەوە (كریسمەس). كاپتن كڵەیتن و من پلانی چوونە دەرەوەمان هەیە لە 23ی مانگدا، بۆ مانەوە لەگەڵ ماڵی سەید سەفائەدین و نەقیبدا لە خانوویەكیاندا لە دێهات، ئەوەی كە  من و تۆ نانی نیوەڕۆمان تێدا خوارد. پێموایە ئاهەنگی جەژنی لەدایكبوون لە ماڵێكی دێهاتیی عەرەبدا شتێكی خۆش دەبێت، توخوا وا نیە! ئێمە بە سواری ئەسپ دەڕۆین و ئەگەر كەش و هەوا لەبار بێت سەیرانێكی پڕ كەیف دەبێت و دڵنیام كە سەید سەفائەدین خانەخوێیەكی زۆر باش دەبێت.

وا جارێكی تر ئاژاوە و پشێوییەكی توركی ــ كوردیمان بۆ دروستبوو لە سنووری ئەربیلدا. پێدەچێت كەمالییەكان، پێش ئەوەی بێنە نێو دانوستانی ئاشتییەوە بیانەوێ چەندیان پێبكرێت كارتیان لەدەستدا بێت، یان ئەمە ئاماژەی دوژمنایەتی و داخ لەدڵییە لەلایەن ئەوانەوە. بە هەرحاڵ ئەمە مایەی نیگەرانییە، بەڵام سەبارەت بەم هاندان و دنەدانەی كەمالییەكان ئێمە كێشەیەكمان نیە لە مامەڵە كردن و چارەسەر كردنی ئەو سنوورە كوردیانەدا، بەڵام لەگەڵ هێزی نیزامیی پتەوی تورك و چەك و جبەخانەى شەڕی چیاییاندا هیچ ناكرێت، لە كاتێكدا ئێمە هەر هێزی لێڤی و پۆلیسمان هەیە بۆ بەرەوڕووبوونەوەیان و ئەمانە كێشەیەكی قورسن. لە بەینی خۆشماندا بێت فڕۆكە باش نیە بۆ ناوچەی شاخاوی، چونكە تۆ لە ئاسمانەوە گوندێكی شاخاویی كوردی بە باشی نابینیت لە بەر ئەوەی    سەربان و ساپیتەكانی كە بە قوڕ سواغدراون تەختە و لە قەدپاڵی چیاكە دەچن و تەنانەت ئەگەر دەسنیشانیشی بكەیت ناتوانیت زیانی زۆری پێبگەیەنیت و خەڵكەكە پەنا دەبەنە ژێر هەر گاشە بەردێكی گونجاو و بەم پێیە بۆمبەكان بێ زیان دەبن بە بەراورد لەگەڵ شوێنی تردا. ئاخ بۆ ئاشتی، ئاشتی بە هەر نرخێك بووە و تۆ بڵێی هیچ نەوەیەك بە ئەندازەی ئەم نەوەیەى ئێمە شەكەت و ماندوو بووبێت بە دەست جەنگ و ناكۆكییەوە!

19ى كانوونى دووەمى 1922

… هەموو شتەكانی تر زۆر بە ئاسایی دەڕۆن، بێجگە لە سنوورەكانی باكووری ڕۆژهەڵات كەوا توركەكان زیاتر مایەی سەرئێشە و ماندوێتین. لە ئێستادا ئێمە دوو هێرشی بچووكمان لەلایەن كوردەكانەوە كراوەتە سەر بە فیت و پیلانی كەمالییەكان و بۆ بەدبەختیی هەردوولا زیانی گیانییان لە ئەفسەرە بەریتانییەكانی لێڤی داوە. دوا هێرشیان لە نزیك هەڵەبجە بووە و من بە ئاستەم باوەڕ بەوە دەكەم كاتێ كە بیری لێدەكەمەوە چۆن بە سواری لە نۆڤەمبەردا (1921 ـ و) بەوپەڕى ئاسوودەیى و بێباكییەوە بە چیاكانی هەوراماندا گوزەرم كردووە. ئەم كارە بە هۆى پیلان و پیاوخراپیی كوردێكەوە سازكرابوو لە دیوی ئێرانی پشتی سنوورمانەوە و بوو بە هۆى كوژرانی ئەفسەرى فەرماندەی لێڤی، كاپتن فیتزجیبۆن، كە یەكێك بوو لەوانەی لە ئاهەنگی نانخواردنی شێواندا لە كەركووك لەگەڵمان بەشدار بوو كاتێ كە من بەوێدا تیپەڕیم لە گەڕانەوەمدا لە سلێمانییەوە بۆ بەغدا. من بە زەحمەت دەتوانم خۆڕابگرم كاتێ كە بیر لەو پیاوە دەكەمەوە كە چەند پڕ بوو لە پەرۆشیی بۆ ژیان و چەند رۆشنبیر بوو و ئێستاش لە گۆڕێكی دوورەدەستدا لە هەڵەبجە راكشاوە . یادت بەخێر ئازیزم، لە پێناوی نیشتماندا خۆت بەخت كرد. باوكی ئازیزم، كەواتە ئێستا باش تێدەگەیت كە بە چ پەرۆشییەكەوە ئێمە ئاواتەخوازی ئاشتین لەگەڵ توركیادا و بەفیرۆچوونی دڵڕەقانەی ژیانی كەسێكی ئاوا چەند سەخت و تاڵە.

33

31 ى كانوونى دووەمى 1922

… شتێكى هێند بایەخدار نیە بۆ ئێمە كە چى لە ئێراندا ڕوودەدات بە ئەندازەى ئەوەى كە ئێمە ئاشتى بەرقەرار بكەین لە سنوورى باكوورمان لەگەڵ توركیادا. لە ئێستادا دۆخەكە خامۆش و بێدەنگە و كوردەكانى ئێران لە دەوروپشتى سلێمانى بۆمباران كراون لەگەڵ نیوەى هێزە توركیەكە، كە تەنها دەگاتە سەد و بیست كەسێك و لە رەواندوز پاشەكشەى كردووە. بەڵام كەمالییەكان هێزى خۆیان كۆكردووەتەوە و گریمانەى ئەوە هەیە كە لە بەهاردا هێرش بكرێت و ئێمە هیچ هێزێكمان نیە بەرەنگاریان ببینەوە بێجگە لە لێڤى و سوپاى عەرەبى، كە هەردوكیان تەواو لاوازن و ئەمەش نیگەرانى و دڵەڕاوكێى ڕاستەقینەمانە و ئەگەر چارەسەر كرا ئەوە بە ئاسانى كارەكە دەچێتە پێشەوە.

34

26ی شوباتی 1922

باوكی ئازیزم، لەمەودوا نامە نیومانگییەكەم دەست پێدەكەم و پۆستەی ئاسمانی هەفتەیەك دواكەوت بەڵام پێموایە سبەینێ بگات، پۆستەی ڕۆیشتوویش هەر دواكەوت و ئێمە لێرە باوبۆران گاڵەمان پێدەكات و كاریگەریی زۆری لە سەر گەشت هەیە، بەڵام بەگشتی خزمەتگوزاری بە زستان هەر بەردەوام بوو. هەروەها تاقمە ئۆتۆمبیلێكیشمان بە بیاباندا دەڕوات بەشێكی بۆ دەستنیشان كردنی فڕۆكەخانە و بەشێكیش بە مەبەستی زانیاری كۆكردنەوە لە سەر ئەگەرى هێڵێكی ئاسنین و بۆ ئەم مەبەستەش ئەی. تی. ویڵسن لەگەڵیان ڕۆیشتووە. من هیچ باوەڕێكم بەو هێڵە ئاسنەی بیابان نیە وەك پێشنیازی كار بەڵام ئەگەر APOC (كۆمپانیای نەوتی ئەنگلۆ  ـ فارسی Anglo – Persian Oil Company)  بڕیاری لەسەردا ئەوە عێراق پێی دەڵێ نەخێر. كۆمپانیا ناوبانگێكی باشی نیە بە هۆی ئەو نرخە زۆرەوە كە دەیخەنە سەر كیرۆسین لە بەغدا و ویڵسن لە سەر ئەو مەسەلەیە چاوی بە مەلیك كەوت و بۆ یەكەمجارە كە دەیبینێ. من بۆ سبەینێ چووم وێنەی مەلیك بگرم و پێدەچوو زۆر ڕای لە ویڵسن نەبووبێت، بۆیە پێی وتم: “ئۆی خوشكم، خۆ ئەمە دزێكی تەواوە”! ئەمەش لە بەر ئەوە بوو كە پێشنیازی كردبوو كیرۆسین لە موحەممەرە بكڕێت و خۆی بیگوێزێتەوە (ئەی. تی. ویڵسن پێیوابوو بەرزیى نرخ بە هۆى كرێى باركردن و گواستنەوەیە). ئەى. تى. وتی كەوا كارەكەی سەری نەگرتووە و من پێموایە ئەوان كۆنتراكتێكی تایبەتیان هەیە لەگەڵ مێسپێرسدا بۆ گواستنەوەی نەوت. لەو ماوەیەدا لێشاوێكی تووڕەیی خەڵك ڕوو لە هەڵكشان بوو بە هۆی ئەوەی نرخی بەروبوومی كشتوكاڵی دابەزیبوو بۆ ڕێژەی پێش جەنگ و پیترۆڵیش بۆ سێ جارانی پێش جەنگ بەرز بووبۆوە و كشتیاران لەتوانایاندا نەمابوو پەمپی ئاو بخەنە گەڕ. APOC  قازانجێكی هێجگار قەبە دەكات و پێموایە ئەو پارەیەیان بداتێ ئەگەر بە تەمای ئیمتیازاتی زیاتر بێت لە عێراقدا بۆ ڕاگرتنی بارێكی گونجاو سەبارەت بە نرخ. حاڵی حازر خوتە و بۆڵەیەكی زۆر هەیە كەوا دەبێ سامانی كانزایی وڵات لە بەرژەوەندیی وڵات خۆیدا بێت. مستەر تۆمسن وەك ئەفسەرێكی سیاسی لەگەڵ كاروانی ئۆتۆمبیلەكاندا ڕۆیشتووە و پاش ئەوەش ئێرە بەجێدێڵێت و من زۆر بیری دەكەم چونكە كەسێكی زۆر باش بوو و هاوڕێتیی خۆش بوو كە بە سواری لەگەڵت دەردەچوو. ئەی. تی. ویڵسن كەسێكی تەواو بەڕێز و خۆش مەشرەبە لەگەڵ  من و زۆر شكۆ و شانازیی حكوومەتی عەرەبی لە ڕۆژنامەدا بڵاودەكاتەوە و بە تایبەتیش لێی دەبیستم كەوا هەژدە مانگی ژیانی داوەتە ئەم حكوومەتە و كاركردن لەپێناویدا، بەڵام ئەوەی كە من بینیم كەوا ئەو هەڵەیە لەم مەسەلەیەدا. كارەكە بە شێوەیەكی سەرسوڕهێنەرانە دەڕوات و خەڵكانی شیاو جێگەی خۆیان دەگرن و پێگەی شەخسیی فەیسەڵ ڕۆژ بە ڕِۆژ باشتر دەبێت و تا ئێمە بەر لە هێرشی كەمالییەكان بگرین هیچ هۆیەك نابینم بۆ مەترسی لە كۆسپ و تەگەرە. ئەوەی كە دەخوازم باشتر سەرنجی بدرێتێ ئەوەیە كە ئەوانەی دڵـگەرم نەبوون و باوەڕیان بە حكوومەتی عەرەبی نەبوو ئێستا باوەشیان پێدا كردووە بۆ وەرگرتنی پلە و پایە، كە پێمخۆشە بڵێم كەوا مەلیك دایاندەمەزرێنێت. توندڕەوەكان قسە زۆر دەكەن بەڵام هیچ گەشەیەكی ڕاستەقینە ناكەن و هەر لەم رووەوە سێشەممەی ڕابوردوو ئاهەنگێكی نیوەڕۆخوانم بۆ یوسف سوەیدی ساز كرد و مەلیك داوای لێكردم بە نەرمی لەگەڵی بجووڵێمەوە. من لە بەر خاتری مەلیك وامكرد بەڵام بە كەسێكی فشەكەری خۆهەڵكێش تێیگەیشتم و جارێ هەر یەكەم قسەی بە كۆمەڵێك شتی پووچ و بێمانا دەستی پێكرد. مستەر كۆرنواڵیس، مستەر دراوەر (لە فەرمانگەى داد)، عەبدولمەجید شاوی و گەلێ كەسی تر میوان بوون و عەبدولمەجید هەندێ قسەی خۆش و بەتامی بۆ كردین.

ئەو شەوە مەلیك ئێوارە خوانێكی گەورەی ساز كرد و من خانەوادەى كۆكس و بۆردیللۆن  و خەڵكی ترم بۆ بانگهێشت كرد. ئەوان زۆر جۆر نەبوون لەگەڵ یەكتر وەك نەریتی ئەم چەشنە بۆنانە بەڵام بۆ من ئێوارە خوانێكی نایاب بوو و لە نێوان مەلیك و ساسۆن ئەفەندیدا دانیشتبووم كە زۆر كەیفیان لەگەڵ یەكتر هەبوو، دوو ڕۆژ دواتر مەلیكم برد بۆ كەڕادە بۆ بینینی باخ و گوڵی دار قەیسی و من پێشتر حاجی ناجیم ئاگادار نەكردبووەوە و بەداخەوە لەوێ نەبوو بەڵام مەلیك و یاوەرانی زۆر كەیفیان بە جوانی و ڕێكوپێكیی باخەكە هات و سەرسام بوون بە نەمامەكانی دارە بەرییەكان. یەكێك لە كوڕەكانی حاجی ناجی لەوێ  بوو و بە مەلیكی وت چ جۆرە نەمامێكی دەوێ بۆی دەنێرێ. لە گەڕانەوەدا كە من و رۆستەم حەیدەر لە یەك ئۆتۆمبیلدا بووین گەیشتینە حاجی ناجی و ئەوەمان پێوت. ئەنجام بەخۆشحاڵییەوە سێ سەد نەمام زیاتری بۆ نارد و بەهیوام پەیوەندییەكی گەرمی لەگەڵ كۆشكدا بۆ دروست ببێت. ئەمڕۆ یەكشەممە حاجی ناجی لە كاتی قاوەڵتیی بەیانیدا هاتە   لام و نامەیەكم دایە بۆ رۆستەم حەیدەر و پێموت كە تەلەفۆنێك بۆ مەلیك بكات. هەڵبەت ئەم پیاوە زۆر ئاقڵە و  شكۆ و بەخشندەییەكی گەورەی تێدایە، هەروەها ڕەعییەتێكی دڵسۆز و گوێڕایەڵی فەیسەڵە. پێویستیی مەلیك بە داری میوە بە هۆی ئەوەوەیە كەوا كێڵـگەیەكی گەورەی سپیاتیی كڕیوە (شیرەمەنی) و نیازی وایە بیكاتە پارك. لەم كارەیدا فەخری جەمیل یارمەتی دەدات بەڵام پێموایە حاجی ناجی لە هەموو كەس باشترە بۆ رێنمایى كردن لەم بوارەدا. بە هەر حاڵ من نازانم لە كوێ پارەی كڕینی بۆ پەیدا كردووە كەوا حەدداد پاشا بۆی ڕێكخستووە، چونكە بە پێی زانیاریی من فلسێكی خۆی شكنابات، بەڵام تەنانەت ئەگەر قەرزیشی كردبێت ئەوە من پێمخۆشە، چونكە یەكەم دەبێتە هۆی ئەوەی كە زیاتر ڕەگ داكوتێ لێرە و دووەمیش شتێكی دەبێ لە دەرەوە پێوەی خەریك بێت و لە خەڵكی جۆراوجۆر دووری بخاتەوە.

سەرلەبەیانیی لەگەڵ سێر پێرسى چووین بۆ ڕێوڕەسمێكی زۆر خەمناك و دڵتەزێن، ئەویش پرسەی ماتەمینیى كاپتن فیتزجیبۆن بوو كە مانگێك لەمەوپێش لە هێرشی كوردە ئێرانییەكاندا بۆ سەر هەڵەبجە كوژرا. ڕۆژێكی خۆرەتاوی خۆش بوو و گۆڕستانی سەربازی، كە بە عادەت وشك و ڕووتەنە، بەڵام بە بارانی زۆری ئەمساڵ گژوگیا و گوڵە زەنبەقی سپی و زەردی كێوی دایپۆشیوە و لە ناشتنیدا كۆمەڵێك داخ و حەسرەتم دەربڕی بۆ كۆچ و دابڕانی لە جیهانێكی پڕ لە هیوا و ئاوات. پاشان بە پەلە گەڕامەوە بۆ ئۆفیس و خێرا هێلكەیەكی كوڵاوم لووش كرد و هێندەی پێنەچوو مستەر كوك و لەگەڵ خۆی بردمی بۆ كردنەوەى بازاڕی عوكاز (سوق عكاظ). با ئەوەشت پێبڵێم كە ئەم بازاڕە زۆر گەورە و بەناوبانگ بووە لە ڕۆژگاری جاهیلیی پێش ئیسلامدا، كاتێ كە هەموو شاعیرانی عەرەب كۆبوونەتەوە و پێشبڕكێی شیعر خوێندنەوەیان كردووە و هەندێك لەو شیعرانە تا ئێستاش پارێزراون. گەنجە خوێن گەرمەكانی بەغدا پێشنیازیان كردووە وەك نەریتێكی ساڵانە بیپارێزن و لەگەڵ پێشانگای هونەر و كاری دەستڕەنگینیدا گرێی بدەن. ئەمە لە شوێنێكی تەختایی بەرفراواندا و لە ناو باخی دارخورمادا لە نزیك وێستگەیەكی شەمەندەفەری حیللە سازدرابوو. لێرە عەشاماتێكی زۆری خەڵك كۆبووبۆوە كە بە زۆری خەڵكە نەتەوە پەرستە توندڕەوەكە بوون. بەڵام  من و مستەر كوك پێشوازییەكی گەرم كراین و لە سەر كورسییەكانی ڕیزی پێشەوە دایانناین بەرانبەر بەو سەكۆ و ساباتە سوورەی كە بۆ مەلیك سازكرابوو. مەلیك ڕێوڕەسمەكەی كردەوە و ماوەی دوو سەعات بە شكۆوە دانیشت بەو پێیەی كە ئاهەنگێكی گشتی دەیخوازێت و هۆنراوە و وتار دەخوێنرانەوە و وەى خوایە كە دوورو درێژ بوون! من لێرەدا رەزامەندیی كەسەكانی دەوروبەرم وەرگرت كە لە پاشەڕۆژدا هۆنراوەكانی بازاڕی عوكاز نابێ لە 250 بەیت زیاتر بن. وتاردانی ڕەسمیش ئەوە بوو كە بۆچی من وڵاتی خۆمم خۆشدەوێ و ئەمەش بابەتێك بوو كە بەرەنگاری هەر كەسێك دەبمەوە لە سەری و نابێ گەورەترین و بلیمەتترین كەسى بێزاركەر بێت. دۆستە گەنجەكانمان لەخۆشیاندا دەستیان لە ملی یەكتر دەكرد و بە دڵـگەرمی پێشوازییان لەو هەلە دەكرد كە پێیاندرابوو. ئەوان نەك هەر بە كەش و فشەوە وتاریان دەدا بگرە هێند درێژدادڕیش بوون كە دواجار مەلیك بە تایبەتى رایسپارد كە دواهەمین كەسیان لە ناوەڕاستی قسە پڕ باق و بریقەكەیدا بیبڕێتەوە. من زۆر كەیفم بەوە دەهات چونكە هەموویانم دەناسی و پێمخۆش بوو ببینم چۆن سەكۆی وتاردانی وشكە نەتەوە پەرست كۆنترۆڵ دەكرێت . ئەمە شوێنێكی تەختایی باش بوو و ڕەخنەی چاكی لێوە دەگیرا، بەڵام بازاڕی عوكاز شوێنێكی گونجاو نیە بۆ پەرەپێدانی توندوتیژیی سیاسی. من پێمخۆش بوو بەو جۆرە خۆیان سەغڵەت كردووە و كاتێ دواجار توانیمان تەماشای نمایشەكە بكەین هەراو غەڵبە غەڵبێكی لە ڕادەبەدەر لە چوار دەوری مەلیك ئاڵابوو، بەڵام نوری پاشا بە ژیری و شكۆی خۆی لە ناو قەرەباڵغییەكەدا بەكێشی كردم و بەمە توانیمان هەموو شتێك ببینین. نمایشەكە زۆر باش ڕێكنەخرابوو، چونكە ئێمە لە ساڵی 1918دا یەكێكی لەوە باشترمان ڕێكخست لەلایەن دەسەڵاتی سەربازییەوە و جوانترین نمایش ئەوەبوو كە ڕاهیبە فەرەنسییەكان لەگەڵ كچانی بچووكی هەتیودا لە سەر زەوی دانیشتبوون و هێڵی ڕەنگاوڕەنگیان دروست دەكرد و خێوەتێك پڕ لە نیگاری هونەرمەندە خۆوڵاتییەكان بوو كە لەڕادە بەدەر خراپ بوون و ئەو بابەتەیان هەڵبژاردبوو كە بە زۆری ڕۆحی عێراقیان دەنواند لە ڕووی مەجازییەوە بەڵام لە ئاستێكى خراپدا بوون. من وایدەبینم كەوا هەندێ كاتی پێدەچێت پێش ئەوەی مایكڵ ئەنگلۆی خۆمان بەرهەم بێنین. ئەو ڕۆژەم بە ئاهەنگێكی ئێوارە خوانێك كۆتایی پێهێنا لە ماڵەكەی خۆمدا و مستەر كوك و سەید محێدین (دووەم و زیرەكترین كوڕی نەقیب) و تۆفیق ئەلخالیدیی موتەسەڕیفی بەغدا و حیكمەت سڵێمان كە پیاوێكی بەتوانای گەپجاڕ بوو و براكەی وەزیرێكی بەناوبانگی جەنگ بوو لە سەردەمی توركدا و عەبدوللەتیف نوری كە ئەندامی دەستەی ئەركانی سوپای عێراق بوو. محێدین و تۆفیق و حیكمت هەرسێكیان پیاوی    ئەقڵ و بیر فراوان بوون. ئەو كەسانەی وا بیر دەكەنەوە گوایە ڕۆژهەڵات بە تەواویی ئەقڵییەتی جیاوازە لە ڕۆژئاوا دەبێ گوێ لە پیاوانی لەم چەشنە بگرن كاتێ كە بە سەربەستی پێكەوە قسە دەكەن وەك ئێستایان لە ماڵەكەی مندا. جیاوازیی ڕاستەقینە لە  كاراكتەردایە و ئەوان هیچ حەز بەوە ناكەن لە شوێنی گشتیدا بدوێن و دەربكەون، چونكە قورسایی نەزانینی ڕەشە خەڵكەكە و خورافەیان زۆر بە سەرەوەیە. ئەم سیانە ئەو شەوە مشتومڕیان لە سەر مەسەلەیەك بوو كەوا ڕەنگە هەندێ سەرئێشە بۆ حكوومەتی عێراق دروست بكات. لە بەغدا خانوویەكی بەهائوڵڵا هەیە، كە دامەزرێنەری مەزهەبێكی ڕیفۆرمخوازی ئێرانییە و بەهاییەكان  بە شوێنێكی زۆر پیرۆزی دەزانن چونكە ماوەیەك بەهائوڵڵای تێدا ژیاوە پاش ئەوەی نزیكەی شەست ساڵێك لەمەوپێش لە ئێران هەڵاتووە. شیعەكان، كە هەمیشە دەمارگرژترین و موحافزەكارترین خەڵكن، وەك لادەر تەماشای بەهاییەكان دەكەن و زۆر دژی ئەوەن ئەم خانووە بپارێزرێت بە پێی ئەوەی لانكەی زەندیقەكانە بەڵام مەلیك و نەقیب هەردوك وەكو یەك زۆر تووڕەن لەم ورووژاندنە و نەقیب قێز لە خورافاتی شیعەكان دەكاتەوە و ئەم تێگەیشتنەى مەلیك لە سەر بیر و باوەڕى شیعەكان لە گەلێ سەرەوە باشەی خۆی هەیە. میوانە سونییەكانم، كە هەر هەموویان ئازادانە بیریان دەكردەوە و بە ڕەهایی قسەیان دەكرد و من ناتوانم هاوكارى ئەو نیازەیان بم لە مەسەلەی خانووی بەهاییەكاندا و با موجتەهیدەكان ــ نەفرەت لە هەموویان ــ هەوڵ بدەن چارەسەرێكی گونجاوی بكەن.

پاشان عەرەبەكان ڕۆیشتن و من و مستەر كوك ماینەوە و لە دەوری ئاگرەكە كەوتینە گفتوگۆیەكی دوور و درێژ و هەردوكمان كۆك بووین لە سەر ئەوەی كە هیچ شتێك لە دنیادا نیە قسە و باسی زۆر هەڵـگرێ وەك لەوەی لە ناوجەرگەی بیر و ڕۆشنبیریی ئاسیادا بیت بۆ چاودێری   كردن و هاندانی كوَششی شكست پێهێنانی كاریگەریی عیلمانییەتدا. خوا دەزانێ كەوا ئەقڵ و زیرەكییان تەواو وردە بەڵام هاندانی مۆراڵ كزە بۆ تووڕدانی دەستباڵایی دوور و درێژی یاسا و ڕێسای تیوَكراتی لە كاروباری مرۆڤایەتیدا. هەڵبەت ئەمە بۆ ئەوروپا چەندین سەدەی برد تا یەكلابووەوە تێیدا و بە ڕاستى من دەڵێم سوپاس بۆ هەوڵ و تێكۆشانی دوو نەوەی ئەم دواییە كەوا من ئێستا مەسیحی نیم و كەسیش ڕێی لێنەگرتووم، بەڵام موسڵمانەكان هێشتا چەندین شەڕ و شۆڕیان لەبەردەمدایە و ئەو ڕاستییە ئاڵۆزی كردووە كەوا تاقە ڕێگەی ڕوون بۆ ڕاپەڕاندنی جەماوەری خەڵكی نەزانی ئاسیا دژ بە حوكمی ڕەهای بێگانە ختووكەدانی بیرو باوەڕی ئاینییانە. ئەو پیاوانەی كە ختووكە دەدەن هەر خۆیانن پێشتر وەعز و ئیرشادیان دەدا و ئێستا وەك چەكێك بەكاریدێنن لە ناكۆكیی سیاسیدا، بەڵام تا شەڕەكە نەبڕێتەوە ناتوانن وازی لێبێنن.

دوێنێ نیوەڕۆ خوانێكی ئەوروپیانەم سازكرد و مستەر ناڵدەر  لە مووسڵەوە دابەزیبوو و ئێستا لە مۆڵەتدایە، كاپتن بێلی كە لە سلێمانییەوە بە فڕۆكە هاتبوو، هەروەها خانەوادەی جۆیس بۆ خۆمان بە تێر و تەسەلی قسەمان كرد. كاپتن بێلی لە شوێنی كاپتن فیتزجیبۆن دانراوە كەوا كوژراوە و مستەر ناڵدەر بەرپرسی سەنگەر و قایمكارییەكانى دژ بە هەڕەشەی توركە لە باكوورەوە. كاتێ كە هەموومان كۆبووینەوە دەمانزانی ئەم سەركێشییە چ مەترسییەكی تێدایە و ئەوانیش بە بەشێك لە كاری ڕۆژانەیان دادەنا و منیش شانازی بەوەوە دەكەم كە هاوكاریانم و تاقە هیوام ئەوەیە بتوانم هاوبەشیان بم لەو مەترسی و بەرپرسیارییەی بە سەربەرزییەوە لە ئەستۆیان گرتووە. بە لای كەمەوە حكوومەتی خاوەن شكۆ بڕیاری داوە كە دوا هێزمان لە مووسڵ نەكشێنێتەوە لە مووسڵ و، ئە وەك ئەنجامێك، من پێشبینی دەكەم كەوا تەلگرامەكەی كۆڵۆنێڵ بۆرتن، كە لە نامەیەكی پێشتردا ئاگادارم كردیتەوە و بیستوومە ئەنجومەنی فڕۆكەوانی ئەوەی ڕوونكردووەتەوە كەوا ئەگەر بیرۆى كاروبارى جەنگ نەیەوێت بەرگری لە مووسڵ بكات، ئەوە ناچار دەكرێن هەنگاوی لەو جۆرە بنێن و (ئەمە زۆر نهێنییە). هەوڵدان بۆ چارەسەرێك لەلایەن ئێمەوە بەر لە مەترسییەكە دەگرێت، چونكە كەمالییەكان تەواو سەغڵەت و نائومێد بوون. ئەگەر فەرەنسییەكان بزانن كەوا بە تەواوی هیچ شتێكیان بەدەستەوە نەماوە ئەوە هەرگیز بە ڕێككەوتننامەی ئەنكەرە ڕازی نابن، چونكە بە مەبەستى ئەوەی سنوورێك لە ئێمە بدزن سازشێكی خراپیان كردووە.

پاش نانی نیوەڕۆ بە سواری چوومە دەرەوە و لە گەڕانەوەمدا بۆ ماڵەوە جەعفەر پاشا و خێزانیم بانگهێشت كرد و لەو ماڵەدا سەرم لێدان كە تازە نوری پاشا گواستوویەتیەوە ناوى و با ئەوەش بڵێم كە نوری ژنبرای جەعفەرە و ئەمیش لەوێ بوو و بە شانازییەوە هەموو  پوورەكانی و ژن خوشكەكانی پێناساندم و بێگومان وامهەست كرد كە یەكێكم لەو خێزانە و ئەمەش زۆر خۆشحاڵم دەكات.

ئەمڕۆ بەتەما بووم بە ئەسپسواری پیاسەیەكی باش بكەم بەڵام با و تۆزێكی پیس هەڵیكردووە و ئەمشەویش كردی بە لێزمە و باران و لە بەر ئەوەى بەروبوومی باشمان بۆ مسۆگەر دەكات لێی نیگەران نیم. پاش نیوەڕۆ كۆبوونەوەیەكمان لەگەڵ بەشداربووانی كتێبخانەی بەغدا بەست، كە من بەڕێوەمبرد، بۆ هەڵبژاردنی كۆمیتەیەكی نوێ و ئەمەش دەرفەتێكی خۆش بوو بۆ بینینى زۆرێك لەو كەسانەی كە سیاسی نین و هەروەها كاربەدەستی دەوڵەت نین و پێمانخۆش دەبێت ئەنجامی هەڵبژاردنەكە بزانین و ئەم كۆمیتەیەی ئێستا، كە من و مستەر كوك و ساسۆن ئەفەندیی  تێدایە، ڕەنگە بگۆڕێت. من زۆر گوێی نادەمێ، بەڵام ئەگەر هەڵبژێرامەوە ئەوە سەلماندنێكی دڵخۆشكەرە بۆ متمانە.

ئەو ڕۆژە چووم بۆ چاى خواردنەوەیەك لەگەڵ ساسۆنی ئازیز و    ژنبرا و ژنخوشكەكەیدا و خەڵكێكی تا بڵێى بەڕێز بوون و ساسۆن بردمی بۆ ماڵ و گفتوگۆیەكی دۆستانەمان كرد لە بارەى مەلیك و حكوومەتی خاوەن شكۆ و هەموو ئەو شتانەی كە بیرمان لێدەكردەوە و بە ڕاستى زۆرم خۆشدەوێ و نرخ بۆ دۆستایەتیی ئەو پیاوە دادەنێم.

با بێمەوە لای ئەو شتانەی بایەخی بچووكیان هەیە و لەم ڕۆژانەدا بە زۆری لە سەر خواردنی دۆمەڵانی بەتام دەژیم و لەم وەرزەدا دەتوانی بە شێوەیەكی ئاسایی لە بیابان بەدەستی بێنیت، بەڵام من قەت بەم زۆر و زەوەندییە نەمبینیوە چەشنی ئەم بەهارە نائاسایی و پڕ خێر و بەرەكەتە. ئێستا لە باخەكەمدا نەرگسە كێوی و گوڵە قەیفە و هەمیشە بەهار بە جارێ داویانە بەیەكدا و گوڵە باخەكانیش خەریكە دەپشكوێن.

35

22 ی حوزێرانی 1922

… كارەساتێكی ترمان بە سەرهات لە سلێمانی و دوو ئەفسەری قارەمانمان لەدەستدا بە هۆی ناپاكیی یەكێك لە ئاغا كوردەكانەوە، چونكە دەیویست یەكێك لە فەرمانبەرە كوردەكان بكوژێت و كە ئاوڕی دابووەوە لەو دوو كەسە ئینگلیزەی هاتبوون بۆ ناوبژیوانی كردنیان، كەچی هەردوكیانی كوشتبوو: یەكێك لەوانە كاپتن ماكانت  ئەفسەری لێڤی بوو و زۆر باشم دەناسی و كەسێكی تا بڵێی خۆشەویست و پیاوێكی ڕاست و ئازا و بەردەوام سەرقاڵی كاری خۆی بوو. من ساڵی پار سواری ئەسپە كەحێلەكەی بووم بە درێژایی سنووری ئێران، ئای چ نرخێكی گەورەیە ئێمە دەیدەین لەپێناو گێڕانەوەی ئەو وڵاتە لە یاسا دەرچووەدا؟

36

6ى تەمووزى 1922

… ئەنجام دەكرێ بڵێم كەوا خەریكە هەور لە باكوور كۆدەبێتەوە و توركەكان هێز لە وان كۆدەكەنەوە و لە رەواندزیش خۆ قایم دەكەن و ژمارەیەك ئەفسەرى تازەشیان بۆ ناردووە. حاڵى حازر واتەواتێكى زۆر لە ناو خێڵە كوردەكاندا بڵاوە و دەستەى ئەركانیشمان بارودۆخەكە بە مەترسیدار دەزانن. ئێمە تا ئێستا لە سلێمانى بكوژانى كاپتن بۆند و كاپتن ماكانتمان دەسگیر نەكردووە و ئەمانە پەیوەندیى ڕاستەوخۆیان بە توركەكانەوە هەیە لە رەواندز. هێزى ئاسمانیى شاهانە بۆردمانێكى چاكى گوندە یاخییەكانى كردووە لە وڵات و شوێنگەلێكى ئەوپەڕى سەخت و هەڵەتدا و بەڵام هەموو كاتى بردوون بۆ ئەوەى بڕێكى تەواوى چەك و تەقەمەنیى فڕۆكە بە خەسار نەدەن و ئەگەر ئێستا بمانەوێت بە خەستى رەواندز بۆمباران بكەین ئەوە چەك و جبەخانەمان بە تەواوى كورت دەهێنێت و تووشى كێشە و زەحمەت دەبین.

37

16 ی تەمووزی 1922

باوكی ئازیزم، دەبێ بە سەرنجی بەرچاوی كەشوهەوا دەستپێبكەم. ئەوان هەندێ شتیان چاككردووەتەوە كە بە كارەبا كار دەكات و هەر خەریكی كارەكەن و بەو پێیە تا ئێستا كە سەعات یەكی پاشنیوەرۆیە كارەبا نیە و پانكە ئیش ناكات. هەرچۆنێك بێت من ئەم بەیانییەی یەكشەممەی ناوەڕاستی تەمووز لە ژوورەوە دانیشتووم و بە تەواوی فێنكە و خەریكی نامە نووسینم بۆ تۆ. پلەی گەرما ناچێتە سەروو سەدی فەهرنهایت و وابزانم ئەمساڵ لە 110ی فەهرەنهایت   تێنەپەڕیوە و بە گشتی وەك ئەمڕۆ هەر بایەكی شەماڵی خۆشی هاتووە. بۆ بەدبەختی ئۆفیسەكەی من كەوتووەتە خراپترین شوێنی بەغداوە چونكە هیچ شنەبایەكی ناگاتێ و بەردەوامیش بە بەر خۆرەوەیە، كەچی ماڵەكەی من بە شێوەیەكی سەیر فێنكە.

پیرێ سێر پێرسى مەلیكی بینی و باس و خواسێكی دوور و درێژی لەگەڵ كردەوە. مەلیك تا ئێستاش هەر هەست بە بێزاری و ماندوێتی دەكات سەبارەت بە پەیماننامەكە ئێستا ئەو ڕاستەوخۆ هەموو ئەو چارەسەرە مەحاڵانە دەنێرێ بۆ سێر پێرسى كە هیوای وایە لە ئەنجومەن دەرچێت و بەم پێیە وەزیرەكان پێش ئەوەی پەیامی مەلیكیان پێبگات زانیاریی تەواویان لایە كە لەلایەن كۆمیسیاری باڵاوە دەركراون. پاشان ئەنجومەنیش وەلایان دەنێت و مەلیك بیر لە شتی تر دەكاتەوە! هەفتەی رابردوو سێر پێرسى ڕەزامەندیی دەربڕی لە سەر ناردنی دوا دەستكاری بۆ وڵات، كە دەستكارییەكی زۆر ئەكادیمییانە بوو. وەزارەتی دەرەوە ڕەەتیكردەوە و ڕێك وا كەوتەوە كە من بۆی چووم و دوێنێ ئەنجومەن هەرچۆنێك بوو ڕەتكردنەوەكەی پێ قووت چوو و داوای لە مەلیك كرد كە دەخوازێت چی بكات و سبەینێ وەڵامی ئەویان پێدەگات. هەر لەم ماوەیەدا خاوەن شكۆ چاوپێكەوتنێكی لەگەڵ ڕۆژنامەكانی ناوخۆدا سازكرد و تێیدا تەواوی بایەخی پەیماننامەی ماندێتی ڕوونكردەوە و دڵنیایی دا بە پرسیاركەران كەوا لە هەموو حاڵەتێكدا هیچ بێگانەیەك ناكرێ فەرمان بۆ ڕسەنزادەیەكی عەرەب دەربكات. بەڵام سێر پێرسى ئاماژە بەوە دەكات كەوا ئەندازیارێكی ئاودێریی بەریتانی كە لەلایەن حكوومەتی عێراقەوە دامەزراوە بە توندى فەرمان بە پیاوماقووڵە عەرەبەكان دەكات و دەبێ جێبەجێیشی بكەن. ئەندامانی ئەنجومەنیش لەمە ئاگادار    كراون و بە تەواوی ناڕازین لە سەر بابەتەكە.

وەك دەبینی كارەكە بەم شێوەیە: مەلیك و نەقیب بە ئاشكرا دەڵێن كەوا هەرگیز ماندێت قبووڵ  ناكەن و حكوومەتی خاوەن شكۆش لە وەڵامدا دەڵێ كەوا ئەوان دەتوانن بڕیار لە سەر هیچ ڕێككەوتنامەیەك نەدەن بە پێى ئەو مافەى كە لەلایەن كۆمەڵەی گەلانەوە پێیاندراوە لە سەر مەسەلەى ماندێت. بەم ڕەنگە ئەو دوو بەڕێزە كەوتونەتە بارێكی نارێكەوە كەوا یان دەبێ پەیماننامەكە ڕەتبكەنەوە یان ماندێتەكە قبووڵ بكەن. لە كێشەی یەكەمدا مەلیك   تاج و تەختەكەشی لەدەست دەدات و ئەوەش باش دەزانێت، مستەر كۆكسیش زۆر چاك دەزانێت ئەو بە ئاسانی مەملەكەتی سێهەمی بۆ نادۆزرێتەوە. با ئەوەش بڵێم كە سێر پێرسى پێشنیازی كردووە هیچ شتێك لە بارەی ماندێتەكەوە باس نەكرێت، چونكە تەنها بە چەند وشەیەك لە پەیماننامەكەدا باسیكراوە، بەڵام لە ئەنجومەندا، كە ئێستا گفتوگۆی لە سەرە، دەبێ روونیبكەنەوە كەوا دان بە پەیماننامەكەدا دەنێن وەك تاقە پەیوەندییەكی نێوان هەردوو حكوومەتی بەریتانیا و عێراق. ئەگەر ئەوان بیانەوێ مەسەلەكە ڕۆژێك زووتر كۆتایی بێت ئەوە ئێمە یارمەتییان دەدەین بۆ قەناعەت هێنان بەم و بەو وا بكەن لەگەڵ سیستەمی ماندێتدا بگونجێن، بەڵام نەقیب حەز بەوە ناكات و بە ئاشكرا دان بە بوونی ماندێتدا دەنێت لە حاڵی حازردا. بەڵام مەلیك هەمیشە دەیەوێ مەسەلەكە بەو بارەدا بشكێنێتەوە كە چارەسەرێك لەخۆ بگرێت و ماندێتی تێدا تووڕ بدرێت، وەلێ كۆمیسیاری باڵا تەیرێكی سركە و ناگیرێت و بەم پێیە گەمەكە بەردەوام دەبێت و ئەگەر لێرەدا گەمەیەك هەبێت ئەوە لە سەر فورات سازش هەڵناگریت و لەوێ كاربەدەستانی عەرەب شێوازی كارگێرییان بە تەواوی دژی ماندێتە. شێخە گەورەكان هەموو تا ڕادەیەك مەیلیان بە لای ماندێتەوەیە و بە تەواوی تووڕەن لە ناعەدالەتی و توندڕەویی كاربەدەستە عەرەبەكانی كارگێڕی و ئۆقرەیان لە بەر بڕاوە و هەڵـگیرسانی شۆڕشێك لە ئان و ساتدایە و حاڵی حازر دوو كەس كوژراون كە لەلایەن شێخەكانی دژە ماندێتەوە ئەنجامدراوە و تەنها لە بەر هۆكاری سیاسی بووە. لە هەردوو حاڵەتەكەدا سەلمان ئەلزاهیری شێخی گەورەی خەزاعیل خۆی بەوە دەزانێت كەوا شكۆ و شەرەفی لەكەدار بووە و دەڵێ موتەسەڕیف لە سەر بنەمای عەشایەری داد بەرقەرار نەكات ئەو لای خۆیەوە یاسا جێبەجێ دەكات. مستەر كۆرنوالیس تا ئێستا توانیوێتی دۆخەكە رابگرێت و ئەو پیاوە هێور بكاتەوە .

بە شێوەیەكی سروشتی ئەمە هەڵوێستی كاربەدەستانی عەرەبە لەوێ و كاربەدەستە بەریتانییەكان كەوتوونەتە بەشدارییەكی چالاك لەگەڵ لایەنەكەی تر و تەواوی تیمەكە لە سەرەوە بۆ خوارەوە بە تەواوی بوونەتە دوو بەرە. مێجەر دیكسۆنی ڕاوێژكاری ناوچەكە نە زۆر زمان پاراوە و نە زۆر شكۆداریشە و هیچ شتێكی پێناكرێت و چارەسەر ئەوەیە بارودۆخەكە پینە بكرێت و پیاوانی میانڕەو دابنرێن، چ عەرەب و چ ئینگلیز. مەلیك بە ئاشكر دەڵێ ئەمەیان ناكرێت تا دواى ئەوەی پەیماننامەكە ئیمزا دەكرێت و بڵاو دەكرێتەوە، كەوا پلاتفۆرمێكی دیاریكراوی بداتێ وەك من پێشتر پەیوەندیم پێوە كردیت كەوا پرسیارە بێ وەڵامەكە هەر ماوەتەوە كە ئایا ناوچەكانی فورات ڕادەپەڕن؟ ئاخۆ ئەمە دۆخێكی سەخت نیە؟

پێموایە و پێشتریش وتوومە و ئێستاش ڕێك و ڕەوان دەیڵێم قەناعەتی تەواوم هەیە كەوا هیچ وڵاتێك لە جیهاندا ماندێت (ئینتیداب) تێیدا سەرناگرێت و یەكەمجار فەرەنسییەكان و دووەمیش ئێمە ناوی ماندێتمان لە سوریا و فەلەستیندا هەر ڕەشكردەوە. تەنانەت بێ ئەم نموونانەش ڕەنگە بەرنامە و پلانی ماندێت هەر مەحاڵ بێت. عەرەبەكان هیچ داواكارییەكی پڕ كەموكووڕیی مافەكانی سەربەخۆیی خۆیان بەرز ناكەنەوە و وەك ئەوەی بخرێنە ژێر ڕکێفی ئەم و ئەوەوە ئەوان ئامادەن كە پراكتیزەی ئەم مافانە بكەن و خۆیان ببەستنەوە بەم پەیماننامەیەوە كاتێ كە یارمەتی دەدرێن، بەڵام ئەمە شتێكی ترە و من دەزانم فەیسەڵ چەند ورد و بەمشوورە لە مامەڵە كردنى كاروباردا و:

1 ــ ئەو دەیەوێت لێرە ماندێت رەتبكاتەوە وەك هەنگاوێك بەرەو رەتكردنەوەی لە سوریا.

2 ــ مەیلی بە لای ئەوەوەیە كە دەوڵەتە سەربەخۆكەی وەك جیهانی موسڵمان بنوێنێ نەك وەك عەرەب.

3 ـ نیازی وایە خیلافەت بگێڕێتەوە دەستی عەرەب و ئەمەش بەرنامەیەكە كەوا بە ڕێكی و بە تەواوی بۆ ئێمە دەگونجێت، چونكە دەوڵەتێكی عەرەبی دۆست یان كۆمەڵە دەوڵەتێك بە شێوەیەكى لەبار بكەونە سنووری ڕۆژئاوای ئاسیاوە ئەگەر ئەوە بتوانن و مەسەلەكە كاری خۆیانە و بە دەسەڵاتی خیلافەتەوە بیرۆكەیەكی باشتر نیە؟ بەڵام ئەمە هیچ جێگە و ڕێگەیەك لەم شوێنەدا بۆ فەرەنسییەكان و زایۆنیستەكان ناهێڵێتەوە.

… ڕۆژی یەكشەممەی 8ی مانگ نوری و كاپتن كڵەیتن بۆ نانی نیوەڕۆ لام بوون و باس و خواسێكی باشی مەسەلەكانمان كرد و بۆ ئێوارەش لـــەگەڵ مستەر كۆرنوالیس و ماڵی داڤێدسندا چووین بۆ مەلە و گەشت كردن و ئێمە هەموو یەكشەممانێك ئــەمە پیشەمانە، لە  باخ و باخاتەكانی سەر دیجلە لای ئەعزەمییەوە. دواینیوەڕوانی تریش من هەمیشە خەڵكانێك بانگهێشت دەكەم كە بە زۆری خانم داڤێدسن و خانم دراوەر دێنە لام، بێجگە لە خەڵكی عەرەب، یان وەزیرەكان و پیاوماقووڵانی تر دێن بۆ چاى خوخواردنەوە، لەوانە جاری وایە خەڵكی سەیر سەیریش دێن كە خۆیان بە دەمڕاست دەزانن، بۆ نموونە ئێوارەی 7ی مانگ كابرایەكى گەوج و نەفام بە ناوی عەتا ئەمین، كە یەكێكە لە سكرتێرەكانی دیوانی پاشایەتی و خۆی خۆی بانگهێشت كردبوو. دید و بۆچوونی ئەم كابرایە لە سەر باردۆخی سیاسیی ئەوەی كە تۆ پێویستە هەمیشە بە قسەی ئەوان بكەیت چونكە خاوەن دەسەڵات و دەستڕۆن لە وڵاتدا و بۆ نموونە كەسە پەڕگرەكان. (ئەم كابرایە لە ژیانیدا لە بەغدا بەولاوە هیچ شوێنێكی تری نەدیوە و هەر بە ئەندازەى جێنتڵمانێكی یانەیەكی لەندەنی لە بارەى وڵاتەوە دەزانێت)، منیش لێمپرسی ئاخۆ بە ڕاستی پەڕگرەكان گەورەترین كاریگەرییان هەیە، لە كاتێكدا مەسەلەی ئەو پەڕگرانە ئەوەبوو كە پەیماننامەكە رەتبكەنەوە.

ئەم دواینیوەڕۆیە كارێكی گەورەمان كرد ئەویش كردنەوەی یانەیەكی ئەنگلۆ ــ عەرەبی بوو، سێر پێرسیش لەوێ بوو و بە كەیفخۆشی لەگەڵ هەموو كەس دەجووڵایەوە، بە ڕەش و سپییەوە، چونكە هەموو لەوێ بوون. ئەمە تەنها یانەی پیاوان بوو و منیش هەرچەندە بانگهێشت كرابووم بۆ ئاهەنگەكە بەڵام ئەندام نیم لەو یانەیەدا. هەروەها شێخە خۆشەویستەكانی فوراتیشمان لەوێ بوون، كە پێنج شەش كەسێك دەبوون و هەموو لە بارەی پەیماننامەكەوە دەدەوان.

ڕۆژی دووشەممەی 9ی مانگ رۆستەم حەیدەری سەرۆكی دیوانی پاشایەتیم بانگهێشت كرد بۆ چاى خواردنەوە و دەرس دادان و ئامۆژگارییەك كە ڕاستێكەی ئەمەی دواییانی باش   وەرگرت و بۆ ئەوەش ڕام لێیەتی و كۆتاییمان بەوە پێهێنا كە ببینە دوو دۆستی نزیك بەڵام ئەگەر بە خشكەیی گەڕایەوە سەر هەڵەكانی جارانی ئەوە پێدەچێت بانگهێشتی چاى خواردنەوەیەكی ترى بكەمەوە.

من راشكاوانە دەیڵێم كەوا زۆر باشم لە دەرس و موحازەراتدا و بە تایبەتى وایان لێدەكەم بە چاكى گوێ بگرن. سەرلەبەیانی ڕۆژی چوارشەممە پیاوێكی گەنجی كەرۆكەی تر بە ناوی رەوف كوبەیسی یەوە كە لیوای ناسرییەی دەدا بە گوێماندا دوای ئەوەی مەلیك بە موتەسەڕیف لەوێ دایمەزراندبوو، هات بۆ چاوپێكەوتنم لە   ئۆفیسەكەمدا و دەردی كۆڵۆنێڵ رێپینگتن دەڵێ دید و بۆچوونی خۆم دا بە گوێیدا و باش تەمێم كرد. دواتر ڕاستەوخۆ چووبوو بۆ لای مەلیك و پرسیاری كردبوو ئاخۆ دەتوانێ داوای پاسپۆرتی چوون بۆ میسر بكات چونكە پیدەچێت خاتوون زۆر لێی تووڕە و ناڕازی بێت. مەلیك زۆر ئاسوودە و خۆشحاڵ بووە بەوە و هەر ئەو ئێوارەیە پێیوتم كاتێ كە بە خێزانی نانی شێوانمان پێكەوە خوارد بە ئامادەبوونی سەفوەت پاشای دیمەشقیی كۆنە مامۆستا تایبەتەكەی و ئەحمەدى كوڕە خۆشەویستە حەوت ساڵانەكەى سەفوەت. لە پاش نان خواردن كەوتینە باسكردنى مەسەلەى كورد لە هەموو بارێكەوە و پێموایە بیرو بۆچوونەكانی مەلیك زۆر باش بوو. هەرسێكمان لە باڵكۆنەكەدا كە دەیڕوانییە سەر ڕووبارەكە دانیشتبووین و لە بارەی هەموو شتێكی ئەم دونیایە دەدواین. من بە شێوەیەكی چاوەڕوان نەكراو دڵسۆزییەك بێپایانم لە سەفوەتدا بینی، خوا بیپارێزێت. ئەو تەنها پیاوێك نیە كە تەنها دید و بۆچوونەكانی میانڕەو بێت بەڵكو دشتوانێ دەستباڵا بێت لە جڵەو كردنی كۆمەڵێك ئەرگومێنتدا. لێرە بێجگە لە مەلیك كە لەوان جیاوازە، كەسانێكى وات دەست ناكەوێت كە بتوانن خۆ دوورەپەرێز بگرن لەوەی بتوانن دوو سێ پرینسیپی تەواو لێكتر جیا لە هزر و بیریاندا بپارێزن بە یەكەوە و لە یەك كاتدا، كەچی سەفوەت ئەوە دەتوانێت. سەفوەت پەیوەندیی بەهێزی من و مەلیكی زۆر لەلا پەسەند بوو و دوێنێ تەنها لە بەر ئەوە هاتبوو چایەكم لەگەڵ بخواتەوە كەوا بە پاڕانەوەوە داوام لێبكات تا بتوانم هاتوچۆی كۆشك بكەم چونكە لای ئاشكرا و ڕوونە كە من تاقە كەسێكم لێرە بە ڕاستی مەلیكم خۆشبوێت و ئەویش خۆشی بوێم. هەر لە بەر منیشە كەوا مستەر كۆرنوالیس تەواوی كار و دەسەڵاتی خۆی خستووەتە ژێر دەستی مەلیك.

 باوكی ئازیزم، هەموو ئەمانە منداڵانە دێنە بەرچاو، بەڵام وایە و زۆر تەواوە و تۆ دەتوانی هەموو شتێك لەگەڵ فەیسەڵ بكەیت ئەگەر لەوە دڵنیا بێت كە تۆ هەست و خۆشەویستیت پێبەخشیوە. ئەو ئەم خۆشەویستی و دڵسۆزییەی پێبەخشراوە و ئەمەش بۆ ئێمە و بۆ خۆی و بۆ هەموو ئەو كەسانەش باشە كە دەبێ لەمە تێبگەن.

… سەبارەت بە ڕا و بۆچوونی مەلیك لە بارەى كوردەوە جارێ بە شێوەیەكی كاتی رەتكراوەتەوە. مێجەر بۆردیللۆن بە فڕۆكە چوو بۆ سلێمانی و لەگەڵ مێجەر گۆڵدسمیسی حاكمی سیاسیدا تەواوی مەسەلەكەیان خستە بەر باس و گفتوگۆ. حاكمی سیاسی ڕای وایە كە ناتوانرێ هیچ شتێك لە بەغداوە بكرێ و هەرچۆنێك بێت پێویستە دەسبەجێ شتێك بكرێت. لە بەر ئەوە بەتەمان پەیوەندییەكی خێرا بكەن لەگەڵ جەردەیەكی ڕێگری سەركێشدا بەڵام زۆر كاریگەرە لەو سەر سنوورە و ئەویش سەید تەهایە ، بۆ ئەوەی بزانن ئاخۆ ئامادەیە پۆستی حوكمدار وەربگرێت لە سلێمانی و رەواندزدا لە ژێر چاودێریی    ئێمەدا و ئەمە بازدانێكی ترسناكە لە تاریكیدا. پێموایە سەید تەها ئەم پێشنیازە رەتناكاتەوە و لەم حاڵەتەدا سەرلەنوێ دێمە مەسەلەكەوە و بیر و بۆچوونی مەلیك دەخەمە ڕوو. چونكە ئێمە هەرچەندە زانیاریی زۆرمان هەبێت لەم كارەدا بەڵام قەت ناتوانین ئەوە بزانین كە ئەوان چی دەكەن بۆ قایل كردنی یەكتر پاش ئەوەی ئازادییان دەدەیتێ لە كاریاندا. مەلیك دەڵێ “من زۆر جیاواز نیم لە ئاغای كورد”. چاكە، بەڵام ئێمە زۆر جیاوازین لە ئاغا كوردەكان و من پێ لەوە دەنێم كە شتێك ڕاستى لەو مەسەلەیەدا هەیە.

ڕۆژی دووشەممەی رابردوو رەواندزمان بۆردمان كرد بە بیست فڕۆكە و هەمان كردارمان ڕۆژی سێشەممە دووبارە كردەوە بە دە   فڕۆكە و هیوادارین بەمە هۆزە كوردە گەوجەكانی سەر سنوور قایل بكەین كەوا بەختی خۆیان تاقی نەكەنەوە لەگەڵ نزیكەی سێ سەد توركدا كە سەربازگەی رەواندزیان لێپێكهاتووە. ڕەنگە كەس باوەڕ نەكات كە ئەمانە هەموو ئەنجامدرا بێئەوەی هیچ زیانێكمان لێبكەوێت. چونكە لەو وڵاتە شاخاوییەدا شوێنێك نیە بۆ      دابەزاندنی و هەر ناتەواوییەك لە فڕۆكەیەكماندا رووبدات ئەوە مانای مەرگی حەتمییە. كۆڵۆنێڵ ماكنیس كەوا كاتى خۆى لەگەڵمدا بوو لە كاروبارى هێزى ئاسمانى لە فەلەستیندا و لەگەڵ خانەوادەى باومان هاتبوو چایەكم لەگەڵ بخواتەوە، فەرماندەى ئەم ئۆپەراسیۆنە   بوو و هەموو شتێكى لەبارەوە بۆ گێڕامەوە و كارێكى گەورە بوو چ لە رێكخستن و چ لە نەبەردى و ئازایەتیدا.

38

30ى تەمووزى 1922

باوكى خۆشەویستم، وا خەریكین لە بەسەرچوونى شەپۆلێكى گەرماى تاقەت پڕووكێن نزیك دەبینەوە. ئەو شەوە لە باخچەكەمدا ئاهەنگێكم سازكردبوو، لە سەرەتاوە دنیا زۆر گەرم بو بەڵام دواتر كەمێك فێنكى كرد و بە ڕاستى ئاهەنگێكى خۆش بوو و تێكەڵەیەكى سەیر تێیدا بەشدار بوو. نورى هات و یاریى كاغەزى پردى كرد و لە باخچەكەدا هەمەچەشنە خەڵكى نامۆى تێدا بوو. ئەفسەرانى ئەركانى گشتى عەرەب كە لە ئەستەمبووڵ مەشقیان كردبوو، گەنجێكى ڕوخسار قەشەنگى كورد، ناوى قادر بەگ بوو كە ئەگەر پێویست بكات لە ملت دەدات بێئەوەى ساتێكیش بیرى لێبكاتەوە، هەروەها سەیدە گەنجە بەڕێزەكانى خانەوادەى نەقیب، چەند پیاوماقووڵێكى بەڕێزى بەغداو دواجاریش عەجیل یاوەرى گەورە (كە پێشتر لە بارەیەوە قسەم بۆت كردووە بەڵام ڕەنگە لە بیرت چووبێتەوە). ئەم پیاوە سەرۆكى هۆزى شەممەرى نیشتەجێى باكوورى مووسڵە لە خێوەتێكدا دەژى و پەروەردەى ئەو خێوەتانەیە. هەروەها پیاوێكى تەواوە و سەربازێكى ئازایە و فەرماندەى لەشكرى حوشتر سوارى باكوورە و پیاوێكى  چوست و بەتواناى دەوڵەتە. بۆ تەواوكردنى وێنەكەى شەش پێ باڵایەتى و لەڕادە بەدەر  قۆز و قەشەنگە دەستوپلێكى جوان و دەنگێكى دلێرى پێوەیە و ئەمەیە عەجیل. لە پاش كاتژمێر یانزەى شەو زۆربەى میوانان ڕۆیشتن و ئاهەنگەكەیان چۆڵ كرد ئەو دووانەمان كە ماینەوە بۆ ماوەى سەعاتێك گوێمان بۆ عەجیل شلكردبوو كاتێ كە بە شێوەیەكى سەرنجڕاكێش روونكردنەوەى دەدا لە سەر نەخشە كێشانى سنوور لەگەڵ تورك و فەرەنساییەكاندا كە چۆن و بە چ شێوەیەك دابنریت. بۆ ڕۆژى دواتر بانگم كرد بۆ ئۆفیسەكەم و هاوكاریى كردم لە داڕشتنى نەخشەیەك و یاداشتێك و ناردم بۆ سێر پێرسى و بچووكترین گومانم نەبوو كەوا عەجیل ڕاستە و فەرەنسییەكان رازى نابن.

… ئێستاش لە بارەى قادر بەگەوە باسێكت بۆ دەكەم كەوا كوردێكى خەڵكى سلێمانییە و دەچێتە سەر پیرۆزترین و لە هەمان كاتیشدا شەڕخوازترین بنەماڵەى ئەو لیوایە (مەبەستى شێخ قادرى حەفیدە ــ و). شێخ مەحموودى براى گەورەترین و توندوتیژترین كەسى ئەم بنەماڵەیە كە سەركردایەتیى یاخیبوونێكى كرد لە ساڵى 1919دا و لەلایەن جەنەراڵ ماكمونەوە دامركێنرایەوە. پاشان شێخ مەحموود دوورخرایەوە بۆ هندستان و بەم دواییەش ڕێگەى پێدرا بگەڕێتەوە بۆ كوەیت. ئەگەر بە تەواوى لە بیرم مابێت قادر بەگیش نێردرابوو بۆ هندستان بەڵام ساڵى پار ڕێگەى پێدرا بگەڕێتەوە و لە بەغدا نیشتەجێ بێت لەگەڵ كەسێكى تردا بە ناوى شێخ غەریب كە خزمى نزیكیان بوو. شێخان، وەك لە ناوچەكەدا خێزانەكەیان بەم ناوە شۆرەتیان ڕۆیشتووە، خۆیان بە دوور دەگرن لە ئاژاوە و پشێوییەكانى ئێستاى سلێمانى، بەڵام هەموویان فشار دەكەن بۆ گێڕانەوەى شێخ مەحموود و وەك جۆرێك لە ڕاگرتنى دۆخەكە حاكمى سیاسیى ڕاسپاردوە كە پێویستە قادر و غەریب بنێردرێنەوە بۆ سلێمانى و سێر پێرسى ڕەزامەندیى دەربڕى بەڵام من بەدڵم نەبوو. بە هەر حاڵ، وەك هەستێكى سۆز ئامێز بۆ ئەم دوو پیاوكوژە بچووكە من بە شەخسى زۆرم پێخۆشبوو كە متمانەیان پێبكرێت و ئاگادار بكرێنەوە كە دەگەڕێنەوە بۆ شوێنى خۆیان و خۆ ئامادە بكەن بۆ سەفەر. دواتر هەر كە زانرا ئەمانە دەگەڕێنەوە شێخان بە شێوەیەك لووتیان بەرز كردەوە و خۆیان دەنواند كەوا فەرماندەى لێڤییەكان دەیوت لەمەودوا ئیتر بەرپرس نیە لەوەى كە ڕوودەدات و منیش هەواڵم نارد بۆ ئەم داماوە كەوا مەسەلەكە دڵشكاندنى    تێدایە و لە ئێستادا ناگەڕێنەوە و پاشانیش مەسەلەكەم لاى خۆم راگرت و هیوام خواست دواخستنەكە زۆر نەخایەنێت و ڕاستێكەى ئەوانیش كــارەكەیان بە گوێڕایەڵییەوە وەرگرت.

پێدەچێت كاروباری كورد تاڕادەیەك روو لە باشە بێت و حاڵی حازر هەموو پڕۆژەكانی مەلیكیان رەتكردووەتەوە. ئەمانە هەموو شتێكیان بەجارێ لەدەستدا و كەسانی سەركێشن چەشنی عەبدولكەریم فەتاح بەگ  كەوا هێزی لێڤی و فڕۆكە بەدوایەوە بوون پاش ئەوەی دوو ئەفسەرە بەریتانییەكەی كوشت. ئێمە لای خۆمانەوە پێشنیازی نهێنیمان كردووە بۆ یەكێك لە جەردە و ڕێگرەكانی سنوور، كە سەید تەهایە. ئەم پیاوە خۆی ئەوەندە بایەخدار نیە بەڵام سەر بە سمكۆیە كە پیاوێكی زۆر گرنگە  كە ماوەی چوار ساڵ شەڕی ئێرانییەكانی   كرد و لە پێگەی سەرۆكی بزووتنەوەی نیشتمانیی كوردایە. ئەگەر سەید تەها قایل بوو بەو پێشنیازەی بۆی كراوە ئەوە سمكۆ پشتی دەگرێت و هەوڵ و تەقەلای توركەكان پەكدەخات. سمكۆ ئەو “جێنتڵمانەیە” كەوا حاكمی ورمێی ئێرانی بۆمبێكی لە نێو كاغەزدا بۆ ناردبوو كە بە نامەیەك وەسفی رووداوەكەمان بۆ دەكات و تێیدا دەڵێت “هیچ كاتم نەبوو تەنها ئەو ماوە كەمە نەبێت كە توانیم بۆ براكەمى فڕێبدەم و تەقییەوە”.

39

8 ى ئابى 1922

… لەم ئێوارانەدا بۆ نانخواردنى شێوان بە خێزانى لەگەڵ مەلیك دانیشتین و سەفوەت و ئەحمەدى كوڕە بچووكیشی لەگەڵمان بوون. لە پاش شیو كردن سەفوەت بە ئەسپایی دۆعاخوازیى كرد و منیش لەگەڵ مەلیك لە باڵكۆنەكە دانیشتین كە دەیڕوانییە سەر ڕووبارەكە و ماوەى كاتژمێر و نیوێك لە بەر تریفەى مانگەشەو كە لە شەپۆلى ڕووبارەكەى دەدا قسە و دەمەتەقێمان كرد و مەلیك ناخى دڵى خۆى بۆ كردمەوە بە شێوەیەك كە هیچ خۆشحاڵ نەبووم پێى. ئەو تاڕادەیەكى زۆر هەست بە ئازارى ئەوە دەكات كە ڕێگەى پێنەدرا كارى خۆى لەگەڵ كوردى سلێمانى بكات و منیش بە تەواوەتى لەگەڵى هاوڕام. هەروەها زۆر بە توندى نیگەرانە لە هەوڵیدا بۆ گەیشتنە رێككەوتن لەگەڵ   كەمالییەكاندا و لەمەشدا بە تەواوى لەگەڵیم و بەڵێن دەدەم كە تا بتوانم هەموو شتێك بكەم بۆ هەماهەنگى كردنى مەلیك لەگەڵ كۆمیسیاری باڵادا. لەم خاڵەدا ئەوان وا بیردەكەنەوە كە ئێمە نزیكین لە ڕێككەوتنێك لەگەڵ كەمالییەكاندا لە سەر بنەماى گێڕانەوەى ویلایەتى مووسڵ   بۆیان و ئەمەش بە ماناى سەربڕینى عێراقە. لەگەڵ ڕێزمدا من ڕام وایە كەوا تەنانەت حكوومەتە هەلپەرستەكەمان تواناى سووكایەتى پێكردنى لەم چەشنەى نیە. بەڵام تاقە ڕێگە بۆ قەناعەت پێكردنى مەلیك و دەستە و تاقمەكەى ئەوەیە كە دەستیان واڵا بكرێت لە گفتوگۆ و دانوستاندا لەگەڵ توركەكاندا و بتوانن بە پێى بەرژەوەندیى وڵات بڕیار بدەن. حاڵى حازر وەزیرى دەرەوە (مەبەست وەزیرى دەرەوەى بەریتانیایە ــ و) برووسكەیەكى زۆر خراپ و نەعلەتیى بۆ ناردووین كەوا دەسەڵاتى تەواوى داوەتە مێجەر یۆنگ  ـ نەعلەتى خواى لێبێت  ـ و تێیدا ڕاسپاردەى ئەوە دەكات كە بەر لە هەڵبژاردنەكان ئێمە بە شێوەیەكى كردارەكى ئامۆژگاریى تەواوى ناوچە كوردییەكانى لاى عێراق بكەین بۆ خۆڕاگرى و داكۆكی كردن و پێكهێنانى دەوڵەتێكى سەربەخۆى كوردى. كۆمیسیاری باڵا لەگەڵ هەموو هەڵوێستێكیدا پێیوتم كەوا سەرنج و تێبینییەكانم لە سەر ئەم مەسەلەیە بخەمە ڕوو. من پێموایە و ئاواتەخوازیشم كە ئەو تا سەر ئێسقان بەرەنگارى ببێتەوە، چونكە ئەگەر ئێمە كار بە پێشنیازەكانى ئەم پڕۆژەیە بكەین ئەوە ماناى وایە كە نەك تەنها فەیسەڵ بەڵكو هەموو عێراقییەكى عەرەب قەناعەت بەوە دەكات كە ئێمە لیوا كوردییەكان لە لیوا عەرەبییەكان جیادەكەینەوە بۆ ئەوەى بیانگێڕینەوە بۆ توركەكان.

من سەرومڕ بێ وەستان خەریكى نووسینى یاداشتم لە سەر مەسەلەى كورد بۆ كۆمیسیارى باڵا و دوێنێ لە كەشوهەوایەكى هێجگار گەرم و دۆزەخ ئاسادا، كە وام هەست دەكرد خەریكە دەمرم، لە  ئۆفیس و لە كاتژمێر حەوتى بەیانییەوە بۆ یەك و نیوى نیوەڕۆ كارم كردووە و پاشان گەڕامەوە ماڵ و دواى نان خواردنى نیوەڕۆ بێوچان كەوتمەوە كاركردن لە كاتژمێر    دوو و نیو بۆ شەشى ئێوارە و دواى ئەوەش چووم بۆ كۆبوونەوەى كۆمیتەیەك و پاشتریش بۆ شیو كردن لە كونسوڵییەتى فەرەنسى و لەوێ تا نیوەشەو یاریى كاغەزمان كرد و كاتێ گەڕامە ماڵەوە هەستم كرد لە خێوێكى سامناك دەچم.

40

16 ى ئابى 1922

… لەم ماوەیەدا هەموو ئەم رقەبەرایەتی و دوژمنكارییانەی ناوخۆ كەوا هێند بە قورسى داگیرى كردووین ڕەنگە كاڵ  ببنەوە و لە ئاست مەترسیى پەرەگرتووى كەمالییەكان لە سەر ناوچە سنوورییەكانى باكوورمان. ئەمڕۆ هەواڵێكمان پێگەشتووە و خستووینیە حاڵەتی ئامادەباشیى تەواوەوە. سمكۆ، ئەو چەتە كوردەى ئەودیوى سنوورمان (كە لە نامەكەى ئەمدواییەمدا باسم بۆ كردوویت)، وەك بیستوومانە دواجار بە تەواوى لە سەر دەستى توركەكان شكستى خواردووە. لە ئێستادا سمكۆى چەتە و ڕێگر، نەتەوەخوازێكى كوردە و قەناعەتى هێناوە كەوا بێ یارمەتیدانى ئێمە هەرگیز ناتوانێ مەبەستى خۆى بەدیبێنێ (كە بە شێوەیەكى سەرەتایى سمكۆ بكرێتە حوكمدارى هەموو كوردستان). بەم پێیە ئێستا نەك هەر تەرەفدارى ئێمەیە بەڵكو پەیامبەرانیشی بۆ هەموو هۆزە كوردییەكانى سنوور ناردووە و كەوا ئەگەر بەرهەڵستیى ئێمە بكەن، بە دەسیسە و هاندانى تورك، ئەوە خوێنى خۆیان حەڵاڵ دەكەن. هاوزەمان لەگەڵ هەواڵى لەناوبردنیدا ئێمە برووسكەى شێتانەمان لە سلێمانییەوە پێدەگات و داوا دەكەن فڕۆكە و  لێڤى و هەموو جۆرە هێزێك بنێرینە سەر   سنوور و مەیدانى شەڕ. من هەست بە مەترسییەكى زۆر گەورە دەكەم و جارێكى تر هانى سێر پێرسیم دایەوە كە لێبگەڕێت مەلیك خۆى مامەڵە لەگەڵ دۆخەكە بكات و ڕاستەوخۆ سلێمانى ببەستێ بە خۆیەوە چونكە هیچ چارێكى ترمان نیە لەوە زیاتر. ئەگەر ئەوە بكات پێموایە دوا هەل و دەرفەت دەبێت كە نەهێڵێ دابەشبوون ڕووبدات، بەڵام ئەگەر ئەم هەلە لە دەست بدرێت ئەوە تورك گرەوەكە دەباتەوە و كەركووكى تازە بە ئێمەوە نووساویش لە دەست دەچێت چونكە زۆربەى دانیشتووانى بە ڕەگەز توركن و لەگەڵ ئەواندا دەڕۆن. بە زۆریش ئەمە كارێكى نەشیاو و قەناعەتهاوەر نیە كەوا ئێمە بگەینە لێوارى كارەساتى بەرنەگیراو و پێموایە ئێستا لەو دۆخەداین و هەڵبەت بە شێوەیەكى لابەلاش تەواوى كاربەدەستانمان لە سلێمانى دەكوژرێن.

41

18 ى ئابى 1922

… ئاڵۆزییەكان لە سەر سنوورى كوردستان مایەى نیگەرانییەكى گەورەن و كەمالیستەكان بە دیاریكراوى بەرەوخوار دەبنەوە بۆ سلێمانى نەك بە هێزى گەورەوە بەڵكو لە ڕێگەى بڵاوكردنەوەى واتەواتى ئیسلامییەوە لە ناو تیرە و هۆزەكاندا و ئێمەش هیچمان بە دەستەوە نیە هێزێكى بچووكى لێڤى نەبێت ئەویش بە هۆى دوو مانگى پیادەڕەویى قورسەوە لە گەرمادا بە تەواوى شەكەت بووە و پرزەى لێبڕاوە و فڕۆكەكانیشمان زۆر كاریگەر نین لە ناوچەى شاخاوییدا. من زۆر هەست بە دڵەڕاوكێ و نیگەرانى دەكەم لە بارەى ئەفسەرە دابڕاوەكانمانەوە و تاڕادەیەك كەمتر لە بارەى یەك دوو ئاغاى كوردەوە كەوا كەڵەمێردانە كارمان بۆ دەكەن و ئێمەش پشتیوانییان لێدەكەین. هەڵبەت برووسكەیەكى بایەخدارى جفرەكراو لە وڵاتەوە (واتە بەریتانیا ــ و) گەیشتووە و هێشتا نەكراوەتەوە و بێگومان ئەو وەڵامەى تێدایە كە پێمانوایە بڕیار لە چارەنووسمان بدات.

42

31 ى ئابى 1922

… لە كاتێكدا كە ئێمە مشتومڕمانە لە سەر ئەم كێشانە سەربازەكانمان بەرگرى لە سنورەكانى سلێمانى دەكەن دژ بە كەمالییەكان كەوا بە هێزەوە داگەڕاونەتە خوارەوە بۆ  ڕانیە و ئێمە سەعات بە سەعات چاوەڕێى هەواڵى لەناوچوونى ئەفسەرانمان و لێڤى و پیاوانى هۆزەكانمان دەكەین.

43

8 ى ئەیلوولى 1922

باوكى خۆشەویستم، ئێمە بەردەوامین لە شەڕ و نەبەردییەكانمان لەگەڵ بارودۆخێكى ئێجگار سەخت و تووشدا و وەك دەوترێت لە نێو دەریایەكى پڕ شەپۆلدا و هەر كە لایەكیان هێور دەكەینەوە دڵنیا نین كەوا شەپۆلى داهاتوو نوقمى بن دەریامان ناكات. زۆرى   نەخایاند و ئەو سەركەوتنە بەرچاوەى لێدانەكەى سێر پێرسى بەدەستیهێنا و جێگیر كردنى ناوخۆیى مسۆگەر كرد، كەچى مەترسیى دەرەكى ئەگەرى قەبارەیەكى نوێ و ترسناكى بەخۆوە بینى. پێش هەموو شتێك، وەك خۆت بیستووتە، ئەو هێرشە خێڵەكییەى بە فیت و تەگبیرى كەمالییەكان ئەنجامدرا و بە زۆریش لە ڕێگەى كوردە بەدفەساڵەكانەوە لە ناوچەكانى سەر سنوورى ئێران ناچارى كردین ڕانیەى سەر بە ناوچەى سلێمانى بەجێبێڵین. ئەمە لە خۆیدا زیانێكى زۆر گەورە نەبوو، چونكە ناوچەكە لە باشترین حاڵەتیدا پڕ ئاژاوە و پشێوییە و هیچ شتێكمان لێ دەست ناكەوێت، تەنانەت ئەو خەرج و مەسرەفەش كە تێیدا بە فیڕۆى دەدەین، بەڵام پاشەكشە لە بەرامبەر هۆزگەلێكى یاخیدا بەردەوام بە كارێكى مەترسیدار دەژمێردرێت چونكە هەرگیز نازانیت كەى و لە كوێدا تەواو دەبێت. هەروەها ئێمە پشتى بابەكر ئاغاى پشدەریشمان بەردا، ئەو پیاوە بوێر و بەهێزەى لە ئەوەڵەوە تا ئاخر لایەنى ئێمەى گرت و نازانین چارەنووسى چی دەبێت و چی   بەسەردێت و ئەمەش جۆرە هەڵوێستێكە كە وا هەست بكەیت لە ڕووى شەخسییەوە كارێكى دزێوت كردبێت. بە دواى ئەوەشدا هەموو فەرمانبەرانمان لە سلێمانى كشاندەوە و مەحاڵە لەوە بگەین كەوا ئاژاوەگێڕیى دەرەكى ئەنجامى چى دەبێت و بێ پاساویش ژیانى كەسانێك بخەینە مەترسییەوە كە هیچ هۆكارێكمان نیە بۆ پاڕاستنیان. بەم ڕەنگە ئێمە لە سلێمانى ئەنجومەنە كوردییە هەڵبژێردراوەكانمان ڕادەست كردەوە، كە پێش ساڵێك دەستى بە كار كردبوو و شێخ قادرمان كردە بەرپرسى، كە یەكێكە لەو بنەماڵە ناوخۆییەى سەرۆكایەتیى ناوچەكە دەكات و نزیكەى شەست كەسمان بە فڕۆكە كشاندەوە، كە بریتیبوون لە ئەفسەرى بەریتانى و فەرمانبەر و نووسەرى ئێرانى و لێڤیى ئاسوورى. كارەكە بێ هیچ گرفتێك    ئەنجامدرا و هێزى ئاسمانیى شاهانە بە شێوەیەكى باش و دروست ئەركى خۆى بەجێهێنا، بەڵام ئاخۆ جارێكى تر دەگەڕێینەوە؟ ئەوە جێى گومانە و ئەگەر وایشكەوتەوە ئەوا هەرگیز لە هەمان بار و زرووفدا نابێت. ئەوە چەند ساڵیكە بە هۆى كارى نایاب و دڵسۆزانەوە لیوایەكمان لە ئاژاوە و پشێوى ڕزگار كردووە و بە شێوەیەكى لەبار و گونجاو بە ڕاڕەوى گەشەكردنى ئاشتیانەدا تێمانپەڕاندووە كەچى هەمووى بەباچوو لە ئەنجامى واتەواتێكى كەمالیى گەوجانەدا لە نێو خەڵكانێكى شاخاوى و دڕندەى سەرسنوورداو بۆچى؟ وەڵامى ئەمەش ڕوونە، لە بەر ئەوەى ئێمە لەو كاتەوە كە جاڕى ئاگربەس دراوە بە شێوەیەكى هێند خراپ مامەڵەمان لەگەڵ مەسەلەى توركیدا كردووە كەوا مایەى نائومێدییە چونكە هەر كەسێك لە ئێمە ئاگادارى بارودۆخەكە بێ لە توركیا دەیزانى كەوا پەیماننامەى سیڤەر پڕوپووچییەكى هێند سەقەت و بێمانا بوو كە ئەقڵ نەیبڕێت و هیچ كامێك لە ئێمە نەیدەتوانى كەسێك بدۆزێتەوە و گوێى لێبگرێت. دواجاریش تۆپەكانى تورك كەوا فەرەنسییەكان گوللە و پێداویستیى تەواویان بۆ دابینكردبوو ڕێگاى ڕۆژهەڵاتمانەوە بە شێوەیەكی چاوەڕوان نەكراو بێدەنگ و جێگیرە و ئاژاوە و خراپەكاریی زیاتر نەڕۆیشتووە خۆیان دۆزییەوە لە شوێنێكدا كەوا ئەقڵ و زانیارى دەستەوسانن لەوەى كونێكى بچووكى تێدا بدۆزنەوە.

تا ئێستا بارودۆخ لە سنوورەكانی. مێجەر نۆئێڵ ، كە حاكمی سیاسییە لە هەڵەبجەی ئەوپەڕی باشووری ناوچەی سلێمانی، پێداگریی دەكات لە پۆستەكەیدا بمێنێتەوە و باوەڕی وایە، لە سەر ئەرز دەتوانێت هۆزە لۆكاڵییەكەی ئەوێ، كە هۆزی جافە، لە سەر ڕێی ڕاست بهێڵێتەوە، وەك چۆن دەتوانێت هەر كاتێك بیەوێت سواری ئەسپەكەی دەبێت و بە هەر لایەكدا ئارەزوو بكات دەڕوات. ئەم ئەفسەرە كەسێكی لەڕادە بەدەر نائاساییە و هیچ دوور نیە بتوانێت كۆمارێك لە سلێمانیدا دروست بكات بە سەرۆكایەتیی خۆی! بەڵام پلان و بەرنامەی ئێستا گێڕانەوەى سەرۆكی بنەماڵەكەی شێخ قادرە، واتە شێخ مەحموودی برا گەورەكەی، كە ساڵی 1919 لە دژی ئێمە راپەڕی و لەو كاتەوە گیراوە و دوورخراوەتەوە بۆ هندستان و كوەیت. ڕاستە هیچ هۆكارێك نیە كەوا ئەم پیاوە ئێمەی خۆشبوێت بەڵام رق و كینەی لە تورك دەگەڕێتەوە بۆ ماوەیەكی دوورتر لە سێ ساڵ و جێی باوەڕە كە ڕەنگە ئامادە بێت بۆ هەماهەنگی كردن لە وەدەرنانی توركەكاندا. سلێمانی لەخۆیدا گرنگ نیە بەملا یان بەولادا بڕوات و هەمیشە كێشە و گرفتێك هەبووە چونكە ئەم شارە بە توندی ئەوەی رەتكردووەتەوە ببێتە بەشێك لە عێراق و كورد حەز بە عەرەب ناكەن. ڕاستێكەى كێشەكە لە لیوای كەركووكی دراوسێى نزیكیدایە كە نیوەی دانیشتووانی بە رەگەز تورك و نیوەكەی تریش كوردن و هەمیشە سوێندى ملكەچی و بەیعەتیان بۆ فەیسەڵ رەتكردووەتەوە.

ئێرە لە ڕووی ئابوورییەوە بەشێكی تەواوكەری عێراقە و ئەگەر توركیا بگاتە سلێمانی و لەوێوە بۆ كەركووك ئەوە كارێكی زۆر جیددى و مایەى نیگەرانییە. ئەوەی كە مەلیك لێی دەترسێ ئەوەیە كە ئەگەر كەمالییەكان و سوپاكەیان لە سەرقاڵ بوون بە دەست گریكەوە (یۆنانییەكانەوە) رزگار بن و بە دوورى مەزانە بابدەنەوە سەر عێراق و تەواوی ویلایەتی مووسڵ بۆ خۆیان رابكێشن و لە دەست ئەو و ئێمەشی دەربكەن. هەڵبەت تا ئەو كاتەی ئێمە فشاری دیبلۆماسی بەرپا دەكەین هیچ ڕێگایەكی تر نیە ببێتە بەربەستیان بۆ جێبەجێ كردنی ئەم جوامێرییە ئاسانە ئەگەر بیانەوێت. من تێبینیی ئەوەش دەكەم كە                (أ) دیبلۆماسییەتی ئێمە لە ئێستادا نەزۆكە و (ب) شكستی گریك ئێمەی خستووەتە خراپترین پێگەوە بۆ پیادە كردنی هەر هەنگاوێك. ئەنجامگیریی من لە بارەی مووسڵ و كەركووكەوە ئەوەیە كەوا ئێمە لە ڕووى پراكتیكەوە لە ژێر رەحمەتی كەمالیستەكانداین و ماوەتەوە سەر ئەوەی ئەوان چ بڕیارێك دەدەن و بە ڕاستى دۆخێكی خراپ تێكەوتووین.

44

10 ى ئەیلوولى 1922

بەیانیی ئەم یەكشەممەیە، لە كاتێكدا كە من نامەم بۆ دەنووسیت (واتە بۆ باوكی ــ و)، سێر پێرسى و مستەر كۆرنوالیس چاوپێكەوتنێكی گرنگ و مەترسیداریان لەگەڵ مەلیكدا هەیە، كە تێیدا سێر پێرسى داوای لێدەكات تەواوی كارە ئەنجامدراوەكانی بخاتە ڕوو و پڕۆژەكانی چی دەبن بۆ داهاتوو. دوێنێ ئێوارە لە سەر نانخواردن لەگەڵ مستەر كۆرنوالیسدا گفتوگۆمان لە سەر هەموو ئەگەر و بۆچوونەكان كرد تا نیوەشەو بێ ئەوەی بگەینە ئەنجامێك.

دوێنێ لەگەڵ مستەر ئێدمۆندز پێكەوە نانی نیوەڕۆمان خوارد. ئەم پیاوە ئەو حاكمە سیاسییە بوو كە بەم دواییە لە رانیە كاری دەكرد و كەسێكی ڕەفتار جوانی بەتوانایە و بە پیادەڕۆیی لەگەڵ رەتڵەكەدا پاشەكەشەی كرد لە ژێر دەسڕێژی قورسی خێڵەكاندا تا ئەو كاتەی فرۆكە هاتن و هێرشبەرانیان بێدەنگ كرد. هێزی ئاسمانیی شاهانە كارێكی سەرسامكەر ئەنجامدەدات بەڵام ناتوانێ لە ناوچە شاخاوییەكاندا هێرشبەران بوەستێنێ، چونكە كەمترین زیان دەگەیەنێ لە كاتێكدا كەوا كاری بێَشومار هەیە لە ئەستۆی بگرێت. مستەر ئێدمۆندز باوەڕی وایە كە چارەسەری گونجاو ئەوەیە كەوا شێخ مەحموود بگێڕنەوە بۆ شوێنی خۆی وەك ئەوەی كە پێشنیاز كراوە و هەڵبەت منیش ئەمە بە ڕاست دەزانم و ئەگەر ویستی ئێمە سەرپەرشتیی بكەین و ئەو كاتە دەبێ بوار بدەین یەك ئەفسەری سیاسیی بەریتانی لەگەڵ بمێنێتەوە بۆ ببێتە ئەفسەری پەیوەندی لەگەڵ بەغدا و بە هیچ شێوەیەك دەست وەرنەداتە كاروباری بەڕێوەبردنەوە.

شێخ مەحموود تەنها نموونەیەكی ئاسایی سەرۆك چەتە و ڕێگری كوردە و تەنها كەمێك واوەترە و هیچ بیروبۆچوونێكی لە سەر بەڕێوەبردن نیە و هەموو دۆست و خزمەكانی دەخاتە سەر كار و دوژمنەكانیشی سەركوت دەكات ئەگەر نەیشڵێین دەیانكوژێت، ئێمە ناتوانین ئەم پیاوە بوەستێنین و تەنانەت هیچ پیاوێكی بەرپرسی ئینگلیزیش ناتوانێ ڕایبگرێت. بەڵام ئەگەر ئێمە پەیوندیی باشمان لەگەڵ هێشتەوە و بە پێی توانا پشتیوانی سەربەخۆیی ئەو پارچە بچووكەی كوردستانمان كرد كە لە ژێر ڕکێفی ئەودایە، ئەوە دەبێتە ناوبەینێكی كوردی لە نێوان عێَراق و توركەكاندا. ڕەنگە تۆ سەرسام بیت بەوەی بۆچی و چۆن شێخ مەحموود ئەو دەسەڵاتەی هەیە بە سەر وڵاتدا، لە كاتێكدا كە دەیناسین چ شەڕخواز و پیاوخراپێكە و وەڵامەكەشی ئەوەیە كە دەبێ بزانێ كەوا بە پلەی یەك ئاغای كورد كۆنترۆڵی سەرسوڕهێنەری هەیە بە سەر خێڵ و هۆزەكانیدا بە پلەی دوویش شێخ مەحموود لە ڕوویەكی ترەوە پیاوێكی پیرۆزە و ئەمەش پشتاوپشت بۆ هەموو ئەندامانی بنەماڵەكەی ماوەتەوە و باپیرە گەورەیان مەزارێكی هەیە لە سلێمانیدا.

ژیان بە دەگمەن تەمەڵ و بێ رووداوی كوتوپڕە بۆ كورد و بەردەوام پڕە لە پێشهاتی نوێ، بۆ نموونە شێخ قادری برا بچووكی شێخ مەحموود وەربگرە. تەنها مانگێك لەمەوپێش لە بەغدا گیرا، لە پاش دوو ساڵی بەند كردن و لەگەڵ من دانوستانی دەكرد لە بارەى ڕۆژی گەڕانەوەیەوە بۆ زێد و ماڵی خۆی (من لە جیاتی سێر پێرسى دانوستانم دەكرد). ئەم پیاوە بچووكە چەند جێنتڵ و چەند سوپاسگوزارە بەڵام هەمیشە چەقۆ لە سەر ملت دادەنێ و دوو هەفتە بە سەر گەڕانەوەیدا تێنەپەڕیبوو كەچی خۆی بە سەرۆكی ئیدارەی لیوایەكی تەواو بینییەوە وەك بریكاری حكوومەتی خاوەن شكۆ (واتە حكوومەتی بەریتانیا ـ و) ئەوجا لە بەر ئەوەیە كە دەڵێم ئەو هەرگیز هەست بە تەمەڵی و بەتاڵی ناكات.

مێجەر گۆڵدسمیسیش لێرەیە و لە بیرتە پار ساڵ لە سلێمانی لە لای مامەوە و ئێستا ئەو حاكمی سیاسیی لیواكەیە و بەنیازە لەگەڵ شێخ مەحموود بگەڕێتەوە، یان بە ماوەیەكی كەم دوای ئەو، بەڵام من گومانم نیە كە پیاوی ڕاستەقینە بۆ ئەركی ئەفسەری پەیوەندی مێجەر نۆئێڵە، چونكە لە مەحاڵەوە نزیكە بۆ مێجەر گۆڵدسمیس كەوا بە چاوی خۆی ببینێت هەمو ئەو دام و دەزگایەی بنیاتی ناوە تێكوپێك بدرێت و پێویستت بە كەسێكی ملهوڕی و بوێری وەك مێجەر نۆئێڵ دەبێت، كە بە خۆی وەك كورد وایە ئەو رۆڵە ببینێت و بە هەر حاڵ ئەو ئەرك و كاری سێر پێرسییە.

45

14 ى ئەیلوولى 1922

… پێش چەند ڕۆژێك سێر پێرسى و مستەر كۆرنوالیس لەگەڵ مەلیك دانیشتن و گفتوگۆیان لە سەر كۆمەڵە بابەتێك كرد و ئەویش رازی بوو بە هەموو ئەو كارانەی سێر پێرسى    كردوویەتی و پەسەندی كرد، پاشان بەڵێنی دا كە نەقیب راسپێرێت بۆ پێكهێنانی وەزراەتێكی نوێ، بەڵام زۆری ڕق هەڵسا وەختێ پێیوترا كەوا پێویستە دەست وەرنەداتە وردەكاریی كاروباری بەڕێوەبردن و بە تایبەتى كە دامەزراندنی سەرۆكی دیوان و سەرۆكی تەشریفاتەكەی لەلایەن حكوومەتەوە بوو بە بڕیارێك لەلایەن ئەنجومەنی وەزیرانەوە.

… چاكە ئێستا باسی سلێمانیت بۆ دەكەم، ئەنجامی دانانی شێخ قادر بە سەرۆكی ئەنجومەنی بەڕێوەبردن وا كەوتەوە كە هەموو ئەو هۆزانەى چووبوونە پاڵ كەمالییەكان رایانگەیاند كەوا لە بەر ئەوەی ئێستا لە وڵاتی خۆیاندا حكوومەتی كوردی فەرماندارە ئیتر ئەمان هیچ كارێكیان بە توركەكان نەماوە! شێخ قادر خۆیشی پەیامگەلێكی وای بڵاوكردەوە كەوا تەنها ئومێدی ملكەچبوونە بۆ فەرماندەكانی كۆمیسیاری باڵا. لەو كات و ساتەدا كە ئێمە سلێمانیمان چۆڵ كرد ئەو ئاغا یاخییەی كە بەرپرس بوو لە كوشتنی كاپتن بۆند و كاپتن ماكانت چووە شاری سلێمانی و داوای چەكی كرد و شێخ قادریش رازی نەبوو چەكیان بداتێ و بوو بە دەمەقاڵەیان. لە ئێستادا دوو لایەن لە شارەكەدان، شێخ قادر لە لایەكەوە بە پشتیوانیی لێڤی و پۆلیس و تەواوی هاوڵاتیانی بە شەرەف، كە بە دڵسۆزى سەر بە بەریتانیان و عەبدولكەریم فەتاح (كە تۆمەتی پیاوكوشتنی لەسەرە) كە بە دڵگەرمی سەر بە توركە، بەڵام توركەكان هەموو لە رانیە دەرچوون و پاشەكشەیان كردووە بۆ رەواندز.

لەم ماوەیەدا شێخ مەحموود گەیشتەوە بەغدا و مێجەر نۆئێڵ كە چاوی پێكەوتبوو دەڵێ زۆر نیگەران و بێتاقەتە و هەرگیز بەپەرۆش نیە قورسایی بەڕێوەبردن لەئەستۆ بگرێت بەڵكو بە شێوەیەكی گشتی حەز بەوە دەكات بگەڕێتەوە سەر ئەو ژیانە ئاسایی و هێمنەی لە دوورخراوەییدا دەیگوزەراند لە كوەیت ! دوور لە پیشاندانی هەر وەڕسی و نیگەرانییەك بۆ سێ ساڵی بەند كردنی و زۆر سوپاسگوزار و منەتبارە لەو مامەڵە باشەی كە كراوە و بە نیازە ئەم ئێوارەیە یان سبەینێ سێر پێرسى ببینێ و هەڵبەت منیش دەبیستم كەچی چووەتە نێوانیان.

ئەگەر لێمانگەڕێن كاری خۆمان بكەین، بێگومان دەتوانین عێراق و كوردستان بەڕێوەببەین، با كارەكە قورسیش بێت، بەڵام ئاخۆ لێماندەگەڕێن كاری خۆمان بكەین؟ ئەگەر كەمالییەكان گەڕانەوە سەرمان بەو لەشكر و سوپایەوە كە لە بەرەی گریك (یۆنان) دەستواڵا دەبێت ئەوە نە ئێمە و نە تەواوی ناسیۆنالیستەكانیش پێكەوە ناتوانین بەرەنگاریان بینەوە. ئەمەیە رەوشەكە و ئێمەش هەر ئەمڕۆ و سبەیمانە و نازانین ئاخۆ سبەینێ هەڵدەكۆتنە سەرمان یان نە.

46

24ى ئەیلوولى 1922

… كەسایەتییە دەركەوتووەكەی تری لای ئێمە شێخ مەحموودی سلێمانییە، كە ڕۆژی 13ى مانگ لە كوەیتەوە گەیشتە بەغدا. هەڵبەت ئەوە كاری خواوەندە كە مێجەر نۆئێڵی بۆ نارد و بوو بە ڕاوێژكاری لەو ماوە كورتەی هەنگوینە مانگمان لەگەڵی لە زستانی                  1918  ــ 1919داو دەبوو بگاتە ئێرە، پاش ئەوەی نووچیدا و شكستی خوارد. لە گفتوگۆكەی لەگەڵ سێر پێرسیدا شێخ مەحموود گیانێكی هێجگار بەجێ و لۆجیكیی نواند و پێوە دیار نەبوو كە هیچ   ڕق و كینەیەكی لە دڵدا بێت بەرانبەرمان لە سەر ئەو سێ ساڵَ بەند كردنە و هەرگیز وای دەرنەخست و بە پێچەوانەوە ئەوەی دەردەبڕی كە ئێمە چ میهرەبانییەكی گەورەمان لەگەڵ كردووە لە سەر ئەوەی كە بەرمانداوە! بەڵام كە گەیشتەوە سلێمانی بە تەواوی گۆڕا و هەڵوێستی پێچەوانەی نواند و هەڵبەت لە سەرەتادا بەشێكی لە بەر ئەوە بوو كە تا بتوانێ پارە و چەكمان لێ بستێنێ. لە بارەی حكوومەتی عێراقیشەوە زۆر بە ئاشكرا رای خۆی دەربڕی كە ئێمە قبووڵمانە و هەرچۆنێك بێت سێر پێرسى قەناعەتی پێكرد كە لە هەموو حاڵەتێكدا دەبێ باش و تەبا بێت لەگەڵ دراوسێكەیدا و دەبێ ئەم دەرفەتە بقۆزێتەوە و بگەنە تێگەیشتن لەگەڵ فەیسەڵدا. بەم ڕەنگە شێخ مەحموود لە پاش دوو   ڕۆژ و لە 16ی مانگدا چوو بۆ بینینی مەلیك و دواتر ڕاستەوخۆ لە چاوپێكەوتنەكەوە هاتە لای من لە ئۆفیس. بۆ دواینیوەڕۆ مەلیك ناردی بە شوێنمدا و باسی گفتوگۆكەی نێوانیانی بۆ كردم، كە بە ڕاشكاوانە قسەیان كردووە و بە شێخ مەحموودی وتووە بەرژەوەندییەكانی   عێراق و كوردستان هەر یەكن و سلێمانیی بە قەڵایەكی دژ بە تورك داناوە و هەرچییەكی پێبكرێت بۆ یارمەتیدانی درێغی ناكات. ئەوجا ئەفسەران و پیاوانی كورد لە سوپای عێراقدا دەكرێ بچنە پاڵی ئەگەر ئەم حەز بكات و دواجاریش بچنە خزمەتیەوە ئەگەر ئارەزوویان لێبێت. لە پاش ئەوە تا گەڕانەوەی بۆ سلێمانی لە 20ى مانگدا ڕۆژانە سەری لێدەدام و ڕاستێكەی من خۆشم بە چارەیدا نەدەهات و لێى لالووت بووم.

بۆ ئێوارەی ڕۆژی 20ی مانگ ڕۆیشت بۆ كفری، كە دەكەوێتە نزیك هێڵی شەمەندەفەرەوە لە ناوچەی كەركووك و ئەگەر لەبیرت مابێت و لەگەڵ خۆیدا مێجەر نۆئێڵ و پێنج ئەفسەری كورد لە سوپای عێراق و بژاردەیەك لە خەڵكی سەركێش و ساختەچی بووبوونە یاوەری. هەر كە گەیشتبووە كفری برووسكەیەكی درێژ و ڕازاوەی بۆ ناردم! لەوێ لەو لیوایە حیزبێكی بەهێزى سەر بە توركیا هەیە و هەر ئاغایەك كەوا خزمی ماڵی شێخ مەحموود نەبێت ركابەر یان دوژمنە. ئاخۆ ئەو شان و شكۆیە بە هۆى پشتگیریی ئێمەوە دەستیكەوتووە بەردەوام دەبێت یان نە، ئەوەیان نازانم.

حاڵی حازر نە مێجەر نۆئێڵ، كە شێخ مەحموود تكای لێكرد لەگەڵی بێت، نە هیچ ئەفسەرێكی بەریتانی پێ ناخەنە سلێمانییەوە تا كەریمی فەتاح بەگ، كەوا هەردوو كاپتن بۆند و ماكانتی كوشت، نەگیرێت یان لە شار نەچێتە دەرەوە. دوا هەواڵ كە ئێمە لە بارەیەوە بیستوومانە گوایە شێخ قادری برای شێخ مەحموود بە مودیر ناحیەی زاب دایمەزراندووە! هەرچۆنێك بێت ئەوەی كە روودەدات خەریكە بەو بارەدا بشكێتەوە كە تووشی ئاژاوەگێڕیی ببێتەوە و كاتی خۆی ئێمە رزگارمان كرد لەو ئاژاوەیە و ئێستا ئێمە هیچ هەوڵێك نادەین بۆ وەستاندنی. شایانی باسە بە گەیشتنی شێخ مەحموود بۆ كفری هۆزە كوردەكانی ناوچەی كەركووك بە تێكڕا مەزبەتەیەكیان ئیمزا كردووە كە لە ملكەچیی حكوومەتی عەرەبیی كاتی دەردەچن و دەڕۆنە سەر كوردستان لە ژێر ڕکێفی شێخ مەحموودا. ئەمانە خۆشحاڵی و شكۆی خۆیان لە بێ حكوومەتیدا دەبینن و ئەوە جووتیار و بازرگانەكانە كەوا گرفتار دەبن. ئەمانە كاتێ كە لە چاوەروانی دەكەون و نائومێد دەبن لە یارمەتیی ئێمە دواجار بادەدەنەوە بە لای توركدا، لە سەر ئەو بنەمایەی كە هەر حكوومەتێك بێت باشترە لە بێ حكوومەتی. نەخێر من هیچ دڵخۆش نیم بە بارودۆخی سیاسی لە سلێمانیدا بەڵام تا ئاژاوە بەردەوام بێت ئەوە شێخ مەحموود باشترین شەڕخواز و پیاوخراپە.

47

28 ی ئەیلوولی 1922

… توركەكان، نەفرەتی خوایان لێبێت، لە خۆئامادەكردندان بۆ ئەوەی ئەمجارەش هێرشێكی تر بكەنە سەر ئاكرێ، كە دەكەوێتە باكووری هەولێرەوە. ئەوان هێزێكی وایان بە دەستەوە نیە بەڵام مەقاشی دەستیان خێڵەكانن كە دەیانجووڵێنن و لە بەر ئەوەی ئێمە تا ئێستا مستەكۆڵەی خۆمان لە گیرفانماندا شاردووەتەوە بۆیە خێڵەكان وا دەزانن توركەكان تاقە لایەنن كە هێزیان بە دەستەوەیە و ئەمەش هۆكاری لەدەستدانی سلێمانی بوو بۆ ئێمە. ئێمە كارێكمان كردووە بەڵام لاى كەمەكەى لە پاش چل و هەشت كاتژمێر ئەنجامى دەردەكەوێت و هێزى ئێمە لە خێراییدایە بەڵام فەرماندەمان كەسێكە كە نازانێ ماناى خێرایى چییە و ئێستاش دەرفەتى ئەوەمان هەیە كە ئەزموونە گەورەكە تاقیبكەینەوە و بگەینە ئەو ئەنجامەى كەوا خێرایى و لەناكاو پەلاماردان دوا حوكم و بڕیار نیە لە تاكتیكدا. لەو ساتەوە كە بە پلەی یەكەم مەبەستمانە گرنگی بدەین بە واتەواتی توركەكان هیچ كەسێكی نیشتمانپەروەرمان نەخستە وەزارەتەوە و تەنها شوێنی وەزیرە كۆنەكانمان ئاڵۆگۆڕ پێكرد. حاڵی حازریش مەلیك ئاڕاستەی خۆی بەرەو ڕۆژئاوا گۆڕیوە و من ئامادە بووم شتی زۆر بكەم لە پێناوی پێكهێنانی وەزارەت لە سەر ویست و خواستی ئەو بەڵام یاسین پشتی كردە ئێمە و ئەویش. ناجی سوەیدیش كە ئەو دەیەوێت، پاش سەرنەكەوتنی لە مەسەلەی یاسیندا، كەسێكی پەسەند نیە لە لای نەقیب و سا ئیتر پەنا بە خوا!

48

8 ی تشرینى یەكەمی 1922

… ڕاوێژێكی تر لەگەڵ مەلیك سەرلەنوێ هاتنی مێجەر نۆئێڵ بوو لە سلێمانییەوە و ئەوەی ئاشكرا كرد كە بارودۆخ لەوێ لە دەستمان دەرچووە. چونكە شێخ مەحموود دەیەوێت ببێتە مەلیك لە كوردستانێكی یەكگرتوودا، ئەگەر ئەم كوردستانە بە مەلیكی بوونی رازی بێت یان نە. بە رێكەوتیش زانیمان كەوا بەشێكی گەورەی رەعییەتەكەی داهاتووی بە هیچ شێوەیەك ئەویان نەدەویست.

دوێنێ مێجەر نۆئێڵ نانی نیوەڕۆی لەگەڵم خوارد و پاشان بە شەودا گەڕایەوە بۆ سلێمانی. ئەم ئەفسەرە باسی بارودۆخێكی زۆر مەترسیداری بۆ كردم كە هەموو شەوێك سەركێشانە ژیانی دەكەوێتە مەترسییەوە. ئەو لە ژوورەكەی مندا دەهات و دەچوو و دیمەنی وای باس دەكرد كە جێی باوەڕ نەبوو و نەدەچووە ئەقڵەوە. هەڵچوونی خەڵك هەموویان بە دڵـگەرمییەكی نیشتمانپەروەرانەوە بۆ پێشوازی كردنی جەردە و ڕێگرێكی نەزان و نەخوێنەوار كە شێخ مەحموودە و لەو رێوڕەسمەدا ئاڵاى نیشتمانیى دەشەكایەوە و سروودى نەتەوەیى و نیشتمانى دنیاى پڕكردبوو. لێرەدا مێجەر نۆئێڵ مەدالیایەكى نیوەمانگى ئاڵتوونى لــە گیرفان دەرهێنا و وتى “ئەمەش باجى  كوردییە و لە بازاڕ دروستیان كردووە و ئەم دانەیەشیان داوە بە من بۆ پارێزگارى”. ئەو بە ئۆتۆمبێل لە نزیكى سەد یاردەوە بە لاى ئەو سەرۆك هۆزەدا گوزەرى كردووە كە دوو كاپتنەكەى ئێمەى كوشت و ئێستا ناحەز و ركابەرى سەرسەختى شێخ مەحموودە. من باوەڕم نیە ئەم مەدالیا ئاڵتوونە یارمەتیى    بدایە و بیپاڕاستایە ئەگەر بهاتایە و كەریمى فەتاح بەگ لەسەرپێ بوایە، چونكە ئەم لە نیوە شەودا بەوێدا تێپەڕیوە. دواجار ئەم خەڵكە مەزبەتەیەكیان بە مێجەر نۆئێڵدا ناردووە بــــۆ خاوەن شكۆ (كۆمیسیاری باڵا) و تێیدا داواكارن و دەستەودامێنمان بوون كەوا پارێزگارییان لێبكەین و هەموو خەرج و مەسرەفێكیشیان دابین بكەین و لە هەمان كاتیشدا ئەوان بە   كەیف و خوایشتی خۆیان هێزەكانی ئیمپراتۆری بەكاربێنن و پارەش بەفیڕۆ بدەن. بەڵێ ئەوان دەوڵەتى كوردییان دەوێ و دەخوازن بەریتانیا پارێزگارییان لێبكات بەڵام ماندێتیش رەتدەكەنەوە. عەبدولكەریمى قادر كەرەم كە یەكێك بوو لە خزمەكانى شێخ مەحموود و ناوبژیى نێوانمانى دەكرد پرسیبووى “باشە ماندێت چیە؟”، كاتێ كە مێجەر نۆئێڵ بۆى باس كردبوو ئەمیش هاوارى كردبوو و وتبووى خۆ رێك ئەوەیە كە ئێمە دەمانەوێت بەڵام وشەى ماندێت رەتدەكرێتەوە و ناو و شۆرەتێكى باشى نیە لاى خەڵك”. تۆ بیهێنە بەرچاوى خۆت ئەم تێكەڵ و پێكەڵییەى چواردە خاڵە كەوا كۆمەڵەى گەلان دەریكردووە بۆ دوورترین قوژبنى دنیا و ئەم دڕندەیى و كێوى خانەیە . دواتر ئەویش گەڕایەوە بۆ لایان و لەگەڵ كۆپییەكی لائیحەی پەیماننامەی لەگەڵ عێراق بردبوو بۆ ئەوەی پێیان بڵێ ئەمە ئەو شتەیە كە دەكرێ پێتان ببەخشین و دەتوانن وەریبگرن یان بیدەنە دواوە و دەترسم ئەمە نائومێدمان بكات.

مێجەر نۆئێڵ لەو جۆرە كەسانەیە كەوا دەست و پێوەندی ناوخۆی هەیە و دڵسۆزترین خەڵكن بۆی و لەپێناویدا خۆیان بەخت دەكەن. ئەو كەسانە تەواوی واتەوات و دەنگوباسی بازاڕی بۆ   دێنن و هەر لە ڕێگەی ئەوانیشەوە ئەو دەنگۆیانە بڵاو دەكاتەوە كە خۆی مەبەستێتی خەڵك باوەڕی پێبكەن. بۆ نموونە ئەوەی پێگەیشتووەتەوە كە سلێمانی پیرۆزبایی لە خۆی دەكات كەوا پیاوێكی ئینگلیزی وەك ئەوی تێدایە، چونكە ئەگەر كار ئاڵۆزیی تێكەوت و ئێمە بیرمان لەوە كردەوە شارەكە بۆردمان بكەین ئەوە دەتوانن ئەو بە بارمتە بگرن. لە بەر ئەوە لە ناو خەڵكدا وای بڵاوكردووەتەوە كە سازشی لەگەڵ حكوومەتی خاوەن شكۆی بەریتانیادا كردووە كەوا ئەگەر شتێكی نالەبار روویدا لە دۆخەكەدا با پشتگوێی بخەن و بایەخی پێنەدەن بەڵام ئەگەر گیانی لەدەستدا ئەوە دەبێ بڕی دە هەزار پاوەن بدەنە كەسوكاری. بەم ڕەنگە خەڵكەكە وازیان هێنا لەوەی بە بارمتە بیگرن و بیكەنە قەڵغانی پارێزگاری لە بۆردمان كردن.

49

24ى تشرینى یەكەمى 1922

… یەكشەممە وەك هەفتانە عادەتم پێوە گرتووە پێش قاوەڵتیی بەیانی و پێش ئەوەی بچمە سەر دەوامەكەم كە لە زستاندا كاتژمێر هەشت و نیو دەستپێدەكات، بە ئەسپسواری پیاسەیەكم كرد. پێداچوونەوەیەكم نووسیوە بۆ كتێبە تازەكەی دوكتۆر ویگرام “كوردستان لانكەی مرۆڤایەتی”. دوێنێ لە ماڵەكەی من ئاهەنگێكی نانخواردنی ئێوارەمان ساز كرد بە ئامادەبوونی مستەر داڤیدسن، كاپتن كڵەیتن، مستەر كۆرنوالیس و خۆم. داماوە مستەر كۆرنوالیس تووشی نەخۆشییەكی سەختی لەرزوتا بوو و ماوەی دوو هەفتە لە جێگەدا خستی.

ڕۆژێكیان لەم هەفتەیەدا خێزانەكەی ساڵح بەگ سەردانێكی كردم بۆ چای خواردنەوە و دوو كوڕی بچووكی خۆی لەگەڵدا بوو، لە كاتێكدا كە منداڵان لە باخچەكەدا یارییان لەگەڵ   ئاژەڵ و باڵدارە ماڵییەكاندا دەكرد وەك (سەگ و سوێسكە و قاز و كۆترەكان) و ئەویش چیرۆك و بەسەرهاتی سەیری ژیانی خۆیی بۆ دەگێڕامەوە و لە نێو ئەو بە سەرهاتانەدا (1) لە تەمەنی حەڤدە ساڵیدا لە ئەستەمبووڵ لەلایەن كۆمیتەی ئیتیحاد و تەرەقییەوە   دەگیرێت و دەخرێتە زیندانەوە، لە بەر دابەشكردنی ڕۆژنامەی “مەشرووتیە”، كە ڕۆژنامەیەكی لیبراڵ بووە و شەریف پاشای باوكی لە پاریس دەریدەكرد. پاشان لەلایەن سەعید حەلیم پاشای خاڵۆیەوە رزگار دەكرێت و بە هۆى پۆستەی “ئۆریانت ئێكسپرێسەوە” دەنێردرێتە پاریس بۆ لای باوكی. (2) لە ساڵی 1913دا لە شوقەكەیاندا لە پاریس بەرەنگاری كابرایەكی زل و كەتەی ئەلبانی بوونەتەوە كە لەلایەن ئیتیحاد و تەرەقییەوە بۆ كوشتنی شەریف پاشا ناردوویانە و پاشان چۆن بینیوێتی ئەلبانییەكە لەلایەن ساڵح بەگی ئامۆزا و مێردیەوە كوژراوە. ئەم خانمە لە سەرى دایكیەوە نەوەی محەمەد عەلیی میسرە و هەموو ئەم چەرمەسەری و بەسەرهاتەی ژیانی بە شتێكی ئاسایی دەزانێ و ژنێكی تا بڵێى جوانە و خوێندنی باڵای تەواو كردووە و لە پاش رووخانی ئیتیحاد و تەرەقی بووە بە ناسیۆنالیستێكی توركی پەڕگر. بەڵام من بە شەخسی باوەڕ ناكەم توركیا هیچ دەرفەت و ئاسۆیەكی هەبێت و مستەفا كەمال، ئەو سەربازەی بەخت بووە بە یاوەری، پێدەچێت وەك دكتاتۆرێكی سەربازی سەربكەوێت و سەرپێ بكەوێت لەگەڵ دەستە و تاقمێكی خۆی لە ئەفسەرانی برسی و دڕندە.

دوێنێ نانی شێوانم لەگەڵ مستەر كۆرنوالیس و خانەوادەی ساڵح بەگدا خوارد.

… لەملاشەوە دەبێ ئەوە بڵێم كەوا من باوەڕ بە چیرۆكەكەی دۆمنوڵ ناكەم كەوا دڵنیایی دراوەتە فەرەنسا گوایە ئێمە مووسڵ دەگێڕینەوە بۆ توركەكان و هەموو بەڵـگەكان كە ئێمە هەمانە (ئێمەش لە ناوخۆداین) بەڵـگە و سەلماندنی پێچەوانەن، لە ماوەی مانگی رابوردوودا، بە هۆى كاری چالاكی فڕۆكەوە، ناوچە كوردییە سنوورییەكانمان لە توركەكان پاككردەوە و لە مەلیكەوە بۆ خوارەوە هەموو دەزانین و لە وڵاتیش (واتە بەریتانیا ـ و) هەر دەزانن كەوا دەوڵەتی عەرەبی نایەتە بوون بە بێ ناوچەكانی باكوور. بەغداش زۆر لە نزیكەوە پشتی بە مووسڵ  بەستووە و بێ مووسڵ پەیماننامەكە بێنرخ دەبێت. با ئەوەش بزانین كە رادەست كردنی هەر شوێنێك بە تورك بە واتای كوشتاری بە كۆمەڵ دێت بۆ كۆمەڵـگەی كریستیان و ئاخۆ لە بیرتە كە بە گوندەكانی كریستیاندا گوزەرمان كرد لە ڕێگەماندا بەرەو هەولێر و دواى لەناوبردنی ئاسوورییە گەڕاوەكانی بۆ وڵاتی خۆیان (بڕوانە پێداچوونەوەكەی سەردەم) كە ئەم شتانە دەبێتە بێرێزی كردنی هەتاهەتاییمان لە ئاسیادا. عیسمەت پاشا دڵنیاكردنەوەیەكی تایبەتی داوینەتێ (كە ئەمەیان ئەوپەڕی نهێنییە) كەوا كەمالییەكان بەنیاز نین داوای گێڕانەوەی خاكی عێراق بكەن و پێموایە زانیارییەكانی من لە هى دۆمنوڵ باشترە.

كاپتن كڵەیتن و نوری پاشا و من لە نانخواردنی نیوەڕۆ لە ماڵەكەی من پێشنازێكی پرشنگدارمان گەڵاڵە كرد كەوا پێویستە ڕێگە بە عێراق بدرێ نوێنەری خۆی بنێرێتە كۆنگرەی ئاشتی (كە ئەمەش ئەوپەڕی نهێنییە) و هەر ئەم دواینیوەڕۆیەش پێشنیازمان كرد بۆ   مەلیك و لەخۆشیاندا راچڵەكی و داواكارییەكە بە شێوەیەكی رەسمی رەوانەی وڵات كرا و (واتە بەریتانیا ـ و) ئەگەر ئەمە رەزامەندیی لە سەر درا ئەوە یەكێتیی خاكى عێراق دەپارێزن.

ئێستا وا پەیماننامەكە  مۆر كرا و مەلیك چووەتە دەرەوە بۆ داكۆكی كردن لە هەر دێڕێكی لە بەرانبەر سادەترین دەم هەڵهێنانەوە بۆ رەخنە لێگرتنی. جاڕدانی لەلایەن خۆیەوە و برووسكەكەی بۆ مەلیك جۆرج بە وردی حاڵەتی دەروونیی ئەو دەردەبڕێت. ئیرادەی ئەنجامدانی هەڵبژاردن دەركرا و تۆمار كردنی دەنگدەران دەستی پێكردووە لەم هەفتەیەدا و نزیكەی شەش هەفتە دەخایەنێت و مەلیك بڕیاری داوە و سوورە لە سەر ئەوەی كە ئەنجومەنێكی نوێنەرانی وا هەڵدەبژێرێت كە رەزامەندیی لە سەر پەیماننامەكە دەربڕێت و پێموایە جێبەجێ دەبێت.

50

1ی تشرینى دووەمی 1922

… هێشتا هەر ئەو ئۆپرا گاڵتەجاڕییە بەردەوامە لە كاركردن لە سلێمانیدا كە شێخ مەحموود نمایشی دەكات، بەڵام بەڵـگەكان وا دەگەیەنن كە لەوانەیە بەم زوانە دەكشێنەوە. بەم دواییە شێخ مەحموود وەزارەتێكی دامەزراندووە كە لە نۆ وەزیر و فەرماندەیەكی گشتی و پشكنەرێكی گشتی بۆ كوردستان پێكدێت. سەرنجم دا كە وەزارەتی داد هێشتا پڕ   نەكراوەتەوە و ئەوان هەموو ئەو چوار لاك و نیو ڕوپیەیان خەرج كردووە كە لە گەنجینەدا بەجێمانهێشت و كەس نیە تەنانەت خەونیش بە كۆكردنەوەی باجەوە ببینێت!

لەو ماوەیەدا سمكۆ بۆ لای ئێمە هەڵات لەگەڵ سەید تەهای پاشكۆیدا، پاش شەڕ و شۆڕێكی خوێناوی لەگەڵ ئێراندا بە ناوی نەتەوەی كوردەوە و ئێرانییەكان شكستیان پێهێنا و ئەمیش خۆی گەیاندە لاى ئێمە بۆ هەولێر. لە بەر ئەوەی سمكۆ ئاڵۆزییەكی دیپلۆماتیك و پەیوەندیى نێودەوڵەتی بۆ بەرپا دەكردین بۆیە پێیڕاگەیەنرا كە لە ئێستادا نەیەتە ناو هەولێرەوە و لە دووریی چەند میلێك لەوێ بمێنێتەوە. بەڵام ئەمان ئامادەن دژ بە توركەكان بجەنگن لە سەر سنوورمان ـ چونكە وەك ئەوان دەڵێن گوایە توركەكان دەسدرێژییان كردووەتە سەر ئازادیی كوردستانی سەربەخۆ! پێموانیە سمكۆ بە چاوی سۆز و پشتگیرییەوە بڕوانێتە داخوازییەكانی شێخ مەحموود و ئەگەر لێبگەڕێین كارەكان ڕێگەی خۆیان بگرن ئەوە ڕەنگە چەقۆیەك یان دوان ڕێگەی خۆیان بدۆزنەوە بۆی و من بە هێمنی و بە وردی دەڕوانمە ئەم ئەگەرە.

ئێستا وەفدێكی كورد بەڕێوەیە بۆ گفتوگۆكردن سەبارەت بە كێشەی كورد لەگەڵ خاوەن فەخامەت كۆمیسیاری باڵا و خاوەن شكۆ جەلالەتی مەلیك. شەمەندەفەر وەفدەكەی بەجێهێشتووە وەك زۆر جار روودەدات، بەڵام ڕەنگە سبەینێ بگات. بێگومان ئەگەر توركەكان نەبن ئەوە مەسەلەى كورد شتێك نیە لە نوكتەیەكى گەورە بەولاوە و ئێمە بۆردمانى خەستى توركەكانمان كردووە، بەڵام ئەوان لە باكوور كۆبوونەتەوە و بۆیە پێموایە ساڵ زۆر دڕەنگە بۆ جموجووڵێكى ڕاستەقینە و كردەیى لە چیاكاندا.

 51

2ی تشرینى دووەمی 1922

… وەفدە كوردییەكە گەیشت و لە چواردە كەس پێكهاتوون لەگەڵ یاوەرانیان و هەموویان چەكدارن. ئەمانە لە ئوتێلێكی بچووك دابەزیون پاش ئەوەی میوانەكانی تریان دەركردووە و پاشان خاوەنی ئۆتێلەكەش لە ترسا ڕایكردووە و لە ژێرزەمینەكەدا خۆی شاردووەتەوە. لەگەڵ ئەوەشدا مێجەر نۆئێڵ دەڵێ كەوا ڕا و بۆچوونی بەجێیان پێیە و ئێوارە روونی دەكەنەوە بۆ سێر پێرسى.

52

10 ى تشرینى دووەمى 1922

… ڕۆژی 6ی ئەم مانگە لەگەڵ كاپتن فڵاكسمان چووینە خوارەوە بۆ سەرای و سەردانی رەشید بەگی موتەسەڕیفمان كرد، كە دۆستی منیشە و یەكێكە لەو كۆمەڵە عەرەبە گەنجانەی هەست دەكەن كەنار خراون لەو كاتەوە كە سێر پێرسى لە مانگی ئابەوە كردەوە چالاكەكانی چێكردووە و زۆر بە تایبەتیش و بێ لێبواردن پیاوماقووڵان لێرە میانڕەون و بە گشتی سیاسەتەكانیان بەدڵ نیە. ئەو هەرگیز نكووڵیی نەكردووە لە پشتگیری كردنی پەیماننامەكە بەوپەڕی دڵـگەرمییەوە، سەرباری فەرمانەكانی مەلیك و بە هەندێ دوور و درێژی باسی ئەوەی بۆ كردم كە چۆن ناسیۆنالیستەكان (بۆ نموونە پەڕگرەكانیان) هەندێ بەڵـگەیان دەویست بۆ پیشاندانی ئەوەی كە بە ڕاستی حكوومەتێكی عەرەبیی سەربەخۆ لە گۆڕێدایە. ئەو هیچ بەڵـگەیەكى تایبەت نەكرد بەو مەسەلەیە بەڵام من وایبۆچووم ئەو مەبەستی یان گۆڕِینێك بوو لە كابینەی وەزاریدا یان گێڕانەوەى دوورخراوەكان بوو، كە ئەمەی دواییان مەحاڵە و هەروەها ناڕەزایی لە سەر ئەوە دەردەبرێ كە ناتوانێ بەرەنگاریی واتەواتی توركیا بێتەوە. لەولاشەوە میانڕەوەكان بە رابەرایەتیی قازیی دۆستی من پێدەچوو زیاد لە ئامادەن بۆ گێڕانەوەی پەیماننامەكە و دژ وەستانەوەی خۆیان بۆ توركەكان رادەگەیەنن ئەگەر هەر دڵنیاییەك وەربگرن كە ئێمە نامانەوێ ئەوان بەجێبێڵین بۆ كەمالییەكان. هەرچۆنێك بێت رەشید بەگ زۆر سەرقاڵ بوو بەو هەواڵەی لە زاخۆوە گەیشتبوو، كە دەكەوێتە ئەوپەڕی سنووری باكوورەوە و ڕۆژی پێشتر قایمقام گەلێ برووسكەی مەترسیداری ناردبوو كەوا هێرشێكی تورك و خێڵەكان لە ئان و ساتدایە و ئەگەر دەسبەجێ سەرباز نەنێرن ئەوە تكا دەكات دەست لە كاركێشانەوەی قبووڵ بكرێت. ئێمە زۆر هەستمان بە نیگەرانی نەكرد چونكە دەمانزانی كەوا كۆڵۆنێڵ دۆبنی پشكنەری گشتیی نوێى لێڤی دوێنێ ئێوارە گەیشتووەتە زاخۆ و ئەگەر هەر شتێكى مەترسیدار لە ئارادا بێت ئەوە برووسكەمان بۆ دەنێرێت. هەرچۆنێك بێت مێجەر موڕەی، مێجەر ویڵسن، كاپتن سڵەیتەر و من بڕیارماندا یەكەی زرێپۆشمان و چەند هێزێكی تر بنێرین بۆ پشتیوانی كردنی قایمقام.

53

19ى تشرینى دووەمى 1922

… لە 7ی ئەم مانگەدا گەشتەكەمان دەست پێكرد (لە زاخۆ  ــ و)، من و مێجەر ویڵسن و مێجەر موڕەی لە ئۆتۆمبێلێكدا بووین و كاپتن سڵاتەر شۆفێریی دەكرد، زەیاش بە جانتا و كەلوپەلەكانمانەوە شوێنمان كەوتبوو. بێگومان ڕۆژێكی خۆش بوو، تاقمەكەی ئێمەش ئاسوودە بووین. لە پاش یەك دوو كاتژمێر گەیشتینە كۆڵۆنێڵ دۆبن، مستەر رێنتن، كۆڵۆنێڵ بێنتینگ و پاسەوانێك و رێپیشاندەرێك. بۆ بێبەختی كۆڵۆنێڵ دۆبن هەواڵێكی ناخۆشی پێبوو كە شەڕ وەستاوەو توركەكان بڕیاریانداوە كەوا خێڵەكان لە هەر كاتێكدا بێت هێرش بكەن و دڵنیابوو كەوا هۆزەكان دوودڵن و بێ فشاری زۆر ناجووڵێن. بەم ڕەنگە ئێمە بەردەوام بووین لە ڕۆیشتن و گەیشتینە ڕێگای زاخۆ كەوا من بە سواریی ئەسپ ساڵی 1909 پێیدا تێپەڕیوم كە زنجیرەیەكی دوور و درێژ گرد و شاخ بوو لای ڕاستمانەوە دوای ئەوە كوتوپڕ پێچدەكاتەوە بۆ دۆڵی زاخۆ. یاڵەكان بە دەوەنی بەڕوو داپۆشرابوون و لە كۆتایی دۆڵەكەوە چەمی خابوور بەرچاو دەكەوت و لە پشتیەوە لووتكەو بەرزاییەكانی چیاكانی كورد چاو دەكران. لێرە دانیشتین و نانی نیوەڕۆمان خوارد و تاقمێك پۆلیس كە قایمقام ناردبووی بۆ چاودێریی كردنی دۆڵ و ڕاڕەوی زاخۆ لە كاتی گەشتەكەماندا ئاگادارییان دەكردین. كەمێك ئەوخوارتریش قایمقام خۆی و داود بەگ و عەبدوڵا ئاغای سەرۆكی هۆزێكی كوردی ئەو ناوچەیە لەگەڵ یاوەرێكی بەهێزی چاودێرییان دەكردین. من لەگەڵ ئەم سەرۆك هۆزە لە بەغدا ئاشناییم پەیدا كردبوو ئەو كاتەی كە هاتبوو بۆ رێوڕەسمی تاج لەسەرنان.

زاخۆ دەكەوێتە دوورگەیەكەوە كە بە لقێكی ڕووباری خابوور دەوردراوە و ئێمە وەستابووین و دەمەتەقێمان دەكرد لە سەر دیواری قەڵا كۆنەكەی دەڕوانێتە سەر ڕووبارەكەدا و دواتر لەگەڵ مێجەر ویڵسن چووین بۆ بینینی ئەو پردە هەڵواسراوەی كە دروستی كردبوو.

دواجار لەگەڵ قایمقام ڕۆیشتین بۆ چای خواردنەوە و لەوێ سەرۆك شارەوانی بردینیە لای ئاغایەكی خەڵكی شڕناخ و تاقمێك سەرۆك هۆز كە لەو شاخە بەرزانەی ئەودیوی خابوورەوە هاتبوون كەوا توركەكان لێیەوە سەرەوكاری جموجووڵ دەكەن دژ بە عێراق. ئاغاكە ژنبرای سەرۆك شارەوانی بوو و من خۆشمدەویست و ئەویش تەماشای ناوچەوانی دەكردیت و بە توندی دەستی دەگوشیت لە تەوقە كردندا. چیرۆكی ئەم پیاوە بەم جۆرە بوو: توركەكان بە هەموو شێوەیەك فشاریان خستبووە سەر كەوا لە پێش كۆنگرەی لوزاندا هێرش بكاتە سەر زاخۆ. ئاغاكانی شڕناخیش بەرهەڵستیی ئەوەیان دەكرد چونكە خەڵكی زاخۆ دۆست و خزمیان بوون و حەزیان نەدەكرد زیانیان پێبگەیەنن. بەڵام توركەكان رازی نەبوون و پێیانوتن ئێوە دەبێ یەكەمجار بڕۆن و دڵنیابن ئێمەش بە دواتاندا دێین و تۆ تەماشای ئەم گەمەیە بكە. جوولەكە دەبێ وا بنوێنێت كەوا پرۆتێست و ناڕەزاییە دژ بە زوڵم و ستەمی بەریتانیەكان. ئەی توركەكان چیبكەن؟ ئەوانیش پەیڕەویی داب و نەریتی سەردەمیانە دەكەن و دەكەونە كارەكەوە بۆ “گێڕانەوەی نیزام”. من سێر پێرسیم ئاگادار كردەوە كەوا ئێمە نابێ ڕێگە بە فێڵ و تەڵەكەی توركەكان كەوا بۆ قازانج و بەرژەوەندیی خۆیان پیلان بگێڕن و دەردی پەندەكە دەڵێ “سەری بۆ من و كلكی بۆ تۆ” ئەوان گرەو ببەنەوە و پێویستیشە پەیامێك بدەینە خالید ئاغاو خزمەكانی شڕناخی و روونی بكەینەوە كەوا ئێمە نامانەوێت بە هیچ جۆرێ ئازاریان بدەین ئەگەر ئەوان ئازاری زاخۆ نەدەن. بەڵام دەبێ ئەوەشیان پێڕابگەیەنین كە ئەگەر هاتن ئەوە باشترین بەخێرهاتنی ئێمە بە شێوەیەك دەبێت هەرگیز نەیانبینیبێت. هەڵبەت ناوبانگی تۆپەكانی ئێمەیان بیستووە و هێزی لێڤی ئامادەیە و ئەو فڕۆكانەش كە پشتیوانییان دەكەن بەشی ئەوە دەكەن بەری تیشكی ڕۆژیان لێبگرن. بۆ نزیكی خۆرئاوا گەیشتینە سەربازگەی لێڤی كە دەكەوتە لاپاڵی چیاكانەوە و ئاڵای بەریتانیای بە سەرەوە دەشەكایەوە. لێڤییەكان هێزێكی ئیمپراتۆرین و بریتین لە 350 ئاسووری و زۆر لەوە دەچێ تۆ لە باقووبە كاتى خۆى ئەمانەت بینیبێت (واتە باوكی ـ و) و ئێمە لە كوشتن رزگارمان كردن و ئێستا پاسەوانیی لە دوا پێگەی دووری ئێمە دەكەن. پاشان هەر كە چووینە سەربازگەكەوە ئەوان بە ڕێزەوە هاتن بۆ سڵاو لێكردنمان، بە جلی خاكی و شۆرتەوە كە جوانترین لاقی خەڵكی شاخاوی دەردەخست، بە شەبقەی پانوپۆڕ و پەڕی سپی یان جەرگیی پێوە و ئەوان بۆ هەموو دنیا وەك گورگەی قەبارە گەورە دەردەكەوتن (سیك و گورگە دوو گرووپى ئەتنیكیی هندى و نیپاڵین و كاتی خۆی لە سوپای بەریتانیدا ڕۆڵی بەرچاویان بووە ـ  وەرگێڕ)، هەڵبەت ئەمانە لە شەڕ و نەبەردیدا قەت قەت پلە نزم و ئایەخ نەبوون و ئەوان ژن و منداڵەكانیان لەگەڵ خۆیان بوون و هەموو لە زنج و كۆڵیتی باش دروستكراودا دەژیان و هەر چوار خێزان و لە خانووچكەیەكدا. ئەوان گوێی نادەنێ و خواردنیان باشترە لەوەی كە لە نێو چیا سەختەكانیاندا گوزەرانیان دەكرد و منداڵەكانیشیان دەڕۆن بۆ قوتابخانە و فێری ئینگلیزی دەبن. پیاوەكانیان تفەنگی چاكیان پێیە و مەشقیان پێكراوە بۆ شەڕكردنی تورك و كورد، ئەگەر پێویست بكات و ئەمان زیاد لە هەر خەڵقندەیەكی بنیادەم گەورەترین مەراقیان شەڕ كردنە.

پاشان ئێمە بە پەلە چووینە سەر ئەو لووتكەیەی ئاڵاكەی لێ چەسپكرابوو بۆ تەماشا كردنی خۆرئاوا بوون. لەوێ، لە دامێنی دۆڵی خابوورەوە و لەو شوێنەدا كە ئاوی خازری تێدەڕژێت، توانیمان ئاخر بنكەی پۆلیسی خۆمان ببینین و لەوبەری خازرەوە یەكەم خانووی پاسەوانیی توركیا  ببینین و زۆر لێكترەوە نزیكبووین.

… لە گەڕانەوەماندا پێچمان كردەوە بە لای گوندی دهۆكدا و لە شیوەكەدا رەتڵێكی ئاسووریمان بینی لە ئامێدییەوە دەهات و بە لاپاڵی چیاكاندا دادەگەڕا. ئەمانە لە ئۆپەراسیۆنی تەمێكردنی هێرشێكی ئەو كوردانەوە ئاڵابوون كەوا بە فیت و تەگبیری توركەكان ئەنجامیاندابوو و كوشتنی چەند گوندنشینێكی كریستیانی لێكەوتبووەوە.

ئێمە رەتڵێكی لێڤیمان كردبووە سەریان و پیاوانی عەشیرەتە دۆستەكانمان كۆكردبووەوە، لە ئاسووری و لە كورد و ئاگریان بەردابووە گوندەكانی هێرشبەران كە لە ناو دووكەڵدا نوقم بووبوون.

لە دهۆك سەردانی قایمقامە كوردە بەتەمەنەكەمان كرد كە پیاوێكی بەڕێز بوو و دەم و چاوی دەتوت هی جووتیارێكی یۆركشایەرە، هەروەها چووینە لاى كاپتن ئەلبانیی یاریدەدەری ڕاوێژكار و پاشان چووینە سەر كانیاوێك لە دامێنی زنجیرە چیاكەی دهۆكەوە و لەوێ لەگەڵ مێجەر ویڵسندا بە چیا و دەوەنە بەڕووەكاندا هەڵكشاین تا گەیشتینە شوێنەواری ریلیفە ئاشوورییەكانی سەدەی نۆیەم و لەوێ لەو پاشا و خواوەندانە ورد دەبووینەوە كە بە شێوەیەكی سەیر سواری ئەو ئاژەڵە كێوییانە بووبوون و یەك بە دوای یەكدا رێچكەیان بەستبوو. پاشان لە چیاكە داگەڕاین و نانی نیوەڕۆمان  خوارد و پێش ئەوەی تاریك دابێت گەیشتینەوە مووسڵ.

بۆ سبەینێ 10ی نۆڤەمبەر، هەینی بوو لەگەڵ ئەوەشدا سەیرم كرد موتەسەڕیف لە فەرمانگەكەیدایە (خانووەكەی مستەر ناڵدەر) و كەمێك لای دانیشتین و دواتر لەگەڵ مێجەر ماكڵین لە ڕووبارەكە پەڕینەوە و بە نێو گرد و تەپۆڵكە شوێنەوارییەكانی نەینەوادا دەسووڕاینەوە. بۆ دواینیوەڕۆ موتەسەڕیف كۆڕ و كۆبوونەوەیەكی هێجگار گەورەی ساز كرد بۆ من و مێجەر موڕەی و لەوێ چاومان كەوت بە هەموو پیاوماقووڵانی مووسڵ. ئەو ئێوارەیە لەگەڵ مێجەر ماكڵین و مێجەر موڕەی و كۆڵۆنێڵ بێنینك شێومان كرد و ئاهەنگێكی تا بڵێی خۆش بوو.

 ڕۆژی شەممە بۆ بەدواداچوونی بەرنامە و پلانەكەم چوومە دەرەوەی شار و تەواوی ڕۆژەكەم لەگەڵ مێجەر ویڵسن بەسەربرد لە دێهاتی نێوان مووسڵ و زابدا (زێی بادینان) و ویڵسن ڕێگاوبان و پردەكانی دەپشكنی. بۆ ئێوارەش موتەسەڕیف بانگهێشتێكی نانخواردنی ساز كردبوو كە تێیدا چاومان بە كاربەدەستانی ناوخۆ  كەوت و كارێكی زۆر باش بوو.

مووسڵ بە شێوەیەكی سروشتی لە ژێر كاریگەریی بارودۆخی توركیادایە و ئەو واتەواتانەی كە ئێمە دەیگێڕینە دواوە بۆ توركەكان شڵەژان و پشێویی زۆر دروست دەكات و كەس ناوێرێ خۆی پابەند بكات بە هیچ دید و بۆچوونێكەوە. لە ناوجەرگەی ئەم هەموو بەند و باوانەدا قازیی خۆڕاگرە و پیاوماقووڵانی سەر بە ئەمیش خۆ دەپارێزن لەم هەموو قسە و باسە بێسەروبەرە.

بۆ ڕۆژی 12ی مانگ بە ئوتۆمبێل لەگەڵ مێجەر ویڵسن ڕۆیشتین بۆ هەولێر و لە سەر زێ نانی نیوەڕۆمان خوارد. نازانم ئاخۆ ئەو هەموو  گرد و یاڵە گەورانەت بیر ماوە لە نێوان ڕووبارەكە و هەولێردا. لای یەكێك لەو گردە گەورانەدا وەستاین و لە جۆگە ئاوێك    پەڕینەوە و بەرەو سەر گردەكە هەڵكشاین. بە عادەت عەرەبەكان لە سەر بەرزایی مردوویان ناشتووە و هەر گۆڕێك لە خشتێكی ئاشووری دیاریكراوەو بەم ڕەنگە تەماشامان دەكرد و یەكێكمان لە باری درێژیی بینی بە نەخشی ئاشووری هەڵكۆڵرابوو، دیار بوو كێلی گۆڕی پاشایەكە و من سەرنجم دەدا كە مێجەر ویڵسن هەمیشە تێبینیی ئەوەی دەكرد كە خشتە ئاشوورییەكان هەر بەو قەبارەیەن و پیاویان تێدا نێژراوە، ئەوجا گۆڕەكەمان هەڵكۆڵی و كێل و نەخشەكەمان بردە خوارەوە و دڵنیا بووین لەوەی هی پیاوە.

بەیانیی ڕۆژی دواترم لای ئەحمەد ئەفەندیی موتەسەڕیفى هەولێر بەسەربرد و قسەم بۆ دەكرد و لەوێش چاوم بە هەندێ پیاوماقووڵ كەوت كە هاتبوون بۆ سەردانم. ئەحمەد ئەفەندی یەكێكە لە پیاوە پایە بەرز و هەڵكەوتووەكانی ئەم وڵاتە و توركمانێكی    هەولێرییە و لە هەوەڵەوە بە دڵسۆزیی لەگەڵ ئێمە كاری كردووە و ئەگەر توركەكان بێنەوە دەبێ ئەو وڵات بەجێبێڵێ. ئەم پیاوە خوێندەوارێكی باشەو رۆشنبیرێكی  تەواوە و كە قسەمان لەگەڵ دەكات وادەزانین یەكێكە لە خۆمان. بێجگە لەوە ناوچەكە لە    قولەمشتیدایە و هەر كاتێ مەسەلەی تورك روون و یەكلا بووەوە و ئەو دەتوانێ بەرەو كەناری سەلامەتی رێنمایی بكات. حاڵی حازر رووداوی بەرچاو پەیدابوونی سمكۆ و سەید تەهایە و سمكۆ سەرۆكێكی خێڵەكیی كوردە كە بۆ سەربەخۆیی كورد شەڕی لەگەڵ ئێران و  توركدا كرد و تیایدا سەرنەكەوت، سەید تەهاش پاشكۆیەتی و كاریگەرییەكی شەخسیی گەورەی هەیە لە رەواندزدا، كە لە ئێستادا توركی تێدایە. ئەوان لە سنوورەوە هەڵاتوون بۆ لای ئێمەو ئامادەن تورك لە ڕەواندز دەرپەڕێنن، ئەو كاتەش ئەگەرى ئەوە هەیە سەید تەها بە حوكمدار بمێنێتەوە و سمكۆش كاتی خۆی تەرخان بكات بۆ ئاشتبوونەوە لەگەڵ ئێرانییەكان و بگەڕێتەوە بۆ وڵاتەكەی خۆی. زۆر باشە رەواندز لە ناو سنووری عێراقدا بێت و مەلیك فرە خۆشحاڵ بوو بەم پێشنیازە. سەید تەها لە بەغدا بوو كاتێ كە من چووبوومە هەولێر و خەریكە دەستە و تاقمێك كورد پێكەوەدەنێ و تۆپ و چەكیش لە سوپای عەرەبی دابین دەكات و پشتیوانیی فڕۆكەش لەلایەن ئێمەوە، بەڵام من زۆر بە گومانم لەوەی هیچی  پێبكرێت و بەڵێنی خۆی بباتە سەر.

ئەحمەد ئەفەندى ئامۆزاى مەلا ئەفەندییە و نازانم ئاخۆ ئەو پیرەمێردە پاك و پوختەت بیرە كە لە دەرەوەی شار دەژی؟ ئەو دواینیوەڕۆیە ئێمە هەموو چووینە سەردانی بۆ ئەوەی چایەكی لەگەڵ بخۆینەوە و ئەمیش وەك ئامۆزاكەی كۆڵەكەیەكی چون پۆڵا بەهێزەو پیاوێكی ڕاست و دۆغرییە. بۆ ڕۆژی دواتر، واتە چواردەی مانگ لەگەڵ مێجەر ویڵسن بە ئۆتۆمبێل چووین بۆ كەركووك و لەوێ لای مستەر ئێدمۆندز مامەوە كەوا جێگری مێجەر مارشاڵی ڕاوێژكارە و ئەمیان لە ئێستادا گەڕاوەتەوە پاش ئەوەی نەشتەرگەرییەكی رژێنى لاملى (گلاندی دەرەقی) كردبوو لە بەغدا و لە خوا بە زیاد بێت چاكبووەتەوە. مستەر ئێدمۆندز و مێجەر نۆئێڵ دەبوو یاوەریی هەڵمەتەكەی سەید تەها بكەن. ئەگەر بیرت بێ ماڵەكەی مستەر ئەدمۆنز لە كەركووك هەمان ماڵە كە تۆی تێدابوویت. سەرۆك شارەوانی و موتەسەڕیف دوو برادەری نزیكمن و یەكەم ئێوارەی گەیشتنم سەریان لێدام و بۆ ڕۆژی دواتر منیش چوومە سەردانیان بێجگە لەوانیش سەردانی سەرۆك ئەسقوفی  كلدانەكان و گەورە مورشیدی ئاینیی ئیسلام، محەمەد عەلیی تاڵەبانیم كرد كە سەرۆكی تەكێی قادرییە. لێرەش رێك هەمان چیرۆكی هەولێرە لە ڕووی نەهێشتنی گومانی تورك و ئەودوای واتەوات و مەسەلەكانی تر. محەمەد ئەفەندیی سەرۆكی شارەوانی بەنیازە ناوچەكە بەتەواوی تێكەڵ بە عێراق بكات و سەبارەت بە پێكهێنانی بەشێك وەك كوردستانێكی سەربەخۆ هیچ گوێیەكی لێناگرن.

ڕۆژی پانزەی نۆڤەمبەر، لە قەرەخانەوە (جەلەولا –  و) سواری قەتار بووم و ڕۆژی 16ی مانگ بێ هیچ رووداوێك گەیشتمە بەغدا، ئەوە نەبێت كە قەتارەكە نزیكەی شەش كاتژمێر دواكەوت و خۆت دەزانی ڕێگەو بانەكانمان چۆنن. هەر كە گەیشتمەوە كەوتم بە سەر قەیرانی سیاسیی وڵاتدا و نەقیب دەستی لە كار كێشابووەوە.

54

5 ی كانوونی دووەمی 1923

… ئەم ئێوارەیە ئاهەنگێكی نانخواردنى خۆشمان ساز كردو مستەر ئێدمۆندزیشم لەگەڵ خۆم بردبوو، كە لە كەركووكەوە هاتبوو و گفتوگۆیەكی بەسوودمان لە سەر بارودۆخی كوردستان كرد. كوردەكان بە درێژایی سنووری ڕۆژهەڵات ئێستا لەو قەناعەتەدان كەوا توركەكان هیچ سوودێكیان نابێ بۆیان و لە ڕاستیدا توركەكان وتوویانە كەوا بیر لە سەربەخۆیی كوردەكان ناكەنەوە. لە بەر ئەوە تاقمەكەی كە وا مەیلیان بە لای بەریتانیەكانەوەیە فشاریان هێناوە بۆ شێخ مەحموود بۆ ئەوەی پەتەكە رابكێشێت (هەڵبەت لە جەژنی لەدایكبوونی عیسادا برووسكەیەكم لە شێخ مەحموودەوە پێگەیشت بە ئیمزای مەلیكی كوردستان ـ مەحموود) كە شتێكی نابەجێ و قێزەون بوو. فەیسەڵ وتبووی كەوا حكوومەتی عێراق پشتیوانی لە بیرۆكەی دامەزراندنی حكوومەتێكی كوردی دەكات كە حوكمی زاتی هەبێت لە چوارچێوەی عێراقدا، بە مەرجێك ئەم داڕشتن و رێكخستنە كارگێڕییە جیابوونەوەی لیوا كوردییەكان لەخۆ نەگرێت لە ڕووی سیاسی و ئابوورییەوە. بەم ڕەنگە كالیدۆسكۆپی كوردی شێوازێكی ئەرێنی زیاتری بە خۆوە بینی بە شێوەیەكی كاتی. ئەمەش تەرتیبێكی گونجاوە چونكە “كۆنگرەی لوزان” ئەگەر شكستی هێنا، چونكە ئەگەری ئەوە هەیە كە شكست بێنێ، ئەودەم بەدڵنیاییەوە دەبێ چاوەڕێی ئەوە بن كە لە باكوورەوە هێرشێك دەكرێتە سەرمان، كەوا لە ئێستادا توركەكان سەربازو كەرەستەی سەربازی ئامادە دەكەن و ئێمەش ئەگەر وەك ئەوانمان كرد كاتێكی زۆرمان دەوێ.

شتەكان بە تەڵخى دێنە بەرچاو، وا پێدەچێت كەوا فەرەنسییەكان، بە نەعلەت بن، بەرەو رێككەوتن بڕۆن لەگەڵ توركەكاندا بۆ ئەوەى گرفتێكى گەورە بۆ ئێمە دروست بكەن كەوا نەتوانین پشتگیریى لە داواكارییە سامناكەكانیان بكەین لە بارەى ئەڵمانیاوە.

55

30 ى كانوونى دووەمى 1923

… هەواڵی گەیشتنی چوار بەتالیۆنی توركی لە جەزیرەی ئیبن عومەری نزیك سنوورەكانمان، ڕۆژی 21ی مانگ گەیشت و ئەوە چەند مانگێكە چاوەڕوانی زیاد كردنی هێز دەكرێت و هەموو نەخشەو پلانەكانی بەرگری، ئەگەر بتوانین ناوی بەرگریی لێبنێین، ئامادەن. سەرلەبەیانیی ڕۆژی سێشەممە چووم بۆ بۆ نمایشێكی هێزەكانی بەریتانیا كەوا ڕۆژی پێنج شەممە دەڕوات بۆ مووسڵ. وەك چۆنایەتی دیمەنێكی زۆر دڵخۆشكەرە ئەگەر بێت و چەندایەتی و ژمارەی چوار هێندە بكرێتەوە و من و سێر هێنری هەردوكمان ڕامان وابوو. ئێمە هەرچیمان هەبوو رەوانەی سەرەوەمان كرد، سوپای عیراق هێڵەكانی پەیوەندیی گرتە دەست و هێزی جەندرمەی غەیرە نیزام رێكدەخات لە نێوان فورات و دیجلەدا، بە سەرپەرشتیی ئەفسەرە عەرەبەكان بۆ پشتیوانی كردنی هێزی سوارەی عێراق كە ئەوانیش بەو ئاڕاستەیەدا ڕۆیشتوون. ئەگەر توركەكان لەشكرێك یان دوانى تر نەنێرنە خوارەوە ئەوە زۆر باشە بۆ ئێمە دەنا بە پێچەوانەوە دەبێت. بێجگە لە   هەڕەشە و گوڕەشەی عیسمەت پاشا ئەوان حەز بە هێرش كردن   ناكەن و بۆچوونی ئەوان ئەوەیە كە لە پێشدا هۆزە ناوخۆییەكان بنێرن و ئەمانیش لای خۆیانەوە ئەوپەڕی دوودڵن كەوا فشار بكەن. ڕۆژی یەكشەممە 28ی مانگ زەید ڕۆیشت بۆ مووسڵ و كاپتن كڵەیتنیشی لەگەڵە و بڕیاری تەواویشی لایە و ئەو بێجگە لەوەی كەوا كوڕێكی ئازیز و ڕەفتار جوانە دڵسۆزییەكی كوێرانەی هەیە بۆ مەلیكی برای. ئەمرۆ خاوەن شكۆ مەلیك بانگی كردم چایەكی لەگەڵ بخۆمەوەو هەرچەندە زۆر ڕووخۆش و بە گفتولفت بوو بەڵام بە سروشتی نیگەران بوو لەوەی ئایا پاش هەموو شتێك ئێمە خۆمان ئامادە كردووە بۆ بەرگری كردن لە وڵات یان مەسەلەكە بەجێبێڵین بۆ ئەم. ئەو پێیوتم كە ئەگەر پێویست بكات ڕاپرسی قبووڵ دەكات بەو مەرجەی ئەو ناوچانەش بگرێتەوە كە بە زۆرینە عەرەبنشینن و ئێستا لە دەستی توركدان، وەك نسێبین و ماردین و لە هەردوو لاوە هێزە چەكدارەكان بكشێنەوە و هێزێكی بێلایەن سەرۆكایەتیی ڕاپرسییەكە بكات. بەڵام داوامان لێدەكات كەوا دەستیشی واڵا بكەین بەوەی كە دەستبەرداری ماندێت بین و پێگەی خۆمان بە تەنها بخەینە سەر پەیماننامەكە. ئەوجا ئەگەر ئەم پێشنیازە قبووڵ نەكرا ئەگەر هێزەكانی بەریتانیا لە مووسڵ كەوتنە مەترسییەوە (لە تۆی ناشارمەوە و بە ڕای من ڕەنگە هەروا بێت) و یان ئێمە پاشەكشەمان كرد و عەرەبەكانمان بەجێهێشت بە تەنها بەرگریی لە خۆیان بكەن، ئەو خۆی دەچێتە سنوور و لە دوا هەڵوێستدا گیانی خۆی بەخت دەكات و منیش بە رۆحی خۆم هیچ شتێك لەوە باشترم ناوێ كە لەگەڵیدا بڕۆم. ئەی ئاخۆ لەوە زیاتر چیبكەم؟ ئەوە حەوت ساڵە لەم ئەركەدام بۆ دامەزراندنی دەوڵەتێكی عەرەبی و ئەگەر شكستمان هێنا ئەوە كەمێك شین و شەپۆڕە بۆ من بە شەخسی و ڕەنگە نەوەكانی داهاتوو تێیدا سەركەوتووبن و باوەڕیشم وایە هەر سەردەكەون. بە هەر حاڵ، با ڕوو وەرچەرخێنین لە چەشنی ئەم ئەگەرە ناخۆشانە، وەك لۆرد بەلفۆر ساڵی 1919 لە ساتەوەختێكدا  وتی و ئێستا بووە بە وتەیەكی بەناوبانگ.

هەڵبەت دۆخی خورۆشاوی زیاتر دەگاتە ئۆفیسەكەی من و خەڵك لێرە و لەوێ زانیاریی وا دەگەیەنن لە بارەى ئەو نامە و نووسراوانەوە كە لە نێوان توركەكان یا بریكارە موجتەهیدەكان و كەمالییەكان و بەلشەفیكەكاندا دێن و دەچن سەبارەت بە فتواكان و  وڕێنە و شتی پڕوپووچی هاوشێوە كە پەیوەندییان بە فەرمانگەی لێكۆڵینەوەی تاوانەوە هەیە.

56

1 ی ئازاری 1923

… لەم ڕۆژانەدا لە ڕەیسز چاوم بە مەلیك و زەید كەوت و زەید كە تازە لە مووسڵ گەڕاوەتەوە كارێكى زۆر باشى لەوێ كردووە و بە تایبەتى هەموو كوردەكانى سنوور كۆمەڵ كۆمەڵ هاتبوونە لاى و دڵسۆزیى خۆیان دووپات كردبووەوە. ڕاستێكەى ئەوەیە كە حكوومەتى عەرەبى شكۆى لەدەستداوە و والییە توركەكە پیاوێكى زۆر بەشكۆترو گەورەتر بوو لە موتەسەڕیفى ئێستاى حكوومەت. ئامادەبوونى شازادەیەك لە بنەماڵەى شاهانە كارێكى زۆر باش بوو بۆ گێڕانەوەى هاوتایى و بێجگە لەوەش ناردنى هێزى ئیزافى بوو بە مایەى دروستكردنى متمانە. پێموایە ئەگەر واز لە زەید بێنن ئەوە لەگەڵ كوردەكانی باكوور دەكەنە رێكخستنێكی دڵخۆشكەر و ئێمە بە ڕوونی لەوە تێناگەین، بەڵام باوەڕیان وا دەبێ كە ئەوە زۆر روونە و جێی رەزامەندییە. ئەو هەڵەیەی كە ئێمە دەیكەین ئەوەیە كە پێدادەگرین لە سەر ئەوەی داوایان لێدەكەین (واتە لە عێراقییەكان) كارەكان وا رێكبخەن بەو شێوەیەی ئێمە دەمانەوێ و ئەمەش بە هیچ جۆرێ گونجاو نیە بۆ ئەوان. كەواتە ئەگەر ناوچەكانى دەوروپشتى مووسڵ و هەولێرى لابێت ئەوە پێمباشە مامەڵە لەگەڵ سلێمانیشدا بكات، كەوا دۆخەكەى لە بارى ئێستادا زۆر خراپ بووە. شێخ مەحموود پەیوەندییەكى نزیكى لەگەڵ توركەكاندا هەیە و لە ئێستادا خەریكە هۆزەكان كۆدەكاتەوە بۆ ئەوەى پەلامارى كەركووك بدەن. بەڵام خۆشبەختانە ژمارەیەكی زۆری خزم و شوێنكەوتووانی لە هۆزەكان لە دژی وەستاونەتەوە. ئەو دوا ئاگاداریى بۆ نێردراوە و ئەمڕۆ ماوەكەى تەواو دەبێ و ترسم لەوە هەیە ئەگەر حكوومەت رادەستی پیاوماقووڵان و ئەشرافی ناوخۆیی نەكات و شاری سلێمانی چۆڵ نەكات وەك فەرمانى پێ كراوە كە دەبێ جێبەجێى بكات، ئەوە ناچار دەبین بۆردمانی بكەین. هەڵبەت جەنگی ئاسمانى زۆر بێبەزەیى و دڵڕەقانەیە، بەڵام كاتێ هێزى زەمینیت تا سەر ئێسقان كەمبووبێتەوە ئەى ئیتر چیبكەیت؟

57

12ى ئازارى 1923

… تازە لە دانیشتنێكی چای خواردنەوە لەگەڵ مەلیك لە باخچەكەیدا هاتمەوە كە تێیدا نزیكەی دوو كاتژمێر گفتوگۆمان كرد و شتەكان پێدەچێت هیوابەخش بن. وا دیارە توركەكان ئاشتییان دەوێت و ئێمەش شێخ مەحموودمان وەدەرنا. هەروەها خۆشبەختانە جانتای نامەی فەرماندە توركەكەی رەواندزمان گرتووە كە ناردوویەتی بۆ بارەگای ئەركان لە جەزیرەی ئیبن عومەر لە سەر ڕووباری دیجلەو رێك ئەودیوی سنوورمان و چەند نامەیەكی شێخ مەحموودی تێدابووە لەلایەن شێخ مەحموودەوە و یەكەمیان تەنها دوای مانگێك لە گەڕانەوەی بۆ سلێمانی نووسرابوو كە بە سوێندەوە بەڵێن دەدات تا مردن لە خزمەتی توركەكاندا دەبێت و ئەوانیتریشی باس لە ئامادە  كردن و سازدانی هێرشێك دەكات بۆ سەر كەركووك و كەواتە ئێمە هەر لە بێشكەدا كۆرپەكەمان خنكاند. شتەكەی تر ئەوەی كە چۆن كەسێك لە شوێن ئەم شەڕخوازە دابنێین. مەلیك و وەزیرەكانی بەرنامە و پلانی خۆیان هەیە و بە هێزی دووبارە بوونەوە ئەوان ناتوانن ئاژاوەیەكی خراپتر بەرپا بكەن لەوەی ئێمە دەیكەین. پێموایە دەسەڵاتدارانم قەناعەت پێكردووە كە بەختی خۆیان تاقی بكەنەوە و ئەمەش گەمەیەكە لە ساڵی رابوردووەوە من كاری بۆ دەكەم و پێمخۆشە و ئەمە هەمووی بە تەواوی تایبەتە و هەرگیز ئاشكرا ناكرێت.

58

12ی نیسانی 1923

… ئەم بەیانییە گفتوگۆیەكی زۆر خۆشم هەبوو لەگەڵ پیاوێكی ئاینیی كوردستاندا كە ناوی شێخ حەسەن بوو. ئەم پیاوە بۆ ڕا و بۆچوون گۆرینەوە هاتبوو لە سەر مەسەلەی كورد. هەرچەندە ڕەنگە مەسەلەكە مایەی پێكەنین بێت كەوا بەم سادەییە بیبیستی بەڵام باوەڕم وایە ئەگەر ڕێگەمان بدەن و لێمانگەڕێن ئەوا من و مەلیك و ئەم پیاوە دەكرێ كێشەكە چارەسەر بكەین لەگەڵ سێر هێنری و مستەر كۆرنواڵیس بۆ ڕاوێژ پێكردنیان و دەتوانین بە شێوەیەك چارەسەری بكەین كە بە دڵی هەموو لایەك بێت.

لە هەمان كاتیشدا مەلیك هەوڵى دەدا پەیوەندی بە زانا شیعەكانەوە بكات (ئەمەیان زۆر نهێنییە)، بە شێوەیەكی هەڵە و بە پێچەوانەی ڕاوێژی باشترین دۆستەكانی بە سەرۆك وەزیرانەكەشیەوە. ئەوان یارییەكەیان باشتر و تۆكمەتر كرد و سەرلەبەیانیی ئەمڕۆ فتوایەك بە مزگەوتی كازمێندا هەڵواسرابوو كەوا بەرگریی لە عێراق دژ بە تورك حەرام  دەكات و بەیانیی زوو كۆپییەكیان لەم فتوایە بۆ هێنام و كێشەكە ئێستا ئەوەیە كەوا حكوومەتی عێراق دەبێ چیبكات. مستەر كۆرنواڵیس وایدەبینێ كە پێویستە ئەو موجتەهیدانەی ئیمزایان لە سەر فتواكە كردووە دەربكرێن بۆ ئێران ـ چونكە ئەوانە هەر هەموویان رەعییەتی ئێرانن، بەڵام بڕیارێكی مەترسیدارە و خۆزگە مەلیك لێگەڕایە و دەستی تێنەخستایە. بە نزیكبوونەوەی رەمەزان و ئەو ورووژاندنە ئاینییەی بەرپای دەكات پێدەچێت ڕۆژانی داهاتوو مەترسیدار بێت.

… توركەكانمان لە سنوورەكانی ڕۆژهەڵاتمان دەركرد و بە تەماین وا لە عەرەبەكان بكەین كەوا لەوێ تەرتیباتی پێویستی خۆیان لەگەڵ كوردەكان بكەن و ئەگەر ئەوە بەدیهات ئەوا لە ڕاستیدا بۆ یەك جاریش بێت چاكەی ئەوە بۆ خۆم دەگێڕمەوە. ئێستا وا دێتە بەر باى گوێمان كەوا بڕیاری ئەنجومەنی وەزیران كاریگەریی پەیماننامەكە بۆ ماوەی چوار ساڵ كارا دەكات و ئەوەی كە ناسروشتییە ئەزموونی دامەزراندنی شتێك بكەین كەوا بەند بێت بە بوون و مانەوەمان لەوێ بە زەبری هێز. ئەمە و بێجگە لەوەش ئێمە شتێكمان نیە لە سەری پێكبێین لەگەڵ سەرۆكە دڕندەكانی كورددا و ئەو بابەتەش كە لە دەستماندایە، وەك جەعفەر عەسكەری دەڵێ “بابەتێكی نەفرەتییە” چونكە ئەوان هەموو پیاوی ئاینیی نیمچە خوێندەوار و نیمچە برسین و دڕندەن و هەر یەكەیان بە ئەندازەى ڕقى لە شەیتان ڕقیە لەویتر، كەواتە ئیتر چۆن دەتوانین دەوڵەتێكی كوردی دامەزرێنین؟!

59

9ى مایسى 1923

… هەفتەی رابردوو تێكڕا پڕ لە ورووژان و مشتومڕ بوو، لەوانە كێشەیەكی گەرمی پڕ لە   بێنە و بەرە وەك چۆن دەزگاكانی حكوومەت لە رەواندز دامەزرێنین كەوا تازە گرتوومانەتەوە. سێر هێنری و فەرماندەى هێزى ئاسمانى دید و بۆچونیان یەكە و بەڵام مێجەر بۆردیللۆن، حكوومەتی عێراق، مستەر كۆرنوالیس و من بە توندی ئەویتر پەسەند دەكەین. دواجار لە یەكشەممەی 30 نیساندا سێر هێنرى مێجەر بۆردیللۆن و مستەر كۆرنوالیسى بە فڕۆكە نارد بۆ گەڵاڵە كردنی ڕاو بۆچوون لە سەر  زەوی و راپۆرت و ڕاوێژكاری لە سەر بەرنامە و پلانێك دەستەبەر بكات. ئەو ڕۆژەی ئەوان سەفەریان كرد بایەكى توند هەڵیكردبوو، هەڵبەت فڕینیش بە سەر چیا كوردییەكاندا و بە هۆی لە كاركەوتنی ئامێری بێتەلەوە زۆر ترسناكە و ئێمە تا سێشەممە هەواڵی گەیشتنیانمان نەزانی. من زۆر نیگەران بووم و لەوەش زیاتر كە زانیم رەواندز  بێتەڵی كردووە بۆ كەركووك بۆ ئەوەی ئاگاداریان بكەنەوە كە نەیەن بۆ رەواندز لە بەر نالەباریى كەش و هەوا. پاشان زنجیرەیەك پێشهات ڕوویاندا و ئەوان هاتن بۆ ڕاوێژ كردن و وەرگرتنى بیروڕاو ئەمەش لەلایەن حكوومەتی عێراق و مستەر كۆرنوالیس و منەوە لەئەستۆ گیرابوو بەڵام مێجەر بۆردیللۆن لە دژی وەستایەوە. ڕۆژی دووشەممەش هەموو بەرنامەكەیان بە ورد و درشتی ناردەوە بەڵام فڕۆكەكە ڕێگەی ونكردبوو و ئێمەش تا ڕۆژی چوارشەممە هیچ نامەیەكمان پێنەگەیشت و دواجار نەك نامەكانی دووشەممە بەڵكو هەندێكی تریان سێشەممە نارد. هەرچۆنێك بێت بە مانەوە و بە هەندێ برووسكەوە توانیمان زۆر بە ئاسانی حوكم لە سەر ئەوە بدەین كە ڕاوێژیان تێدا كرد و پاشان ئاخۆ باوەڕی پێدەكەیت و سێر هێنرى ڕای وایە ئەوان هەڵەن و ڕاوێژیان بە كەس نەكردووە بەڵكو كاندیدی خۆیان ناردووە بۆ ئەوەی وەك قایمقام دابمەزرێت، كەوا كەسێكی ڕووخۆشە بە ناوی سەید تەها و هەموو خەڵكی ناوچەكە لە دژی ئەوەن! من ماوەی كاتژمێرێك قسەم بۆ كرد و هەموو بەڵـگە و پاساوێكم دایە بەڵام بێئەنجام بوو. پاشان ڕۆیشتم بۆ وەزارەتی ناوخۆ و نامەكەی مستەر كۆرنوالیسم بۆ خوێندنەوە كە ناردبووی. دواینیوەڕۆ كۆنفرانسێك دەبەسترێ و من دەیانبینم یان تەلەفۆنیان بۆ دەكەم لە بارەی نامە تایبەتیەكەوە كە ئەو بەیانیە بە فڕۆكە لە مستەر كۆرنوالیسەوە پێمگەیشتووە و بێگومان سێر هێنریشم لێئاگادار كردووەتەوە. بەشداربووانی كۆنفرانسەكە هەموو قەناعەتیان بەوە بوو كە مێجەر بۆردیللۆن و مستەر كۆرنوالیس ڕاستن. من خۆم نەڕۆیشتم بۆ كۆنفرانسەكە و تا كاتژمێر پێنج لە ئۆفیس مامەوە، پاشان كە كۆنفرانسەكە تەواو بوو هەموو هاتن بۆ لام و هەموویان، بە دوو وەزیرە عەرەبەكەشەوە زۆر پەست بوون و خۆشم دەزانم كە هەردوو هاوكارەكەم لە رەواندز زۆر بێزار و بێتاقەتن و ئاگاداریان كردم كە شەممە دەگەڕێنەوە.

لە پاش گەڕانەوەیان لە كاتێكدا مێجەر بۆردیللۆن چوو بۆ لای سێر هێنرى من لەگەڵ مستەر كۆرنوالیس نانی نیوەڕۆم خوارد و تەواوی چیرۆكەكەی بۆ گێڕامەوە هەردوكیان تووشی نیشتنەوە بوون بە ناچاری و هەر یەكە فڕۆكەیەكیان پێبووە. مێجەر بۆردیللۆن پێنج میل لە دووریی كەركووك نیشتووەتەوە و بە پێیان ڕۆیشتووە بەڵام مستەر كۆرنوالیس لە دووریی بیست میل نیشتووەتەوە و شەوی لە ژێر فڕۆكەكەدا بەسەربردووە.

بە هەر حاڵ ئەوە كۆتایی هەڵچوونەكان بوو بەڵام هەردوكیان بە تەواوی بێز لەوە دەكەنەوە كە ئەم راوەبەرازەیان پێكراوە وەك پەندەكە دەڵێ. من باوەڕ ناكەم سەید تەها بەردەوام بێت و ئەوەش زۆر گرنگ نیە چونكە خەڵكەكە هەر خۆیان دەریدەكەن و ئێمەش بادەدەینەوە سەر بەرنامەیەكی تر، بەڵام لە خوت و خۆڕایی دوو مانگی ئێمە بە فیڕۆ چوو لەگەڵ خەم و ئازارێكی باشدا كە دەبوو خۆمانی لێ بپارێزین.

60

16 ى تەمووزى 1923

… بۆ دواجار وا خەریكین سلێمانی دەگرینەوە و دوو فەوجی هێزی سوارەی عێراق، كە بە زۆری كوردن بە ڕێگەوەن بەرەو ئەوێ و ڕاو بۆچوونی زێڕینی فەرماندەی هێزی ئاسمانییان بەدەستهێناوە. ئێمە ڕێ لە ئۆپۆزسیۆن ناگرین لە هەر چەشنێك بن و خەڵك لێرە نەخۆشی دوو ساڵی پاشاگەردانی و بەرەڵایی بندەستی شێخ مەحموودن و بەپەرۆشن بێنە ژێر ڕکێفی ئیدارەیەكی باش و لێوەشاوەوە. كارێكی زۆر دڵخۆشكەرە كە وا هێزی سوارەی عێراق وا بە چاكی ئەركی خۆیان ئەنجام بدەن و ئەمە كاری خۆیانە لەئەستۆیان گرتووە و دەبێ هەرواشبێت.

61

29ى تشرینى دووەمى 1923

… كارەكان بە جۆرێك بەڕێوە دەچن و ئەوەندە باشن كە تا ڕادەیەك ئەقڵ نایبڕێت. نوێنەرێكی گەورەی شیعە و تەواوی پیاوماقووڵانی شیعەی بەغدا و كازمێن سەردانی مەلیكیان كردووەو پێیان راگەیاندووە كەوا كۆمەڵـگەی شیعە بە هەڵەی خۆیاندا چوونەتەوە و ئێستا دەخوازن پشتی پەیماننامەكە و پەیوەندیی لەگەڵ بەریتانیادا  بگرن و لە ناو ئەوانەدا پیاوانێك هەبوون كە پار ساڵ گیرابوون و دوورخرابوونەوە بۆ هەنجام لە قەیرانی پاش لێڤییەكانی مەلیكدا. موحسین شەلەشى وەزیرە شیعەكەی دارایی، دوێنێ بەیانی پەیامێكی تایبەتی بۆ ناردم كە بیدەم بە سێر هێنرى و پێی بڵێم كەوا ئەو، واتە موحسین، ئامادەیە دەست بخاتە ناو دەستمان و “یەكەم” ئەركی پەسەند كردنی پەیماننامەكە و رێككەوتنە لاوەكییەكانی وەك خۆیان. شتێكی خۆشی تر ڕوویداوە و با نهێنی بێت هێزی ئاسمانیی شاهانە پۆستەیەكی زۆر گرنگی كۆمەڵە نامەیەكی گرتووە لە موجتەهیدەكانی ئێرانەوە بۆ بریكارەكانیان لێرە و تێیاندا هاتووە كە خاوەن شكۆی مەلیك بەڵێنی داوە كەوا كابینەكەی موحسین سەعدوون  بڕووخێنێ و وەزرارەتێكی شیعە و سەرۆك وەزیرانێكی شیعە دابنێت، كە نزیك بێت لە موجتەهیدەكان و پەیماننامەكە رەتبكاتەوە. ئەوان باوەڕیان بە بەڵێنەكانی نەكردووە و فتوایەكیان دەركردووە بە قەدەغە كردنی كشانەوە لە هەڵبژاردنەكان لە سەر بنەمای ئەوەی كە خاوەن شكۆ ئەو بەڵێنانە جێبەجێ دەكات. ئەمەش بۆ ئەوەی پیشانی بدرێت بەڵام بڵاو نەكرێتەوە تا ئەو كاتەی ئەو كاری خۆی دەكات. ئێمە نازانین ئەوان چۆن متمانەیان بە پۆستە هەبوو چونكە پێشتر نامە و پەیامیان بە دەست ئاڵوگۆڕ كردووە و ئێمە پاش گەیشتنیان لەلایەن پۆلیسەوە پێماندەزانین، بەڵام هیچ كاتێ نەماندەخستە لای خۆمان و لە پاش ڕاوێژی دوور و درێژ بڕیارماندا كەوا سێر هێنرى بیانباتە لای خاوەن شكۆ بۆ بڕیاردان لە سەری.

… دواجار شێخ مەحموود كە هێشتا خەریكی بەرپاكردنی ئاژاوە و پشێوی بوو لە سلێمانی كۆتایی پێهات، هەموو شوێنكەوتووانیشی خەریكە وازی لێدەهێنن و پشتی تێدەكەن و دوا داواكاریی بۆ ئێمە ئەوەیە كە دەتوانێت خزمەتمان بكات بە هاندانی خێڵە كوردەكانی ئێران بۆ راگەیاندنی داواكردنیان بۆ ماندێتی بەریتانیا و ئێمەش بە تەواوی رەتمانكردەوە و لە هەمان كاتدا مەسەلەكەمان گەیاندە حكوومەتی ئێرانی و بەم پێیە ئێمە كارمان بۆ شێخ مەحموود كردووە بەو ئاڕاستەیە ئەگەر ئەو بخوازێت كار بكات.

62

31ی كانوونی یەكەمی 1923

… پێموایە هیچ دەرچوون و سەیرانێكمان لە عێراقدا لەمەی ئەمجارە خۆشتر و كەیفسازتر نەبوو، هەرچەندە سێر هێنرى پێی ناخۆش بوو لە بەر ناچاریی مانەوەی لە بەغدا بە هۆی هەندێ ئەركی كۆمەڵایەتییەوە. بە شێوەیەكی گشتی شتێكی تایبەت و ئەوتۆی سەرنجڕاكێش رووی نەداوە ئەمە نەبێت: دواجار بیروڕای لە سەر ئەوە گیرسایەوە كە بۆردمانی شێخ مەحموود بكات لە سلێمانی، چونكە ئەم كابرایە سەرقاڵی پیلانگێڕان بوو لەگەڵ توركەكان (دژ بە ئێمە) و ناو بە ناو ئەو كارەشی تێكەڵ بە هەندێ نمایش دەكرد بۆ ڕاكێشانی كوردەكانی ئێران بە لای حكوومەتی بەریتانیادا. بەم ڕەنگە مارشاڵی فڕۆكەوانى لە ڕۆژی جەژنی لەدایكبووندا كارەكەی بەوپەڕی نهێنییەوە لەئەستۆ گرت و بە فڕۆكە لە بەرزیی تەنها سەد و پەنجا پێ لە زەوییەوە بە سەر سلێمانیدا سووڕایەوە و لە نێو ماڵەكانی تردا ماڵەكەی شێخ مەحموودی دەسنیشان كرد و پاشان ژمارەیەكی زۆر بۆمبى بە سەردا بەردایەوە و بە مژدەوە گەڕایەوە بۆ بەغدا كەوا كۆتایی بە ژیانی ئەم كابرا شەڕخوازە هێناوە. بەڵام بۆ ڕۆژی دواتر برووسكەیەك لە شێخ مەحموودەوە گەیشت و تێیدا دەڵێ كەوا لەوپەڕی تەندروستی و لەشساغیدایە و لەوە تێناگات كە ئێمە بۆچی سلێمانیمان بۆمباران كردووە.

63

6 ی شوباتی 1924

… هەفتەى پێشوو بیرم چوو لە بارەى چەند كەسێكى بەڕێزەوە ئاگادارت بكەمەوە و ڕۆژێكیان لە كاتێكدا دەچوومە ژوورەوە بۆ لای وەزیری ناوخۆ بە مەبەستی گفتوگۆ كردن و بە ڕێكەوت لە ژووری چاوەڕوانی پیاوێكم بینی و دەسبەجێ هاوارم لێكرد “بابەكر ئاغا!”، ئەمە ئەو پیاوە بوو كە گەورەترین مێزەری كوردیی دەبەستە سەرەوە و چاوی چەپی بە گرانترین فەقیانەی سپی دادەپۆشی و بەم ڕەنگە ناسیمەوە. ئەم پیاوە بەناوبانگترین پیاوانی سەر سنوورە كە لە خۆشی و ناخۆشیدا لە كێشەكانی شێخ مەحموودا لەگەڵ ئێمەدا بوو. ئەوجا لە بەر ئەوەی روخساری من زۆر ئاشكرا و بە دەرەوە نەبوو نەیناسیمەوە و ئەو سڵاو لێكردنە گەرمەی منی بە زمانی فارسی پێ كوتوپڕ بوو بەڵام لەگەڵ ئەوەشدا بە ماریفەتێكی جوانی وەرگرت. كاتێ لە لای وەزیر هاتمە دەرەوە، ئەو زانیاریی لە بارەمەوە وەرگرتبوو و ئەوەی كە پێیبەخشیم لەوە باشتر و زیاتر بوو كە من پێشتر پێمدابوو. ئەو بە سروشتی خۆی پێشتر نەدەهات بۆ ئێرە و هیچكام لە ئەندامانی بنەماڵەكەی بابەكر ئاغا لە ڕۆژگاری توركدا نەدەهاتن بۆ بەغدا و ئەگەر هەندێكیشیان هاتبن ئەوە ئێستا كەسیان لە ژیاندا نەماون. یەك لە سیفەتەكانی ئەم پیاوە ئەوە بوو كە بە هەموو جۆرێك رەتیدەكردەوە كە سەرسام بێت بە هەر شتێك – بۆ نموونە بەغدا. بە هەر حاڵ بەغدا شارێكى پڕ لە قوڕ و قوڕاو بوو و ئەو شوێنى جوانترى لە چیاكانی كورددا دەبینی. ئەی سینەما؟ بێگومان ئەم شتانە رەشەخەڵكەكە پێی سەرسامن، بەڵام وامبیستووە كەوا جارێكیان لە سینەمادا خەریكبووە لە سەر لۆجەكەی بەربێتەوە لە تاو پێكەنین بە چەند دیمەنێكی دزی و گیرفان بڕین و بە كەیف و خۆشحاڵییەوە وتوویەتی “خۆ ئەمانە هەموو دزن”. بێگومان دواتر هەستی بە هیچ شتێكی سەیر و سەمەرە نەدەكرد و پیاوێكی لەگەڵ خۆی هێنابوو بە ناوی حاجى شێخ عارفی سەرگەڵوو كە سەیدێك بوو لە پلەیەكی بەرزی پاكیدا و زۆر بە كەمی خواردن یان خواردنەوەیەكی ئەم وڵاتە حاڵ و بار نادیارەى دەخوارد لە ترسی ئەوەی پاك نەبێت و خەریكبوو لە برسا دەمرد. بەڵام جارێكیان بۆ رمبازێنی ئەسپ (ڕەیسز)یان بردبوو و لە كاتی نوێژی نیوەڕۆدا نوێژی خۆی لە سەر پلە پلانەكان دابەستبوو ـ ئەم پیاوانە لەو جۆرە كەسانە بوون كە من بە ڕاستى خۆشمدەویستن.

 64

17 ى نیسانى 1924

… سێر هێنرى تازە لە مووسڵ گەڕاوەتەوە و من بە پەرۆشەوەم بۆ ئەوەی بانگم بكات. ئێمە ئێستا لە سلێمانی لە شەڕداین بە عادەت و من هەوڵ دەدەم قەناعەتی پێبكەم (واتە بە سێر هێنرى ـ و) كە ئەم  ئاژاوە و پشێوییە لە كۆڵی هەموومان بكاتەوە.

65

21ى نیسانى 1924

… ئەو بەیانییە كەس نەهات بۆ بینینى من بەڵام یەكێك لە كوردەكان هات بۆ بینینی كاپتن هۆڵتی سكرتێری خاوەن شكۆ (كە بە كوردی قسەی دەكرد) و پێیوتم كەوا كوردەكان بێزار بوون لە تەواوی ورووژان و هەڵچوون و دەیانەوێت پەیماننامەكە بە یەكجاری تێپەڕێت و كاری پێبكرێت.

66

29 ى نیسانى 1924

… ئەمڕۆ نوری پاشا و ئیلتید هاتنە لام و پێكەوە نانی نیوەڕۆمان خوارد و گفتوگۆمان لە سەر  پڕۆژە و بەرنامەكەی من كرد كە لە سەر ئەو بناغەیە داڕێژرابوو كە ناكرێ كەسێك لە پۆستێكی باڵادا دابنێیت و متمانەت پێ نەبێت. گفتوگۆكە زۆر قەناعەتبەخش بوو، پاشان داود بەگی حەیدەری، كە یەكێك لە نوێنەرانی كوردی ئەنجومەنە (ئەنجومەنی نوێنەران  ــ و) و پێیوتم كەوا هەر هەژدە كوردەكە هەڵوێستیان یەكە لە پشتگیری كردنی پەیماننامەكەدا.

67

21 ى مایسى 1924

… بیرم چوو شتێكت لە بارەی مەسەلەی ئاسوورییەكانەوە لە كەركووك بۆ بنووسم. ئەوە ڕەنگە لە هەر شوێن و هەر كاتێكدا ڕووبدات وەك دەمەقڕە و شەڕێكی ناو بازاڕ وایە، بەڵام دوو ڕاستی هەن دەبێ ئاماژەیان پێبدرێت، (ئە) مەسەلەكە لە نێوان موسڵمان و مەسیحییەكاندا بوو، (بێ) هەڵـگەڕانەوە و یاخیبوونی بەتالیۆنێكی لێڤی مەسەلەكەی شەڵەژاند و ناشیرینی كرد. ئەمەش هەموو شەڕخواز و خراپەكارێك گوێقوڵاخ دەكاتەوە.

شێخ مەحموود ئێستا سەرقاڵە بە وەعز و ئامۆژگاری دانەوە بۆ جیهاد و شاری سلێمانی ئێستا لەبارە بۆ بۆردمان كردن بەڵام پێشتر هۆشداریی دراوە بە دانیشتووانی بۆ ئەوەی چۆڵی بكەن. فەرماندەی هێزی ئاسمانی، كە من زۆر زۆر خۆشمدەوێت دەڵێ “ئامادەم لە سلێمانیدا بۆمبارانی هەر شتێك بكەم كە لە چوار پێ بەرزتر بێت” و ئەم پیاوە زۆر وردە و ئەقڵی بە هەموو شتێك دەشكێت و یەك لە تێبینییە راگوزەكانی ئەوەیە كەوا “هەرگیز نابێت ساتێكی تەمەڵی و بێزاربوونت لە عێراقدا ببێت”.

68

28 ى مایسى 1924

باوكی ئازیزم، دوانامەت كە لە 14ى مایسدا ناردبووت زۆر مایەی خۆشی و ئاسوودەییم بوو، نازانم ئەگەر مستەر تۆماست ناسیبێت و ئەو ئێستا نەخۆشە و هەموو ئەو شتانەی كە بە چارڵست وت زۆر ڕاستن تەنها یەك خاڵ نەبێت ئەویش كەركووكە كە لە پار ساڵەوە لە ژێر ڕکێفی سەرۆكە جێمتمانە و بەڕێزە ناوخۆییەكەدایە و (ئێستا پێیدەوترێ موتەسەڕیف) كە ئێستا باشترین و ئارامترین بەشی عێراقە. كەركووك گەلێ ئیمتیازی تایبەتی خۆی هەیە وەك زمانی لۆكاڵیی خۆی و كاربەدەستی خۆوڵاتی و لەم بارودۆخەی تەواو قایلە ببێتە بەشێك لە عێراق بۆ ئەوەی سوودد و قازانجی پەیماننامەیەك بەدەستبێنێ لەگەڵ ئێمەدا و بە پێچەوانەوە هەرگیز نەبووە بەشێك لە عێراق. هەڵبەت هیچ رووداوێكی تێدا نەدەبوو ئەگەر بهاتایە و هێزە بەریتانییەكان یان هندییەكان لێرە بوونایە، بەڵام نەكرا لێرەیان دابنێین و ئەمەشیان كێشەیە و كەركووكلییەكان هەمیشە داوای دەكەن. ئێستاش باسێكی لێڤیت بۆ دەكەم و ئەمانە زۆر سەیر و بەرەڵان و ئەوە پلانێكی لە ڕادەبەدەر خراپە كەوا بكەیت هێزێكت لە كریستیانەكان هەبێت و هێزێك لە موسڵمانەكان، هەرچەندە ئەمان كەمێك ئەهوەنترن، لە ژێر سەرپەرشتیی ئەفسەرە بەریتانیەكاندا. ئەوانە بە شێوەیەكی رەها دەبنە ناحەز و دوژمنی دانیشتووان و ئێرەیی نێوان ئەمان و سوپای عێراق و حكوومەت زۆر گەروەیە، ئەمانە كەش و فشی ئەوە دەكەن كەوا بوون بە سەربازی بەریتانی و عەرەب و كوردی پیس نین و ئێمەش بە ناچاری و فشاری دۆخەكە لەم كێشەیەوە تێگلاوین.  ساڵی 1920 و كاتێ لە دوای یاخیبوونەكە ئێمە كوتوپڕ بەرەوڕووی كشانەوەی هێزەكانی بەریتانیا بووینەوە، دەبوو لێڤییەكان بەكاربێنین بۆ پاسەوانی كردنی هێڵی شەمەندەفەر و ئەو دەمە ژمارەیان زۆر بوو و نەمانتوانی بیانخەینە ناو سوپای عێراقەوە لە بەر كۆمەڵێك هۆكار و پاساو، كە لە نێوانیاندا، نەبوونی پارەی پێویست بوو بیاندەینێ. ئەوان بارێكی گران بوون بە سەر باری دارایی بەریتانیاوە و گەنجینە نەیدەتوانی لەڕووی یاساییەوە كاری بۆ بكات و بە هیچ شێوەیەك نەیدەتوانی یارمەتیی هێزە ناوخۆییەكانی خەڵكی خۆوڵاتی بدات كە لە ژێر سەرپەرشتیی ئەفسەرە بەریتانییەكاندا نەبوون، بۆیە گەیشتینە ڕێگەیەكی داخراو و دەبوو پەنا بەرینە بەر ئەو لێڤییانە كە لە ژێر سەرپەرشتیی ئەفسەرانی بەریتانیدا بوون و لەو كاتەدا ژمارەیەكی كەمی ئاسوورییەكانمان هەبوو بەم جۆرە بن و دواتر هەڕەشەی توركیا هاتە پێشەوە لە شوباتی 1923دا و ئێمە دوو بەتالیۆنی زیادەمان بە سەرباز گرت و بە تایبەتى بۆ پاسكردنی سنوور، هەر كە هێزەكانمان بە شێوەیەكی بەرچاو هاتنە كەمی ئەمانە ناونووس كران و مەشقیان پێكرا بۆ ئەوەی جێگەیان  بگرنەوە و ئەم لێڤییانە بێ جیاكاریی لە لیواكانی باكووردا بەكاردەهێنران و بێ جیاوازی كردن بەگشتی دوودڵی و نیگەرانییەك هەبوو لە بەكارهێنانی هێزە كریستیانەكان لە شارە موسڵمان نشینەكاندا، بەڵام لە ژمارە كەمییەكی ئاوهای هێزەكاندا تا ڕادەیەك ئەم مەسەلەیە پەیرەوی نەدەكرا و بوونیان لە كەركووك لەم سۆنگەیەوە بوو، هەروەها وا ڕێكەوتبوو كە بەتالیۆنەكەی ئەوێ لە هۆزە كێوییەكانی ئاسوورییەكان ناونووس كرابوو بەڵام ئەفسەرەكانیان بە تەواوی  جێمتمانە و ڕەفتار جوان بوون. شەڕێكی لەناكاو دروست بوو و كوتوپڕیش گۆڕا بە هات و هاوار دژ بە موسڵمانان و دیسپلین و توندوتۆڵیی سەربازی بابردی و ئەوەی ڕوویدا ڕوویدا. بۆ بەدبەختی ئەوە بوو كە بۆ ڕۆژی دواتر وا بڕیار درابوو كە ئەم بەتالیۆنە ئاسوورییە بنێردرێتە دەرەوەی كەركووك بۆ گوندی چەمچەماڵی سەر ڕێگەی سلێمانی و نیوەیان ڕۆژی پێشتر ڕۆیشتبوون و وا ئێستا هەموویان لەوێن. بە ڕای من، كە ئەمە تەنها ڕایەكی تایبەتییە، كەوا لە پاشەڕۆژدا دەكرێ ئاسوورییەكان تەنها لە ناوچەكانی خۆیان خزمەت بكەن و پاسەوانیی سنوورەكانی خۆیان بكەن، كە لە هەمان كاتدا سنووری عێراقیشە و ئەودواشیان دەبێ بڵاوەیان پێبكرێت و بەهیوام لە كاتێ خۆیدا بەشێكیان لە سوپای عێراقدا دابمەزرێن. هەڵبەت ئەوان لە ناو پۆلیسی عێراقدا بە قەناعەتەوە لە ژێر ڕکێفی ئەفسەرانی عێراقیدا كار دەكەن و من پێمخۆشە ئەم مەسەلەیە بۆ چارڵس روونبكەیتەوە.

هێزە خۆوڵاتییە تایبەتیەكانی لەم چەشنە هەمیشە ئەگەری سەرچاوەی مەترسین، بە تایبەتى ئەگەر ئاینەكەشیان جیاواز بێت. بە بۆچوونی من حكوومەتی بەریتانیا دەبوو بە شێوەیەكى ڕاست ئەم هێزە دروست بكات و بە ستراتیجێك كە پارە لە خزمەتی سوپای عێراقدا خەرج بكات، كە مەشقیان بەریتانییە و بەڵام ئەفسەرانیان عێراقین، بە هەر حاڵ ئەم پڕۆژە خرابووە بەر باس و ڕەتكرابووەوە.

ئێمە دوێنێ و ئەمڕۆ كاری خۆمان دژ بە شاری سلێمانی جێبەجێ   كرد و شێخ مەحموود دەرفەتی رووداوەكەی كەركووكی قۆستەوە بۆ جاڕدانی جیهاد و كاری لەم چەشنە دەبوو دەسبەجێ بوەستێنرێ. تۆ بڕوانە ئەو هۆزە كێوییانەی مامەڵەیان لەگەڵ دەكەیت، موسڵمان و مەسیحیی دانیشتووانی شارەكە (واتە كەركووك  ـ و) هۆشدارییەكی توندیان درایە و بەو پێیە ئاواتەخوازین زیانی گیانی كەم بێت یان هەر نەبێت. ئەوان تەنها زۆر نیگەرانی ئەوەن بۆ دەركردنی شێخ مەحموود و دوای ئەوەش نەهێڵن بگەڕێتە دواوە و بێگومان ئەو لە ئێستادا هەڵاتووە بۆ چیاكان. هەڵبەت تێدەگەیت كەوا هێزی تەواومان نیە بۆ جێگیر  كردن و پاڕاستنی شوێنێكی دووری وەك سلێمانی. فەوجێكی سوارە ئامادە كراوە كە بە زۆری لە كوردەكان پێكدێت و نێردراوە بۆ كەركووك. دواجار من باوەڕم وایە كە سوپای عێراق لە توانایدا دەبێت سلێمانی بگرێت، بەڵام لە حاڵی حازردا تاقە چەك كە هەمانبێت فڕۆكەیە.

با ئەوەشمان لا روونبێت كە ئەگەر سەرچاوەكانمان هێندە لاواز نەبوایە ئەوە هۆكاری تر دەبوو بۆ پاڕاستنی وڵات، بەڵام سەبارەت بە توركەكان و كۆكردنەوەی هێزەكانیان لە سەر سنووری باكوور ئەوە دەبێ لە بەرانبەردا تا لە توانادا بێت سوپای عێراق لە ناوچەی مووسڵ كۆبكرێتەوە و پێگەی بەهێز بكرێت.

69

11 ى حوزێرانى 1924

… ڕۆژی یەكشەممە عەلی سڵێمان ڕاستەوخۆ دوای قاوەڵتیی بەیانی هاتە لام بۆ هەندێك باس و ئامۆژگاری، من پێموت هێشتا وای بیر لێدەكەمەوە كە دەبێ ئەوان كۆششی خۆیان بكەن بۆ متمانە بەخشین بە پەیماننامەكە و ئەگەر وا نەكەن ئەوە بیر و بۆچوونێك لەلایەن نوێنەرە كوردەكانەوە گەڵاڵە كراوە بۆ ڕێگرتن لە ڕەتكردنەوەی و دەنگدان بۆ دواخستنی تاوەكو مەسەلەی مووسڵ چارەسەر دەكرێت. بێگومان ئەوەش بە واتای هەڵوەشانەوەی ئەنجومەنی نوێنەران دێت و گریمانەی كۆنترۆڵ كردنی تەواوی دەبێت لەلایەن نەیارانەوە، بەڵام من ئەوەم بە عەلی نەوت.

… هەموو نوێنەرانی عەمارە دەنگیان داوە بە پەیماننامەكە و هەروەها ئەوانی بەسرەش بەڵام پارێزەرێك و كوردەكان هەڵوێستیان توندە و نوێنەرانی هەولێر نەبێت كەوا ئیمزایان لە سەر چارەسەرێك كردووە كە ڕێگەیان پێنادات دەنگی پێ نەدەن و هەموو ئەوانی مووسڵیش، سێ كەسی لێدەرچێت. پێویستە ئەوەشت پێبڵێم كەوا هەموو ناسیۆنالیستە دەستەمۆكانی مەلیك كە ساڵی 1920 لە دژمان یاخیبوون و ساڵی 1922 چوونە پاڵ هاندەرانی دژە ماندێت، لە دژی دەنگیان داوە. ئەمەش دەرسێكی چاك بوو بۆ مەلیك،   یاسین و ناجی سوەیدی لە دژی دەنگیان داوە، بەڵام رەوف چادرچی و عەلی سڵێمان و عەجیل دەنگیان پێداوە و عەجیل پێشتر لۆبییەكی زۆر باشی بۆ  كرد و من خۆشحاڵم بەوەی عەجیل تا كۆتایی رێك و ڕاست ڕۆیشت.

… شێخ و وەزیرانی لایەنگری پەیماننامەكە زۆر شانازیی دەكەن و خۆیان هەڵدەكێشن و كوردەكانی سلێمانیش، كە یەك لەوان براكەی شێخ مەحموودە، زۆر خۆشحاڵیی خۆیان دەردەبڕی و هەقی خۆشیانە چونكە هەرگیز ئەم دۆخەیان بە خۆیانەوە نەبینیوە.

70

30ى تەمووزی 1924

… مەلیك ئێستا باشترە بەڵام هەر لاوازە و وازى لە بیرۆكەى چوون بۆ فەلەستین هێناوە و حاڵى حازر بیر لە گەشتێك دەكاتەوە بۆ شوێنێك لە باكوورى دهۆكەوە، بەڵام هەندێك پێیانوابوو كە بۆ مەلاریا خراپە. ڕاستێكەى من بیرم دێتەوە یەكەم ساڵ كە پەنابەرە ئاسوورییەكان لەو شوێنەدا نیشتەجێ كران زۆربەیان نەخۆش كەوتن و وەك مێش لێیان دەمرد. ئەوجا لە پاش پرسیار و سۆراخ كردن ئەڵتەناتیڤەكە بوو بە شەقڵاوە كە دەكەوێتە نێوان هەولێر و رەواندزەوە و وەك بۆیان باس كردووم شوێنێكى خۆش و دڵـگیرە و هەڵبەت داواى لێكردم منیش لەگەڵى بچم بەڵام ناتوانم و ئەوەندە بێتاقەتم خەریكە بگریم و ڕەنگە یەكەمجار بێت لە ژیانمدا واملێهاتبێت.

كێشەی سلێمانی ئێستا لە دۆخێكی زۆر باشدایە و پێموایە شێخ مەحموود شكستی هێنا و دواجار هەڵات بۆ دەرەوەی وڵات. سوارەی عێراقی بێ هیچ بەرگرییەك چوونە ناو سلێمانییەوە و شێخ مەحموود نزیكەی دوو سەد سواری لەگەڵدایە و هەڵاتووە بۆ چیاكانى دەوروپشت، بەڵام چەند تفەنگچییەك لە پیاوەكانی هەموو شەوێك شارەكە بەر دەسڕێژی گوللە دەدەن و تەنگیان بە هێزی سوارە هەڵچنیوە و نایەڵن بە شەودا   بخەون و بە ڕۆژیش پاسەوانی دەكەن، بەڵام كاری باش ئەنجامدەدەن و ئەمانە هەواڵی باشن دەیبیستین و لە ئێستادا شوێنكەوتووانى شێخ مەحموود لێیدەتەكێنەوە و هەڵدێن و دەستە دەستە دێنەوە و چەك و جبەخانەى كزبووە و وا چاوەڕوان دەكەم كە ڕێگەی باكوورى بەرەو توركیا گرتبێتەبەر و ڕەنگە بەم زوانە بگاتە ئەوێ. هەڵبەت لەو چیا سەختانەدا زەحمەتە كەسێك دەسگیر بكرێت و ئەمەش لە دیدو بۆچوونی ئێمەوە بە شێوەیەكی گشتی باشترین كارە كە ئەو بیكات، یان ئەوەیە كە خۆی بمرێت، چونكە تۆ بە هیچ شێوەیەك نازانی چیبكەیت لە پیاوێكی لەم چەشنە كاتێ كە دەسگیری دەكەیت و پاشان بە داواكاری و مەزبەتە تەنگت پێهەڵدەچنن بۆ بەردانی و تەنانەت ئەوانەش كە ڕقیان لێیەتی لە ترسا لەگەڵ ئەوانیتر داواكارى و عەرزەوحاڵەكان ئیمزا دەكەن بۆ ئەوەی ئازاریان نەدات ئەگەر ڕۆژێك هات و بەربدرێت بە هۆی بەشدار نەبوونیان لە پێشكەش كردنی داواكاریی بەردانیدا.

71

30ى ئەیلوولی 1924

… ئێوارەی ئەو ڕۆژەی كە لۆرد تۆمسن گەیشت (واتە پێنجشەممە) ئێوارە ئاهەنگێكی ڕەسمی لە “موقیمییەتدا” سازدرا و دەسبەجێ سڵاوی لێكردم و پاش نانخواردنی ئێوارەش زۆر بە رووخۆشی و ئەوپەڕی نێوان خۆشیی كۆمەڵایەتییەوە كەوتە گفتوگۆ كردن لەگەڵم. بۆ ڕۆژی دواتر مەلیك بانگهێشتی كردم بۆ چاى خواردنەوە و بۆ ئەوەی وەرگێڕانی بۆ بكەم، بەڵام ژمارەیەك لە وەزیرەكان لەوێ بوون و لە بەر ئەوە گفتوگۆكە تەنها شتێكی رووكەش بوو و هیچیتر. بۆ ڕۆژی شەممە لۆرد تۆمسن  بە فڕۆكە چوو بۆ مووسڵ پاشان ڕۆژی یەكشەممە بە سەر سنوورەكانی ڕۆژهەڵاتدا فڕی و سەری لە هەولێر و كەركووكیشداو شەوێكیشی لە كەركووك بەسەربرد و بۆ ڕۆژی دووشەممە بە فڕۆكە ڕۆیشت بۆ سلێمانی و ماوەی دوو كاتژمێری تێدا مایەوە و پاشان گەڕایەوە بۆ بەغدا و نانی نیوەڕۆی لە موقیمییەتدا خوارد. ئاخۆ ئەمە سەرسوڕهێن نیە؟ بۆ ئێوارەش بانگهێشتێكی تایبەتی نانخواردن لە كۆشكی شاهانە سازكرا و ئاهەنگێكی هێجگار خۆش و كەیفساز بوو، پاشان لە باخچەكەدا مەلیك كەوتە گفتوگۆ لەگەڵ لۆرددا و وەرگێڕی نێوانیان ساسۆن ئەفەندی بوو و مستەر هێنری پێیوتم كەوا لۆرد تۆمسن لە دۆخێكی زۆر خۆشحاڵیدا بووە و هەروەها باسی ئەوەش دەكات كە لە سلێمانی پێشوازییەكی زۆر گەورە كراوە و سەرۆكە كوردەكان هەموو هاتوون بۆ سڵاو   لێكردنی و سەدان كەس لە شوێنكەوتووانیان لەگەڵدا بووە بە چەك و خەنجەر و دەمانچە و ڕەزنە فیشەكەوە و مەوكیبى پێشوازییەكە هێند درێژ بووە كەوا ئەمسەر و ئەوسەری لێكیداوەو لێرەدا كێشەیەكی قورسی كێ لەو سەرۆكانە پێش ئەویتر بكەوێ دروستبووە! و لۆرد تۆمسن دەگێڕێتەوە كە لەوێ هەستێكی وای لا دروستبووە كە ئیمپراتۆرێكی بچووكە لە ئیمپراتۆرەكانی رۆمان و ئەم بەیانییە بە فڕۆكە سەفەرى كرد و دۆعاخوازیى لێكردین.

… مەلیك پارچە زەوییەكی لە نزیك خانەقین كڕیوە (گوندی عەلیاوا ــ وەرگێڕ) و ئەمڕۆ داوای لێكردم پێكەوە بە ئۆتۆمبیل بچین بۆ ئەوێ چونكە دەیەوێت شوێنێك هەڵبژێرێت بۆ دروستكردنی كۆشكێك لە كاتی راودا تێیدا بحەوێتەوە، بەڵام من لەگەڵ سێر هێنریدا وام ڕێكخست بە شەمەندەفەری شەو بڕۆین و بۆ كاتژمێر شەشی بەیانی بگەینە ئەوێ و ڕۆژەكە لەگەڵ خاوەن شكۆدا بەسەربەرین و پاشان بە شەمەندەفەرەی شەوی داهاتوو بگەڕێینەوە و بەیانیی پێنجشەممە لە لە ئۆفیس دەوام بكەین و مەلیك ئێستا لەوێ لە خێوەتدا دابەزیوە. ئەمڕۆ بۆ یەكەمجارە لە دواى مانگێك باى شەماڵ لە باكوورەوە هەڵیكردووە و پێدەچێت لەمەودوا كەشوهەوا بەرەو فێنكیى بڕوات، ئەگەرچى ئێستا مانگى ئەیلوولە و دنیا هێشتا هەر زۆر گەرمە.

… هێشتا شەڕوشۆڕمان لە باكوور هەر بەردەوامە، بەڵام توركەكان بایەخی خۆیان لە كوشتاری ئاسوورییەكاندا چڕكردووەتەوە و ئەوان (واتە ئاسوورییەكان) پاش پەرتوبڵاوییەكی بەكۆمەڵی كوتوپڕ لە سەرەتاوە خۆیان گرتەوە و كەوتنە بەرگری كردن. لەگەڵ ئەوەشدا هەموو گوندەكانی ئەوپەڕی باكوور سووتێنران و شەش هەزار پەنابەرمان لا كۆبووەتەوە لە ئامێدی. باشە ئەمە كارێكی لە سنوور بەدەر و سامناك نیە كەوا ئێمە جارێكی تر بكەوینەوە ئەنجامدانی هەموو قۆناخەكانی فریاكەوتن و دووبارە نیشتەجێ كردنەوە. ئەوان بەمدواییە سەرلەنوێ گوندەكانیان ئاوەدانكردەوە كەچى دووبارە ماڵوێران بوونەوە.

72

15 ی تشرینى یەكەمی 1924

 … بەڵام سەبارەت بە جەنگ و شەڕوشۆڕ لای ئَێمە ئەوە ئێوە وەك ئێمەی لێدەزانن و ڕەنگە زیاتریش. ئێستا دەزانین كەوا توركەكان ڕاڤەی زاراوەی “دۆخی ئێستا ــ الوضع الراهن” یان هەواڵەی كۆمەڵەی گەلان كردووە و ئەمە باشترە و پێموانیە شەڕیان بوێت، چونكە لە بارودۆخێكی ناسكدان لەگەڵ كوردەكانی لای خۆیاندا و باشترین بەشی كەتیبەیەكیان هەڵـگەڕایەوە و لە ساتەوەختی ناردنیاندا بۆ وڵاتی ئاسوورییەكان هەڵاتن و ئەفسەرەكانیان حاڵی حازر لە مووسڵن. ئەوەی تێبینی دەكرێ بزووتنەوەی كورد كەوا قۆناخی باشی بڕیوە لە ڕەوتی خۆیدا، هەرچەندە من باوەڕم وایە كە ئەم بزووتنەوەیە هیچی تێدا بەستە نیە و بیرۆكەی بوونی كوردستانێكی سەربەخۆ بیرۆكەیەكی تەواو خەیاڵییە، بەڵام دەتوانێت تا ڕادەیەكی باش توركەكان سەرقاڵ بكات. ئێمە باوەڕمان بە لای ئەوەدا دەچێت كەوا هێرش كردنە سەر ئاسوورییەكان ڕەنگە بەو نیاز و ئارەزووەی حكوومەتی تورك بێت بۆ ئەوەی بیرو ئەندێشەی كوردەكان بە ئاڕاستەی تردا ببات و ئەگەر مەسەلەكە وابێت ئەوە پێدەچێت ئەو پلانە سەركەوتنێكی ئەوتۆى بە دەست نەهێنابێت.

73

18ى شوباتى 1925

… هەواڵەكان لە باكوورەوە دڵخۆشكەرن و ڕاستیەكەی هەولێر زۆر باش ڕەفتاری كردووە و كەركووكیش لەو باشتر بوو كە چاوەڕوانی بووین و وەك دەزانیت ژمارەیەكی باشی توركمان لەوێ هەن و پێمانوابوو رێژەیەكی گەورەیان داوا دەكەن بگەڕێنەوە بۆ توركیا، بەڵام كەمێكیان ئەوەیان كرد. وەرگێڕە هۆڵەندییەكە، وەك چاوەڕێم دەكرد، تەواو بێتوانا بوو لە وەرگێڕانی زمانی ئاسایی هەر زمانێكدا و تەنانەت كوردیش! ئێمە بیستوومانە كەوا “پسپۆڕانی” زمانی توركی تادێت گرژ و مۆنتر دەبن.

هەرچۆنێك بێت ئێمە ئێستا لە گەرمەی قەیرانێكی وەزاریداین لە سەر مەسەلەی ئیمتیازی كۆمپانیای نەوتی توركی. پێموایە لە بارەى ئەم كۆمپانیاوە باسم بۆ كردوویت و ئەمە كۆمپانیایەكی ئێنتەرناشناڵ و بەریتانی و فەرەنسی و ئەمریكییە و گرووپێكی زۆر گەورەیە و هێند قەبە و بەتوانایە كە دەتوانێت سەرمایەى زەبەلاحی پێویست پەیدا بكات بۆ بە بۆریی ڕاكێشانی نەوت بە ناو دەریای ناوەڕاستدا. لە دیدی ئێمەوە مەسەلەی گەورە ئەوەیە كەوا گەشە كردنی وڵات دەبێ دەستپێبكات و سەرمایەی دەرەكیش پەرەبسێنێت. بەشداریی   فەرەنسا و ویلایەتە یەكگرتووەكانی ئەمریكا پارێزگارییەكی ئیزافییەو ئێمە پێمان خۆشە و باوەشی بۆ دەكەینەوە. بەڵام هەڵچوون و دنەدانێكی گەوجانە و نەزانانە سەری هەڵداوە و بە شێوەیەكى سەرەكی لەلایەن كەسانی دەرەوەی حوكم و وەك كوتەكێك بەكاریدێنن بۆ هاندانی گشت كۆمپانیاكانی تر تا وەكو ڕێگەیان پێبدرێت بۆ كێبەركێ و بەدەستهێنانی ئیمتیاز ئەگەر هەل و مەرجی باشتر پێشكەش بكەن و ئەنجامەكەشی وادەبێت كە ئەوان تا ڕادەیەك هەر مەرجێك پێشكەش بكەن بە لای خۆیانەوە گونجاو بێت كە دواجار بیفرۆشنەوە بە كۆمپانیای نەوتی توركی وەك سێر جیم. كادمان بۆی دەچێت. ئەمەش دواخستنی دوو سێ ساڵ و ناهاوتایی ئابووریی گشتی دەگەیەنێت. مەلیك كارێكی زۆر گران دەكات بۆ ئەوەی كابینەكە ڕاستیی مەسەلەكەی بۆ دەربكەوێت بەڵام سیان لە وەزیرەكان هێشتا هەر هەڕەشەی دەست لە كار كێشانەوە دەكەن و بە سێر هێنرییان وتووە كەوا ئەوان مەترسییەكان لە پێشەوە دەبینن ئەگەر كۆمپانیای نەوتی توركییان رەتكردەوە، بەڵام متمانەیان بە حكوومەتی خاوەن شكۆیە (واتە بەریتانیا ـ و) بۆ دەرباز كردنیان لەم هەرا و ئاژاوەیەی تێیكەوتوون و بەم پێیە داوا كراوە لە حكوومەتی خاوەن شكۆ دیدو بۆچوونی خۆی لە بەهێزترین تێرمدا بە برووسكەیەك رەوانە بكات.

74

4ى ئازارى 1925

… ڕۆژی شەممە، دوو كەسی ئەمەریكی، كە لە خانووی موقیمییەتدا ماونەتەوە، لەگەڵ خۆم بردمن و هەندێ دیمەنی شارم پیشاندان و پاشان سەردانی مەلیكیان كرد. یەك لەمانە ملیۆنێرەو ناوی كراڤاسە و ئەویتر پارێزەرێكی هەڵكەوتووە و ناوی ویلیامزە. تۆ قەت ناوی ئەم مستەر كراڤاسەت بیستووە؟ ئەمە ملیۆنێرێكی ناودار نیە و سەر بە پارتی كۆمارییە و دۆستی پەرلەمانی خۆمان و ویڵسنە و سپرینگی و ڕەنگە بڵێم هەموو كەس دەناسێت و پیاوێكی كەتەی سەر ماش و برنج و پڕە لە زانیاری. ئەو پرسیاری پڕوپووچ ناكات لە سەر سوننی و شیعە چونكە هەموو شتێكیان لەبارەوە دەزانێت، بەڵام ئەو پرسیارانەی كە دەیكات هەموویان بایەخدارو سەرنجڕاكێشن و من زۆر پێی ئاسوودەم، مستەر ویلیامزیش پیاوێكی خۆش مەشرەبە بەڵام من زۆر قسەی لەگەڵ ناكەم. مستەر كراڤاس وەك باوكێك لەگەڵ مەلیكدا دەدوا لە بارەى ئیمیتازاتی نیشتمانییەوە و سەرۆك وەزیرانیش لەوێ بوو و ئەو بە شەخسی زۆر سەری لە مەسەلەی نەوت دەرناچێت بەڵام وەك هەموو كەسێك دەزانێت كەوا نەوت بۆ عێراق بایەخێكی بەرچاوی هەیە و كارێكی گرنگە ئەگەر ئەم گرووپە نێودەوڵەتییە گەورەیەی كۆمپانیای نەوتی توركی رابكێشێتە وڵاتەوە. ئەم خاڵە كـــــــۆمیسیاری بـــاڵا (المندوب السامـــی) زۆر جەختی لـە سەر دەكات و دەكاتەوە بەڵام كابینەی وەزارەت هێشتا هەر دوودڵە و ئەوان بیرۆكەیەكی گەوجانەیان كەوا پێویست دەكات نەوتی مووسڵ بە پارچە پارچە دابەش بكرێت بە سەر ژمارەیەكی زۆر كۆمپانیای بچووكدا بۆ هاندانی كێبەركێ و دابەزاندنی نرخی نەوت. بێگومان مەسەلەكە زۆر گەورەیە و پێویست بە راكێشانی بۆرییە نەوتێك دەكات بۆ سەر دەریای ناوەڕاست بەم ڕەنگە هیچ لایەك ناتوانێ بچێتە ژێری و تەنها گرووپی گەورەی كۆمپانیاكان دێنە پێشەوە و دەرەنجام كۆمپانیا بچووكەكان پاش   زیان و كات بەفێڕۆدان ناچارن پشكی خۆیان بفرۆشنە هەندێ لە گرووپی زەبەلاحی وەك كۆمپانیای نەوتی توركی. پێدەچێت یاسین پاشا خۆی ئامادە كردبێت بۆ هەڵوێست وەرگرتن لە چەند وەزیرێكی هاوكاری، ئەگەر بتوانێت ئاڵۆگۆڕیان پێبكات، كە پێموایە دەتوانێت و چاپەمەنیی نیشتمانیش دەستیان كردووە بە قسە و باس و ئەمەش ئاماژەیەكی باشە.

… كۆمیسیۆنی نەخشەكێشانی سنوور بێجگە لە تێلاكی، كە تەندروستیی تەواو نەبوو، ڕۆیشت بۆ سلێمانی و لەوێ حوكمێكی كۆدەنگی چاكی بەدەستهێنا لە بەرژەوەندیی عێراق. شێخ مەحموود لەم پرۆسەیەدا بەشدار نەبوو لە بەر ئەوەی هەڵاتبوو و ئاودیوی سنوور بووبوو بۆ ئێران. كۆمیسیۆن لە ئێستادا بەرەو شارۆچكەكانی سنووری باكوور دەچێت بۆ تەواوكردنی ئەو كار و ئەركەی پێی سپێردراوە.

75

22 ى نیسانى 1925

… پێناچێت شتەكان زۆر دڵخۆشكەر بن چونكە كۆبوونەوەیەكی سەربازیی گەورەی تورك لە ئارادایە كە بە ناو بۆ كۆتایی پێهێنانی یاخیبوونی كوردە، كە پێدەچێت ئەنجامدرابێت، بەڵام وا دیارە بۆچوونێكی بۆ ترساندنی ئێمە و عیرَاقە كاتێ كە كۆمەڵەی گەلان دەگاتە بڕیاری خۆی. ئەمەش هاوشانە لەگەڵ واتەواتێكی بەربڵاو لەم وڵاتەدا كەوا كاریگەرییەكی زۆری هەیە. سەردانی كۆمیسیۆن لە خۆیدا پاڵنەر و هۆكارە بۆ بێ یاسایی. كاتێ كە ژمارەیەك لە جێنتڵمانی بەساڵاچووی ئەوروپایی دێنە ئەم ناوە و بە ڕێز و شكۆیەكی زۆر گەورەوە پرسیارت لێدەكەن ئاخۆ تۆ حكوومەتەكەی خۆت   خۆشدەوێت و ئاخۆ حكوومەتێكی ترت پێ باشتر نیە و تۆ بە شێوەیەكى سروشتی دەكەویتە بیركردنەوەی ئەوەی كە ڕا و بۆچوونت بەهایەكی گەورەی هەیە.

… با جارێكی تر بێینەوە لاى سلێمانی. شێخ مەحموود سەری بەرز كردووەتەوە پاش ئەوەی كردبووی بە خۆڵدا كاتێ كەوا لیژنەی سنوور ڕۆیشتبووە ئەوێ و یەكدەنگیی دژە توركیای بەدەستهێنابوو. ئەمە بەشێكی واتەواتە و بەشێكیشی قورسایی كۆنی كۆنترۆڵ كردنی باندەكانی چەتەیە لەلایەن هێزە نیزامییەكانەوە. من دوێنێ لە كەركووك بووم و دواتر بۆت باس دەكەم و زۆرم پێناخۆشە ئەوەی كە بیستم، ئەم شتانە دەبێ دەسبەجێ و زۆر بەپەلە مامەڵەی لەگەڵ بكەیت كە پێموانیە بەمجۆرە مامەڵەمان كردبێت، كە بەشێكی بە هۆى ئەوەوە بووە كەوا خاوەن شكۆ پلانی گەشتێكی هەبوو بۆ چیا سنوورییەكانی باكوور و ویستی بڕیار دوابخات تا خۆی دەچێتە كەركووك و ئەوەش تا 2ی مایس رێكناكەوێت. لە ئێستادا ئاژاوە و پشێوی لە سلێمانیدا زیادی كردووە و ئاواتەخوازین كپ بكرێتەوە و مەترسیی كەمتر بێت لەوەی كە چاوەڕێی لێدەكرێت.

… مەلیك داوای لێكردم دوو ڕۆژێكی پپشووی جەژنی ڕەمەزان لەگەڵی بچم بۆ باخەكەی لە نزیك خانەقین و خاوەن شكۆ نیازیە دواینیوەڕۆی هەینی بڕوات و ڕەنگە ئەوان پێنجشەممە مانگ ببینن و پێموایە بڕۆم باشە.

76

29 ى نیسانى 1925

… دوێنێ بەیانی لە كاتژمێر حەوتدا و پاش قاوەڵتیی بەیانی خاوەن شكۆ جەلالەتی مەلیك (كە بە عادەت بەیانیان زوو لە خەو هەڵدەستێ) و من و ئیلتید و كڵەیتن بە تەكسییەكی شەق و شڕ (باوەجوو زیاتر خەتای ڕێگەكە بوو) چووین بۆ خانەقین بە مەبەستی سەردانی پارچە مڵكێك لەوێ كە مەلیك بەنیازە خانووە بچكۆلەیەكی لە سەر دروست بكات. شوێنەكە زۆر جوان بوو و لە سەر گردێك و چوار میل لە ڕۆژئاوای خانەقینەوە بوو، جۆگە ئاو بە بنی گردەكەدا ڕێیدەكرد و دیمەنێكی دڵڕفێنی بەرزاییەكانی ئێران، كە زنجیرە بە دوای زنجیرە شاخدا درێژ بووبۆوە.

ئێمە لە ژێر خێوەتێكی كراوەدا دانیشتین، كە یەكێك لە بریكارەكانی خاوەن شكۆ تێیدا دەژیا و پیاوێكی خەڵكى سوریا بوو بە ناوی ئەحمەد مرێوید و پێموایە دانی بەوەدا ناوە كە پاسەوانێكی كوشتووە و پاش شوێنگۆڕكێیەكی زۆر لێرە گیرساوەتەوە و مەلیكیش دوور لە سوریا لێرە داڵدەی داوە. پاشان من و ئیلتید پیاسەیەكمان كرد و بۆ ڕۆژی دواتریش سەرلەبەیانییەكەی جەی. ئێم. ویڵسن گەیشت و هەموو دڵخۆش بووین كە لە گەرمای بەغدا رزگارمان بووە. بانگهێشتەكە لە ماڵەوە بوو بۆ نانخواردنی نیوەڕۆ و مەلیك زۆر لە دۆخەكە ڕازی بوو وەك خانەخۆییەكی رووسوور و تا پەڕی ئەوپەڕ وێڵ و ماریفەتی نواند و من دواتر زانیم كە نەیانهێشتووە زەیا (خزمەتكارەكەی میس بێڵ ـ و) پارەی تكتی قەتار بدات و هەمووی لە سەر خۆیان بووە. بۆ سبەی بەیانیی لە پاش قاوەڵتیی كردن گەشتێكمان بەو دەشت و مێرگە پڕ گوڵ و گوڵزارەدا كرد بۆ پردەكەی سەر ئەڵوەند، واتە ڕووباری  خانەقین و لەوێ بە قەراخ ڕووبارەكەدا هەر دەهاتین و دەچووین و مشتومڕمان بوو لە سەر دروستكردنی ڕێگای سەرەكیی ناو مڵكەكە. لە پاش پەڕینەوە بەرەو رۆخی ئەوبەر جووتیارانمان دەبینی ڕاوەماسی دەكەن. لێرە لە چەمی دیالە “سیروان”دا ڕاوە بەرازێكی زۆر خۆشمان كرد، كەوا  كوڕ و كاڵ و سەگەل شوێنیان كەوتبوون و پاشان مەلیكی خاوەن شكۆ بە تفەنگی پۆلیسێك تەقەی لێكرد.

… هێشتا سێر هێنرى هەر خەریكی گەشت كردنە و هێشتا شێخ مەحموود هەر بێزاركەر و هۆكاری نائارامی و ناجێگیریی ئاسایشە، لە كاتێكدا كە وەزیرەكان هەر خەریكی ناكۆكیی ناوخۆیانن و پێموانیە ئەم وەزارەتە ماوەیەكی دوور و درێژ بەردەوام بێت لە حوكمدا.

بەرهەمە چاپكراوەكانى وەرگێڕ    

1. جینوَساید لە عێراقدا .. پەلامارى ئەنفال بوَ سەر كورد.

وەرگێڕان لە ئینگلیزییەوە (چاپى یەكەم 1999 بە ناوى خوازراوى سیامەندى موفتى زادەوە، 600 لاپەڕە ، ناوەندى چاپەمەنیى خاك ـ سلێمانى.  چاپى دووەم 2004 ، 460 لاپەڕە، خانەى وەرگێڕان ـ  سلێمانى). چاپى سێهەم 2013، دەزگاى رۆشنبیریى جەمال عیرفان، سلێمانى، 470 لاپەڕە. چاپى فارسى (نسل كشى در عیراق، هجوم أنفال بە كردها) لە دەقە كوردییەكەیەوە لە لایەن (رشید حیدرى)یەوە وەرگێڕراوە، ساڵى 2014 ، دەزگاى رۆشنبیریى جەمال عیرفان چاپى كردووە، 500 لاپەڕە.

2. ڕۆمانى كیژى كاپیتان، نووسینى:  ئەلێكساندەر پووشكین، وەرگێڕان لە ئینگلیزییەوە، چاپى یەكەم، ساڵى 1999، 156 لاپەڕە، دەزگاى چاپ و پەخشى سەردەم، سلێمانى. چاپى دووەم، ساڵى 2013، دەزگاى رۆشنبیریى جەمال عیرفان، 261 لاپەڕە.

3. خـوریـى زێـڕیـن “ئەفسانەكانى گەلانى قەوقاز”

وەرگێڕان لە ئینگلیزییەوە، ساڵى 2000 ، دەزگاى چاپ و پەخشى سەردەم، سلێمانى، 260 لاپەڕە.

4. هۆنراوە و چیروَكى فوَلكۆریى كوردەوارى “بەرگى یەكەم”

كۆكردنەوە و لێكۆڵینەوە، ساڵى 2000، وزارەتى رۆشنبیرى، بەڕێوەبەرێتیى گشتیى چاپ و بڵاوكردنەوە، سلێمانى، 442 لاپەڕە.

5. kurdish folktales، (چیرۆكى فۆلكلۆریى كوردی) كۆكردنەوە، وەرگێڕانى لە  كوردییەوە بۆ ئینگلیزى پرۆفیسۆر ویلەر تاكستۆن wheeler thackston لە زانستگەى هارڤارد، ساڵى 1999،  چاپى یەكەم، ئەمەریكا ـ نیویۆرك ـ دەزگاى كتێبخانەى كوردى،  118 لاپەڕە. چاپى دووەم، ساڵى 2006، وەزارەتى رۆشنبیرى ــ خانەى وەرگێڕان، سلێمانى، 139 لاپەڕە.

6. گۆڕینى ڕژێم ، كۆمەڵە وتارێكى سیاسییە لە سەر عێراق ، نووسینى كریستۆفەر هیچنس، وەرگێڕان لە ئینگلیزییەوە. ساڵى 2004، خانەى وەرگێڕان ــ سلیمانى، 192 لاپەڕە.

7. ڕێبەرى یارمەتیدانى كەمینەى نەتەوەیى بۆ بەشداریكردن لە پرۆسەى هەڵبژاردندا. ئامادە كرنى ئۆفیسى دەزگاكانى دیموكراتى و هەڵبژاردن، وەرگێڕانى لە ئینگلیزییەوە، چاپكردنى پەیمانگاى كوردى بۆ هەڵبژاردن، ساڵى 2004،  122 لاپەڕە.

8. قبور غیر هادئە: البحپ عن المفقودین فى كردستان العراق / تقریر منڤمە مراقبە حقوق الأنسان، الترجمە من الإنكلیزیە. الگبعە الأولى، دار الترجمە ـ السلیمانیە، 2004، 101 صفحە. الگبعە الپانیە، مۆسسە جمال عرفان الپقافیە، السلیمانیە، 2013، 124 صفحە.

9. دلیل لمساعدە الأقلیە القومیە للمساهمە فى العملیە الأنتخابیە. إعداد مكتب المۆسسات الدیقراگیە وحقوق الأنسان، الترجمە من الإنكلیزیە، من منشورات المعهد الكردى للإنتخابات، السلیمانیە، سنە 2004 ، 104 صفحە.

10. رۆمانى دۆنى ئارام، نووسینى: میخائیل شۆڵوَخۆڤ، وەرگێڕان لە عەرەبییەوە. خانەى وەرگێڕان ـ  ساڵى 2005، سلێمانى، 563 لاپەڕە.

11. ئەمەیە ئەمەریكا.. یادەوەریی كوردێك لە ئەمەریكادا، (یاداشت). دەزگاى خەندان بۆ پەخش و وەشاندن، ساڵى 2005، 147 لاپەڕە.

12. میر ئیڤان و گورگە بۆر، (كۆمەڵێك ئەفسانە و چیرۆكى میللیى گەلان)، وەرگێڕان لە ئینگلیزییەوە، دەزگاى چاپ و پەخشى سەردەم، ساڵى 2005،  164 لاپەڕە.

13. كارێكى ژەهراوى: ئەمەریكا و عێراق و گازبارانى هـەڵـەبـجـە، نووسینى یووست هیڵتەرمان، وەرگێڕان لە ئینگلیزییەوە، ساڵى 2008، كۆمپانیاى ئاوێنە بۆ چاپ و بڵاوكردنەوە، سلێمانى، 437 لاپەڕە.

14. كەركووك لە دوو راپۆرتى گرووپى قەیران نێودەوڵەتیدا، وەرگێڕان لە ئینگلیزی و عەرەبییەوە بە هاوكاریى لەگەڵ ئازا حەسیب قەرەداخى، دەزگاى توێژینەوە و بڵاوكردنەوەى موكریانى، ساڵى 2009، هەولێر، 208 لاپەڕە.

15. رێبازى سۆفیگەریى نەقشبەندیى ـ خالیدى، لە بڵاوكراوەكانى دیدارى جیهانیى مەولانا خالید، نووسینى كۆمەڵێك توێژەر، وەرگێڕان لە ئینگلیزییەوە، چاپكردنى دەزگاى چاپ و بڵاوكردنەوەى ئاراس، چاپى یەكەم، ساڵى 2009، هەولێر، 468 لاپەڕە. چاپى دووەم، ساڵى 2014، دەزگاى رۆشنبیریى جەمال عیرفان، سلێمانى، 466 لاپەڕە.

16. گەلە بەشخوراوەكانى ڕۆژهەڵاتى ناوەڕاست، كۆكردنەوە و ئامادەكردنى: دێڤید ئەندرۆس، وەرگێڕان لە ئینگلیزییەوە، لە بڵاوكراوەكانى مەڵبەندى كوردۆلۆجى، ساڵى 2009، سلێمانى، 164 لاپەڕە.

17.  ڤاسیلیساى نازدار ، (چیرۆكى میللیى رووسى)، وەرگێڕان لە ئینگلیزییەوە (بە هاوكاریى كانیى كچم و بە ناوى ئەویشەوەیە)، ساڵى 2006، وەزارەتى رۆشنبیری، خانەى وەرگێڕان، سلێمانى، 202 لاپەڕە.

18. شێخ مەحموود: سەرهەڵدان و شكستى سەربەخۆیى باشوورى كوردى پاش جەنگى جیهانیى یەكەم، نووسینى وەدیع جوەیدە، وەرگێڕان لە ئینگلیزییەوە، (55 لاپەڕەیە لە كتێبى یادنامەى شێخ مەحموودى حەفید، لە بۆنەى پەنجا ساڵەى كۆچى دوایى شێخدا)، بنكەى ژین، سلێمانى، ساڵى 2006.

19. لە گاسنەوە بۆ كۆمپیوتەر (گۆڕان، ڕەفتارى بەكۆمەڵ، بزووتنەوەى كۆمەڵایەتى)، وەرگێڕان لە ئینگلیزییەوە، دەزگاى چاپ و پەخشى سەردەم، سلێمانى، ساڵى 2010، كتێبى گیرفان، 116 لاپەڕە.

20. هژه هى أمریكا .. مژكرات وخواگر كوردى فى أمریكا، كتابە: محمد حمه صالح توفیق، ترجمە: رحیم حمید عبدالكریم بالتعاون مع المۆلف، من منشورات الجمعیە الپقافیە فى كركوك، 2013، 240 صفحە.

21. أوجه الشبه بین جینوساید الكورد والهنود الحمر والهولوكوست النازى (بحپ مقدّم الى مۆتمر الجینوساید المنعقد فى أربیل 26  ـ  28 كانون الپانى 2008)، من منشورات مۆسسە ماركریت، 2013، السلیمانیە، 96 صفحە.

22. الأنفال .. الكورد ودولە العراق، تألیف: شورش حاجى رسول، الترجمە من الكوردیە: محمد حمه صالح توفیق و حسن عبدالكریم و دلیر میرزا، دار الترجمە، 2005، السلیمانیە، 212 صفحە.

23. پشیلە سپییە بچكۆلە (چیرۆكى منداڵان)، نووسینى: مابوا (چینى)، وەرگێڕان لە ئینگلیزییەوە، خانەى سمۆرە بۆ رۆشنبیریى منداڵان، ساڵى 2009، سلێمانى، 24 لاپەڕە.

24. میشكا و چێشتى سمۆلینا (چیرۆكى منداڵان)، نووسینى: نیكۆڵاى نۆسۆڤ (رووسى)، وەرگێڕان لە ئینگلیزییەوە، خانەى سمۆرە بۆ رۆشنبیریى منداڵان، ساڵى 2010، سلێمانى، 32 لاپەڕە.

25. a brief study on: anfal as kurdish genocide. margaret publication center, sulaimaniya, 2014.

ئەم باسە لە ئۆكتۆبەرى 1913لە كۆرێكدا لە  شارى فرانكفۆرتى ئەڵمانیا و لە تەمووزى 2014 لە كۆنفرانسى لێكۆڵەرەوانى جینۆساید لە شارى وینیپیگى كەنەدا و لە مارتى 2015 دا لە بەشى ڕۆژهەڵاتى ناوەڕاستى زانكۆى یاگیلۆنیا لە شارى كراكۆڤى پۆڵەندا پێشكەش كراوە.

26.  كورد لە نامەكانى میس بێڵ دا، وەرگێڕان لە ئینگلیزییەوە، چاپكردن و بڵاوكردنەوەى دەزگاى رۆشنبیریى جەمال عیرفان، ساڵى 2016، سلێمانى، 340 لااپەڕە.